1 Tan 26 - MAWUXÓWÉMA

¹ Hɔnjínɔtɔ́ lɛ́ɛ lɔmɔ̌ ɖó gbɛ̌ta. Mɛcelemiyahu Kɔlée ví, Asáfu vívú e jɔ ɖo Kolée xwédo ɔ́ mɛ ɔ́,

² ɖó vǐ tɛ́nwe. Vǐ lɛ́ɛ sín nyǐkɔ ɖě jɛ ɖě gúdo ɖíe: Zekaliyahu, Yediaɛ́lu, Zevadiyahu, Yatiniyɛ́li,

³ Elámu, Yexoxanáni, Elihoenayi.

⁴ Ovɛ́di-Edɔ́mu ɖó vǐ tántɔn. Vǐ lɛ́ɛ sín nyǐkɔ ɖě jɛ ɖě gúdo ɖíe: Cemaya, Yexozavadi, Yoáxi, Sakáa, Nɛtanɛli,

⁵ Amumiyɛli, Isakáa, Pewuletayi, ɖó Mawu xo ɖɛ dó Ovɛ́di-Edɔ́mu jí.

⁶ Vǐ súnnu ɖaxó Ovɛ́di-Edɔ́mu tɔn Cemaya ɔ́ ji vǐ, bɔ yě ɖo ali ɖaxó ɖaxó nu ɖo hɛ̌n ɔ́ nu, ɖó súnnu glegbenu akowunká wɛ nú yě.

⁷ Cemaya ví lɛ́ɛ ɖíe: Ɔtini, Hlefayɛ́lu, Ovɛ́di, Ɛluzavadi kpó nɔví tɔn súnnu lɛ́ɛ kpó. Nɔví tɔn énɛ́ lɛ́ɛ ɔ́, súnnu glegbenu wɛ nú yě. Yě wɛ nyí Elihu kpó Semakiyáhu kpó.

⁸ Yě bǐ wɛ nyí Ovɛ́di-Edɔ́mu ví. Yě kpó vǐ yětɔn lɛ́ɛ kpó nɔví yětɔn lɛ́ɛ kpó bló gbɛtɔ́ kanɖé ko-nukún-we (62). Súnnu glegbenu wɛ yě bǐ nyǐ bó jɛ xá azɔ̌ ɔ́.

⁹ Mɛcelemiyahu ví lɛ́ɛ kpó nɔví tɔn lɛ́ɛ kpó bǐ bló gbɛtɔ́ afɔtɔn-nukún-atɔn. Súnnu glegbenu wɛ yě bǐ nyí.

¹⁰ Mɛlali ví Hosa ɔ́ ji vǐ bó sɔ́ vǐ tɔn Cimuli gǎn, có é wɛ ka nyí nukɔngbéví ǎ.

¹¹ Ilukyahu wɛ nyí Mɛlali ví wegɔ́ ɔ́, bɔ Tevaliyahu nyí atɔngɔ́ ɔ́. Zekaliyahu nyí ɛnɛgɔ́ ɔ́. Hosa ví súnnu lɛ́ɛ kpó nɔví tɔn súnnu lɛ́ɛ kpó bǐ bló gbɛtɔ́ wǒ-atɔn.

¹² Hɔnjínɔtɔ́ gbɛ́ta énɛ́ lɛ́ɛ kpó gǎn yětɔn lɛ́ɛ kpó, kpódó nɔví yětɔn lɛ́ɛ kpó ɖo azɔ̌ yětɔn wa wɛ ɖo Mawu Mavɔmavɔ xwé gbe.

¹³ Yě nyi akɔ gbɔn xwédo ɖokpó ɖokpó mɛ, bó tunwun mɛ e ná nɔ hɔn lɛ́ɛ ɖokpó ɖokpó jí ɖo yɔkpɔ́vú kpó mɛxó kpó mɛ é.

