2 Axɔ́sú 15 - MAWUXÓWÉMA

Oziyási Judáa xɔ́sú

¹ Hwenu e axɔ́sú Izlayɛ́li tɔn Jelobowámu ɖo xwe koatɔ́n-nukún-we (27) bló wɛ ɖo zinkpo jí ɔ́, Oziyási Amasiyasi ví ɔ́ yi axɔ́súzinkpo Judáa tɔn jí.

² Xwe afɔtɔn-nukún-ɖokpó wɛ é ɖó bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú káká nú xwe kanɖé wěwe (52). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yekolia.

³ É nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Amasiyasi wa nǔ gbɔn ɔ́ wɛ é bló gbɔn pɛ́pɛ́pɛ́.

⁴ Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ, bó ɖo zǎlínkpɔ́n dó zo wɛ gbɔn fí énɛ́ lɛ́ɛ.

⁵ Mawu Mavɔmavɔ sɛ́ azɔn baɖabaɖa ɖé dó Oziyási: é bɛ́ gudu bɔ gudu ɔ́ nɔ wǔtu tɔn mɔ̌ káká jɛ gbe e gbe é kú é. Hwenu e é ɖo azɔn ɔ́ jɛ wɛ ɔ́, è sɔ́ ɛ yi ɖó xwé ɖé gbe ɖo zɔ nú mɛ bǐ, bó sɔ́ vǐ tɔn Yotámu e kpa acɛ ɖo hɔnmɛ ɔ́ ɖó axɔ́súɖuto ɔ́ bǐ nu.

⁶ È wlǎn axɔ́sú Oziyási sín tan e kpo lɛ́ɛ kpó nǔ e é wa lɛ́ɛ kpó dó “Judáa xɔ́sú lɛ́ɛ sín Tan wéma” mɛ.

⁷ Oziyási zán wá kú, bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Yotámu ɖu axɔ́sú ɖó tɛn tɔn mɛ.

Zakalíi Izlayɛ́li xɔ́sú

⁸ Hwenu e axɔ́sú Judáa tɔn Oziyási ɖo xwe gbantɔ́n-nukún-atɔn (38) bló wɛ ɖo axɔ́súzinkpo jí ɔ́, Zakalíi Jelobowámu ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú sun ayizɛ́n.

⁹ É wa nǔ e ma nyɔ́ Mawu Mavɔmavɔ nukún mɛ ǎ é tɔ́gbó tɔn lɛ́ɛ ɖɔhun. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ.

¹⁰ Calúmu Yavɛ́ci ví ɔ́ blá Zakalíi gbé bó hu i ɖo agbawungba, bó jɛ tɛn tɔn mɛ.

¹¹ È wlǎn axɔ́sú Zakalíi sín tan e kpo lɛ́ɛ dó “Izlayɛ́li xɔ́sú lɛ́ɛ sín Tan wéma” mɛ.

¹² Lě e nǔ e Mawu Mavɔmavɔ ɖɔ nú Jehu ɔ́ jɛ gbɔn é nɛ́. Mawu Mavɔmavɔ ɖɔ n'i ɖɔ: “Vǐ towe, vǐvú towe, vitikli towe kpó kpaba towe kpó ná yi axɔ́súzinkpo Izlayɛ́li tɔn jí.”

Calúmu Izlayɛ́li xɔ́sú

¹³ Hwenu e axɔ́sú Judáa tɔn Oziyási ɖo xwe gbantɔ́n-nukún-ɛnɛ (39) bló wɛ ɖo zinkpo jí ɔ́, Calúmu Yavɛ́ci ví ɔ́ yi axɔ́súzinkpo Izlayɛ́li tɔn jí ɖo Samalíi bó ɖu axɔ́sú nú sun ɖokpó.

¹⁴ Mɛnahɛmu Gadíi ví ɔ́ gosín Tíisa, bó wá Samalíi, lobo hu Calúmu, bó jɛ tɛn tɔn mɛ.

