1 Tan 16 - MAWUXÓWÉMA

¹ Ée è zě akɔjijɛgbá Mawu tɔn ɔ́ wá ɔ́, è zě ɖó goxɔ e Davídi ko gbá ɖ'ayǐ n'i ɔ́ tɛ́ntin, bó sá vɔ̌ e è nɔ dó zo ɔ́ kpódó kɔnɖókpɔ́ vɔ́ kpó nú Mawu.

² Ée Davídi sá vɔ̌ lɛ́ɛ fó ɔ́, é xo ɖɛ dó togun ɔ́ jí ɖo Mawu Mavɔmavɔ nyǐkɔ mɛ.

³ Énɛ́ ɔ́ gúdo ɔ́, è nǎ gbe ɖɔ è nǐ ná wɔ̌xúxú kloklo ɖokpó dǎti xúxú mlímlí ɖokpó ɖokpó kpódó vǐwun xúxú mlímlí kpó mɛ ɖokpó ɖokpó. Bɔ è mǎ nú Izlayɛ́li togun ɔ́ bǐ, súnnu kpó nyɔ̌nu kpó.

Levíi ví lɛ́ɛ ji han dó kpa susu nú Mawu

⁴ Davídi ɖe Levíi ví ɖé lɛ́ɛ bɔ yě ná nɔ́ wa azɔ̌ ɖo akɔjijɛgbá Mawu Mavɔmavɔ tɔn ɔ́ nukɔn. Yě ná nɔ sú xó ylɔ́ Mawu Mavɔmavɔ, Mawu Izlayɛ́li tɔn ɔ́; yě ná nɔ xomlá ɛ, bó ná nɔ kpa susu n'i.

⁵ Yě mɛ e é ɖe lɛ́ɛ ɖíe: Asáfu; é wɛ ɖo yě nu, bɔ Zekaliya bɔ dó wǔ tɔn. Aziyɛ́li, Cemilamɔti, Yexiyɛ́li, Matitiahu, Eliavu, Benayahu, Ovɛ́di-Edɔ́mu kpó Yeyiɛ́li kpó ɖo agǐdigbo kpó kanhún kpó xo wɛ, bɔ Asáfu ɖo gan xo d'é mɛ wɛ.

⁶ Vɔ̌sánú-xwlémawutɔ́ Benayahu kpó Yaxaziɛ́li kpó ɖo kpɛn kún wɛ magbokɔ ɖo akɔjijɛgbá Mawu tɔn ɔ́ nukɔn.

⁷ Gbe énɛ́ ɔ́ gbe wɛ Davídi ɖe Asáfu kpó azɔ̌gbɛ́ tɔn lɛ́ɛ kpó azɔn nukɔntɔn ɔ́, bónú yě ná nɔ kpa susu nú Mawu Mavɔmavɔ.

⁸ Mi kpa Mawu Mavɔmavɔ, mi sú xó bó ɖɔ é wɛ nyí Mawu. Mi jlá nǔ ɖaxó ɖaxó e é bló lɛ́ɛ nú togun lɛ́ɛ.

⁹ Mi ji han, mi ji han dó kpa susu n'i. Mi ɖɔ nǔ ɖagbe ɖagbe e é bló lɛ́ɛ bǐ.

¹⁰ Mi sɔ́ nyǐkɔ tɔn mímɛ́ ɔ́ dó xɔ susu. Mɛ e ɖo Mawu Mavɔmavɔ ba wɛ lɛ́ɛ ní j'awǎ.

¹¹ Mi hɔn yi su Mawu Mavɔmavɔ, mi gán jɛ wǔ tɔn, mi ba ná nɔ kpɔ́ xá ɛ hwebǐnu.

¹² Mi flín nǔjíwǔ e é bló lɛ́ɛ, bó flín nǔ e é jlɛ́ lɛ́ɛ kpó hwɛ e é ɖɔ lɛ́ɛ kpó.

¹³ Mɛsɛntɔ́ tɔn Izlayɛ́li ví lɛ́ɛ mi, mi Jakɔ́bu ví e é cyán lɛ́ɛ mi, mi flín nǔ énɛ́ lɛ́ɛ e Mawu Mavɔmavɔ wa lɛ́ɛ.

¹⁴ Mawu Mavɔmavɔ wɛ nyí Mawu mǐtɔn. É wɛ nɔ́ ɖɔ hwɛ dó nǔ e ɖo ayǐkúngban jí lɛ́ɛ bǐ.