¹⁴ È nyi akɔ bɔ Cɛlɛmiyahu wɛ ná nɔ́ hɔn e ɖo zǎnzǎnhwe jí ɔ́ jí. Vǐ tɔn Zekaliyahu e nyí wěɖexámɛtɔ́ titewungbe ɖokpó ɔ́ wɛ akɔ sɔ́, bɔ é ná cɔ́ hɔn e ɖo taligbé é.

¹⁵ Hɔn e ɖo afɔligbé ɔ́, Ovɛ́di-Edɔ́mu wɛ akɔ e è nyi ɔ́ sɔ́ bɔ é ná cɔ́. Vǐ tɔn lɛ́ɛ ká ná cɔ́ xɔ e mɛ è nɔ bɛ́ agban lɛ́ɛ dó lɛ́ɛ.

¹⁶ Cupimu kpó Hosa kpó wɛ akɔ e è nyi ɔ́ sɔ́ bɔ yě ná cɔ́ hɔn e ɖo gbadahwe jí ɔ́, kpódó hɔn Calɛ́kɛ́ti tɔn kpó; hɔn énɛ́ wɛ è nɔ hun dó ali e è nɔ gbɔn yi kpó jí ɖo toxo ɔ́ mɛ é.

¹⁷ Levíi ví ayizɛ́n nɔ́ nɔ hɔntogbó zǎnzǎnhwe jí tɔn ɔ́ jí gbe ɖokpó, ɛnɛ nɔ́ nɔ totaligbé tɔn ɔ́ jí gbe ɖokpó, bɔ ɛnɛ nɔ́ nɔ afɔligbé tɔn ɔ́ jí gbe ɖokpó. Gbɛ̌ta we nɔ cɔ́ xɔ e mɛ è nɔ bɛ́ agban lɛ́ɛ dó lɛ́ɛ; mɛ we ɖo gbɛ̌ta ɖokpó mɛ.

¹⁸ Mɛ ɛnɛ nɔ nɔ ali e è nɔ gbɔn yi xɔ e ɖo gbadahwe jí ɔ́ kɔn ɔ́ jí, bɔ mɛ we nɔ nɔ xɔ ɔ́ mɛ.

¹⁹ Kolée kpó Mɛlali kpó sín vǐ e ɖo gbɛ̌ta hɔnjínɔtɔ́ lɛ́ɛ tɔn mɛ lɛ́ɛ nɛ́.

Azɔ̌ tají e è zɔ̌n Levíi ví ɖé lɛ́ɛ é

²⁰ Levíi ví ɖěvo lɛ́ɛ nɔ́ cɔ́ dɔkun e ɖo Mawu xwé gbe lɛ́ɛ, bó nɔ cɔ́ nǔ e è ɖe ɖó vo nú Mawu lɛ́ɛ.

²¹ Laedáni ví e jɔ ɖo Gɛɛcɔ́ni xwédo ɔ́ mɛ, bó nyí hɛ̌nnugán ɖo hɛ̌n yětɔn lɛ́ɛ ɖokpó ɖokpó nu lɛ́ɛ wɛ nyí Yexiyɛ́li kpó

²² vǐ tɔn Zetámu kpó Yoɛ́li kpó. Yědɛɛ lɛ́ɛ wɛ nɔ́ cɔ́ dɔkun e ɖo Mawu Mavɔmavɔ xwé gbe lɛ́ɛ.

²³ Đo xwédo Amulámu tɔn, Yisexáa tɔn, Eblɔ́n tɔn, kpódó Wuziyɛ́li tɔn kpó mɛ ɔ́,

²⁴ Cevuyɛ́lu e nyí Gɛɛcɔ́mu ví, bó nyí Mɔyízi vívú ɔ́ wɛ nyí dɔkunjíkpɔ́ntɔ́gán.

²⁵ Eliezɛ́ɛ, Gɛɛcɔ́ni nɔví lɛ́ɛ ɖo Cevuyɛ́li sín mɛ lɛ́ɛ mɛ; yě wɛ nyí: Hlexavíyahu Eliezɛ́ɛ ví ɔ́, bɔ Yecayahu, Yolámu, Zikli kpódó Celomíti kpó gɔ́ n'i.

