1 Tan 11 - MAWUXÓWÉMA

È sɔ́ Davídi axɔ́sú ɖó Izlayɛ́li to ɔ́ nu

¹ Izlayɛ́li ví lɛ́ɛ bǐ kplé ɖo Davídi gɔ́n ɖo Eblɔ́n, bó ɖɔ n'i ɖɔ: “Hun towe wɛ mǐ nyí.

² Đ'ayǐ e Sawúlu nyí axɔ́sú mǐtɔn ɔ́, hwi wɛ nɔ kplá ahwanfuntɔ́ Izlayɛ́li tɔn lɛ́ɛ yi ahwangbénu, bó nɔ lɛ́ kplá yě wá xwé. Mawu Mavɔmavɔ, Mawu towe ko ɖɔ nú we ɖ'ayǐ ɖɔ hwi ná kpé nukún dó togun émítɔn Izlayɛ́li ɔ́ wú lě e lɛ̌ngbɔ́nyitɔ́ nɔ kpé nukún dó lɛ̌ngbɔ́ tɔn lɛ́ɛ wú é ɖɔhun; hwi wɛ ná nyí to ɔ́ sín gǎn.”

³ Énɛ́ ɔ́, hwenu e tomɛxó Izlayɛ́li tɔn lɛ́ɛ bǐ wǎ axɔ́sú Davídi gɔ́n ɖo Eblɔ́n ɔ́, é nu alɛ xá yě ɖo fínɛ́, ɖo Mawu Mavɔmavɔ nukɔn bɔ yě kɔn ami dó ta n'i, bó sɔ́ ɛ Izlayɛ́li xɔ́sú lě e Mawu Mavɔmavɔ kó ɖɔ gbɔn nú gbeyíɖɔ tɔn Samuwɛ́li é.

Davídi yí Jeluzalɛ́mu toxo ɔ́

⁴ Davídi kpó Izlayɛ́li ví lɛ́ɛ bǐ kpó sí te bo ná tɔ́n ahwan Jeluzalɛ́mu toxo ɔ́. Jeluzalɛ́mu ɔ́, Jebuzi wɛ è nɔ ylɔ́ ɖɔ ɖ'ayǐ, ɖó Jebuzinu lɛ́ɛ wɛ nɔ́ nɔ gbě énɛ́ ɔ́ jí.

⁵ Jebuzinu lɛ́ɛ ka ɖɔ nú Davídi ɖɔ: “A nǎ byɔ́ toxo mǐtɔn mɛ ǎ.” Lo ɔ́, Davídi yí toxo e è mɛ ahohó lɛ́ lɛ̌ dó ɖo Sinyɔ́ɔ só jí é. Toxo énɛ́ ɔ́ wɛ è nɔ ylɔ́ ɖɔ Davídi Toxo.

⁶ Davídi ko ɖɔ ɖ'ayǐ ɖɔ mɛ nukɔntɔn e ná hu Jebuzinu ɖokpó ɔ́ ná húzú ahwangán ɖaxó; Jowabu Selúya ví ɔ́ wɛ ká nyí mɛ nukɔntɔn e hu Jebuzinu é, bó húzú ahwangán ɖaxó.

⁷ Davídi ka yi cí ahohó ɔ́ mɛ. Nǔ e wútu è nɔ ylɔ́ fínɛ́ ɖɔ Davídi Toxo ɔ́ nɛ́.

⁸ Énɛ́ ɔ́ gúdo ɔ́, Davídi gbá xɔ tɛnmɛ tɛnmɛ lɛ́ dó toxo ɔ́, sín Milo kpe ɔ́ kɔn lɛ́ dó. Bɔ Jowabu bló fí e kpo ɖo toxo ɔ́ mɛ ɔ́ ɖó.

⁹ Énɛ́ ɔ́, acɛkpikpa Davídi tɔn ɔ́ nɔ́ ɖo syɛ́nsyɛ́n d'é jí wɛ ɖó Mawu Mavɔmavɔ, Mawu Nǔbǐwúkpétɔ́ ɔ́ ɖo kpɔ́ xá ɛ.

Ahwanfuntɔ́ Davídi tɔn lɛ́ɛ

¹⁰ Ahwangán Davídi tɔn nukúnɖéjí lɛ́ɛ ɖíe. Yě kpó Izlayɛ́li togun ɔ́ bǐ kpó wɛ sɔ́ Davídi axɔ́sú lě e Mawu Mavɔmavɔ ɖɔ gbɔn nú Izlayɛ́li togun ɔ́ é.

¹¹ Ahwanfuntɔ́ syɛ́nsyɛ́n énɛ́ lɛ́ɛ wɛ nyí: Ɛcibáalu Hakimɔ́ni ví ɔ́, ahwangán ɖokpó wɛ. É wɛ zé hwǎn dó hu gbɛtɔ́ afɔɖé kanwe ko (300) ɖo ahwanfunfun ɖokpó tɛnmɛ.