¹⁵ Mi nɔ flín akɔ e é jɛ xá togun tɔn ɔ́ tɛgbɛ, bó nɔ́ flín akpá e é dó é káká nú jijimɛ afatɔ́n (1.000).

¹⁶ Mi flín akɔ e é jɛ xá Ablaxámu é, mi flín akpá e é dó nú Izáki é.

¹⁷ É lɛ́ vɔ́ tɛ ɖɛ̌ jí nú Jakɔ́bu, é wɛ nyí akɔ mavɔ mavɔ e é jɛ xá Izlayɛ́li é.

¹⁸ Akɔ e é jɛ xá Izlayɛ́li bó ɖɔ n'i ɖɔ: “Un ná ná Kanáa to ɔ́ we, bɔ é ná nyí towe; nǔ e un ná hwi kpó vǐ towe lɛ́ɛ kpó ɔ́ nɛ́.”

¹⁹ Hwenɛ́nu ɔ́, mi sukpɔ́ ǎ, mi sukpɔ́ ɖěbǔ ǎ, bo nyí jǒnɔ ɖo to ɔ́ mɛ,

²⁰ bó gosín akɔta ɖě mɛ ɔ́, mi nɔ yi ɖěvo mɛ, bó nɔ gosín axɔ́súɖuto ɖě mɛ yi ɖěvo mɛ.

²¹ Mawu Mavɔmavɔ ka lɔn nú mɛɖé táfú mi ǎ; é dɔn tó nú axɔ́sú lɛ́ɛ ɖó mi wú, bó ɖɔ nú yě ɖɔ:

²² “Mi ma ɖó alɔ mɛ e un cyán lɛ́ɛ wú ó. Mi ma wa nǔ nyanya xá gbeyíɖɔ ce lɛ́ɛ ó.”

²³ Mi mɛ e ɖo ayǐkúngban jí lɛ́ɛ bǐ ní ji han dó kpa Mawu Mavɔmavɔ. Mi jlá hwlɛngán e é nɔ́ ná mɛ ɔ́ ayǐhɔ́ngbe ayǐhɔ́ngbe.

²⁴ Mi jlá susu e é ɖó ɔ́ gbɔn akɔta lɛ́ɛ bǐ mɛ, bó jlá nǔjíwǔ e é nɔ́ wa lɛ́ɛ gbɔn togun lɛ́ɛ bǐ mɛ.

²⁵ Đó Mawu Mavɔmavɔ d'agba, é jɛ xá tawun ɖɔ è nǐ nɔ kpa susu n'i. É syɛ́n hú nǔmɛsɛn lɛ́ɛ bǐ.

²⁶ Đó nǔ e akɔta lɛ́ɛ nɔ sɛn lɛ́ɛ ɖě nyí nǔɖé ǎ, nǔvlɛ́nǔ wɛ; Mawu Mavɔmavɔ wɛ ka bló jǐxwé.

²⁷ Nǔ sa acɔ́ kpó nǔjíwǔ kpó wɛ lɛ́ lɛ̌ dó e. Hlɔ̌nhlɔ́n kpó awǎjijɛ kpó wɛ ɖo nɔtɛn tɔn.

²⁸ Xwédo e ɖo akɔta lɛ́ɛ mɛ é bǐ ní kpa susu nú Mawu Mavɔmavɔ. Mi jlá susu tɔn kpó hlɔ̌nhlɔ́n tɔn kpó.

²⁹ Mi sɔ́ Mawu Mavɔmavɔ nyíkɔ su. Mi hɛn nǔ e mi ná ná ɛ lɛ́ɛ bó byɔ́ xwé tɔn gbe. Mi ɖe kɔ́ nú Mawu Mavɔmavɔ kpó acɔ́nú mímɛ́ lɛ́ɛ kpó.

³⁰ Mi mɛ e ɖo ayǐkúngban jí lɛ́ɛ bǐ ní sísɔ́ ɖo nukɔn tɔn. Gbɛ ɔ́ dó ɖɔ do, é nɔ́ xo to ǎ.

³¹ Nǔ e ɖo jǐxwé é bǐ ní j'awǎ, xomɛ ní hun mɛ e ɖo ayǐkúngban jí é bǐ. È nǐ nɔ́ ɖɔ ɖo akɔta lɛ́ɛ bǐ nukɔn ɖɔ Mawu Mavɔmavɔ wɛ ɖu axɔ́sú.

