1 Samuwɛ́li 9 - MAWUXÓWÉMA

¹ Nya Bɛnjamɛ́ɛnu ɖé tíin; bɔ è nɔ ylɔ́ ɛ ɖɔ Kícu, bó nyí Aviɛ́li ví, Aviɛ́li ka nyí Selɔ́ɔ ví, bɔ Selɔ́ɔ nyí Bekolati ví, bɔ Bekolati nyí Afíaxi ví. Kícu ɔ́, nya ɖé wɛ, bó ɖó alɔnu, bó nyí gbɛtɔ́ nukúnɖéjí.

² Nya énɛ́ ɖó vǐ ɖokpó, bɔ è nɔ ylɔ́ ɛ ɖɔ Sawúlu, bɔ é nyí dɔ̌nkpɛvú ɖagbe ɖagbe ɖé. É nyɔ́ ɖɛkpɛ hú Izlayɛ́li ví lɛ́ɛ bǐ, bó hú ta ga yě bǐ.

³ Kícu Sawúlu tɔ́ ɔ́, tócí tɔn asi ɖé lɛ́ɛ bú, bɔ é ɖɔ nú vǐ tɔn Sawúlu ɖɔ: “Kplá mɛsɛntɔ́ ce lɛ́ɛ ɖokpó, bó yi ba tócí lɛ́ɛ.”

⁴ Nǔgbó ɔ́, Sawúlu kpó mɛsɛntɔ́ ɔ́ kpó sɔ́ nǔ, bó gbɔn Eflayímu só ɔ́ jí, bó gbɔn Calicato ɔ́ mɛ dín; yě ká mɔ tócí lɛ́ɛ ǎ. Yě gbɔn Caalímu tomɛ, tócí lɛ́ɛ ká ɖo fínɛ́ ǎ; yě gbɔn Bɛnjamɛ́ɛ to ɔ́ bǐ mɛ, yě ká mɔ yě ǎ.

⁵ Ée yě wá Súfu gbé jí ɔ́, Sawúlu ɖɔ nú mɛsɛntɔ́ e kplá ɛ ɔ́ ɖɔ: “Wǎ mǐ ní lɛ́ kɔ yi xwé gbe, é má nyí mɔ̌ ǎ ɔ́, tɔ́ ce ná jó tócí xó dó, bó ná jɛ mǐ lin jí.”

⁶ Mɛsɛntɔ́ ɔ́ ká yí gbe n'i ɖɔ: “Đɛ̌mɛnu Mawu tɔn ɖokpó ɖo toxo élɔ́ mɛ fí; nya ɖé wɛ bɔ mɛ bǐ nɔ sí i. É ɖɔ nǔɖé ɔ́, é nɔ jɛ. Wǎ mǐ ní yi gɔ̌n tɔn, afɔ nyɔ́ ɔ́, é ná ɖɔ ali e mǐ ná gbɔn bó ná mɔ tócí lɛ́ɛ nú mǐ.”

⁷ Sawúlu ka ɖɔ nú mɛsɛntɔ́ ɔ́ ɖɔ: “Ényí mǐ ká yi ɔ́, étɛ́ mǐ ká ná ná ɖɛ̌mɛnu Mawu tɔn ɔ́? Đó nǔɖuɖu ɖě sɔ́ kpo ɖo glo mǐtɔn lɛ́ɛ mɛ ǎ. Mǐ ká ɖó nǔɖé, bó ná ná ɖɛ̌mɛnu ɔ́ ǎ. Abǐ nǔɖé sɔ́ ɖo mǐ sí a?”

⁸ Mɛsɛntɔ́ ɔ́ lɛ́ yí xó, bó ɖɔ nú Sawúlu ɖɔ: “Gankwɛ́ kpɛví ɖokpó ɖíe ɖo así ce e. Un ná ná ɖɛ̌mɛnu Mawu tɔn ɔ́, bɔ é ná xlɛ́ ali mǐ.”

