2 Axɔ́sú 2 - MAWUXÓWÉMA

Mawu sɔ́ Elíi yi jǐxwé

¹ Gilugalu wɛ Elíi kpó Elizée kpó gosín, bɔ Mawu Mavɔmavɔ sɔ́ Elíi yi jǐxwé ɖo axásáxásá jɔhɔn ɖé mɛ.

² Lě e nǔ lɛ́ɛ jɛ gbɔn ɔ́ ɖíe: Hwenu e yě ɖo ali jí bó ɖo yiyi wɛ ɔ́, Elíi ɖɔ nú Elizée ɖɔ: “Kɛnklɛ́n nɔ fí, ɖó káká Betɛ́li wɛ Mawu Mavɔmavɔ sɛ́ mì dó.” Elizée ka xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Betɛ́li.

³ Gbeyíɖɔ Mawu tɔn e ɖo Betɛ́li lɛ́ɛ yi Elizée gɔ́n, bó kanbyɔ́ ɛ ɖɔ: “A ka tunwun ɖɔ égbé ɔ́, Mawu Mavɔmavɔ ná sɔ́ gǎn towe yi jǐxwé a?” É yí gbe nú yě ɖɔ: “Ɛɛn, nyi lɔ tunwun, mi ka jó xó énɛ́ dó.”

⁴ Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Jeliko.” É ka xwlé Mawu n'i ɖɔ: “Mawu Mavɔmavɔ ɖo gbɛ, bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Jeliko.

⁵ Gbeyíɖɔ Mawu tɔn e ɖo Jeliko lɛ́ɛ sɛkpɔ́ Elizée, bo kanbyɔ́ ɛ ɖɔ: “A ka tunwun ɖɔ égbé ɔ́, Mawu Mavɔmavɔ ná sɔ́ gǎn towe yi jǐxwé a?” É yí gbe nú yě ɖɔ: “Ɛɛn nyi lɔ tunwun, mi ka jó xó énɛ́ dó.”

⁶ Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Judɛ́ɛn tɔ tó.” É ká xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Bɔ yě zɔn kpɔ́ ɖidó.

⁷ Elíi kpó Elizée kpó nɔ te ɖo Judɛ́ɛn tɔ ɔ́ tó, bɔ gbeyíɖɔ Mawu tɔn lɛ́ɛ kanɖé wǒ (50) wá, bó nɔ te zɔ zaan dó yě.

⁸ Énɛ́ ɔ́, Elíi ɖe awu tɔn ɖaxó ɔ́, bó sló, bó zin dó tɔ ɔ́ nukún mɛ, bɔ tɔ ɔ́ má, bɔ yě mɛ we lɛ́ɛ zun zɔnlin gbɔn ayǐkúngban xúxú jí dín.

⁹ Ée yě dín ɔ́, Elíi ɖɔ nú Elizée ɖɔ: “Byɔ̌ nǔ e jló we ɔ́ mì nú má ná we, có nú Mawu ná sɔ́ mì sín gɔ̌n towe.” Elizée ɖɔ n'i ɖɔ: “Kɛnklɛ́n ná yɛ e a nǎ vǐ ɖě lɛ́ɛ ɔ́ donu we mì .”

¹⁰ Elíi ɖɔ n'i ɖɔ: “Nǔ e byɔ́ wɛ a ɖe ɔ́ vɛ́ wǔ, lo ɔ́, ényí a mɔ mì hwenu e Mawu ná ɖo sísɔ́ mì sín gɔ̌n towe wɛ ɔ́, a nǎ mɔ nǔ e byɔ́ wɛ a ɖe ɔ́ yí. Nú a ma ka mɔ mì ǎ ɔ́, a nǎ mɔ yí ǎ.”

¹¹ Ée yě ɖo yiyi wɛ bo ɖo xó ɖɔ wɛ ɔ́, yě mɔ sɔ́ ɖé lɛ́ɛ dɔn ahwankɛkɛ́ví myɔnɔ ɖé bó gbo yě, bɔ Elíi byɔ́ axásáxásá jɔhɔn ɖé mɛ ɖidó jǐxwé.

¹² Ée Elizée mɔ mɔ̌ ɔ́, é sú xó bó ɖɔ: “Daá! Daá! Ali e nu a ɖe nú Izlayɛ́li ɔ́ syɛ́n hú ahwankɛkɛ́ví Izlayɛ́li tɔn lɛ́ɛ bǐ kpó sɔ́ Izlayɛ́li tɔn lɛ́ɛ bǐ kpó.” Ée é ma sɔ́ mɔ ɛ ǎ ɔ́, é hɛn awu e ɖo kɔ tɔn lɛ́ɛ vún ɖó we we.

¹³ Énɛ́ ɔ́ gúdo ɔ́, é sɔ́ awu ɖaxó e Elíi jó dó , bɔ é jɛ ayǐ é, bó lɛ́ kɔ wá nɔ te Judɛ́ɛn tɔ ɔ́ tó.

