2 Kɔlɛ́ntinu 13 - MAWUXÓWÉMA

Xóɖɔɖ'ayǐ gǔdo gúdo tɔn lɛ́ɛ kpó gbedómɛ lɛ́ɛ kpó

¹ Azɔn atɔngɔ́ ɔ́ ɖíe un ja gɔ̌n mitɔn e. Lě e Mawuxówéma ɔ́ ɖɔ gbɔn ɔ́, “È dǒ hwɛ ɖé mɛɖé ɔ́, mɛ we, abǐ mɛ atɔn ɖó ná ɖe kúnnu ná.”

² Un ɖó xóɖɔɖ'ayǐnúmɛ ɖé, bó ná ɖɔ nú mɛ e ko hu hwɛ wá yi lɛ́ɛ kpó mɛ ɖě lɛ́ɛ bǐ kpó; un ko ɖɔ nú mi hwenu e un wá gɔ̌n mitɔn azɔn wegɔ́ ɔ́ é; amɔ̌ un lɛ́ ɖo vǐvɔ́ ɖɔ wɛ din e un ɖo zɔ é. Din tɔn e un ná wá gɔ̌n mitɔn ɔ́, un ná kpɔ́n bó ɖɔ xá mɛ ɖěbǔ ǎ.

³ Mi ɖo nǔ e ɖe xlɛ́ ɖɔ Klísu nɔ ɖɔ xó gbɔn jǐ ce ɔ́ ba wɛ; un ko wá ɔ́, mi ná mɔ. Klísu wa mɛ ma ɖó gǎn nú ɖé ɖo tɛ́ntin mitɔn ǎ; lo ɔ́, hlɔ̌nhlɔ́n tɔn wɛ é nɔ ɖe xlɛ́ ɖo tɛ́ntin mitɔn.

⁴ Nǔgbó wɛ; è ká ɛ nyi aklúzu jí ɖó gǎnmaɖó tɔn wú; lo ɔ́, é ɖo gbɛ ɖo hlɔ̌nhlɔ́n Mawu tɔn mɛ. Đo bǔ e mǐ ɖe xá ɛ ɔ́ mɛ ɔ́, mǐ lɔmɔ̌ ɖó gǎn ǎ; amɔ̌, mǐ ná ɖe xlɛ́ mi ɖɔ mǐ kpó e kpó ɖo gbɛ gbɔn hlɔ̌nhlɔ́n Mawu tɔn mɛ.

⁵ Mi tɛ́n miɖée kpɔ́n, bó kíjé ayi miɖée tɔn mɛ kpɔ́n ɖɔ émí nɔ́ zán gbɛ ɖo nǔɖiɖi mɛ a jí? Mi tunwun ɖɔ Jezu Klísu ɖo tɛ́ntin émí tɔn; mɔ̌ wɛ ǎ cé? Afi nú mi jɛ ayǐ ɖo tɛ́nkpɔ́n mitɔn mɛ.

⁶ Amɔ̌, un ɖi ɖɔ mi ná tunwun ɖɔ mǐdɛɛ lɛ́ɛ ɔ́, mǐ kún jɛ ayǐ ɖo tɛ́nkpɔ́n mɛ ó.

⁷ É ka ɖo mɔ̌ có, mǐ ɖo vo sa nú Mawu wɛ ɖɔ mi ní ma wa nǔ nyanya ɖěbǔ ó; é nyí mǐ ná ɖe xlɛ́ gbɔn fí ɖɔ è ko tɛ́n mǐ kpɔ́n wɛ ǎ; lo ɔ́, ényí é ná bo cí mǐ ko jɛ ayǐ ɖo tɛ́nkpɔ́n mɛ ɖɔhun ɔ́, mǐ ní mɔ mi ɖo nǔ ɖagbe wa wɛ.

⁸ Đó mǐ sixú wa nǔ ɖěbǔ, bɔ é ná gbɔn vo nú nǔgbó Mawu tɔn ǎ; nǔgbó Mawu tɔn ɔ́ jɛ́n mǐ sixú dó wa nǔ.

⁹ Hwenu e mǐ ma ɖó gǎn ǎ, bɔ midɛɛ lɛ́ɛ ka ɖó ɔ́, mǐ nɔ jɛ awǎ; énɛ́ wú wɛ, mǐ nɔ́ lɛ́ byɔ́ ɖo ɖɛ mǐtɔn lɛ́ɛ mɛ ɖɔ mi ní húzú nǔɖagbewatɔ́ yi fó.

¹⁰ Nǔ e wú un ɖo zɔ bó wlán nǔ énɛ́ lɛ́ɛ bǐ sɛ́ dó mi ɔ́ ɖíe: é wɛ nyí ɖɔ, hwenu e un ná wá nɔ gɔ̌n mitɔn ɔ́, un ma kpɔ́n dó acɛ e Aklúnɔ ná mì ɔ́ wú, bó nylá hun dó mi ó; acɛ énɛ́ e Aklúnɔ ná mì ɔ́, azɔ̌ tɔn wɛ nyí ɖɔ ma dó dó alɔ mi, bónú mi ná yi nukɔn ɖo nǔɖiɖi mɛ; é nyí ɖɔ un ná dó dɔn mi dó gǔdo wɛ ǎ.

¹¹ Nɔví lɛ́ɛ mi, din ɔ́, é su gbeɖé! Mi dó gǎn bó ná nyí nǔɖagbewatɔ́ yí fó; mi dó wǔsyɛ́n lanmɛ nú miɖée; mi ɖó gbe kpɔ́; mi fá xomɛ dó miɖée wú; énɛ́ ɔ́, Mawu wǎn yíyí kpó fífá kpó nɔ ɔ́ ná nɔ kpɔ́ xá mi.

¹² Mi kí nɔví nɔví sín si nú miɖée, dó dó gbe miɖée ná. Mɛɖeɖóvo Mawu tɔn lɛ́ɛ dó gbe sɛ́ dó mi.

¹³ Fɛ́nú Aklúnɔ Jezu Klísu tɔn kpó wǎn yíyí Mawu tɔn kpó, kpódó kɔnɖókpɔ́ Yɛsinsɛn tɔn kpán ní nɔ kpɔ́ xá mi bǐ.