¹² Eleazáa Dódo ví e jɔ ɖo Axoxi hɛ́nnu mɛ ɔ́ bɔ dó Icebaalu wú. É ɖo ahwanfuntɔ́ syɛ́nsyɛ́n atɔn lɛ́ɛ mɛ.

¹³ É wɛ ɖo kpɔ́ xá Davídi ɖo Pasi-Damumímu fí e Filisitɛ́ɛn lɛ́ɛ kplé bó ná fun ahwan ɖe é. Ɔ́jigle ɖé ɖo fínɛ́. Ahwangɔnu Izlayɛ́li tɔn ɔ́ ká ɖo hinhɔn wɛ ɖo Filisitɛ́ɛn lɛ́ɛ nukɔn hwenɛ́nu.

¹⁴ Eleazáa kpó ahwan tɔn lɛ́ɛ kpó ka sɔ́ ahwan nú bó cí gle ɔ́ tɛ́ntin, bó yí gle ɔ́, lobo gba Filisitɛ́ɛn lɛ́ɛ. Énɛ́ ɔ́, Mawu Mavɔmavɔ ná ɖuɖéjí ɖaxó ɖokpó Izlayɛ́li ví lɛ́ɛ.

¹⁵ Hwenu e Filisitɛ́ɛn lɛ́ɛ wá ɖó gɔnu ɖó tɔdo Hlafa ví lɛ́ɛ tɔn mɛ ɔ́, mɛ atɔn ɖo ahwangán gban (30) lɛ́ɛ mɛ, bó wá Davídi gɔ́n ɖo awǐnnya ɖaxó ɖé jí, ɖo sóxo Adulámu tɔn ɔ́ kpá.

¹⁶ Davídi ka ɖo ahohó ɔ́ mɛ hwenɛ́nu, bɔ Filisitɛ́ɛn lɛ́ɛ sín gɔnu ɖokpó ɖo Bɛteleyɛ́mu.

¹⁷ Linlin ɖokpó byɔ́ ayi mɛ nú Davídi, bɔ é ɖɔ: “Mɛ̌ ká ná dun sin nú mì ɖo sitɛ́nu e ɖo Bɛteleyɛ́mu sín hɔntogbó jí ɔ́ mɛ wá, bɔ un ná nu din?”

¹⁸ Ée é ɖɔ mɔ̌ ɔ́, sɔ́ja atɔn lɛ́ɛ byɔ́ Filisitɛ́ɛn lɛ́ɛ sín ahwankpá mɛ gǎnnugǎnnu, bó dun sin ɔ́ ɖo sitɛ́nu ɔ́ mɛ, bó zé wá nú Davídi. Lo ɔ́, Davídi jló ná nu sin ɔ́ ǎ; é yí bó húzú kɔn nyi kɔ́ mɛ nú Mawu Mavɔmavɔ,

¹⁹ bó ɖɔ: “Mawu ce, un ná nu sin élɔ́ ǎ. Mɛ élɔ́ lɛ́ɛ e sɔ́ gbɛ yětɔn ɖó axɔ́ nu, bó yi dun sin wá nú mì ɔ́, é cí hun yětɔn nu gbé un ja ɖɔhun.” Ée é ɖɔ mɔ̌ ɔ́, é nu sin ɔ́ ǎ. Nǔ e sɔ́ja syɛ́nsyɛ́n atɔn lɛ́ɛ bló ɔ́ nɛ́.

²⁰ Avicáyi, Jowabu nɔví ɔ́, ahwangán ɖokpó wɛ, bó kpa acɛ dó sɔ́ja Atɔngbɛ́ta ɔ́ nu. É wɛ zé hwǎn dó hu gbɛtɔ́ afɔɖé kanwe ko (300), bɔ nyǐkɔ tɔn yi jǐ ɖo sɔ́ja Atɔngbɛ́ta ɔ́ mɛ.

²¹ É nyí gbɛtɔ́ nukúnɖéjí hú yě; é wɛ kpa acɛ dó yě nu lɔ; mɛɖé hú gǎn ɛ ɖo “Sɔ́ja Gbangbɛ́ta” ɔ́ mɛ ǎ.

²² Benayahu Kavuceyɛ́linu e nyí Yexoyada ví, bó nyí nya ahwanfuntɔ́ syɛ́nsyɛ́n ɖé sín vǐvú é; é bló nǔ ɖaxó ɖaxó lɛ́ɛ. É wɛ hu Aliɛ́li Mɔwabu tɔn we lɛ́ɛ. É ɖokpó ɔ́ wɛ avuvɔ gbɛ́ gbe ɖokpó káká, bɔ é byɔ́ sitɛ́nu mɛ, bó hu kinnikínní ɖokpó.

