1 Tan 9 - MAWUXÓWÉMA

Jeluzalɛ́munu lɛ́ɛ

¹ Izlayɛ́li ví lɛ́ɛ bǐ sín kɛ́n wɛ è sɔ́ dó axɔ́sú Izlayɛ́li tɔn lɛ́ɛ sín wěma mɛ. È wlǐ akɔta Judáa tɔn ɔ́ yi kannumɔgbénu ɖo Babilɔ́nu, ɖó gbejímánɔ nú Mawu yětɔn wú.

² Mɛ nukɔntɔn e lɛ́ kɔ wá ayǐkúngban yětɔn lɛ́ɛ jí, bó lɛ́ kɔ wá toxo yětɔn lɛ́ɛ mɛ lɛ́ɛ wɛ nyí Izlayɛ́li ví kpaa lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ kpódó mɛ e nɔ kpé nukún dó Mawu xwé ɔ́ wú lɛ́ɛ kpó.

³ Judáa ví lɛ́ɛ, Bɛnjamɛ́ɛ ví lɛ́ɛ, Eflayímu ví lɛ́ɛ kpó Manasée ví lɛ́ɛ kpó ɖěe lɛ́ kɔ wá cí Jeluzalɛ́mu.

⁴ Judáa ví e wá Jeluzalɛ́mu lɛ́ɛ ɖíe: Wutáyi. Wutáyi Amumihudi ví, Ɔmúli vívú, Imulíi vívú vivu Bani vitikli ɔ́. Pɛlɛ́si xwédo mɛ wɛ é jɔ ɖe.

⁵ Asaya sín vǐɖaxó ɔ́ kpó vǐ tɔn lɛ́ɛ kpó; Cela kúnkan ɔ́ mɛ wɛ é jɔ ɖe.

⁶ Yewuɛ́li; Zeláxi kúnkan ɔ́ mɛ wɛ é jɔ ɖe. Judáa ví e wá Jeluzalɛ́mu lɛ́ɛ bǐ bló gbɛtɔ́ nǔwɔntɔn kanwe wǒ (690).

⁷ Bɛnjamɛ́ɛ ví e wá Jeluzalɛ́mu lɛ́ɛ ɖíe: Salúu Mɛculamu ví, Hodawya vívú, Ha-Senúwa vívú vivu ɔ́.

⁸ Yivunɛya Yeloxámu ví ɔ́. Ela Wúzi ví, Mikli vívú ɔ́ kpódó Mɛculamu Cefátiya ví Hlewuyɛ́li vívú, Yivunɛya vívú vivu ɔ́ kpó.

⁹ Yě mɛ énɛ́ lɛ́ɛ bǐ wɛ nyí hɛ̌nnugán ɖo hɛ̌n yětɔn yětɔn nu. Bɛnjamɛ́ɛ ví e wá Jeluzalɛ́mu lɛ́ɛ bǐ bló gbɛtɔ́ afɛnɛ kantɔn gbantɔ́n-nukún-ɖokpó (956).

¹⁰ Vɔ̌sánú-xwlémawutɔ́ e wá Jeluzalɛ́mu lɛ́ɛ ɖíe: Yedaya, Yexoyalivu, Yakíni,

¹¹ kpódó Azalya kpó. Azalya ɔ́, Ilukya ví wɛ, bɔ Ilukya nyí Mɛculamu ví, Mɛculamu nyí Sadɔ́ku ví, bɔ Sadɔ́ku nyí Mɛlayɔ́ti ví, bɔ Mɛlayɔ́ti nyí Axitúvu e kpa acɛ dó Mawu xwé ɔ́ nu é ví.

¹² Adaya lɔ ɖo vɔ̌sánú-xwlémawutɔ́ e wá Jeluzalɛ́mu lɛ́ɛ mɛ; Adaya ɔ́, Yeloxámu ví wɛ, bɔ Yeloxámu nyí Pacehúu ví, bɔ Pacehúu nyí Malukíya ví. Masayi lɔ ɖo vɔ̌sánú-xwlémawutɔ́ e wá Jeluzalɛ́mu lɛ́ɛ mɛ. Masayi ɔ́, Adiyɛli ví wɛ, bɔ Adiyɛli nyí Yaxizeláa ví, Yaxizeláa nyí Mɛculamu ví, bɔ Mɛculamu nyí Mɛcilemiti ví, bɔ Mɛcilemiti nyí Imumɛ́ɛ ví.

¹³ Vɔ̌sánú-xwlémawutɔ́ énɛ́ lɛ́ɛ kpó nɔví yětɔn e kpa acɛ dó tɔ́ yětɔn xwé nu lɛ́ɛ kpó bǐ bló gbɛtɔ́ nukúnɖéjí afɔtántɔn kɛnnɛ (1.760), bó nɔ́ wa azɔ̌ ɖo Mawu xwé gbe.

