1 Tan 24 - MAWUXÓWÉMA

¹ Aalɔ́ɔn ví lɛ́ɛ ɔ́, è to yě ɖó sonu sonu. Aalɔ́ɔn ɖó vǐ ɛnɛ; yě wɛ nyí Nadavu, Avihu, Eleazáa kpó Itamáa kpó.

² Nadavu kpó Avihu kpó kú jɛ nukɔn nú tɔ́ yětɔn. Yě ká ɖó vǐ ɖě ǎ. Bɔ Eleazáa kpó Itamáa kpó kɛ́ɖɛ́ nɔ́ wa vɔ̌sánú-xwlémawutɔ́ sín azɔ̌ ɔ́.

³ Ée é lín xóó ɔ́, Davídi má vɔ̌sánú-xwlémawutɔ́ lɛ́ɛ ɖó sonu sonu, lě e azɔ̌ e wa gbé yě ja ɔ́ byɔ́ gbɔn é; Sadɔ́ku Eleazáa ví ɔ́ kpó Aximɛlɛ́ki Itamáa ví ɔ́ kpó dó alɔ Davídi bɔ é má yě.

⁴ È wǎ mɔ ɖɔ Eleazáa ví lɛ́ɛ sukpɔ́ hú Itamáa ví lɛ́ɛ. Énɛ́ ɔ́ wú wɛ è mǎ Eleazáa ví lɛ́ɛ ɖó xwédo afɔtɔn-nukún-ɖokpó, bó má Itamáa ví lɛ́ɛ ɖó xwédo tántɔn, bɔ xwédo ɖokpó ɖokpó ɖó gǎn tɔn.

⁵ Akɔ wɛ è nyi bo dó má yě, ɖó gǎn e ɖo Mawu Mavɔmavɔ xwé ɔ́ sín azɔ̌ ɔ́ nu, bɔ è nɔ lɛ́ ylɔ́ yě ɖɔ “azɔ̌gán Mawu tɔn” lɛ́ɛ kó ɖo Eleazáa kpó Itamáa kpó ví lɛ́ɛ mɛ.

⁶ Wěgbójínɔtɔ́ Cemaya Nɛtanɛli e jɔ ɖo akɔta Levíi tɔn ɔ́ mɛ sín vǐ ɔ́, wlán nyǐkɔ yětɔn dó wěma mɛ; axɔ́sú ɔ́, gǎn lɛ́ɛ, vɔ̌sánú-xwlémawutɔ́ Sadɔ́ku, Aximɛlɛ́ki Abiyatáa ví ɔ́, hɛ̌nnugán vɔ̌sánú-xwlémawutɔ́ lɛ́ɛ tɔn lɛ́ɛ kpó Levíi ví lɛ́ɛ tɔn kpó nukɔn wɛ é wlán nyǐkɔ énɛ́ lɛ́ɛ ɖe. È nyi akɔ azɔn we ɖě jɛ ɖě gúdo dó xwédo Eleazáa tɔn, bó nyi azɔn ɖokpó géé dó xwédo Itamáa tɔn .

⁷ Gǎn e è nyi akɔ bo sɔ́ lɛ́ɛ ɖíe: Akɔ nukɔntɔn e è nyi ɔ́ sɔ́ Yexoyalivu, bɔ wegɔ́ ɔ́ sɔ́ Yedaya.

⁸ Akɔ atɔngɔ́ ɔ́ sɔ́ Halimu, bɔ ɛnɛgɔ́ ɔ́ sɔ́ Seolímu.

⁹ Akɔ atɔ́ɔ́ngɔ́ ɔ́ sɔ́ Malukíya, bɔ ayizɛ́ngɔ́ ɔ́ sɔ́ Miyamini.

¹⁰ Akɔ tɛ́nwegɔ́ ɔ́ sɔ́ Hakɔ́si, bɔ tántɔngɔ́ ɔ́ sɔ́ Abiya.

¹¹ Akɔ tɛ́nnɛgɔ́ ɔ́ sɔ́ Yecúwa, bɔ wǒgɔ́ ɔ́ sɔ́ Cekaniyahu.

¹² Akɔ wǒ-ɖokpógɔ́ ɔ́ sɔ́ Eliyacivu, bɔ wěwegɔ́ ɔ́ sɔ́ Yakímu.

¹³ Akɔ wǒ-atɔngɔ́ ɔ́ sɔ́ Hupa, bɔ wǒ-ɛnɛgɔ́ ɔ́ sɔ́ Yɛcɛveavu.

¹⁴ Akɔ afɔtɔngɔ́ ɔ́ sɔ́ Biluga, bɔ afɔtɔn-nukún-ɖokpógɔ́ ɔ́ sɔ́ Imumɛ́ɛ.

