1 Tan 23 - MAWUXÓWÉMA

¹ Ée Davídi wá kpo nyɔ̌xó bǐ ɔ́, é sɔ́ vǐ tɔn Salomɔ́ɔ axɔ́sú ɖó Izlayɛ́li togun ɔ́ nu.

² É ylɔ́ gǎn e ɖo Izlayɛ́li lɛ́ɛ bǐ kpó vɔ̌sánú-xwlémawutɔ́ lɛ́ɛ kpó, kpódó Levíi ví lɛ́ɛ kpó kplé.

³ È xa Levíi ví e xwe yětɔn bɛ́ sín gban (30) káká sɔ́yi lɛ́ɛ. Súnnu lɛ́ɛ wɛ è xa, bɔ yě bló gbɛtɔ́ adɔ̌kpo ɖě děgba ɛnɛ afɔwó (38.000).

⁴ Ée è xa yě mɔ̌ ɔ́, Davídi kpɔ́n yě mɛ, bó ɖe gbɛtɔ́ adɔ̌kpo ɖě děgba (24.000), bɔ yě ná nɔ Mawu Mavɔmavɔ xwé ɔ́ sín azɔ̌ lɛ́ɛ nu. Bó ɖe gbɛtɔ́ děgba ɖě afɔwó (6.000), bɔ yě ná nyí nǔjíkpɔ́ntɔ́, bó ná nyí hwɛɖɔtɔ́.

⁵ É ɖe gbɛtɔ́ děgba (4.000), bɔ yě ná nyí hɔnjínɔtɔ́, bó lɛ́ ɖe gbɛtɔ́ děgba (4.000), bɔ yě ná nɔ́ ɖo Mawu Mavɔmavɔ kpa wɛ kpó nǔxonú e Davídi zɔ́n bɔ è blǒ bó ná nɔ́ dó kpa ɛ ná lɛ́ɛ kpó.

⁶ Ée Davídi bló mɔ̌ ɔ́, é má Levíi ví lɛ́ɛ dó xwédo yětɔn yětɔn mɛ: xwédo Gɛɛcɔ́ni tɔn, Kexáti tɔn kpó Mɛlali tɔn kpó.

⁷ Gɛɛcɔ́ni ví lɛ́ɛ ɖíe: Laedáni kpó Cimɛ́yi kpó.

⁸ Laedáni ɖó vǐ súnnu atɔn. Yě wɛ nyí Yexiyɛ́li, Zetámu, kpó Yoɛ́li kpó; Yexiyɛ́li wɛ ɖo yě nu.

⁹ Cimɛ́yi ɖó vǐ súnnu atɔn. Yě wɛ nyí Celomíti, Haziyɛ́li kpó Halani kpó. Yědɛɛ lɛ́ɛ wɛ nyí hɛ̌nnugán e ɖo xwédo Laedáni tɔn mɛ lɛ́ɛ.

¹⁰ Cimɛ́yi lɛ́ ɖó vǐ súnnu ɛnɛ. Yě wɛ nyí Yaxáti, Ziza, Yewúci kpó Beliya kpó.

¹¹ Yaxáti ɔ́ wɛ ɖo yě nu, bɔ Ziza bɔ dó wǔ tɔn. Yewúci kpó Beliya kpó ji vǐ gěgé ǎ, bɔ è dɔn yě ɖó kpɔ́ bɔ yě nyí hɛ̌nnu ɖokpó géé.

¹² Kexáti ɖó vǐ súnnu ɛnɛ. Yě wɛ nyí Amulámu, Yisexáa, Eblɔ́n kpódó Wuziyɛ́li kpó.

¹³ Amulámu ví súnnu lɛ́ɛ ɖíe: Aalɔ́ɔn kpó Mɔyízi kpó. È ɖe Aalɔ́ɔn ɖó vo, bɔ é ná nɔ́ wa azɔ̌ ɖo Tɛn mímɛ́ bǐ ɔ́ mɛ, é kpó vǐ tɔn súnnu lɛ́ɛ kpó káká sɔ́yi. Yě wɛ ná nɔ́ dó zǎlínkpɔ́n zo nú Mawu Mavɔmavɔ, bó ná nɔ́ wa azɔ̌ nú Mawu Mavɔmavɔ, lobo ná nɔ́ xo ɖɛ dó mɛ jí ɖo Mawu Mavɔmavɔ nyǐkɔ mɛ.

¹⁴ Mɔyízi ɔ́, ɖɛ̌mɛnu Mawu tɔn wɛ, có vǐ tɔn lɛ́ɛ ɔ́, gbɛtɔ́ kpaa ɖɔhun wɛ yě cí ɖo akɔta Levíi tɔn ɔ́ mɛ.

¹⁵ Mɔyízi ví lɛ́ɛ ɖíe: Gɛɛcɔ́mu kpó Eliezɛ́ɛ kpó.

¹⁶ Gɛɛcɔ́mu ví ɔ́ nɔ́ nyí Cevuyɛ́li. Gǎn wɛ é nyí.

¹⁷ Eliezɛ́ɛ ɖó vǐ súnnu ɖokpó, bɔ é nɔ́ nyí Hlexavíya. Gǎn wɛ é nyí. Eliezɛ́ɛ sɔ́ ɖó vǐ ɖě ǎ, lo ɔ́, Hlexavíya ví lɛ́ɛ sukpɔ́ ɖésú.

¹⁸ Yisexáa ɖó vǐ súnnu ɖokpó, bɔ é nɔ́ nyí Celomɔti; gǎn wɛ é nyí.