²⁶ Celomíti kpó nɔví tɔn lɛ́ɛ kpó wɛ nɔ́ kpɔ́n nǔ e axɔ́sú Davídi kpó hɛ̌nnugán lɛ́ɛ kpó, kpó sɔ́ja afatɔ́ngán lɛ́ɛ, sɔ́jakanwekogán lɛ́ɛ kpódó ahwangán ɖě lɛ́ɛ kpó sɔ́ ɖó vo nú Mawu lɛ́ɛ bǐ jí.

²⁷ Nǔ e yě mɛ gǎn énɛ́ lɛ́ɛ hɛn wá sín ahwangbénu lɛ́ɛ ɖě wɛ yě sɔ́ ɖó vo nú Mawu, bó ná dó kpé nukún dó Mawu Mavɔmavɔ xwé ɔ́ wú.

²⁸ Celomíti kpó nɔví tɔn lɛ́ɛ kpó wɛ nɔ́ cɔ́ nǔ e Samuwɛ́li nǔmɔtɔ́ ɔ́, Sawúlu Kícu ví ɔ́, Avunɛ́ɛ Nɛ̌ɛ ví ɔ́ kpódó Jowabu Selúya ví ɔ́ kpó ɖe ɖó vo nú Mawu lɛ́ɛ bǐ.

²⁹ Kenaniyahu kpó vǐ tɔn lɛ́ɛ kpó wɛ nɔ́ kpé nukún dó to xó wú ɖo Izlayɛ́li. Yě wɛ nyí nǔjíkpɔ́ntɔ́, bó nyí hwɛɖɔtɔ́ ɖo Izlayɛ́li; Yisexáa kún mɛ wɛ yě jɔ ɖe.

³⁰ Hacaviyahu kpó súnnu glegbenu é ɖɔhun afatɔ́n nǔwɔntɔn kanwe ko (1.700) kpó wɛ nɔ kpé nukún dó Izlayɛ́li yíkúngban e ɖo gbadahwe jí nú Judɛ́ɛn tɔ é wú. Yě nɔ́ kpé nukún dó xó e ɖo sinsɛn li jí lɛ́ɛ wú, bó nɔ́ kpé nukún dó éé ɖo gbɛtɔ́ kpaa lɛ́ɛ tɛ́ntin lɛ́ɛ wú. Eblɔ́n kún mɛ wɛ yě jɔ ɖe.

³¹ Yeliya kpa acɛ dó mɛ e jɔ ɖo Eblɔ́n kún mɛ lɛ́ɛ bǐ nu. Hwenu e axɔ́sú Davídi ɖo xwe kanɖé (40) bló wɛ ɖo zinkpo jí ɔ́, è ba do nú mɛ e jɔ ɖo Eblɔ́n kún mɛ lɛ́ɛ, bó wá mɔ gbɛtɔ́ súnnu glegbenu e jɔ ɖo kún énɛ́ mɛ lɛ́ɛ ɖo Yazɛ́ɛ toxo mɛ, ɖo Galadi yíkúngban jí.

³² Yeliya kpó nɔví tɔn lɛ́ɛ kpó ɔ́, súnnu glegbenu wɛ yě nyǐ. Yě bǐ bló hɛ̌nnugán afɔwó nǔwɔntɔn kanwe ko (2.700). Axɔ́sú Davídi zé yě ɖó akɔta Hwlibɛ́ni tɔn, Gadi tɔn, kpódó akɔta vlɔ́ Manasée tɔn ɔ́ kpó nu, bónú yě ná nɔ́ kpé nukún dó xó e ɖo Mawu sinsɛn li jí lɛ́ɛ wú, bó ná nɔ́ kpé nukún dó éé ɖo gbɛtɔ́ kpaa lɛ́ɛ tɛ́ntin lɛ́ɛ wú.