¹⁴ Levíi ví e wá Jeluzalɛ́mu lɛ́ɛ ɖíe: Cemaya; Cemaya ɔ́, Hacúvu ví wɛ, bɔ Hacúvu nyí Azlikámu ví, bɔ Azlikámu nyí Hacaviya ví; Mɛlali xwédo mɛ wɛ é jɔ ɖe.

¹⁵ Bakibakáa, Ɛlɛ́ci, Galali kpódó Mataniya kpó. Mataniya ɔ́, Mika ví wɛ, bɔ Mika nyí Zikli ví, Zikli ka nyí Asáfu ví.

¹⁶ Ovadia lɔ ɖo Levíi ví e wá Jeluzalɛ́mu lɛ́ɛ mɛ. Ovadia ɔ́, Cemaya ví wɛ, bɔ Cemaya nyí Galali ví, bɔ Galali nyí Yedutún ví. Bɛlɛkya lɔ ɖo Levíi ví lɛ́ɛ mɛ. Bɛlɛkya ɔ́, Asa ví wɛ, bó nyí Ɛlukana vívú. Ɛlukana ɔ́, Nɛtofanu lɛ́ɛ sín gletoxo mɛ wɛ é nɔ́ nɔ.

¹⁷ Hɔnjínɔtɔ́ e wá Jeluzalɛ́mu lɛ́ɛ ɖíe: Calúmu, Akúvu, Talumɔ́ni, Aximani kpódó nɔví yětɔn lɛ́ɛ kpó. Calúmu wɛ nyí gǎn yětɔn.

¹⁸ Káká jɛ din ɔ́, vǐ yětɔn lɛ́ɛ wɛ nɔ́ nɔ axɔ́sú ɔ́ sín hɔn jí ɖo zǎnzǎnhwe jí. Tɔ́gbó yětɔn lɛ́ɛ wɛ nɔ́ nɔ hɔn jí nú ahwankpá Levíi ví lɛ́ɛ tɔn.

¹⁹ Calúmu Kɔlée ví, Eviyasáfu vívú, Kolée vívú vivu ɔ́, kpódó mɛ ɖě lɛ́ɛ e ɖo Kolée hɛ́nnu mɛ lɛ́ɛ kpó wɛ nɔ́ nɔ goxɔ e mɛ è nɔ kpé Mawu Mavɔmavɔ ɖe ɔ́ sín ali nu, lě e tɔ́gbó yětɔn lɛ́ɛ nɔ́ bló gbɔn ɖ'ayǐ, ɖo fí e togun Mawu Mavɔmavɔ tɔn ɔ́ nɔ́ ɖó gɔnu ɖó é.

²⁰ Pínxási Eleazáa ví ɔ́ wɛ nyí gǎn yětɔn ɖ'ayǐ, ɖó Mawu Mavɔmavɔ ɖo kpɔ́ xá ɛ.

²¹ Zekaliyahu, Mɛcelemiya ví ɔ́ lɔmɔ̌ nyí hɔnjínɔtɔ́ ɖo goxɔ Mawu Mavɔmavɔ tɔn ɔ́ sín ali nu ɖ'ayǐ.

²² Hɔnjínɔtɔ́ lɛ́ɛ bǐ bló gbɛtɔ́ afɔɖé wěwe (212), bɔ è sɔ́ kɛ́n yětɔn gbɔn gletoxo yětɔn lɛ́ɛ mɛ. Davídi kpó gbeyíɖɔ Mawu tɔn Samuwɛ́li kpó wɛ zé azɔ̌ énɛ́ dó así nú tɔ́gbó yětɔn lɛ́ɛ, bɔ é nyí azɔ̌ yětɔn.

²³ Yědɛɛ lɛ́ɛ kpó vǐ yětɔn lɛ́ɛ kpó wɛ nɔ́ nɔ Mawu Mavɔmavɔ xwé ɔ́ sín ali nu; yě wɛ nɔ́ cɔ́ goxɔ ɔ́.

²⁴ Hɔnjínɔtɔ́ ɖo Mawu Mavɔmavɔ xwé ɔ́ sín hɔntogbó ɛnɛ lɛ́ɛ jí. Yě ɖo zǎnzǎnhwe jí, bo ɖo gbadahwe jí, bó ɖo totaligbé, lobo ɖo tofɔligbé.

²⁵ Nɔví yětɔn e ɖo gletoxo yětɔn lɛ́ɛ mɛ lɛ́ɛ ɖó ná nɔ́ wá d'alɔ yě hwɛhwɛ xɔ azǎn tɛ́nwe.

²⁶ Hɔnjínɔtɔ́gán ɛnɛ wɛ nɔ ɖo azɔ̌ wa wɛ tɛgbɛ; Levíi ví wɛ nú yě. Yě nɔ́ cɔ́ xɔ e ɖo Mawu xwé gbe lɛ́ɛ kpó dɔkun e ɖ'é mɛ lɛ́ɛ kpó.

