1 Tan 28 - MAWUXÓWÉMA

¹ Davídi kplé gǎn e ɖo Izlayɛ́li lɛ́ɛ bǐ ɖó Jeluzalɛ́mu: akɔtagán lɛ́ɛ, ahwankánɖó axɔ́sú ɔ́ tɔn sín gǎn lɛ́ɛ, sɔ́ja afatɔ́ngán lɛ́ɛ, sɔ́jakanwekogán lɛ́ɛ, gan e nɔ́ kpɔ́n dɔkun kpó kanlin kpó jí nú axɔ́sú ɔ́ lɛ́ɛ, gǎn e nɔ́ kpɔ́n dɔkun kpó kanlin kpó jí nú vǐ tɔn lɛ́ɛ, agooɖojǐe lɛ́ɛ, súnnu akowunká lɛ́ɛ, kpó súnnu glegbenu lɛ́ɛ bǐ kpó.

² Ée yě bǐ kplé ɔ́, axɔ́sú Davídi sí te bo ɖɔ: “Mɛ ce lɛ́ɛ mi, xɔ́ntɔn ce lɛ́ɛ mi, mi ɖótó mì. Nyɛ ɖésú kó lin ɖɔ un ná sá xwé ɖokpó, bɔ é ná nyí akɔjijɛgbá Mawu Mavɔmavɔ tɔn ɔ́ sín nɔtɛn, Mawu mǐtɔn sín afɔɖótɛn, bɔ un ko ɖo nǔ tɔn sɔ́ wɛ.

³ Lo ɔ́, Mawu ɖɔ nú mì ɖɔ: ‘Hwi wɛ ná sá xwé nú mì ǎ, ɖó ahwanfuntɔ́ wɛ a nyǐ, bó kɔn gbɛtɔ́ sín hun kɔn nyi ayǐ.’

⁴ Nǔ ɖo mɔ̌ có Mawu Mavɔmavɔ, Mawu Izlayɛ́li tɔn ɔ́ wɛ ká sɔ́ mì ɖo tɔ́ ce sín xwédo ɔ́ bǐ mɛ, bónú nyɛ kpó vǐ ce lɛ́ɛ kpó ná ɖu axɔ́sú ɖo Izlayɛ́li káká sɔ́yi. Đó, ɖ'ayǐ xóxó ɔ́, Judáa wɛ é sɔ́ gǎn. Énɛ́ ɔ́ gúdo ɔ́, é wá sɔ́ tɔ́ ce sín xwédo ɔ́ ɖo akɔta Judáa tɔn ɔ́ mɛ. Đo tɔ́ ce sín vǐ lɛ́ɛ mɛ ɔ́, nyɛ wɛ é jló bó sɔ́ axɔ́sú ɖó Izlayɛ́li togun ɔ́ bǐ nu.

⁵ Đo vǐ tobutóbú e é ná mì lɛ́ɛ mɛ ɔ́, vǐ ce Salomɔ́ɔ wɛ é sɔ́, bɔ é ná yi axɔ́súzinkpo Izlayɛ́li tɔn ɔ́ jí, bó ná ɖu axɔ́sú ɖo Mawu Mavɔmavɔ nyíkɔ mɛ.

⁶ É ɖɔ nú mì ɖɔ: ‘Vǐ towe Salomɔ́ɔ wɛ ná sá xwé nú mì, bɔ é ná ɖó kɔ́xota gěgé, ɖó un sɔ́ ɛ bɔ é ná nyí vǐ nú mì, bɔ un ná nyí tɔ́ n'i.

⁷ Ényí é xwédo nǔ e un zɔ́n lɛ́ɛ kpó nǔ e un ɖɔ lɛ́ɛ kpó ganjí lě e é ɖ'é wú gbɔn égbé din é ɔ́, un ná sɔ́ axɔ́súɖuɖu tɔn jínjɔ́n ayǐ káká sɔ́yi.’

⁸ Hǔn din ɔ́, ɖo Izlayɛ́li, togun Mawu Mavɔmavɔ tɔn ɔ́ nukɔn, ɖo Mawu mǐtɔn e ɖo tó ɖó mǐ wɛ é nukɔn ɔ́, mi bló nǔ e Mawu Mavɔmavɔ, Mawu mǐtɔn zɔ́n lɛ́ɛ bǐ. Mi bló mɔ̌ ɔ́, to ɖagbe ɖagbe élɔ́ e mɛ mi ɖe ɔ́ ná ɖo mitɔn nyí wɛ tɛgbɛ, bɔ mi ná jó dó nú vǐ mitɔn lɛ́ɛ, bɔ yě ná ɖu gǔ tɔn káká sɔ́yi.

⁹ Vǐ ce Salomɔ́ɔ, hwɛ ɔ́, a ɖǒ ná tunwun Mawu nyɛ tɔ́ towe tɔn, lobo sɛn é ɖokpónɔ géé, kpódó ayixa towe bǐ kpó. Đó Mawu Mavɔmavɔ nɔ́ mɔ nukúnnú jɛ ayixa lɛ́ɛ bǐ mɛ, é tunwun nǔ e lin wɛ è ɖe lɛ́ɛ bǐ. Ényí a ba ɛ ɔ́, é ná jó éɖée dó bɔ a nǎ mɔ ɛ. Lo ɔ́ ényí a jǒ e dó ɔ́, é ná jó we dó bǐ gbídígbídí.

¹⁰ A ɖǒ ná tunwun din ɖɔ Mawu Mavɔmavɔ sɔ́ we, bónú a nǎ sá xwé n'i, bɔ é ná nyí nɔtɛn tɔn. Hǔn bo kpan akɔ́n, bó jɛ azɔ̌ jí.”

