2 Kɔlɛ́ntinu 8 - MAWUXÓWÉMA

Mi ná nǔ mɛ kpó xomɛhunhun kpó

¹ Nɔví lɛ́ɛ mi, mǐ jló ɖɔ mi ní tunwun lě e fɛ́nú Mawu tɔn wa nǔ gbɔn ɖo agun e ɖo Masedwani lɛ́ɛ mɛ é.

² Nǔ gbo agunví lɛ́ɛ tawun ɖo fínɛ́, gbɔn wǔvɛ́ e yě mɔ lɛ́ɛ gbla mɛ. Lo ɔ́, xomɛhunhun yětɔn d'agba sɔ mɔ̌, bɔ yě nɔ́ ɖe xlɛ́ ɖɔ émí nɔ hun alɔ dó ná nǔ mɛ titewungbe; có nǔɖé ka ɖo yě sí ǎ.

³ Nǔgbó ɖɔ nú mi wɛ un ɖe; yě ná nǔ lě e yě kpé wú gbɔn é; yě tlɛ lɛ́ ná hú lě e yě kpé wú gbɔn ɔ́ lɔ; yě ɖésúnɔ ɖó jlǒ,

⁴ bó byɔ́ mǐ, bó dó tagba tɔn nú mǐ ɖésú, ɖɔ mǐ ní kɛnklɛ́n, bónú émí lɔ ná sɛ́ nǔ dó mɛɖeɖóvo Mawu tɔn lɛ́ɛ, bó ná dó dó alɔ yě.

⁵ Yě bló hú gǎn lě e mǐdɛɛ lɛ́ɛ lin gbɔn é; yě tó sɔ́ yěɖée jó nú Aklúnɔ hwɛ̌, bɔ énɛ́ ɔ́ gúdo ɔ́, gbɔn jlǒ Mawu tɔn gbla mɛ ɔ́, yě sɔ́ yěɖée jó nú mǐ lɔmɔ̌.

⁶ Énɛ́ ɔ́ wú wɛ mǐ sa vo nú Títu ɖɔ ní wá mi gɔ́n, bó ná dlɛ́n azɔ̌ ɔ́ d'é nu lě e é kó jɛ wú gbɔn ɖ'ayǐ é, bó ná dó dɔn mi nú mi ná wa wǎn-yíyízɔ́ énɛ́ yi fó.

⁷ Mi jɛ dɔkun ɖo nǔ bǐ mɛ: mi jɛ dɔkun ɖo nǔɖiɖi mɛ, ɖo Mawuxó ɖiɖɔ mɛ, ɖo nǔtunwuntunwun mɛ, ɖo bǐbí ɖó dó nǔ wú maɖódogbó, kpódó wǎn yíyí e mi ɖó nú mǐ é kpán mɛ. Énɛ́ ɔ́ wú ɔ́, mǐ jló ɖɔ mi ní ɖe xlɛ́ ɖɔ émí jɛ dɔkun ɖo wǎn-yíyízɔ́ énɛ́ lɔ mɛ.

⁸ É nyí acɛ kpa nú mi wɛ un ɖe ǎ; lo ɔ́, un ɖɔ bǐbí ɖó dó azɔ̌ wǔ mɛɖé lɛ́ɛ tɔn nú mi, bó ná dó kpɔ́n ɖɔ wǎn yíyí e mi ɖó nú mǐ ɔ́ nyí wǎn yíyí nǔgbó a jí.

⁹ Đó mi tunwun wǔ e Aklúnɔ mǐtɔn Jezu Klísu jɔ mi é: éyɛ́ mɛ e nyí dɔkunnɔ ɔ́, é sɔ́ éɖée dó bló wamamɔnɔ dó ta mitɔn mɛ, bó ná dó dó dɔkun nú mi gbɔn wamamɔnɔ nyínyí tɔn gbla mɛ.

¹⁰ Énɛ́ ɔ́, un ná ɖɔ nǔ e un lin dó nǔ énɛ́ wú ɔ́ nú mi: é nyɔ́ nú mi ɖɔ nǔ e wa ji mi jɛ ɖo xwe ɖě ɔ́ mɛ ɔ́, mi ní bló yi fó. Mi wɛ jɛ nǔ wa jí jɛ nukɔn; é ka nyí énɛ́ kɛ́ɖɛ́ mɛ wɛ mi jɛ nukɔn ɖe ǎ; lo ɔ́, xwe ɖě ɔ́ mɛ ɔ́, mi lɛ́ ɖó jlǒ ɖagbe, bó ná wa nǔ.

¹¹ Hǔn din ɔ́, mi bo dlɛ́n azɔ̌ énɛ́ d'é nu, bó wa yi fó; jlǒ ɖagbe e mi ɖó, bó ɖɔ émí ná wa azɔ̌ ɔ́, mi zé jlǒ ɖagbe mɔ̌hunkɔtɔn dó bló yi fó; mi bló mɔ̌ kpódó nǔ e ɖo mi sí é kpán.

¹² Đó, nú è sɔ́ jlǒ ɖagbe dó ná nǔ mɛ ɔ́, nǔ e ɖo mɛ sí ɔ́ wɛ Mawu nɔ́ kpɔ́n, bó nɔ yí nǔníná énɛ́; é nyí nǔ e ma ɖo mɛ sí ǎ ɔ́ wɛ é nɔ kpɔ́n ǎ.

