1 Samuwɛ́li 8 - MAWUXÓWÉMA

¹ Ée Samuwɛ́li wá kpo ɔ́, é sɔ́ vǐ tɔn lɛ́ɛ gǎn ɖó Izlayɛ́li togun ɔ́ nu.

² Vǐ tɔn nukɔn tɔn ɔ́ nɔ́ nyí Yoɛ́li, bɔ wegɔ́ ɔ́ nɔ nyí Avíya. Bɛ̌-Ceva wɛ yě nyí gǎn ɖe.

³ Samuwɛ́li ví lɛ́ɛ ɔ́, yě nɔ́ wa nǔ é ɖɔhun ǎ. Yě nɔ́ dó nukúnkɛn, bó nɔ ɖu nǔ ɖo nǔ mɛ, bó nɔ dó hwɛ agɔ.

⁴ Izlayɛ́li tomɛxó lɛ́ɛ bǐ kplé, bó wá Samuwɛ́li gɔ́n ɖo Hlama.

⁵ Yě ɖɔ n'i ɖɔ: “Din ɔ́, a ko kpo, bɔ vǐ towe lɛ́ɛ ka nɔ wa nǔ hwi ɖɔhun ǎ. Gbɔ bo sɔ́ axɔ́sú ɖokpó nú é ná nɔ mǐ nu, lě e togun ɖě lɛ́ɛ ɖó axɔ́sú é ɖɔhun.”

⁶ Ée yě ɖɔ nú Samuwɛ́li ɖɔ é ní sɔ́ axɔ́sú ɖokpó nú émí ɔ́, é vɛ́ wǔ tɔn ɖésú. Samuwɛ́li ka xo ɖɛ.

⁷ Énɛ́ ɔ́, Mawu Mavɔmavɔ ɖɔ nú Samuwɛ́li ɖɔ: “Đǒtó Izlayɛ́li ví lɛ́ɛ; blǒ nǔ e ba wɛ yě ɖe ɔ́ nú yě. Đó hwi wɛ yě gbɛ̌ ǎ, nyɛ wɛ yě gbɛ̌ ɖɔ nyi kún sɔ́ ná ɖu axɔ́sú ɖo émí nu ó.

⁸ Nǔ e yě nɔ́ wa sín hwenu e un ɖe yě tɔ́n sín Ejípu ɔ́ bló xá we wɛ yě ɖe; ɖó yě jó mì dó, bó nɔ sɛn nǔ ɖěvo lɛ́ɛ.

⁹ Đǒtó Izlayɛ́li ví lɛ́ɛ; blǒ nǔ e ba wɛ yě ɖe ɔ́ nú yě; amɔ̌, a nǎ ɖɔ nǔ e sín acɛ axɔ́sú e yě ná sɔ́ ɔ́ ná ɖó ɖo yě jí lɛ́ɛ nú yě ɖo togun mɛ.”

Acɛ e axɔ́sú ɔ́ ɖó lɛ́ɛ

¹⁰ Xó e Mawu Mavɔmavɔ ɖɔ nú Samuwɛ́li lɛ́ɛ ɔ́, Samuwɛ́li ɖɔ bǐ xwíí nú togun e byɔ́ ɛ axɔ́sú é:

¹¹ “Axɔ́sú e ná ɖu gǎn ɖo mi nu ɔ́, lě e é ná kpa acɛ nú mi gbɔn ɔ́ ɖíe: é ná fɔ vǐ súnnu mitɔn lɛ́ɛ, bɔ yě ná nɔ́ kun kɛkɛ́ví n'i, bó ná fɔ sɔ́xátɔ́ mitɔn lɛ́ɛ, bɔ yě ná nɔ xá sɔ́ tɔn lɛ́ɛ, abǐ yě ná nɔ dó wezun ɖo kɛkɛ́ví é ɖésúnɔ tɔn nukɔn.