Davídi zé xwé ɔ́ sín ɖiɖe lɛ́ɛ nú Salomɔ́ɔ

¹¹ Davídi zé Mawu Mavɔmavɔ xwé ɔ́ kpó xɔ e ná nɔ mɛ lɛ́ɛ kpó sín ɖiɖe nú Salomɔ́ɔ: dɔkun xɔ lɛ́ɛ, xɔ e ɖo síngbó jí lɛ́ɛ, xɔ e ɖo do lɛ́ɛ, kpódó xɔ e mɛ akɔjijɛgbá Mawu Mavɔmavɔ tɔn ná nɔ ɔ́ kpó.

¹² É lɛ́ zé nǔ e é lin bó ná bló ɖó xwé ɔ́ gbe lɛ́ɛ bǐ sín ɖiɖe n'i. É zé kɔ́xota lɛ́ɛ, xɔ e ná lɛ́ dó kɔ́xota lɛ́ɛ, xɔ e mɛ è nǎ bɛ́ xwé ɔ́ sín dɔkun lɛ́ɛ kpó nǔ è ɖe ɖó vo nú Mawu lɛ́ɛ kpó dó lɛ́ɛ bǐ sín ɖiɖe n'i.

¹³ É zé wěma e jí è wlǎn vɔ̌sánú-xwlémawutɔ́ lɛ́ɛ kpó Levíi ví lɛ́ɛ gbɛ́ta lɛ́ɛ kpó ɖó ɔ́ n'i, bó lɛ́ zé wěma e jí è wlǎn azɔ̌ e è nǎ wa ɖo Mawu Mavɔmavɔ xwé gbe lɛ́ɛ kpó nǔ e è nɔ zán ɖ'é mɛ lɛ́ɛ kpó n'i.

¹⁴ É ɖɔ siká kilóo nabí e ná kpé nǔ tɛnmɛ tɛnmɛ e è nǎ zě siká dó bló lɛ́ɛ, bó ɖɔ kpatágan kilóo nabí e ná kpé nǔ tɛnmɛ tɛnmɛ e è nǎ zé kpatágan dó bló lɛ́ɛ n'i.

¹⁵ É ɖɔ siká kilóo nabí e ná kpé sikázogbɛ́nhɛnnú kpó sikázogbɛ́n lɛ́ɛ kpó ɔ́ n'i, bó ɖɔ kpatágan kilóo nabí e ná kpé kpatáganzogbɛ́n-hɛnnú lɛ́ɛ kpó kpatáganzogbɛ́n lɛ́ɛ kpó ɔ́ n'i.

¹⁶ Sikátávo e jí è nǎ nɔ bɛ́ wɔ̌xúxú e è nǎ nɔ́ xwlé Mawu lɛ́ɛ ɖó lɛ́ɛ ɔ́, é ɖɔ siká kilóo nabí e ná kpé ɖokpó ɖokpó ɔ́ n'i. É ɖɔ kpatágan kilóo nabí e ná kpé kpatágantávo lɛ́ɛ ɔ́ n'i.

¹⁷ É ɖɔ siká akú kilóo nabí e ná kpé sikágáfu lɛ́ɛ, sikágannú lɛ́ɛ, kpó sikágoví lɛ́ɛ kpó ɔ́ n'i; é ɖɔ siká kilóo nabí e ná kpé sikábasya lɛ́ɛ ɔ́ n'i, bó ɖɔ kpatágan kilóo nabí e ná kpé kpatáganbasya lɛ́ɛ ɔ́ n'i.

¹⁸ É ɖɔ siká akú kilóo nabí e ná kpé vɔ̌sákpe e jí è nǎ nɔ́ dó zǎlínkpɔ́n zo ɖe ɔ́ n'i. É ɖɔ lě e è nǎ bló kɛkɛ́ví ɔ́ gbɔn ɔ́ n'i, ɖo tají ɔ́, lě e è nǎ bló wɛnsagun susunɔ e è nǎ zé siká dó bló lɛ́ɛ, bɔ awa yětɔn lɛ́ɛ ná ɖo dlɛ̌ndlɛ́n, bó ná cyɔ́n akɔjijɛgbá Mawu Mavɔmavɔ tɔn ɔ́ é.

¹⁹ Davídi ɖɔ: “Nǔ énɛ́ lɛ́ɛ bǐ ɖo wěma e un yí ɖo Mawu Mavɔmavɔ sí ɔ́ mɛ; wěma ɔ́ tín lě e è nǎ wa azɔ̌ lɛ́ɛ gbɔn ɔ́ mɛ ganjí.”

²⁰ Davídi ɖɔ nú vǐ tɔn Salomɔ́ɔ ɖɔ: “Vǐ ce, syɛ́nlǐn, kpan akɔ́n bó jɛ azɔ̌ jí. Ma ɖi xɛsi ó. Ado ní má hu we ó, Mawu Mavɔmavɔ, Mawu ce ná nɔ kpɔ́ xá we. É ná ɖe alɔ sín kan towe mɛ ǎ. É ná jó we dó ǎ káká bɔ azɔ̌ ɔ́ bǐ ná fó.

²¹ Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó sín gbɛ̌ta e ná wa sinsɛnzɔ́ ɖo Mawu Mavɔmavɔ xwé lɛ́ɛ lɔmɔ̌ ɖo akpá towe. Mɔ̌ ɖokpó ɔ́, azɔ̌ e ɖe bɔ è nǎ wa lɛ́ɛ ɔ́, gbɛtɔ́ ɖe ɖo gǎn lɛ́ɛ kpó togun ɔ́ bǐ kpó tɛ́ntin, bó ɖó jlǒ ɖagbe. Yě lɛ́ tunwun azɔ̌ ganjí, bɔ a hɛn ɔ́, a nǎ ɖeji dó yě wú.”