2 Axɔ́sú 12 - MAWUXÓWÉMA

Joasi Judáa xɔ́sú

¹ Xwe tɛ́nwe ɖó wɛ Joasi ɖe bó nyí axɔ́sú.

² Hwenu e Jehu ɖo xwe tɛ́nwe bló ɖo axɔ́súzinkpo jí wɛ ɔ́, Joasi húzú axɔ́sú, bó kpa acɛ ɖo Jeluzalɛ́mu káká nú xwe kanɖé (40). Nɔ tɔn ɔ́, Bɛ̌-Cevanu wɛ, bɔ è nɔ ylɔ́ ɛ ɖɔ Sivía.

³ Joasi nɔ wa nǔ e nyɔ́ Mawu Mavɔmavɔ nukún mɛ ɔ́ hwebǐnu, ɖó vɔ̌sánú-xwlémawutɔ́ Yexoyada kplɔ́n ɛ ganjí.

⁴ Amɔ̌, vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌sánú kpó zǎlínkpɔ́n kpó xwlé vodún wɛ gbɔn fí énɛ́ lɛ́ɛ.

Joasi bló Mawu xwé ɔ́ ɖó

⁵ Joasi ɖɔ nú vɔ̌sánú-xwlémawutɔ́ lɛ́ɛ gbe ɖokpó ɖɔ: “Mi ná zé akwɛ́ e è wǎ ná ɖo Mawu Mavɔmavɔ xwé gbe lɛ́ɛ dó wa Mawu Mavɔmavɔ xwé ɔ́ sín azɔ̌ ná. É sixú nyí akwɛ́ e è nǎ dó xɔ gbɛ nú mɛ é, é sixú nyí akwɛ́ e mɛ ɖésúnɔ jló bó ná é.

⁶ Mi mɛ ɖokpó ɖokpó ná yí akwɛ́ énɛ́ lɛ́ɛ ɖo mɛ mitɔn e nɔ yí akwɛ́ ɖo Mawu Mavɔmavɔ xwé lɛ́ɛ sí, bó ná zé dó bló Mawu Mavɔmavɔ xwé ɔ́ ɖó ná, ɖo fí e é gblé ɖe lɛ́ɛ.”

⁷ Lo ɔ́, káká wá jɛ hwenu e Joasi ɖo xwe ko-nukún-atɔngɔ́ bló wɛ ɖo zinkpo jí é ɔ́, vɔ̌sánú-xwlémawutɔ́ lɛ́ɛ kó bló nǔ ɖěbǔ ɖó ɖo Mawu Mavɔmavɔ xwé ɔ́ wú ǎ.

⁸ Din ɔ́, axɔ́sú Joasi ylɔ́ vɔ̌sánú-xwlémawutɔ́ Yexoyada kpódó vɔ̌sánú-xwlémawutɔ́ ɖě lɛ́ɛ bǐ kpó kplé, bó kanbyɔ́ yě ɖɔ: “Étɛ́wú mi ma ka bló Mawu Mavɔmavɔ xwé ɔ́ ɖó ǎ? Bɛ́ sín égbé ɔ́, mi sɔ́ ná cyán akwɛ́ ɖě ɖo mɛ mitɔn e nɔ yí akwɛ́ lɛ́ɛ sí ǎ, lo ɔ́, mi ná jó akwɛ́ lɛ́ɛ dó bɔ è nǎ dó bló Mawu Mavɔmavɔ xwé ɔ́ ɖó.”

⁹ Vɔ̌sánú-xwlémawutɔ́ lɛ́ɛ bǐ yí gbe ɖɔ émí kún sɔ́ ná yí akwɛ́ ɖo togun ɔ́ sí ó, émí kún ka sɔ́ ná bló Mawu Mavɔmavɔ xwé ɔ́ ɖó ó.

¹⁰ Énɛ́ ɔ́, vɔ̌sánú-xwlémawutɔ́ Yexoyada zé gbǎ ɖokpó bó tɔ́n ali ɖokpó ɖó nusú tɔn mɛ, lobo zé ɖó vɔ̌sákpe ɔ́ kpá ɖo aɖisíxwé, fí e è nɔ gbɔn byɔ́ Mawu Mavɔmavɔ xwé gbe é. È ɖe vɔ̌sánú-xwlémawutɔ́ e nɔ́ nɔ ali nu lɛ́ɛ bɔ yě ná nɔ́ bɛ́ akwɛ́ e togun ɔ́ hɛn wá Mawu Mavɔmavɔ xwé ɔ́ gbe é bǐ dó gbǎ ɔ́ mɛ.

¹¹ Ée yě mɔ ɖɔ akwɛ́ sukpɔ́ ɖo gbǎ ɔ́ mɛ é ɔ́, wěgbójínɔtɔ́ axɔ́sú ɔ́ tɔn kpódó vɔ̌sánú-xwlémawutɔ́ ɖaxó ɔ́ kpó yi bɛ́ akwɛ́ e ɖo gbǎ ɔ́ mɛ é, lobo xa.