⁹ Xóxó hwenu ɖo Izlayɛ́li ɔ́, nú è xwe nǔ kanbyɔ́ Mawu gbé ɔ́, è nɔ ɖɔ: “Wǎ mǐ yi nǔmɔtɔ́ xwé.” Đó mɛ e è nɔ ylɔ́ égbé din ɖɔ “gbeyíɖɔ” ɔ́, nǔmɔtɔ́ wɛ è nɔ ylɔ́ ɛ ɖɔ ɖ'ayǐ.

¹⁰ Sawúlu ɖɔ nú mɛsɛntɔ́ ɔ́ ɖɔ: “Nǔgbó wɛ a ɖɔ, wǎ mǐ yi.” Bɔ yě ɖidó toxo e mɛ ɖɛ̌mɛnu Mawu tɔn ɔ́ ɖe ɔ́ mɛ.

¹¹ Ée yě ɖo kpó fán byɔ́ toxo ɔ́ mɛ wɛ ɔ́, yě kpé ɖyɔ̌vǐ ɖé lɛ́ɛ, bɔ yě xwe tɔ, bɔ yě kanbyɔ́ yě ɖɔ: “Nǔmɔtɔ́ ɔ́ ɖo xwé gbe a?”

¹² Yě yí gbe nú yě ɖɔ: “Ɛɛn, é ɖo nukɔn mitɔn. Amɔ̌, mi yá wǔ; é wá toxo mǐtɔn mɛ, ɖó égbé wɛ togun ɔ́ jló ná yi sá vɔ̌ ɖo só jí.

¹³ Ényí mi yá wǔ yi toxo ɔ́ mɛ ɔ́, mi ná mɔ ɛ cóbɔ é ná ɖidó nǔ ɖu gbé ɖo só jí; é má nyí mɔ̌ ǎ ɔ́, togun ɔ́ ná ɖu nǔ ǎ, ɖó é wɛ ná xo ɖɛ dó nǔɖuɖu ɔ́ jí hwɛ̌, có yě ná ɖu nǔ. Mi yi din ɔ́, mi ná mɔ ɛ.”

Sawúlu kpé Samuwɛ́li

¹⁴ Sawúlu kpó mɛsɛntɔ́ ɔ́ kpó wlí ali ɖidó. Ée yě ɖo toxo ɔ́ mɛ byɔ́ wɛ ɔ́, Samuwɛ́li tɔ́n, bó ko xwe só jí, bó kpé yě.

¹⁵ Ée Sawúlu sín wǐwá kpo sɔ ɔ́, Mawu Mavɔmavɔ ko ɖɔ nú Samuwɛ́li ɖɔ:

¹⁶ “Sɔ gan élɔ́ mɛ ɔ́, un ná sɛ́ dǎwe ɖokpó dó we, bɔ é ná gosín Bɛnjamɛ́ɛ tomɛ. A nǎ kɔn ami dó ta n'i, bɔ é ná nyí gǎn nú togun Izlayɛ́li tɔn ɔ́. É ná hwlɛ́n togun ce gán ɖo Filisitɛ́ɛn lɛ́ɛ sí; un nyi kɔ kpɔ́n togun ce, ɖó xó e sú wɛ é ɖe é wá káká gɔ̌n ce.”

¹⁷ Ée Samuwɛ́li mɔ Sawúlu lě tlóló ɔ́, Mawu Mavɔmavɔ ɖɔ n'i ɖɔ: “Dǎwe e xó un ɖɔ nú we ɔ́ ɖíe! É wɛ ná ɖu gǎn ɖo togun ce nu.”

¹⁸ Ée Sawúlu jɛ sisɛkpɔ́ Samuwɛ́li jí ɔ́, é nɔ te ɖo toxo ɔ́ sín hɔntogbó jí bó ɖɔ n'i ɖɔ: “Kɛnklɛ́n xlɛ́ nǔmɔtɔ́ ɔ́ xwé mì.”

¹⁹ Samuwɛ́li ka yí gbe nú Sawúlu ɖɔ: “Nyi wɛ nyí nǔmɔtɔ́ ɔ́. Wǎ kplá mì yi só jí, bónú mi ná ɖu nǔ xá mì égbé. É jɛ sɔ ɔ́, un ná ɖɔ nǔ e ɖo ayi towe mɛ ɔ́ bǐ nú we, bó ná jó we dó bɔ a nǎ yi.

