1 Tan 19 - MAWUXÓWÉMA

È kɔ́n wi nú gǎn hɔn-yitɔ́ Davídi tɔn lɛ́ɛ

¹ Azǎn ɖé jɛ ǎ bɔ Naxáci, axɔ́sú Amumɔ́ɔ ví lɛ́ɛ tɔn zán kú, bɔ vǐ tɔn jɛ do tɔn mɛ.

² Davídi nɔ ɖɔ dó ayi mɛ ɖɔ: “Un ná ɖe xomɛnyínyɔ́ ce xlɛ́ Hanúni, Naxáci ví ɔ́, ɖó tɔ́ tɔn nyɔ́ xomɛ dó wǔ ce.” Ée Davídi lin mɔ̌ ɔ́, é sɛ́ mɛ dó, nú yě ná yi dó tɔ́ tɔn e kú ɔ́ sín nǔwamɛgbe e. Ée mɛsɛntɔ́ Davídi tɔn lɛ́ɛ yi Amumɔ́ɔ ví lɛ́ɛ sín tomɛ, ɖo Hanúni gɔ́n, bó ná dó nǔwamɛgbe e ɔ́,

³ gǎn hɔn-yitɔ́ Amumɔ́ɔ ví lɛ́ɛ tɔn yi ɖɔ nú Hanúni ɖɔ: “A lin ɖɔ tɔ́ towe ná zé su wú jɛ́n Davídi sɛ́ mɛsɛntɔ́ tɔn lɛ́ɛ dó ɖɔ yě ní wá dó nǔwamɛgbe we a? Yě ná wá kpɔ́n ayǐ, bó ná wá gba to wú wɛ é sɛ́ mɛsɛntɔ́ tɔn lɛ́ɛ dó gɔ̌n towe vlafo ǎ cé?”

⁴ Ée Hanúni se mɔ̌ ɔ́, é wlí mɛsɛntɔ́ Davídi tɔn lɛ́ɛ. É ɖɔ bɔ è xwlɛ́ atán yětɔn, bó zɛ awu yětɔn sín nɛgbé káká wá gogó jí, lobo nya yě.

⁵ È yi ɖɔ nú Davídi. Ée é se mɔ̌ ɔ́, é sɛ́ mɛ dó gbě yětɔn mɛ, bɔ è yi kpé yě; amɔ̌, winnyá hu mɛsɛntɔ́ lɛ́ɛ ɖésú, ɖó nǔ e è wa xá yě ɔ́ wútu. Axɔ́sú Davídi ɖɔ sɛ́ dó yě ɖɔ yě ní nɔ Jeliko káká nú atán yětɔn ní wú cóbónú yě ní wá xwé.

Davídi fun ahwan xá Amumɔ́ɔ ví lɛ́ɛ kpó Silíinu lɛ́ɛ kpó

⁶ Ée Amumɔ́ɔ ví lɛ́ɛ mɔ ɖɔ émí zé émíɖée dó xomɛ nú Davídi ɔ́, Hanúni kpó Amumɔ́ɔ ví lɛ́ɛ kpó sɛ́ kpatágan tɔ́nu gban dó, bo da kɛkɛ́ví kpó sɔ́xátɔ́ lɛ́ɛ kpó ɖo Silíinu e ɖo Mɛzopotamíi lɛ́ɛ sí, bó da ɖo Silíinu e ɖo Maaka lɛ́ɛ kpó ée ɖo Sova lɛ́ɛ kpó sí.

⁷ Yě da kɛkɛ́ví adɔ̌kpo ɖě děgba atɔn (32.000), bó da axɔ́sú Maaka tɔn ɔ́ kpódó togun tɔn kpó, bɔ yě wǎ ɖó gɔnu ɖó Madaba nukɔn. Amumɔ́ɔ ví lɛ́ɛ lɔmɔ̌ tɔ́n sín toxo yětɔn lɛ́ɛ mɛ, bó sɛ yěɖée kplé, bó ɖidó ahwan fun gbé.

⁸ Ée Davídi se nǔ e wa wɛ Amumɔ́ɔ ví lɛ́ɛ ɖe ɔ́, é sɛ́ ahwangán Jowabu kpó ahwanfuntɔ́ syɛ́nsyɛ́n lɛ́ɛ kpó dó ahwangbénu.