¹⁵ È wlǎn axɔ́sú Calúmu sín tan e kpo lɛ́ɛ, kpódó Zakalíi gbé e é blá ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ.

¹⁶ Énɛ́ ɔ́ gúdo wɛ Mɛnahɛmu tɔ́n ahwan Tifusáxi toxo ɔ́, bó hu mɛ e ɖo toxo ɔ́ mɛ lɛ́ɛ, lobo vɔ mɛ e ɖo Tíisa gbé jí lɛ́ɛ káká yi Tifusáxi. É tɔ́n ahwan toxo ɔ́ ɖó è hun toxo ɔ́ sín hɔntogbó lɛ́ɛ n'i ǎ. É zɛ xoxónɔ e ɖo toxo ɔ́ mɛ lɛ́ɛ bǐ sín adɔgo.

Mɛnahɛmu Izlayɛ́li xɔ́sú

¹⁷ Hwenu e axɔ́sú Oziyási ɖo xwe gbantɔ́n-nukún-ɛnɛ (39) bló wɛ ɖo axɔ́súzinkpo Judáa tɔn jí ɔ́, Mɛnahɛmu Gadíi ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú xwe wǒ.

¹⁸ É wa nǔ e ma nyɔ́ Mawu Mavɔmavɔ nukún mɛ ǎ é káká yi kú. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ.

¹⁹ Axɔ́sú Asilíi tɔn Púlu wá to ɔ́ mɛ, bɔ Mɛnahɛmu ná ɛ kpatágan tɔ́nu gban, bónú é ná dó alɔ ɛ, bónú acɛkpikpa tɔn ná jínjɔ́n ayǐ.

²⁰ Dɔkunnɔ e ɖo Izlayɛ́li lɛ́ɛ sí wɛ Mɛnahɛmu yí kpatágan énɛ́ lɛ́ɛ ɖe, bó bɛ́ nú Asilíi xɔ́sú ɔ́. Kpatágan kanɖé wǒ (50) wɛ dɔkunnɔ ɖokpó ɖokpó ná. Ée è zě kpatágan ɔ́ nú Asilíi xɔ́sú é ɔ́, é lɛ́ kɔ yi to tɔn mɛ, é sɔ́ nɔ te Izlayɛ́li ǎ.

²¹ È wlǎn axɔ́sú Mɛnahɛmu sín tan e kpo lɛ́ɛ kpó nǔ e é wa lɛ́ɛ kpó dó “Izlayɛ́li xɔ́sú lɛ́ɛ sín Tan wéma” mɛ.

²² Mɛnahɛmu zán wá kú, bɔ vǐ tɔn Pekaxíya ɖu axɔ́sú ɖó tɛn tɔn mɛ.

Pekaxíya Izlayɛ́li xɔ́sú

²³ Hwenu e Oziyási ɖo axɔ́sú ɖu wɛ ɖo Judáa ɔ́, xwe tɔn kanɖé wǒgɔ́ (50) ɔ́ mɛ ɔ́, Pekaxíya, Mɛnahɛmu ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú xwe we.

²⁴ É wa nǔ e ma nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ.

²⁵ Pekáxi Hlemaliyahu ví ahwangán Pekaxíya tɔn ɔ́ blá gbě tɔn, bó tɔ́n ahwan ɛ ɖo Samalíi ɖo xɔ ɖokpó mɛ, ɖo hɔnmɛ, bó hu i; é hu Aagɔ́vu kpó Aliyé kpó lɔmɔ̌. Galadinu kanɖé wǒ (50) wɛ é kplá dó éɖée jí bó yi fun ahwan ɔ́. Mɔ̌ wɛ é hu Pekaxíya gbɔn, bó ɖu axɔ́sú ɖó tɛn tɔn mɛ.

²⁶ È wlǎn axɔ́sú Pekaxíya sín tan e kpo lɛ́ɛ kpó nǔ e é wa lɛ́ɛ bǐ kpó dó “Izlayɛ́li xɔ́sú lɛ́ɛ sín Tan wéma” mɛ.

