2 Kɔlɛ́ntinu 9 - MAWUXÓWÉMA

È sɛ́ nǔ dó nɔví lɛ́ɛ, bó dó dó alɔ yě

¹ Nǔ e è sɛ́ dó mɛɖeɖóvo Mawu tɔn e ɖo Judée lɛ́ɛ, bó dó dó alɔ yě ɔ́, é byɔ́ dandan ɖɔ ma wlán wěma sɛ́ dó mi d'é wú ǎ.

² Nǔgbó ɔ́, un tunwun jlǒ ɖagbe e mi ɖó ɔ́, bó nɔ́ zé mi dó jlá ajɔ̌ ná ɖo Masedwaninu lɛ́ɛ gɔ́n, bó nɔ́ ɖɔ: “Nɔví e ɖo Akáyi lɛ́ɛ ko ɖo gbesisɔ mɛ, bó ná ná nǔ mɛ sín xwe ɖě ɔ́ mɛ ɖokpóó.” Bǐbí ɖó dó azɔ̌ wú mitɔn zɔ́n, bɔ akpakpa sɔ́ mɛ gěgé ɖo yě mɛ.

³ É ɖo mɔ̌ có, un ɖo nɔví élɔ́ lɛ́ɛ sɛ́ dó mi wɛ, bónú kpa e mǐ kpa mi ɖó nǔ énɛ́ wú ɔ́ ní ma wá nyí nǔ yǎyá ó: un jló ɖɔ mi ní ɖo gbesisɔ mɛ nǔgbó, lě e un ɖɔ gbɔn é.

⁴ É ma nyí mɔ̌ ǎ ɔ́, ényí Masedwaninu lɛ́ɛ kpó nyɛ kpó wá, bó má mɔ mi ɖo gbesisɔ mɛ ǎ ɔ́, winnyá ná hu mǐ ɖaxó, ɖó lě e mǐ kó ɖó ji ɖe dó mi wú sɔ́ é wútu; mi lɔ ná mɔ winnyá.

⁵ Hǔn, un mɔ ɖɔ é ɖo dandan mɛ nú ma sa vo nú nɔví énɛ́ lɛ́ɛ ɖɔ yě ní wá gɔ̌n mitɔn jɛ nukɔn nú mǐ, bónú nǔníná e mi ko dó akpá tɔn, bó ná ná kpódó xomɛnyínyɔ́ kpó ɔ́, yě ná sɔ́ nǔ tɔn ɖ'ayǐ. Énɛ́ ɔ́, hwenu e un ná wá ɔ́, é ná ko ɖo alɔ jí, bɔ é ná nyí xlɛ́ ɖɔ mi nɔ́ ná nǔ mɛ kpódó ayixa ɖagbe kpó; ní ma nyí dandan sín nǔ ó.

⁶ Mi ka flín xógbe élɔ́: mɛ e dó jinukún kpɛví ɖé ɔ́, kpɛví ɖé wɛ é nɔ ya; mɛ e ka dó gěgé ɔ́, gěgé tɔn wɛ é nɔ́ ya.

⁷ Hǔn, mɛ ɖokpó ɖokpó ɖó ná ná nǔ mɛ lě e é lin gbɔn ɖo ayi tɔn mɛ é; ní ma ná nǔ mɛ, bónú é lɛ́ vɛ́ n'i, abǐ ní nyí dandan sín nǔ n'i ó. Đó Mawu yí wǎn nú mɛ e nɔ ná nǔ mɛ kpódó xomɛhunhun kpó é.

⁸ Mawu ɖó acɛ e ná ná nǔ ɖagbe ɖagbe tɛnmɛ tɛnmɛ lɛ́ɛ bǐ mi é, é ná ná mi, bɔ é ná túnflá, bónú mi ná ɖó nǔ e ɖo tají nú mi lɛ́ɛ bǐ hwebǐnu, bó ná zán, bɔ é ná lɛ́ kpo ɖo mi sí ganjí, nú azɔ̌ ɖagbe lɛ́ɛ bǐ.

⁹ Lě e Mawuxówéma ɔ́ ɖɔ gbɔn é; é wɛ nyí ɖɔ: “É ná nǔ wamamɔnɔ lɛ́ɛ bɔ é sukpɔ́. Hwɛjijɔ tɔn ɖo te tɛgbɛ.”

¹⁰ Mawu e nɔ ná jinukún nǔkúndótɔ́, bó nɔ́ ná nǔɖuɖu, bɔ è nɔ ɖu ɔ́ ná ná jinukún e hudó mi ɔ́ bǐ mi, bó ná zɔ́n bɔ é ná su, bɔ hwɛjijɔ e mi ɖó ɔ́ ná ná sínsɛ́n gěgé.

¹¹ É ná dó dɔkun gěgé nú mi hwebǐnu, bónú mi ná sixú nɔ ɖe xlɛ́ hwɛhwɛ ɖɔ émí nɔ́ ná nǔ mɛ kpó xomɛhunhun kpó, bɔ mɛ gěgé ná nɔ́ dó kú nú Mawu ɖó nǔ e mi nɔ ná, bɔ mǐ nɔ́ sɔ́ yi jó nú yě lɛ́ɛ wú.

¹² Đó azɔ̌ énɛ́ e wa wɛ mi ɖe ɔ́, é nyí nǔ e hudó mɛɖeɖóvo Mawu tɔn lɛ́ɛ kɛ́ɖɛ́ wɛ é nɔ́ gló nú yě ǎ; lo ɔ́, é nɔ́ lɛ́ zɔ́n, bɔ kú dó nú Mawu sín ɖɛ nɔ sukpɔ́, ɖó nǔ e é wa nǔ yě lɛ́ɛ wú.

¹³ Azɔ̌ énɛ́ ná ɖe nǔ e mǐ nyí ɔ́ xlɛ́, bɔ mɛ gěgé ná kpa susu nú Mawu ɖó tónú e mi se nú Mawu, bó nɔ ɖe nǔɖiɖi e mi ɖó nú Wɛn Ɖagbe Klísu tɔn ɔ́ xlɛ́ é wú; yě ná lɛ́ kpa susu nú Mawu, ɖó lě e mi nyɔ́ xomɛ, bó nɔ má dɔkun mitɔn lɛ́ɛ xá yě, kpó mɛ ɖě lɛ́ɛ kpó gbɔn é wú.

¹⁴ Đó fɛ́nú tobutóbú e Mawu gba kɔn dó mi jí ɔ́ wútu wɛ yě nɔ́ xo ɖɛ nú mi kpó wǎn yíyí ɖaxó kpó.

¹⁵ Mi nú mǐ ná dó kú nú Mawu ɖó nǔníná tɔn e d'agba bɔ è ma sixú jlɛ́ ǎ é wú.