¹⁴ É sɔ́ awu ɔ́, bó zin dó tɔ ɔ́ nukún mɛ bó sú xó ɖɔ: “Fítɛ́ Mawu Mavɔmavɔ, Mawu Elíi tɔn ɔ́ ɖe?” Ée Elizée lɔmɔ̌ zin nǔ dó tɔ ɔ́ nukún mɛ Elíi ɖɔhun ɔ́, tɔ ɔ́ má ɖó we, bɔ é dín gbɔn mɛ.

¹⁵ Gbeyíɖɔ Mawu tɔn gbɛ́ta e gosín Jeliko ɔ́ ɖo zɔ bo mɔ nǔ e Elizée bló ɔ́, bó ɖɔ: “Yɛ Elíi tɔn ɖo Elizée jí.” Ée yě ɖɔ mɔ̌ ɔ́, yě yi kpé e, bó ɖe kɔ́ n'i.

¹⁶ Yě ɖɔ n'i ɖɔ: “Súnnu glegbenu kanɖé wǒ (50) ɖo fí xá mǐ mɛsɛntɔ́ towe lɛ́ɛ. A jlǒ nú yě ná ba gǎn towe a? Bóyá yɛ Mawu Mavɔmavɔ tɔn ná kó sɔ́ ɛ nyi só ɖé jí, abǐ tɔdo ɖé mɛ din.” É ka yí gbe nú yě ɖɔ: “Mi ma sɛ́ yě dó ó.”

¹⁷ Lo ɔ́, yě ɖo hǔn mɛ n'i káká bɔ é gbɔ bó ɖɔ: “Mi bo sɛ́ yě dó.” Bɔ yě sɛ́ súnnu kanɖé wǒ (50) lɛ́ɛ dó bɔ yě yi Elíi ba gbé, bo ba ɛ káká nú azǎn atɔn, yě ká mɔ ɛ ǎ.

¹⁸ Ée yě lɛ́ kɔ wá ɔ́, Elizée kpo ɖo Jeliko, bó ɖɔ nú yě ɖɔ: “Un ma ko ɖɔ nú mi ɖɔ mi ní má yi ó a?”

Elizée zé Jeliko tɔjɔtɛnsin ɔ́ dó húzú sin ɖagbe

¹⁹ Jelikonu lɛ́ɛ ɖɔ nú Elizée ɖɔ: “Gǎn, a mɔ din a? Fí e toxo mǐtɔn ɖe ɔ́ nyɔ́, amɔ̌ sin e ɖo to ɔ́ mɛ ɔ́ nyɔ́ ǎ, bɔ ayǐkúngban ɔ́ nɔ́ nyɔ́ nǔ ǎ.”

²⁰ Ée yě ɖɔ mɔ̌ ɔ́, Elizée ɖɔ nú yě ɖɔ: “Mi wún jɛ dó gannú yɔ̌yɔ́ ɖokpó mɛ wá nú mì.” Bɔ yě yi wún jɛ ɔ́ wá n'i,

²¹ bɔ é yi tɔjɔtɛn ɔ́ kɔn, bó wún jɛ ɔ́ kɔn nyi mɛ bo ɖɔ: “Mawu Mavɔmavɔ ɖɔ: ‘Un sɔ́ sin élɔ́ dó húzú sin ɖagbe. É sɔ́ ná hu mɛ ǎ, é ká sɔ́ ná hɛn ayǐkúngban ɔ́ gblé ǎ.’ ”

²² Nǔgbó ɔ́, sin ɔ́ húzú sin ɖagbe, bó kpo ɖo mɔ̌ káká jɛ égbé lě e Elizée ɖɔ gbɔn é.

Mawu dɔn tó nú yɔkpɔ́vú e ɖo Elizée ko wɛ lɛ́ɛ

²³ Elizée gosín Jeliko, bó ɖidó Betɛ́li. Hwenu e é ɖo yiyi wɛ ɔ́, yɔkpɔ́vú ɖé lɛ́ɛ tɔ́n sín toxo ɔ́ mɛ, bó jɛ kiko e jí. Yě nɔ́ ɖɔ n'i ɖɔ: “Yi, ta xwíxwá! Yi, ta xwíxwá!”

²⁴ Bɔ Elizée lɛ́ kɔ kpɔ́n yě, bó dó nu yě ɖo Mawu Mavɔmavɔ nyíkɔ mɛ, bɔ lɔnmɔ we tɔ́n sín nǔkan mɛ, bó vúnvún mɛ kanɖé-nukún-we (42) ɖo yě mɛ.

²⁵ Énɛ́ ɔ́ gúdo ɔ́, Elizée gosín fínɛ́, bó yi Kaamɛ́li só jí, bó gosín fínɛ́ bo lɛ́ kɔ wá Samalíi.