⁹ Amumɔ́ɔ ví lɛ́ɛ sɔ́ ahwannú, bó wá to yěɖée ɖó Hlaba, tota yětɔn ɔ́ sín hɔntogbó kpá. Axɔ́sú e wá lɛ́ɛ so gbɛ̌ ɖo akpá ɖěvo xwé ɖo ahwangbé ɔ́ nu.

¹⁰ Jowabu mɔ ɖɔ kɛntɔ́ ɖo gǔdo nukɔn. Ée nǔ ɖo mɔ̌ ɔ́, é cyán sɔ́ja Izlayɛ́li tɔn e syɛ́n hú ɖě lɛ́ɛ bǐ lɛ́ɛ, bɔ yě húzú kpan nukɔn sɔ́ja Silíinu lɛ́ɛ.

¹¹ É zé nɔví tɔn Avicáyi ɖó sɔ́ja tɔn e kpo lɛ́ɛ nu, bɔ yě húzú kpan nukɔn Amumɔ́ɔ ví lɛ́ɛ.

¹² Jowabu ɖɔ nú nɔví tɔn Avicáyi ɖɔ: “Nú Silíinu lɛ́ɛ ɖo gǎn hú mì wɛ ɔ́, a nǎ wá dó alɔ mì. Nú é ka nyí ɖɔ Amumɔ́ɔ ví lɛ́ɛ wɛ ɖo gǎn hú hwɛ wɛ ɔ́, nyɛ ná wá dó alɔ we.

¹³ Kpan akɔ́n. Wǎ mǐ ván kan bó fun ahwan nú togun mǐtɔn kpó toxo Mawu Mavɔmavɔ, Mawu mǐtɔn tɔn lɛ́ɛ kpó; Mawu Mavɔmavɔ ní ka bló lě e é jló gbɔn é.”

¹⁴ Jowabu kpó ahwanfuntɔ́ tɔn lɛ́ɛ kpó sí ahwan te dó Silíinu lɛ́ɛ jí, bɔ Silíinu lɛ́ɛ hɔn ɖo Jowabu nukɔn.

¹⁵ Ée Amumɔ́ɔ ví lɛ́ɛ mɔ ɖɔ Silíinu lɛ́ɛ hɔn ɔ́, yě lɔmɔ̌ hɔn ɖo Avicáyi, Jowabu nɔví ɔ́ nukɔn, bó yi byɔ́ toxo ɔ́ mɛ. Énɛ́ ɔ́, Jowabu lɛ́ kɔ wá Jeluzalɛ́mu.

¹⁶ Ée Silíinu lɛ́ɛ mɔ ɖɔ Izlayɛ́li sɔ́ja lɛ́ɛ ɖu ɖo émí jí ɔ́, yě sɛ́ mɛ dó Silíinu e ɖo Efláti tɔ ɔ́ gúdo dɔ̌n lɛ́ɛ gbé mɛ, bɔ Cofáki ahwangán Hadadɛzɛ́ɛ tɔn ɔ́ zɔn yě nu.

¹⁷ È yi ɖɔ nú Davídi. Ée é se mɔ̌ ɔ́, é kplé ahwangɔnu Izlayɛ́li tɔn ɔ́ bǐ, bó dó asá Judɛ́ɛn tɔ ɔ́; é sɛ yi yě gɔ́n, bó tɔ́n ahwan yě. Davídi húzú kpan nukɔn Silíinu e ɖo ahwan fun xá ɛ wɛ lɛ́ɛ.

¹⁸ Silíinu lɛ́ɛ hɔn ɖo Izlayɛ́li ví lɛ́ɛ nukɔn. Davídi hu ahwanfuntɔ́ yětɔn lɛ́ɛ, bó hu sɔ́ yětɔn e nɔ́ dɔn ahwankɛkɛ́ví lɛ́ɛ děgba ɖě afɔwó-afatɔ́n (7.000), bó hu sɔ́ja adɔ̌kpo we (40.000). É hu Cofáki ahwangán ɔ́ lɔmɔ̌.

¹⁹ Ée axɔ́sú e ɖo Hadadɛzɛ́ɛ glɔ́ lɛ́ɛ bǐ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě gbɔ bó dó hwɛ gbo xá Davídi, bó nɔ acɛkpikpa tɔn mɛ. Énɛ́ ɔ́, Silíinu lɛ́ɛ sɔ́ jló ná dó alɔ Amumɔ́ɔ ví lɛ́ɛ ǎ.