1 Tɛsalonikinu 4 - MAWUXÓWÉMA

Lě e è nǎ zán gbɛ mɛtɔn gbɔn, bɔ é ná nyɔ́ Mawu nukún mɛ é

¹ Bó ná dó fó ɔ́, nɔví lɛ́ɛ mi, mǐ kó kplɔ́n lě e mi ná zán gbɛ mitɔn gbɔn, bɔ é ná nyɔ́ Mawu nukún mɛ ɔ́ mi, bɔ mi ka ko ɖo blǒbló gbɔn jí wɛ. Nǔ e kpo bɔ mǐ ná ɖɔ nú mi din ɔ́ ɖíe: mǐ ɖo byɔ̌byɔ́ mi wɛ, bó ɖo vo sa nú mi wɛ ɖo Aklúnɔ Jezu nyǐkɔ mɛ ɖɔ mi ní nɔ zán gbɛ mitɔn, bónú é ní lɛ́ nyɔ́ d'é jí hú mɔ̌.

² Nǔgbó ɔ́, mi tunwun nǔ e Aklúnɔ Jezu ná gbe mǐ, bɔ mǐ kplɔ́n mi é.

³ Nǔ e Mawu jló nú mi ɔ́ wɛ nyí ɖɔ mi ní nyí mɛ mímɛ́, bó ma nɔ lɛ aga ó.

⁴ Mɛ ɖokpó ɖokpó ní tunwun lě e é ná hɛn agbaza tɔn ɖó mǐmɛ́ kpódó yɛ̌yi kpán jí gbɔn é;

⁵ ní ma nɔ jó éɖée dó nú jlǒ nyanya agbaza mɛ tɔn lɛ́ɛ lě e nǔmaɖitɔ́ e ma tunwun Mawu ǎ lɛ́ɛ nɔ bló gbɔn é ó.

⁶ Mɛɖěbǔ ní ma wa nǔ nyi do nú nɔví tɔn, abǐ ní hízí i ɖo xó énɛ́ ɔ́ mɛ ó; ɖó Mawu ná ba hlɔn nǔ mɔ̌hun lɛ́ɛ bǐ tɔn, lě e mǐ kó ɖɔ nú mi syɛ́nsyɛ́n gbɔn é.

⁷ Đó Mawu ylɔ́ mǐ, bónú mǐ ná wa nǔ blíblí ǎ; lo ɔ́, é ylɔ́ mǐ nú mǐ ná zán gbɛ mímɛ́.

⁸ Hǔn, mɛ e hɔn nǔkplɔ́nmɛ énɛ́ nyi gbě ɔ́, é nyí gbɛtɔ́ wɛ é hɔn nyi gbě ǎ; lo ɔ́, Mawu e ná Yɛsinsɛn tɔn mi ɔ́ wɛ é hɔn nyi gbě.

⁹ É sɔ́ byɔ́ ɖɔ è nǎ wlán nǔɖé sɛ́ dó mi dó nɔví ɖo nǔɖiɖi mɛ sín wǎn e mi ɖó ná yí nú miɖée ɔ́ wú ǎ; ɖó lě e mi ná yí wǎn nú miɖée gbɔn ɔ́, Mawu ko kplɔ́n mi.

¹⁰ Wǎn yíyí énɛ́ wɛ mi ɖó nú nɔví lɛ́ɛ gbɔn Masedwani to ɔ́ bǐ mɛ. Amɔ̌, nɔví lɛ́ɛ mi, mǐ lɛ́ ɖo byɔ̌byɔ́ mi wɛ ɖɔ wǎn yíyí énɛ́ ní nɔ lɛ́ jɛjí ayǐhɔ́ngbe ayǐhɔ́ngbe.

¹¹ Mi dó gǎn, bónú fífá ní nɔ́ nɔ tɛ́ntin mitɔn; mi dó gǎn bó nɔ́ kpé nukún dó nǔ mi ɖésúnɔ tɔn lɛ́ɛ wú; mi dó gǎn bó nɔ́ wa azɔ̌ kpó alɔ mi ɖésúnɔ tɔn kpó lě e mǐ kó ɖɔ nú mi gbɔn é.

¹² Énɛ́ ɔ́, mɛ e ma ɖo agun Klísu tɔn mɛ ǎ lɛ́ɛ ná nɔ ɖó sísí nú mi, bɔ mi ka ná nɔ kɔ jí nú mɛɖé ǎ.

Aklúnɔ sín wǐwá kpó fínfɔ́n sín kú tɔn kpó

¹³ Nɔví lɛ́ɛ mi, lě e mɛ e ko kú lɛ́ɛ xó ná wá nyí gbɔn ɔ́, mǐ jló ɖɔ mi ní mɔ nǔ jɛ mɛ céɖécéɖé, bónú mi ma nɔ aluwɛ mɛ mɛ ɖě lɛ́ɛ e ma ɖo nukún ɖó nǔɖé wɛ ǎ lɛ́ɛ ɖɔhun ó.

¹⁴ Đó mǐ ɖi nǔ ɖɔ Jezu kú bó lɛ́ fɔ́n; mɔ̌ ɖokpó ɔ́, mǐ lɛ́ ɖi nǔ ɖɔ Mawu ná fɔ́n mɛ e ɖi nǔ nú Jezu cóbó kú lɛ́ɛ kpó é kpó.

¹⁵ Nǔgbó ɔ́, lě e Aklúnɔxó ɔ́ ɖɔ gbɔn ɔ́ ɖíe ɖɔ nú mi gbé wɛ mǐ ja e: mǐ mɛ e ná kpo ɖo gbɛ hwenu e Aklúnɔ ná wá dó ɔ́, mǐ ná jɛ nukɔn nú mɛ e ko kú lɛ́ɛ ǎ.

¹⁶ Hwe ɔ́ nu su ɔ́, Aklúnɔ ɖésúnɔ ná jɛ te sín jǐxwé, bɔ è nǎ se mɛɖé ná ɖe gbe kpó xósúsú kpó, bó ná se wɛnsagun Mawu tɔn ɖaxó ɖokpó sín gbe; bó ná se ɖuɖéjí sín kpɛn Mawu tɔn sín gbe; bɔ mɛ e ɖi nǔ nú Klísu cóbó kú lɛ́ɛ ná fɔ́n jɛ nukɔn.

¹⁷ Énɛ́ ɔ́ gúdo ɔ́, mǐ mɛ e ná kpo ɖo gbɛ hwenɛ́nu lɛ́ɛ ɔ́, Mawu ná zé mǐ kpó yě kpó zɛ̌ɛ́n yi jǐ, ɖo akpɔ́kpɔ́ mɛ, bɔ mǐ ná yi kpé Aklúnɔ ɔ́ ɖo jɔhɔn mɛ; bɔ énɛ́ ɔ́, mǐ ná nɔ kpɔ́ xá Aklúnɔ ɔ́ hwebǐnu.

¹⁸ Hǔn mi bo zé xó énɛ́ lɛ́ɛ dó dó wǔsyɛ́n lanmɛ nú miɖée.