2 Kɔlɛ́ntinu 3 - MAWUXÓWÉMA

Akɔjijɛ yɔ̌yɔ́ ɔ́ sín azɔ̌watɔ́ lɛ́ɛ

¹ Xó énɛ́ lɛ́ɛ e mǐ ɖɔ ɔ́, mǐɖée sɔ́ su sín xó wɛ é nyí a? Abǐ mǐ ba ná zé wěma e ɖe xlɛ́ ɖɔ mǐ nyí azɔ̌ mɔ̌hunkɔtɔn wa tɔ́ ɔ́ xlɛ́ mi lě e mɛ ɖě lɛ́ɛ ba ná xlɛ́ mi gbɔn é wɛ a? Abǐ mǐ ba ná byɔ́ wěma énɛ́ mi wɛ a?

² Midɛɛ lɛ́ɛ ɖésúnɔ wɛ nyí wěma mǐtɔn, bɔ è wlán dó ayixa mɛ nú mǐ, bɔ mɛ bǐ hɛn ɔ́, yě nǎ tunwun, bó ná xa.

³ Nǔgbó wɛ! É ɖo wɛn ɖɔ wěma ɖé wɛ mi nyí, bɔ Klísu wlán, bɔ mǐdɛɛ lɛ́ɛ nɔ sɔ́ jó. É nyí kwélesin wɛ è dǒ wlán wěma ɔ́ ná ǎ; lo ɔ́, Yɛ Mawu gbɛɖe ɔ́ tɔn wɛ è dǒ wlán ná; é nyí awǐnnyatɛ jí wɛ è wlǎn ɖó ǎ; lo ɔ́, gbɛtɔ́ lɛ́ɛ sín ayi mɛ wɛ è wlǎn dó .

⁴ Jiɖiɖe e mǐ ɖó dó Mawu wú gbɔn Klísu jí ɔ́ wɛ zɔ́n bɔ mǐ yí gbe ɖɔ mɔ̌ wɛ é nyí.

⁵ Nǔgbó ɔ́, gbɔn alɔkpa ɖěbǔ mɛ ɔ́, mǐ sixú ɖɔ ɖɔ mǐ sixú wa azɔ̌ mɔ̌hunkɔtɔn ɖo mǐ ɖésúnɔ sín hlɔ̌nhlɔ́n mɛ ǎ. Hlɔ̌nhlɔ́n e mǐ nɔ dó kpé nǔ wú ɔ́, Mawu gɔ́n wɛ é nɔ gosín.

⁶ Đó é wɛ húzú mǐ, bɔ mǐ kpé wú, bó nyí akɔjijɛ yɔ̌yɔ́ ɔ́ sín azɔ̌watɔ́. Akɔjijɛ yɔ̌yɔ́ énɛ́ jínjɔ́n sɛ́n e è wlán lɛ́ɛ jí ǎ; lo ɔ́, Yɛsinsɛn sín nǔwiwa wɛ. Sɛ́n e è wlán ɔ́, mɛ wɛ é nɔ hu; lo ɔ́ Yɛsinsɛn ɔ́, gbɛ wɛ é nɔ ná mɛ.

⁷ Sɛ́n ɔ́, awǐnnya sín atɛ lɛ́ɛ jí wɛ è wlǎn ɖó, wěkwín ɖě jɛ ɖě gúdo, bɔ susu Mawu tɔn tɔ́n hwe énɛ́ nu. Mɔyízi sín nukún mɛ nɔ kɔ́n, bó nɔ ná wěziza ɖaxó ɖé, bɔ Izlayɛ́li ví lɛ́ɛ nɔ sixú kpɔ́n ɛ ǎ, có wěziza énɛ́ ɔ́ ka ɖó ná bú. Nú sɛ́n e azɔ̌ tɔn ɔ́ ko nyí ɖɔ mɛ wɛ é nɔ dɔn yi kú ɔ́, ka wá kpó susu ɖaxó mɔ̌hunkɔtɔn kpó ɔ́,

⁸ nɛ̌ wɛ susu e lɛ́ lɛ̌ dó Yɛsinsɛn sín azɔ̌ ɔ́ ma ɖó ná d'agba hú mɔ̌ ǎ gbɔn?