¹³ É nyí è nǎ sɔ́ nǔ e ɖo mɛ sí é bǐ ná mɛ dó dó alɔ mɛ, bó wá jɛ do tɔn ɖɔ wɛ è ɖe ǎ; lo ɔ́, mɛ e ná nǔ wɛ è ɖe é kpó mɛ kpó bǐ ná nɔ zɛ̌nzɛ̌n.

¹⁴ Din ɔ́, nǔ ɖo mi sí ganjí, bɔ mi hɛn ɔ́, mi ná gɔ́ alɔ nú mɛ e nǔɖé hudó lɛ́ɛ. Énɛ́ ɔ́, nú nǔɖé wá hudó mi lɔmɔ̌ gbeɖé, bónú yě lɔ ɖó ganjí ɔ́, yě ná dó alɔ mi. Lě e mɛ bǐ ná nɔ zɛ̌nzɛ̌n gbɔn ɔ́ nɛ́.

¹⁵ Lě e nǔ e è wlán dó Mawuxówéma ɔ́ mɛ ɔ́ ɖɔ gbɔn é nɛ́; é wɛ nyí ɖɔ: “Mɛ e bɛ́ gěgé tɔn kplé ɔ́, é ɖó dín ǎ; mɛ e ka bɛ́ kpɛɖé ɔ́, é hwedó e ǎ.”

Títu kpódó azɔ̌gbɛ́ tɔn lɛ́ɛ kpó

¹⁶ Susu nú Mawu e sɔ́ dó ayi mɛ nú Títu, bɔ é bí dó mi wú mǐ ɖɔhun é!

¹⁷ Títu yí gbe nú nǔ e mǐ byɔ́ ɛ é; nǔ e lɛ́ hú mɔ̌ ɔ́ wɛ nyí ɖɔ bǐbí ɖó dó nǔ wú sín akpakpa sɔ́ ɛ káká bɔ é ɖésúnɔ ɖɔ kpó jlǒ é ɖésúnɔ tɔn kpó ɖɔ émí ná wá mi gɔ́n.

¹⁸ Mǐ sɛ́ nɔví e agun lɛ́ɛ bǐ nɔ kpa, ɖó lě e é nɔ wa Wɛn Ɖagbe jlájlázɔ́ ɔ́ gbɔn é wú ɔ́ dó, bɔ é xwedó Títu.

¹⁹ Énɛ́ ɔ́ kɛ́ɖɛ́ wɛ ǎ; nɔví mǐtɔn énɛ́ ɔ́ wɛ agun lɛ́ɛ ɖe, bɔ é ná xwedó mǐ gbɔn to lɛ́ɛ mɛ to lɛ́ɛ mɛ, bɔ mǐ ná wa wǎn-yíyízɔ́ énɛ́ ɔ́ nú susu Aklúnɔ tɔn, bó ná ɖe jlǒ e mǐ ɖó, bó ná dó alɔ mɛ ɖě lɛ́ɛ ɔ́ xlɛ́.

²⁰ Mǐ ɖo nǔ bǐ bló wɛ, bónú nǔníná ɖaxó énɛ́ ɔ́, mɛɖé ma wá mɔ nǔɖé ɖɔ dó lě e mǐ zán gbɔn é wú ó.

²¹ Mǐ ba ná nɔ́ wa nǔ ɖagbe; é ka nyí nǔ e nɔ́ nyɔ́ Aklúnɔ nukún mɛ ɔ́ kɛ́ɖɛ́ wɛ mǐ ná nɔ́ bló ǎ; lo ɔ́, mǐ ná nɔ́ bló nǔ e nɔ́ nyɔ́ gbɛtɔ́ lɛ́ɛ lɔmɔ̌ nukún mɛ é.

²² Mǐ sɛ́ nɔví mǐtɔn ɖěvo kpódó yě kpán dó; mǐ tɛ́n ɛ kpɔ́n gbɔn ali gěgé xo; é ka nɔ ɖe xlɛ́ hwe lɛ́ɛ bǐ nu ɖɔ émí bí dó azɔ̌ wú; amɔ̌ din ɔ́, ɖó jiɖiɖe ɖaxó e é ɖó dó mi wú ɔ́ wútu ɔ́, bǐbí ɖó dó azɔ̌ wú tɔn lɛ́ jɛjí.

²³ Títu ɔ́, azɔ̌gbɛ́ ce wɛ éyɛ́ nyí, bó nɔ́ wa azɔ̌ xá mì, bó ná dó dó alɔ mi. Nɔví ɖě lɛ́ɛ e xwedó e lɛ́ɛ ɔ́, mɛsɛ́dó agun lɛ́ɛ tɔn wɛ yě nyí, bó ɖo azɔ̌ wa wɛ nú susu Klísu tɔn.

²⁴ Mi ɖe xlɛ́ yě ɖɔ mi yí wǎn nú yě nǔgbó, bónú agun lɛ́ɛ ná mɔ ɖɔ mi yí wǎn nú yě, bó ná tunwun ɖɔ ée mǐ ɖo gǔgó ɖó mi wú wɛ ɔ́, hwɛ mǐtɔn jɔ.