1 Tan 13 - MAWUXÓWÉMA

Davídi jló ná zé akɔjijɛgbá Mawu tɔn wá Jeluzalɛ́mu

¹ Davídi kpó sɔ́ja afatɔ́ngán lɛ́ɛ kpó sɔ́jakanwekogán lɛ́ɛ kpó, kpódó tonukún ɖě lɛ́ɛ kpó yi tagbesɔ.

² Davídi ɖɔ nú Izlayɛ́li ví e wá kplé lɛ́ɛ bǐ ɖɔ: “Ényí é nyɔ́ mi nukún mɛ, bó nyɔ́ Mawu Mavɔmavɔ, Mawu mǐtɔn lɔmɔ̌ nukún mɛ ɔ́, mǐ ná yá wǔ sɛ́ wɛn dó mɛ mǐtɔn e ɖo Izlayɛ́li yíkúngban jí lɛ́ɛ bǐ. Đo tají ɔ́, mǐ nǎ lɛ́ sɛ́ wɛn dó vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó gbɔn toxo lɛ́ɛ kpó gletoxo e lɛ́ dó yě lɛ́ɛ kpó mɛ. Mǐ ná ɖɔ nú yě ɖɔ yě ní wá kplé ɖo mǐ gɔ̌n.

³ Mǐ ná zé akɔjijɛgbá Mawu mǐtɔn tɔn ɔ́ wá ɖó akpá, ɖó mǐ ké ya ná ɖo Sawúlu hwenu ǎ.”

⁴ Ée é ɖɔ mɔ̌ ɔ́, é nyɔ́ yě mɛ e kplé lɛ́ɛ bǐ nukún mɛ, bɔ yě yí gbe ɖɔ émí ná bló nǔ e é ɖɔ ɔ́.

⁵ Énɛ́ ɔ́, Davídi kplé Izlayɛ́li ví lɛ́ɛ bǐ, bɛ́ sín Ejípu dogbó jí ɖo tofɔligbé káká yi Hamáti ɖo totaligbé, bó ná zé akɔjijɛgbá Mawu tɔn ɔ́ sín Kiliyati-Yealimu.

⁶ Davídi kpó togun Izlayɛ́li tɔn ɔ́ bǐ kpó yi Baala e è nɔ lɛ́ ylɔ́ ɖɔ Kiliyati-Yealimu ɖo Judáa yíkúngban jí é, bó ná yi zé akɔjijɛgbá Mawu tɔn ɔ́ wá yi. Akɔjijɛgbá ɔ́ jí wɛ, Mawu Mavɔmavɔ ɖo ayǐjínjɔ́n ɖe, ɖo axɔ́súzinkpo tɔn jí, bɔ nyǐkɔ tɔn ɖ'é wú.

⁷ Yě zě akɔjijɛgbá ɔ́ ɖó kɛkɛ́ví yɔ̌yɔ́ ɖé mɛ, sín Avinadávu xwé gbe. Wúza kpó Axiyo kpó wɛ ɖo kɛkɛ́ví ɔ́ kun wɛ.

⁸ Davídi kpó togun Izlayɛ́li tɔn ɔ́ bǐ kpó ɖo awǎ jɛ wɛ ɖo Mawu nukɔn kpó hlɔ̌nhlɔ́n yětɔn bǐ kpó: Yě ɖo han ji wɛ bo ɖo agǐdigbo kpó kanhún kpó xo wɛ, hǔn kpó gan kpó xo wɛ, lobo ɖo kpɛn kún wɛ.

⁹ Ée yě wá jɛ Kidɔ́ni sín kɔ́xota ɔ́, nyibú lɛ́ɛ jló ná zin akɔjijɛgbá Mawu tɔn ɔ́ dɛ́, bɔ Wúza dlɛ́n alɔ bó ná hɛn ɖó te.

¹⁰ Énɛ́ ɔ́, Mawu Mavɔmavɔ sin xomɛ dó Wúza bo dɔn tó n'i ɖó é ɖó alɔ akɔjijɛgbá ɔ́ wú. Énɛ́ ɔ́, Wúza kú ɖo Mawu nukɔn fínɛ́.

¹¹ Tó e Mawu Mavɔmavɔ dɔn nú Wúza gbɔn mɔ̌ ɔ́ sin xomɛ nú Davídi, bɔ é ylɔ́ tɛn énɛ́ ɔ́ mɛ ɖɔ Pelɛ́si-Wúza. È kpo ɖo fí ɔ́ ylɔ́ ɖɔ mɔ̌ wɛ káká jɛ égbé.

¹² Gbe énɛ́ ɔ́ gbe ɔ́, xɛsi ɖi Davídi dó Mawu wú, bɔ é ɖɔ: “Akɔjijɛgbá Mawu tɔn sixú yi xwé ce gbe ǎ.”

¹³ Nǔgbó ɔ́, Davídi zé akɔjijɛgbá ɔ́ ɖó xwé tɔn gbe ɖo Davídi Toxo mɛ ǎ, lobo zé yi ɖó nya Gatinu ɖé xwé. È nɔ ylɔ́ nya ɔ́ ɖɔ Ovɛ́di-Edɔ́mu.

¹⁴ Akɔjijɛgbá Mawu tɔn ɔ́ nɔ Ovɛ́di-Edɔ́mu xwé xɔ sun atɔn, bɔ Mawu Mavɔmavɔ dó acɛ Ovɛ́di-Edɔ́mu sín mɛ lɛ́ɛ jí, bó dó acɛ nǔ e nyí étɔn lɛ́ɛ bǐ jí.