³² Xu kpó nǔ e ɖ'é mɛ lɛ́ɛ bǐ kpó ní xo zǐn. Fí e nyí gběgbó é kpó nǔ e ɖ'é mɛ lɛ́ɛ kpó ní sú xó bó j'awǎ.

³³ Atín e ɖo zungbó mɛ lɛ́ɛ ní kpa awǒbóbó ɖo Mawu Mavɔmavɔ nukɔn, ɖó é jǎwe bó ná ɖɔ hwɛ xá gbɛ ɔ́.

³⁴ Mi kpa susu nú Mawu Mavɔmavɔ, ɖó é nyɔ́, ɖó nǔbláwǔkúnúmɛ tɔn ɖo te káká sɔ́yi.

³⁵ Mi ɖɔ: “Mawu Mɛhwlɛ́ngántɔ́ mǐtɔn, hwlɛ̌n mǐ gǎn. Sɛ mǐ kplé, ɖe mǐ sín akɔta lɛ́ɛ mɛ, bónú mǐ ná sɔ́ nyǐkɔ mímɛ́ towe su, bónú susu kpa nú we ná nɔ́ hun xomɛ nú mǐ.”

³⁶ Susu nú Mawu Mavɔmavɔ, Mawu Izlayɛ́li tɔn ɔ́ káká sɔ́yi. Bɔ togun ɔ́ bǐ ɖɔ: “Amǐ! Mi kpa susu nú Mawu Mavɔmavɔ!”

³⁷ Énɛ́ ɔ́ gúdo ɔ́, Davídi ɖe gbe nú Asáfu kpó nɔví tɔn lɛ́ɛ kpó, ɖɔ yě ní nɔ akɔjijɛgbá Mawu Mavɔmavɔ tɔn ɔ́ nukɔn fínɛ́, bó nɔ́ wa azɔ̌ yětɔn lě e azǎn ɖokpó ɖokpó byɔ́ gbɔn é.

³⁸ É ɖe Ovɛ́di-Edɔ́mu kpó gbɛtɔ́ kanɖé koatɔ́n-nukún-atɔn (68) kpó ɖo mɛ tɔn lɛ́ɛ mɛ, bɔ yě ná nyí hɔnjínɔtɔ́; é lɛ́ ɖe Ovɛ́di-Edɔ́mu Yedutún ví ɔ́ kpó Hosa kpó lɔ.

³⁹ Davídi zé azɔ̌ e è nǎ wa ɖo goxɔ Mawu Mavɔmavɔ tɔn e ɖo tɛn mímɛ́ mɛ ɖo Gabawɔ́ɔn é mɛ ɔ́ dó así nú vɔ̌sánú-xwlémawutɔ́ Sadɔ́ku kpódó nɔví tɔn vɔ̌sánú-xwlémawutɔ́ lɛ́ɛ kpó,

⁴⁰ bónú yě ná nɔ xwlé vɔ̌ e è nɔ dó zo ɔ́ Mawu Mavɔmavɔ zǎnzǎn gbada tɛgbɛ ɖo vɔ̌sákpe e jí è nɔ dó vɔ̌ zo ɖe ɔ́ jí. Yě ná nɔ́ wa nǔ e Mawu Mavɔmavɔ zɔ́n Izlayɛ́li ví lɛ́ɛ, bɔ é ɖo sɛ́n ɔ́ mɛ lɛ́ɛ bǐ.

⁴¹ Bɔ Hemani kpó Yedutún kpó, kpódó mɛ ɖě lɛ́ɛ e è ɖe tawun bɔ yě ná nɔ kpa Mawu Mavɔmavɔ lɛ́ɛ kpó ɖo akpá yětɔn. Yě ɖó ná nɔ kpa Mawu Mavɔmavɔ, ɖó nǔbláwǔ kú nú mɛ tɔn ɖo te káká sɔ́yi.

⁴² Hemani kpó Yedutún kpó nɔ kpé nukún dó kpɛn lɛ́ɛ kpó gan lɛ́ɛ kpó wú, bó nɔ kpé nukún dó nǔxonú e è nɔ xo dó han e ji nú Mawu wɛ è ɖe lɛ́ɛ mɛ lɛ́ɛ wú. È ɖe Yedutún ví lɛ́ɛ bɔ yě ná nɔ́ nɔ hɔn jí.

⁴³ Énɛ́ ɔ́ gúdo ɔ́, mɛ ɖokpó ɖokpó yi xwé; Davídi lɔmɔ̌ lɛ́ kɔ́ wá xwé tɔn gbe, bó ná dó gbe mɛ tɔn lɛ́ɛ.