²⁷ Mawu xwé ɔ́ kpá wɛ yě nɔ́ dɔ́, ɖó yě ɖó ná nɔ cɔ́, bó ná nɔ́ hun hɔntogbó lɛ́ɛ zǎnzǎn tɛgbɛ.

²⁸ Hɔnjínɔtɔ́ ɖé lɛ́ɛ tíin bó nɔ kpé nukún dó nǔ e è nɔ zán ɖo sinsɛn hwenu lɛ́ɛ wú. È bɛ̌ nǔ lɛ́ɛ xweyǐgbe ɔ́, yě nɔ́ xa kpɔ́n; è bɛ̌ yě wá ɔ́, yě nɔ́ lɛ́ xa.

²⁹ Hɔnjínɔtɔ́ ɖěvo lɛ́ɛ nɔ́ kpé nukún dó nǔ e è nɔ zán ɖo tɛn mímɛ́ ɔ́ mɛ lɛ́ɛ bǐ wú, bó nɔ kpé nukún dó linfín, vɛ̌ɛn, ami, zǎlínkpɔ́n kpódó nǔsáwǔ wǎnɖagbenɔ lɛ́ɛ kpó wú.

³⁰ Vɔ̌sánú-xwlémawutɔ́ lɛ́ɛ kɛ́ɖɛ́ wɛ nɔ ɖa nǔsáwǔ wǎnɖagbenɔ lɛ́ɛ.

³¹ Levíi ví lɛ́ɛ ɖokpó nyí Matitia, bó nyí Calúmu e jɔ ɖo xwédo Kolée tɔn mɛ ɔ́ sín nukɔngbéví. Éyɛ́ wɛ nɔ sɔ atá e è nɔ xwlé Mawu Mavɔmavɔ é.

³² Levíi ví ɖěvo lɛ́ɛ tíin ɖo Kexáti ví lɛ́ɛ mɛ, bɔ azɔ̌ yědɛɛ lɛ́ɛ tɔn wɛ nyí yě ná nɔ ɖa wɔ̌xúxú e è nǎ nɔ xwlé Mawu ɖo gbɔjɛzán gbe lɛ́ɛ é.

³³ Yě mɛ e nɔ kpé nukún dó hanjiji wú, bó nyí hɛ̌nnugán Levíi ví lɛ́ɛ tɔn lɛ́ɛ nɛ́; yě mɛ ɖokpó ɖokpó ɖó xɔ yětɔn yětɔn. Yě sɔ́ nɔ wa azɔ̌ ɖěvo ǎ, ɖó yě nɔ́ ɖo hanzɔ́ ɔ́ kɔn zǎn kpó kéze kpó.

³⁴ Levíi ví e nyí hɛ̌nnugán ɖě jɛ ɖě gúdo lɛ́ɛ nɛ́. Jeluzalɛ́mu wɛ yě nɔ́ nɔ.

Sawúlu hɛ́nnu ɔ́

³⁵ Yeyiɛ́li wɛ ɖó Gabawɔ́ɔn toxo ɔ́ ayǐ, bó nɔ́ nɔ fínɛ́; asi tɔn nyí Maaka.

³⁶ Yeyiɛ́li ví lɛ́ɛ ɖíe: Avidɔni wɛ nyí nukɔngbéví tɔn, bɔ Súu, Kícu, Baalu, Nɛ̌ɛ, Nadavu,

³⁷ Gedɔ́ɔ, Axiyo, Zekaliya kpódó Miklɔ́ti kpó jɛ gǔdo tɔn.

³⁸ Miklɔ́ti ji Cimɛyamu. Jeluzalɛ́mu wɛ yědɛɛ lɛ́ɛ nɔ, yě kpódó hɛ̌nnumɔ yětɔn ɖěvo lɛ́ɛ kpó.

³⁹ Nɛ̌ɛ ji Kícu, Kícu ji Sawúlu. Sawúlu ji Jonatáan, Maluki-Cua, Avinadávu kpódó Ɛcibáalu kpó.

⁴⁰ Jonatáan ji Mɛlibaalu. Mɛlibaalu ka ji Mika.

⁴¹ Mika ví lɛ́ɛ ɖíe: Pitɔ́ni, Mɛlɛ́ki kpódó Taxiléya kpó.

⁴² Axázi ji Yaela, Yaela ka ji Alɛmɛ́ti, Azimawɛ́ti kpódó Zimuli kpó. Zimuli ji Mɔsa,

⁴³ Mɔsa ji Binɛya, Binɛya ji Hlefaya, Hlefaya ji Eleasa, bɔ Eleasa ji Asɛ́lu.

⁴⁴ Asɛ́lu ji vǐ súnnu ayizɛ́n. Nyǐkɔ yětɔn lɛ́ɛ ɖíe: Azlikámu, Boklu, Yicimayɛ́li, Cealiya, Ovadia kpódó Hanáni kpó.