¹⁵ Akɔ afɔtɔn-nukún-wegɔ́ ɔ́ sɔ́ Hezíi, bɔ afɔtɔn-nukún-atɔngɔ́ ɔ́ sɔ́ Hapisɛsi.

¹⁶ Akɔ afɔtɔn-nukún-ɛnɛgɔ́ ɔ́ sɔ́ Petaxiya, bɔ kogɔ́ ɔ́ sɔ́ Yexezikɛ́li.

¹⁷ Akɔ ko-nukún-ɖokpógɔ́ ɔ́ sɔ́ Yakíni, bɔ ko-nukún-wegɔ́ ɔ́ sɔ́ Gamúlu.

¹⁸ Akɔ ko-nukún-atɔngɔ́ ɔ́ sɔ́ Deláyahu, bɔ ko-nukún-ɛnɛgɔ́ ɔ́ sɔ́ Maaziyahu.

¹⁹ Yě mɛ énɛ́ lɛ́ɛ wɛ è ɖe bo sɔ́ azɔ̌ dó así nú yě, bɔ yě ná nɔ́ wa ɖo Mawu Mavɔmavɔ xwé ɔ́ gbe lě e Mawu Mavɔmavɔ, Mawu Izlayɛ́li tɔn ɔ́ ɖɔ nú tɔ́gbó yětɔn Aalɔ́ɔn bɔ é ɖɔ nú yě gbɔn é.

Levíi ví ɖěvo lɛ́ɛ

²⁰ È sɔ́ Levíi ví ɖěvo lɛ́ɛ: È sɔ́ Cuvayɛ́li ɖo Amulámu ví lɛ́ɛ mɛ, bó sɔ́ Yɛxideyahu ɖo Cuvayɛ́li ví lɛ́ɛ mɛ.

²¹ È sɔ́ Yiciya ɖo Hlexavíyahu ví lɛ́ɛ mɛ. Gǎn wɛ é nyí.

²² È sɔ́ Celomɔti ɖo Yisexáa ví lɛ́ɛ mɛ, bó sɔ́ Yaxáti ɖo Celomɔti ví lɛ́ɛ mɛ.

²³ Eblɔ́n ví lɛ́ɛ ɖíe: Yeliyahu wɛ jɛ nukɔn, bɔ Amaliyahu nyí wegɔ́; Yaxaziɛ́li nyí atɔngɔ́ ɔ́, bɔ Yekamɛyamu nyí ɛnɛgɔ́ ɔ́.

²⁴ Wuziyɛ́li ví ɔ́ ɖíe: Mika. È sɔ́ Camíi ɖo Mika ví lɛ́ɛ mɛ.

²⁵ È sɔ́ Zekaliyahu ɖo Yiciya ví lɛ́ɛ mɛ; Yiciya ɔ́, Mika nɔví wɛ.

²⁶ Mɛlali vǐ lɛ́ɛ ɖíe: Maxli, Muci kpó vǐ tɔn Yaaziyahu ví lɛ́ɛ kpó.

²⁷ Vǐ e Yaaziyahu Mɛlali ví ɔ́ ji lɛ́ɛ ɖíe: Coxámu, Zakúu kpó Ivli kpó.

²⁸ Maxli ji Eleazáa, Eleazáa ka ji vǐ ɖě ǎ.

²⁹ Maxli lɛ́ ji Kícu, bɔ Kícu ji Yelaximɛyɛ́li.

³⁰ Muci ví lɛ́ɛ ɖíe: Maxli, Edɛ́ɛ kpódó Yelimɔ́ti kpó. Levíi ví lɛ́ɛ nɛ́, kpó hɛ̌nnu yětɔn yětɔn kpó.

³¹ Yě lɔmɔ̌ nyi akɔ nɔví yětɔn Aalɔ́ɔn ví lɛ́ɛ ɖɔhun, bó tunwun hwenu e azɔ̌ ná jɛ mɛ ɖokpó ɖokpó jí dó é. Yě nyi akɔ ɔ́ ɖo axɔ́sú Davídi, Sadɔ́ku, Aximɛlɛ́ki, hɛ̌nnugán vɔ̌sánú-xwlémawutɔ́ lɛ́ɛ tɔn, kpódó Levíi ví lɛ́ɛ tɔn kpó nukɔn. Lě e è blǒ gbɔn nú hɛ̌nnu e mɛ vǐ e nyí mɛxó é ɖe ɔ́ jɛ́n è lɛ̌ bló gbɔn nú éé mɛ vǐ e nyí yɔkpɔ́vú ɔ́ ɖe é.