⁹ Azɔ̌ e nɔ dɔn gbɛtɔ́ lɛ́ɛ yi kú ɔ́ ko ɖó susu; nɛ̌ wɛ azɔ̌ e nɔ zé gbɛtɔ́ lɛ́ɛ dó húzú hwɛjijɔnɔ ɖo Mawu nukɔn ɔ́ ma ká ná ɖó susu hú mɔ̌ ǎ gbɔn?

¹⁰ Mǐ sixú ɖɔ ɖɔ susu e jɛ kínkɔ́n jí ɖ'ayǐ ɔ́ kún nyí nǔtí ɖo susu din tɔn ɔ́ nukɔn ó; ɖó susu din tɔn ɔ́ hú gǎn ɖ'ayǐ tɔn ɔ́ titewungbe.

¹¹ Nǔgbó ɔ́, ényí nǔ e ná nɔ ayǐ nú hwenu kpɛɖé ɔ́ ka xɔ susu ɔ́, nɛ̌ wɛ ée ná nɔ ayǐ káká sɔ́yi ɔ́ ma ká ná xɔ susu hú mɔ̌ ǎ gbɔn?

¹² Nukúnɖíɖó mɔ̌hunkɔtɔn e mǐ ɖó ɔ́ wú wɛ mǐ ɖó jiɖiɖe sɔ mɔ̌.

¹³ Mǐ cí Mɔyízi ɖɔhun ǎ; éyɛ́ ɔ́, avɔ wɛ é cyɔ́n nukún mɛ, bónú Izlayɛ́li ví lɛ́ɛ ní ma mɔ wěziza e ɖo kínkɔ́n wɛ ɖo nukún tɔn mɛ, bó ka ná bú ɔ́ sín yiyi ó.

¹⁴ Lo ɔ́, è cyɔ́n nǔ ayixa yětɔn jí, bɔ ayixa yětɔn sɔ́ sixú nɔ mɔ nǔ ǎ; bɔ káká jɛ din ɔ́, nú yě ɖo nǔ xa wɛ ɖo akɔjijɛ xóxó ɔ́ wéma mɛ ɔ́, avɔ ɖokpó ɔ́ wɛ nɔ cyɔ́n ayixa yětɔn jí. Mɛ e ɖo bǔ xá Klísu ɔ́ sín ayixa jí jɛ́n wɛ è nɔ ɖe avɔ énɛ́ sín.

¹⁵ Káká jɛ égbé ɖésú ɔ́, nú yě ɖo Mɔyízi sín wěma lɛ́ɛ xa wɛ hweɖěbǔnu ɔ́, avɔ ɔ́ nɔ cyɔ́n ayixa yětɔn jí.

¹⁶ Lo ɔ́, lě e Mawuxówéma ɔ́ ɖɔ gbɔn ɔ́ ɖíe: “Ényí mɛɖé lɛ́ kɔ wá Aklúnɔ gɔ́n ɔ́, è nɔ ɖe avɔ ɔ́ síin.”

¹⁷ Lo ɔ́, Aklúnɔ e xó ɖɔ wɛ è ɖe ɖo fí ɔ́, Yɛ ɔ́ wɛ; bɔ fí e Yɛ Aklúnɔ tɔn ka ɖe ɔ́, mɛɖée sí jijɛ ɖo fínɛ́.

¹⁸ Mǐ bǐ ɔ́, è ɖe avɔ sín nukún mɛ nú mǐ, bɔ susu Aklúnɔ tɔn ɔ́, è nɔ mɔ ɖo mǐ mɛ wěkpɛ́n mɛ ɖɔhun; énɛ́ ɔ́, è húzú mǐ nú mǐ ná cí Aklúnɔ ɖɔhun, bɔ mǐ gosín susu ɖé mɛ yi byɔ́ susu e lɛ́ hú gǎn mɔ̌ é mɛ. Azɔ̌ e Yɛ Aklúnɔ tɔn wa ɔ́ nɛ́.