¹² É ná sɔ́ yě gǎn: mɛ ɖě ná nyí sɔ́ja afatɔ́ngán, mɛ ɖě ná nyí sɔ́ja kanwekogán, bɔ é ná zán yě dó lɛ gle tɔn lɛ́ɛ ná, bó ná zán yě dó ya jinukún tɔn lɛ́ɛ ná. Yě ná nɔ́ tun ahwanlyánnú tɔn lɛ́ɛ n'i, bó ná nɔ bló nǔ e è nǎ nɔ́ dó dɔn kɛkɛ́ví tɔn lɛ́ɛ n'i.

¹³ É ná fɔ vǐ mitɔn nyɔ̌nu lɛ́ɛ, bɔ mɛ ɖě ná nɔ́ ɖa célu n'i, mɛ ɖě ná nɔ ɖa nǔ n'i, bɔ mɛ ɖě ná nɔ ɖa wɔ̌xúxú n'i.

¹⁴ Ayǐkúngban mitɔn e nɔ nyɔ́ nǔkún ganjí é wɛ é ná sɔ́, bó ná sɔ́ vǐwungbo mitɔn e nɔ sɛ́n ganjí é kpó olívugbo mitɔn e nɔ sɛ́n ganjí lɛ́ɛ kpó bó ná ná azɔ̌watɔ́ tɔn lɛ́ɛ.

¹⁵ É ná yí jinukún mitɔn lɛ́ɛ sín mǎɖówǒ, kpó vǐwun mitɔn lɛ́ɛ sín mǎɖówǒ kpó, bó ná ná azɔ̌watɔ́ tɔn lɛ́ɛ kpó mɛ e é sɔ́ gǎn lɛ́ɛ kpó.

¹⁶ É ná bɛ́ mɛsɛntɔ́ mitɔn súnnu kpó nyɔ̌nu kpó, bó ná bɛ́ mɛ wínnyáwínnyá mitɔn e dó hlɔ̌nhlɔ́n hú mɛ bǐ lɛ́ɛ, kpó tócí mitɔn lɛ́ɛ kpó, bó dó wa azɔ̌ tɔn lɛ́ɛ ná.

¹⁷ É ná yí gbɔ̌ mitɔn lɛ́ɛ sín mǎɖówǒ, bɔ mi ɖésúnɔ ká ná húzú kannumɔ tɔn.

¹⁸ Hwenɛ́nu ɔ́, mi ná jɛ vo sa dó kɔ nú Mawu Mavɔmavɔ jí, ɖó axɔ́sú mitɔn e mi sɔ́ é wú; Mawu Mavɔmavɔ ká sɔ́ ná ɖótó mi ǎ.”

¹⁹ Ée Samuwɛ́li ɖɔ mɔ̌ nú Izlayɛ́li ví lɛ́ɛ ɔ́, yě gbɛ̌ ɖɔ émí kún ná ɖótó xó tɔn ó; yě ɖɔ: “Nǔɖé ná jɛ hǔn, nǔ ɔ́ ní jɛ, axɔ́sú ba wɛ mǐdɛɛ lɛ́ɛ ɖe.”

²⁰ Bɔ mǐ lɔ ná cí togun ɖě lɛ́ɛ ɖɔhun. Axɔ́sú mǐtɔn ná nɔ mǐ nu, bó ná nɔ́ kplá mǐ yi ahwan.

²¹ Ée Samuwɛ́li se xó e togun ɔ́ ɖɔ ɔ́ bǐ ɔ́, é yi ɖɔ bǐ nú Mawu Mavɔmavɔ.

²² Bɔ Mawu Mavɔmavɔ ɖɔ nú Samuwɛ́li ɖɔ: “Se xó e ɖɔ nú we wɛ yě ɖe é, bó sɔ́ axɔ́sú ɖokpó ɖó yě nu.” Énɛ́ ɔ́, Samuwɛ́li ɖɔ nú Izlayɛ́li ví lɛ́ɛ ɖɔ mɛ ɖokpó ɖokpó ní lɛ́ kɔ yi xwé.