¹² Ée yě xa akwɛ́ ɔ́, yě bɛ̌ jó nú mɛ e ná kpé nukún dó Mawu Mavɔmavɔ xwé ɔ́ sín azɔ̌ wú lɛ́ɛ. Énɛ́ ɔ́, yě sɔ́ akwɛ́ ɔ́ bó sú axɔ́ xɔgbátɔ́ lɛ́ɛ kpó mɛ e nɔ wa azɔ̌ ɖo Mawu Mavɔmavɔ xwé gbe lɛ́ɛ kpó,

¹³ kpó xɔmɛtɔ́ lɛ́ɛ kpó, kpó awǐnnyakpatɔ́ lɛ́ɛ kpó. Yě xɔ atín kpó awǐnnya kpikpa kpó ɖo akwɛ́ ɔ́ mɛ dó wa azɔ̌ ná ɖo Mawu Mavɔmavɔ xwé ɔ́ wú. Yě xɔ nǔ tɛnmɛ tɛnmɛ ɖo akwɛ́ ɔ́ mɛ dó bló nǔ e gblé ɖo Mawu Mavɔmavɔ xwé ɔ́ wú lɛ́ɛ ɖó.

¹⁴ È glǎ zé akwɛ́ e è hɛn wá Mawu Mavɔmavɔ xwé ɔ́ ɖě dó bló kpatágan sín basya ná ǎ, è ka zé dó bló nǔ e è nɔ dó bló myɔ ɖó ná lɛ́ɛ kpó gannú kpó ná ǎ, è ka zé dó bló kpɛn ná ǎ, è ka zé dó bló sikánú ɖé abǐ kpatágannú ɖé ná ǎ.

¹⁵ Mɛ e ná kpé nukún dó Mawu Mavɔmavɔ xwé ɔ́ sín azɔ̌ wú lɛ́ɛ wɛ è bɛ̌ akwɛ́ ɔ́ jó ná, bɔ yě sɔ́ dó bló Mawu Mavɔmavɔ xwé ɔ́ ɖó.

¹⁶ Yě mɛ énɛ́ lɛ́ɛ e lɔ mɛ è zě akwɛ́ ɔ́ dó lɛ́ɛ ɔ́, è ba do nú lě e yě ɖo axɔ́ sú azɔ̌watɔ́ lɛ́ɛ gbɔn wɛ é ǎ, ɖó yě nɔ́ hízí nǔ ǎ.

¹⁷ Akwɛ́ e mɛ e hu hwɛ lɛ́ɛ wá ná nú hwɛxɔ́súsúvɔ́ kpó hwɛsɔ́kɛmɛvɔ́ kpó ɔ́, è bɛ̌ ɖěbǔ dó gbǎ ɔ́ mɛ ǎ. Vɔ̌sánú-xwlémawutɔ́ lɛ́ɛ tɔn wɛ akwɛ́ énɛ́ ɔ́ nyí.

Joasi sín axɔ́súɖuɖu fó

¹⁸ Hwenɛ́nu ɔ́, axɔ́sú Silíi tɔn Hazayɛ́li wá tɔ́n ahwan Gati toxo ɔ́ bó yí, lobo lɛ́ jló ná tɔ́n ahwan Jeluzalɛ́mu toxo ɔ́.

¹⁹ Axɔ́sú Judáa tɔn Joasi bɛ́ nǔ e tɔ́gbó tɔn Judáa xɔ́sú Jozafáti kpó Yexolámu kpó Akaziasi kpó sɔ́ ɖó vo nú Mawu lɛ́ɛ bǐ, bó bɛ́ ée é ɖésú sɔ́ ɖó vo nú Mawu lɛ́ɛ d'é jí. É bɛ́ siká e ɖo dɔkun e ɖo Mawu Mavɔmavɔ xwé gbe ɔ́ mɛ lɛ́ɛ kpó ée ɖo hɔnmɛ lɛ́ɛ kpó. É bɛ́ nǔ énɛ́ lɛ́ɛ bǐ sɛ́ dó Silíi xɔ́sú Hazayɛ́li, bɔ é sɔ́ wá tɔ́n ahwan Jeluzalɛ́mu toxo ɔ́ ǎ.

²⁰ È wlǎn axɔ́sú Joasi sín tan e kpo lɛ́ɛ dó “Judáa xɔ́sú lɛ́ɛ sín Tan wéma” mɛ.

²¹ Joasi sín azaglɔ́gán lɛ́ɛ fɔ́n gǔ, bó yi kpá dó Joasi wú, lobo hu i ɖo Bɛti-Milóo ɖo Sila sín ali jí.

²² Mɛsɛntɔ́ Yozavadi Cimɛyati ví ɔ́ kpó Yexozavadi Comɛ́ɛ ví ɔ́ kpó wɛ hu i. È zě cyɔ tɔn yi ɖi ɖo fí e è ɖi tɔ́gbó tɔn lɛ́ɛ ɖó é, ɖo Davídi Toxo mɛ, bɔ vǐ tɔn Amasiyasi ɖu axɔ́sú ɖó tɛn tɔn mɛ.