2 Axɔ́sú 13 - MAWUXÓWÉMA

¹ Hwenu e axɔ́sú Judáa tɔn Joasi Akaziasi ví ɔ́ ɖo xwe ko-nukún-atɔn bló wɛ ɖo zinkpo jí ɔ́, Yoakázi Jehu ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe afɔtɔn-nukún-we.

² É wa nǔ e má nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu Nɛvati ví ɔ́ hu bó dɔn Izlayɛ́li to ɔ́ d'é mɛ lɛ́ɛ hu ǎ.

³ Énɛ́ ɔ́, Mawu Mavɔmavɔ sin xomɛ dó Izlayɛ́linu lɛ́ɛ, bó jó yě nú Hazayɛ́li Silíi xɔ́sú ɔ́ kpódó vǐ tɔn Bɛni-Hadadi kpó, bɔ yě ɖu ɖo Izlayɛ́linu lɛ́ɛ jí xɔ xwe mɔ̌kpán.

⁴ Lo ɔ́, Yoakázi sa vo nú Mawu Mavɔmavɔ ɖɔ é ní fá xomɛ. Bɔ Mawu Mavɔmavɔ yí gbe nú ɖɛ tɔn, ɖó é mɔ lě e Silíi xɔ́sú ɔ́ ɖo Izlayɛ́linu lɛ́ɛ sín nǔ wa gbɔn wɛ é.

⁵ Énɛ́ ɔ́, Mawu Mavɔmavɔ sɛ́ gbɛxɔnúmɛtɔ́ ɖokpó dó Izlayɛ́linu lɛ́ɛ, bɔ é wá ɖe yě sín Silíinu lɛ́ɛ sín acɛ mɛ, bɔ ayi yětɔn jɛ ayǐ lě e yě kó ɖe gbɔn ɖ'ayǐ é.

⁶ Amɔ̌, yě lɛ́ kɔ sín hwɛ e mɛ Jelobowámu kpó mɛ tɔn lɛ́ɛ kpó dɔn Izlayɛ́li to ɔ́ dó lɛ́ɛ é gúdo ǎ. Yě lɔ kpo ɖo ali énɛ́ ɔ́ jí káká bɔ vodún Acela kpo ɖo te ɖo Samalíi toxo ɔ́ mɛ.

⁷ Mawu jó nǔɖé dó nú Yoakázi zɛ sɔ́xátɔ́ kanɖé wǒ (50), kɛkɛ́ví wǒ, kpódó ahwanfuntɔ́ e nɔ zɔn afɔ é děgba we afɔwó (10.000) kpó wú ǎ. Đó Silíi xɔ́sú ɔ́ hu mɛ ɖě lɛ́ɛ, bó gbídí yě ɖó afɔ wú kɔ́gúdu ɖɔhun.

⁸ È wlǎn axɔ́sú Yoakázi sín tan e kpo lɛ́ɛ, nǔ e é wa lɛ́ɛ, kpó akɔ́nkpinkpan e é ɖó ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ.

⁹ Yoakázi zán wá kú bɔ è sɔ́ ɛ yi ɖó Samalíi, bɔ vǐ tɔn Yexoázi ɖu axɔ́sú ɖó tɛn mɛ.

Yexoázi Izlayɛ́li xɔ́sú

¹⁰ Hwenu e axɔ́sú Judáa tɔn Joasi Akaziasi ví ɔ́ ɖo xwe gbantɔ́n-nukún-we (37) bló wɛ ɖo zinkpo jí ɔ́, Yexoázi Yoakázi ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe afɔtɔn-nukún-ɖokpó.

¹¹ É wa nǔ e má nyɔ́ Mawu Mavɔmavɔ nukún mɛ ǎ é: é gɔn hwɛ e Jelobowámu Nɛvati ví ɔ́ hu bo dɔn Izlayɛ́li to ɔ́ d'é mɛ lɛ́ɛ hu ǎ.

¹² È wlǎn axɔ́sú Yexoázi sín tan e kpo lɛ́ɛ: nǔ e é wa lɛ́ɛ, akɔ́nkpinkpan e é ɖó, bó fun ahwan xá axɔ́sú Judáa tɔn Amasiyasi é kpó dó “Izlayɛ́li xɔ́sú lɛ́ɛ sín Tan wéma” mɛ.

¹³ Yexoázi zán wá kú bɔ è sɔ́ ɛ yi ɖó Samalíi ɖo axɔ́sú Izlayɛ́li tɔn lɛ́ɛ sín yɔdo mɛ, bɔ vǐ tɔn Jelobowámu ɖu axɔ́sú ɖó tɛn tɔn mɛ.

Elizée ɖɔ nǔ e ná jɛ dó Silíinu lɛ́ɛ jí é

¹⁴ Hwenu e axɔ́sú Izlayɛ́li tɔn Yexoázi kpo ɖo gbɛ ɔ́, Elizée ɖo azɔn e ná kplá ɛ yi kú ɔ́ jɛ wɛ, bɔ axɔ́sú ɔ́ yi gɔ̌n tɔn, bó nya dó akɔ́n tɔn nu, bó wlí avǐ bó ɖɔ: “Daá! Daá! Ali e nu a ɖe nú Izlayɛ́li ɔ́ syɛ́n hú ahwankɛkɛ́ví Izlayɛ́li tɔn lɛ́ɛ bǐ kpó sɔ́ tɔn lɛ́ɛ bǐ kpó.”