Pekáxi Izlayɛ́li xɔ́sú

²⁷ Hwenu e Oziyási ɖo xwe kanɖé wěwe (52) bló wɛ ɖo axɔ́súzinkpo Judáa tɔn jí ɔ́, Pekáxi Hlemaliyahu ví ɔ́ yi axɔ́súzinkpo Izlayɛ́li tɔn jí ɖo Samalíi bo ɖu axɔ́sú nú xwe ko.

²⁸ É nɔ́ wa nǔ e má nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu hu bo dɔn Izlayɛ́li to ɔ́ d'é mɛ lɛ́ɛ hu ǎ.

²⁹ Hwenu e Pekáxi ɖo axɔ́sú ɖu wɛ ɖo Izlayɛ́li ɔ́, Asilíi xɔ́sú Tiglati-Pilesɛ́ɛ wá tɔ́n ahwan ɛ, bó yí toxo gěgé: é yí Iyɔ́ni, Avɛ́li-Bɛti-Maaka, Yanɔwáxi, Kedɛ́ci kpó Hasɔ́ɔ kpó, bó yí Galadi yíkúngban ɔ́ kpó Galilée yíkúngban ɔ́ kpó bó yí Nɛfutali to ɔ́ bǐ. É bɛ́ mɛ e gbɔn fí énɛ́ lɛ́ɛ bǐ yi Asilíi.

³⁰ Ozée Ela ví ɔ́ blá Pekáxi sín gbě bo hu i, bó ɖu axɔ́sú ɖó tɛn tɔn mɛ. Yotámu Oziyási ví ɔ́ ɖo xwe ko bló wɛ ɖo axɔ́súzinkpo Judáa tɔn jí hwenɛ́nu.

³¹ È wlǎn axɔ́sú Pekáxi sín tan e kpo lɛ́ɛ kpó nǔ e é wa lɛ́ɛ bǐ kpó dó “Izlayɛ́li xɔ́sú lɛ́ɛ sín Tan wéma” mɛ.

Yotámu, Judáa xɔ́sú

³² Hwenu e axɔ́sú Izlayɛ́li tɔn Pekáxi, Hlemaliyahu ví ɔ́ ɖo xwe we bló wɛ ɖo zinkpo jí ɔ́, Yotámu, Oziyási ví ɔ́ yi axɔ́súzinkpo Judáa tɔn jí.

³³ Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, lobo ɖu axɔ́sú nú xwe afɔtɔn-nukún-ɖokpó. È nɔ ylɔ́ nɔ tɔn ɖɔ Yeluca; Sadɔ́ku ví wɛ.

³⁴ É nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Oziyási wa nǔ gbɔn ɔ́ wɛ é bló gbɔn pɛ́pɛ́pɛ́.

³⁵ Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ, bó ɖo zǎlínkpɔ́n dó zo wɛ gbɔn fí énɛ́ lɛ́ɛ. Yotámu wɛ bló hɔntogbó aga tɔn e ɖo Mawu Mavɔmavɔ xwé ɔ́ nu é.

³⁶ È wlǎn axɔ́sú Yotámu sín tan e kpo lɛ́ɛ kpó nǔ e é wa lɛ́ɛ bǐ kpó dó “Judáa xɔ́sú lɛ́ɛ sín Tan wéma” mɛ.

³⁷ Hwenu e Yotámu ɖo axɔ́súzinkpo jí ɔ́ wɛ Mawu Mavɔmavɔ jɛ axɔ́sú Asilíi tɔn Hlesini kpódó axɔ́sú Izlayɛ́li tɔn Pekáxi kpó sɛ́ dó Judáa to ɔ́ mɛ jí, bɔ yě nɔ́ yi fun ahwan xá Judáa to ɔ́.

³⁸ Yotámu zán wá kú bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo tɔ́gbó tɔn Davídi Toxo mɛ, bɔ vǐ tɔn Akázi ɖu axɔ́sú ɖó tɛn tɔn mɛ.