¹⁹ Eblɔ́n ví lɛ́ɛ ɖíe: Yeliyahu wɛ jɛ nukɔn, bɔ Amaliya nyí wegɔ́ ɔ́, Yaxaziɛ́li nyí atɔngɔ́ ɔ́, bɔ Yekamɛyamu nyí ɛnɛgɔ́ ɔ́.

²⁰ Wuziyɛ́li ví lɛ́ɛ ɖíe: Mika wɛ jɛ nukɔn, bɔ Yiciya nyí wegɔ́ ɔ́.

²¹ Mɛlali ví lɛ́ɛ ɖíe: Maxli kpó Muci kpó. Maxli ví lɛ́ɛ ɖíe: Eleazáa kpó Kícu kpó.

²² Eleazáa ji vǐ súnnu ɖě cóbó kú ǎ. Amɔ̌, é ɖó vǐ nyɔ̌nu, bɔ nɔví tɔn Kícu sín vǐ lɛ́ɛ da yě.

²³ Muci ɖó vǐ súnnu atɔn: Maxli, Edɛ́ɛ kpó Yelemɔ́ti kpó.

²⁴ Levíi ví e nyí hɛ̌nnugán bɔ è sɔ́ yě mɛ ɖokpó ɖokpó sín kɛ́n lɛ́ɛ nɛ́. Yědɛɛ lɛ́ɛ wɛ è ɖe, bɔ mɛ e ɖó bɛ́ sín xwe ko káká sɔ́yi lɛ́ɛ nɔ́ wa azɔ̌ ɖo Mawu Mavɔmavɔ xwé ɔ́ gbe.

²⁵ Nǔgbó ɔ́, Davídi ko ɖɔ: “Mawu Mavɔmavɔ, Mawu Izlayɛ́li tɔn ɔ́ kó ná ayij'ayǐ togun tɔn, bɔ é ɖésúnɔ ɔ́ ɖo Jeluzalɛ́mu káká sɔ́yi.

²⁶ Bɔ Levíi ví lɛ́ɛ sɔ́ ná nɔ́ ɖíɖá goxɔ Mawu Mavɔmavɔ tɔn ɔ́ ɖě ǎ; yě ká sɔ́ ná nɔ́ ɖíɖá nǔ e è nɔ zán ɖo goxɔ ɔ́ mɛ lɛ́ɛ ɖě ǎ.”

²⁷ Énɛ́ ɔ́, è sɔ́ Levíi ví e xwe yětɔn bɛ́ sín ko káká sɔ́yi lɛ́ɛ sín kɛ́n, lě e gbeta gǔdo gúdo tɔn e Davídi ɖe tɔ́n ɔ́ ɖɔ gbɔn é.

²⁸ È zě Levíi ví lɛ́ɛ ɖó Aalɔ́ɔn ví lɛ́ɛ sín acɛ mɛ, bɔ yě ná nɔ́ wa azɔ̌ ɖo Mawu Mavɔmavɔ xwé gbe, bó ná nɔ wa azɔ̌ ɖo kɔ́xota lɛ́ɛ, bó ná nɔ wa azɔ̌ ɖo xɔ e bɔ dó Mawu Mavɔmavɔ sín xɔ ɔ́ wú lɛ́ɛ mɛ. Yě ná nɔ́ slá wǔ nú nǔ e è nɔ zán ɖo Mawu Mavɔmavɔ xwé gbe lɛ́ɛ bǐ bó ná nɔ́ wa azɔ̌ ɖěvo ɖěvo lɛ́ɛ ɖo xwé ɔ́ gbe.

²⁹ Yě ná nɔ́ ɖa wɔ̌xúxú e è nǎ nɔ xwlé Mawu Mavɔmavɔ é; linfín e è nǎ nɔ́ sá jinukún vɔ́ ná ɔ́, yě wɛ ná nɔ́ wa azɔ̌ tɔn: yě ná nɔ́ ɖa acɔnmɔ tɔ́n ma ɖ'é mɛ; yě ná nɔ́ ɖa atá ɖo ganzɛ́n wɛnjɛ mɛ, bó ná nɔ́ ɖa atá ɖěvo ɖěvo lɛ́ɛ. Yě ná nɔ́ kpɔ́n ɖɔ nǔjlɛ́ká lɛ́ɛ kpó nǔjlɛ́kpo lɛ́ɛ kpó bǐ sɔgbe a jí.

³⁰ Yě ɖó ná nɔ́ ɖo Mawu Mavɔmavɔ xwé gbe zǎnzǎn gbada, bó ná nɔ́ mlá Mawu Mavɔmavɔ, lobo ná nɔ́ kpa susu n'i.

³¹ Yě ná nɔ́ sá vɔ̌ e è nɔ dó zo lɛ́ɛ nú Mawu Mavɔmavɔ hwebǐnu ɖo gbɔjɛzán lɛ́ɛ gbe, bó ná nɔ́ sá gbe e gbe sun wá jǐ é, bó ná nɔ́ sá xwezán ɖě lɛ́ɛ bǐ gbe. Yě ná nɔ́ wa azɔ̌ yětɔn ɖo Mawu Mavɔmavɔ xwé gbe hwebǐnu; yě ná nɔ́ bló azɔn nabí e sɛ́n ɔ́ ɖɔ é.

³² Yě ná nɔ́ kpé nukún dó goxɔ Mawu Mavɔmavɔ tɔn ɔ́ kpó tɛn mímɛ́ bǐ ɔ́ kpó wú, bó ná nɔ dó alɔ nɔví yětɔn Aalɔ́ɔn ví lɛ́ɛ ɖo azɔ̌ e yě nɔ́ wa ɖo Mawu Mavɔmavɔ xwé gbe lɛ́ɛ kɔn.