¹⁵ Elizée ɖɔ n'i ɖɔ: “Zě da ɖokpó, bó fɔ gǎ d'é jí.” Énɛ́ ɔ́, Yexoázi ɖɔ bɔ è zě da ɖokpó, bó fɔ gǎ d'é jí wá n'i.

¹⁶ Bɔ Elizée ɖɔ n'i ɖɔ: “Tlɔ́ gǎ ɔ́.” Ée axɔ́sú ɔ́ tlɔ́ gǎ ɔ́, Elizée bɛ́ alɔ ɖó alɔ tɔn lɛ́ɛ jí bó ɖɔ:

¹⁷ “Bo hun flɛtɛ́li e ɖo zǎnzǎnhwe jí ɔ́.” É hun flɛtɛ́li ɔ́, bɔ Elizée ɖɔ n'i ɖɔ: “Da!” Ée Yexoázi da gǎ ɔ́, Elizée ɖɔ n'i ɖɔ: “Gǎ énɛ́ ɔ́ xlɛ́ ɖɔ Mawu Mavɔmavɔ ná ná ɖuɖéjí mǐ ɖo Silíinu lɛ́ɛ jí.” A nǎ ɖu ɖo Silíinu lɛ́ɛ jí, ɖo Afɛ́ki bó ná vívá kún yětɔn.

¹⁸ Elizée lɛ́ ɖɔ nú axɔ́sú ɔ́ ɖɔ: “Fɔ gǎ e kpo lɛ́ɛ.” Ée é ɖɔ mɔ̌ ɔ́, axɔ́sú ɔ́ fɔ gǎ lɛ́ɛ, bɔ Elizée ɖɔ n'i ɖɔ: “Zin dó kɔ́ mɛ.” Bɔ é zin dó kɔ́ mɛ azɔn atɔn bo nɔ te.

¹⁹ Gbeyíɖɔ Mawu tɔn ɔ́ sin xomɛ dó e, bó ɖɔ n'i ɖɔ: “Ényí ganjí wɛ ɔ́, azɔn atɔ́ɔ́n abǐ ayizɛ́n wɛ a nǎ kó zin dó kɔ́ mɛ. Ényí mɔ̌ wɛ a ko bló ɔ́, a nǎ ɖu ɖo Silíinu lɛ́ɛ jí bó vívá kún yětɔn. Amɔ̌, din ɔ́, azɔn atɔn jɛ́n a nǎ ɖu ɖo yě jí.”

²⁰ Énɛ́ ɔ́ gúdo ɔ́, Elizée kú bɔ è ɖi i. Hwenɛ́nu ɔ́, Mɔwabunu ajotɔ́ ɖé lɛ́ɛ nɔ́ dó ahwan gbě, bó nɔ́ byɔ́ Izlayɛ́li to ɔ́ mɛ xwewú xwewú tɛgbɛ.

²¹ Mɛ ɖé lɛ́ɛ ka xwe cyɔ ɖi gbé gbe ɖokpó, bó xo go Mɔwabunu lɛ́ɛ sín gbɛ̌ta ɖokpó. Yě zé cyɔ e yě hɛn ɔ́ nyi dó yɔdo e mɛ è ɖi Elizée dó ɔ́ lobo hɔn. Ée cyɔ ɔ́ jɛ Elizée sín xú wú é ɔ́, cyɔ ɔ́ fɔ́n lobo sí te.

Axɔ́sú Yexoázi ɖu ɖo Silíinu lɛ́ɛ jí

²² Axɔ́sú Silíi tɔn Hazayɛ́li dó ya nú Izlayɛ́linu lɛ́ɛ ɖésú hwenu e Yoakázi ɖo axɔ́súzinkpo jí é.

²³ Lo ɔ́, nǔ yětɔn wá jɛ wǔ blá nú Mawu Mavɔmavɔ jí, bɔ é sɔ́ hwɛ yětɔn lɛ́ɛ kɛ yě ɖó akɔ e é kó jɛ xá Ablaxámu, bó jɛ xá Izáki, bo jɛ xá Jakɔ́bu ɔ́ wú. É gbɛ́ ɖɔ émí kún ná sú kún yětɔn dó ó. Bɔ káká jɛ égbé din ɔ́, é nya yě dó gbě ǎ.

²⁴ Hazayɛ́li Silíi xɔ́sú ɔ́ zán wá kú, bɔ vǐ tɔn Bɛni-Hadadi ɖu axɔ́sú ɖó tɛn tɔn mɛ.

²⁵ Ée Hazayɛ́li zán kú tlóló ɔ́, Yexoázi, Yoakázi ví ɔ́ yí toxo e Hazayɛ́li yí sín tɔ́ tɔn sí lɛ́ɛ. Azɔn atɔn wɛ Yexoázi ɖu ɖo Bɛni-Hadadi jí bó yí toxo lɛ́ɛ.