²⁰ Ma nú ado hu we ɖó tócí towe asi e bú sín azǎn atɔn ɖíe lɛ́ɛ wú ó. È ko mɔ yě. Nǔ e a nǎ tunwun din ɔ́ wɛ nyí ɖɔ hwi kpó tɔ́ towe sín xwédo ɔ́ kpó ɖó nukún wɛ Izlayɛ́li to ɔ́ bǐ ɖe.”

²¹ Sawúlu yí gbe n'i ɖɔ: “Étɛ́! Bɛnjamɛ́ɛnu wɛ nú mì, akɔta e hwe hú akɔta e ɖo Izlayɛ́li lɛ́ɛ ɖokpó mɛ wɛ un gosín, hɛ̌nnu e hwe hú hɛ̌nnu lɛ́ɛ bǐ ɖo akɔta Bɛnjamɛ́ɛ tɔn mɛ ɔ́ ɖokpó mɛ wɛ un tɔ́n sín. Nɛ̌ wɛ a nǎ ɖɔ mɔ̌ nú mì gbɔn?”

²² Samuwɛ́li kplá Sawúlu kpó mɛsɛntɔ́ ɔ́ kpó yi só ɔ́ jí, bó kplá yě yi xɔ e mɛ è nɔ ɖu nǔ ɖe ɔ́ mɛ. É ɖó tɛnmɛ nú yě ɖó tɛn nukɔn nukɔntɔn lɛ́ɛ mɛ, ɖo fí e mɛ e è ylɔ̌ lɛ́ɛ ɖe é. Mɛ e è ylɔ̌ lɛ́ɛ yi gbɛtɔ́ gban (30) mɔ̌.

²³ Ée é ɖó tɛnmɛ nú yě ɔ́, é ɖɔ nú mɛ e nɔ ɖa nǔ ɔ́ ɖɔ: “Sɔ́ lan e un sɔ́ nú we bó ɖɔ hwi ní sɔ́ ɖó vo é wá.”

²⁴ Nǔɖatɔ́ ɔ́ sɔ́ gbɔ̌sá blěbǔ ɔ́ wá, bó sɔ́ ɖó Sawúlu sá mɛ, bɔ Samuwɛ́li ɖɔ: “Lan e è sɔ́ ɖó vo nú we é ɖíe; ɖu nǔ xá mɛ e un ylɔ́ lɛ́ɛ.” Énɛ́ ɔ́, Sawúlu ɖu nǔ xá Samuwɛ́li gbe énɛ́ gbe.

²⁵ Yě wǎ jɛ te sín só ɔ́ jí, bó wá toxo mɛ, bɔ Samuwɛ́li kpó Sawúlu kpó yi cí xɔ ta bó ɖɔ xó.

Samuwɛ́li sɔ́ Sawúlu axɔ́sú ɖó Izlayɛ́li to ɔ́ nu

²⁶ Ayǐhɔ́ngbe tɔn ɔ́, Sawúlu kpó mɛsɛntɔ́ ɔ́ kpó fɔ́n zǎn. Ée gbɛmɛ hɔ́n ɔ́, Samuwɛ́li ylɔ́ Sawúlu sɛ́ dó ɖo xɔ ta, bó ɖɔ n'i ɖɔ: “Wǎ nú má nyi we.” Sawúlu sí te bɔ yě mɛ we lɛ́ɛ tɔ́n.

²⁷ Ée yě jɛ fí e toxo ɔ́ fó dó ɔ́, Samuwɛ́li ɖɔ nú Sawúlu ɖɔ: “Đɔ nú mɛsɛntɔ́ towe ní jɛ nukɔn nú mǐ.” Bɔ mɛsɛntɔ́ ɔ́ jɛ nukɔn. Bɔ Samuwɛ́li ɖɔ nú Sawúlu ɖɔ: “Nɔ te bónú ma ɖɔ xó e Mawu ɖɔ ɔ́ nú we.”