²³ Benayahu wɛ lɛ́ hu Ejípunu ɖé gbe ɖokpó. Ejípunu énɛ́ ɔ́, ga tɔn yi mɛ̌tlu we adaɖé; é hɛn hwǎn ɖé alɔ mɛ bɔ kpo tɔn kló sɔ avɔlɔnkpɔntín. Benayahu ɔ́, éyɛ́ ka hɛn kpo ɖokpó bó yi tɔ́n ahwan ɛ, bó xo hwǎn ɔ́ yí sín alɔ tɔn mɛ, lobo zé dó hu i ná.

²⁴ Nǔ ɖaxó ɖaxó e Benayahu bló lɛ́ɛ nɛ́, bɔ nyǐkɔ tɔn yi jǐ ɖo ahwanfuntɔ́ syɛ́nsyɛ́n atɔn lɛ́ɛ mɛ.

²⁵ Gbɛtɔ́ nukúnɖéjí ɖaxó ɖokpó wɛ é nyí ɖo ahwanfuntɔ́ gban (30) lɛ́ɛ mɛ; amɔ̌, é sixú li za xá ahwanfuntɔ́ syɛ́nsyɛ́n atɔn lɛ́ɛ ǎ. É wɛ Davídi sɔ́ ɖó sɔ́ja e nɔ cɔ́ hɔn tɔn mɛ ɔ́ lɛ́ɛ nu.

²⁶ Ahwanfuntɔ́ ɖě lɛ́ɛ sín nyǐkɔ ɖíe: Asaxɛli, Jowabu nɔví ɔ́; Ɛluhanani, Dódo ví, Bɛteleyɛ́munu ɔ́;

²⁷ Camumɔti, Halɔ́ɔnu ɔ́; Hɛlɛ́si, Bɛti-Pɛlɛ́tinu ɔ́;

²⁸ Ila, Ikɛ́ci ví, Tekowanu ɔ́; Aviɛzɛ́ɛ, Anatɔ́tinu ɔ́;

²⁹ Sibekayi, Hucanu ɔ́; Ilayi, Axoxi ví ɔ́;

³⁰ Maxlayi, Nɛtofanu ɔ́; Helɛ́du, Baana ví, Nɛtofanu ɔ́;

³¹ Itayi, Hlivayi ví, Giveyanu ɔ́; Giveya to ɔ́, Bɛnjamɛ́ɛ yíkúngban jí wɛ é ɖe. Benaya, Pileyatɔ́ninu ɔ́;

³² Hulayi e nɔ nɔ Gaaci tɔ lɛ́ɛ kpá é; Aviɛ́li, Bɛti-Alabanu ɔ́;

³³ Azimawɛ́ti, Bahulimunu ɔ́; Eliyaba, Caaluvímunu ɔ́;

³⁴ Hacɛmu ví, Gizɔ́ɔnnu lɛ́ɛ; Yexonatáni, Cagée Haláanu ɔ́ sín vǐ;

³⁵ Axiyamu, Sakáa ví Haláanu ɔ́; Elifali, Wúu ví ɔ́;

³⁶ Hefɛ́ɛ, Mɛkelanu ɔ́; Axiya Bɛti-Pɛlɛ́tinu ɔ́;

³⁷ Ɛsló, Kaamɛ́linu ɔ́; Naalayi, Ɛzibayi ví ɔ́;

³⁸ Yoɛ́li, Natáni nɔví ɔ́; Miváa, Hagli ví ɔ́;

³⁹ Sɛlɛ́ki, Amumɔ́ɔ ví ɔ́; Naxilayi, Beelɔ́tinu ɔ́; Naxilayi wɛ nɔ hɛn ahwanfunnú Jowabu Selúya ví ɔ́ tɔn lɛ́ɛ.

⁴⁰ Ila, Yɛtɛ́ɛ ví ɔ́; Galɛ́vu, Yɛtɛ́ɛ ví ɔ́;

⁴¹ Ulíi, Hitíti ɔ́; Zavadu, Axlayi ví ɔ́;

⁴² Adina, Ciza ví ɔ́. Adina ɔ́, akɔta Hwlibɛ́ni tɔn ɔ́ sín gǎn lɛ́ɛ ɖokpó wɛ; ahwanfuntɔ́ gban (30) nu wɛ é ɖe.

⁴³ Hanáni, Maaka ví ɔ́; Yocafáti, Mɛtɛ́ninu ɔ́;

⁴⁴ Wuziya, Acitalɔ́tinu ɔ́; Cama kpó Yeyiɛ́li kpó; Hotámu, Alowɛ́ɛnu ɔ́ sín vǐ wɛ yě nyǐ.

⁴⁵ Yediaɛ́lu, Cimuli ví ɔ́ kpó nɔví tɔn Yoxa, Tisinu kpó;

⁴⁶ Eliyɛ́li, Maxawímu ɔ́; Ɛlunáamu ví lɛ́ɛ: Yelivayi kpó Yocawia kpó. Yituma, Mɔwabunu ɔ́;

⁴⁷ Eliyɛ́li, Ovɛ́di kpódó Yaasiɛ́li Sovanu ɔ́ kpó.