1 Samuwɛ́li 7 - MAWUXÓWÉMA

¹ Kiliyati-Yealimunu lɛ́ɛ wá sɔ́ akɔjijɛgbá Mawu Mavɔmavɔ tɔn yi, bó sɔ́ yi ɖó Avinadávu xwé ɖo só ɖé jí, bó sɔ́ vǐ tɔn Eleazáa ɖó vo bɔ é ná nɔ cɔ́.

Samuwɛ́li nyí gǎn ɖo Izlayɛ́li

² È sɔ́ akɔjijɛgbá Mawu Mavɔmavɔ tɔn ɔ́ wá Kiliyati-Yealimu ɔ́, é kó lín; xwe tɔn ko yi ko mɔ̌, bɔ Izlayɛ́li to ɔ́ wá jɛ xó sú ylɔ́ Mawu Mavɔmavɔ jí.

³ Samuwɛ́li ka ɖɔ nú Izlayɛ́li to ɔ́ bǐ kplékplé ɖɔ: “Ényí mi ɖésú jɛ́n kpɔ́n ayi mitɔn mɛ, bó lɛ́ kɔ wá Mawu Mavɔmavɔ gɔ́n hǔn, mi bo ɖe vodún Asitaatée kpó nǔmɛsɛn togun ɖě lɛ́ɛ tɔn lɛ́ɛ bǐ kpó sín xwé mitɔn lɛ́ɛ gbe. Mi sɔ́ ayi mitɔn ɖó Mawu Mavɔmavɔ ɖokpó jí, bó sɛn é ɖokpónɔ géé. Énɛ́ ɔ́, é ná hwlɛ́n mi ɖo Filisitɛ́ɛn lɛ́ɛ sí.”

⁴ Nǔgbó ɔ́, Izlayɛ́li ví lɛ́ɛ bɛ́ vodún Baalu lɛ́ɛ, kpó vodún Asitaatée kpó sín xwé yětɔn lɛ́ɛ gbe, bó nɔ sɛn Mawu Mavɔmavɔ kɛ́ɖɛ́.

⁵ Samuwɛ́li ɖɔ: “Mi kplé to ɔ́ bǐ ɖó Misipa, bónú ma xo ɖɛ nú mi.”

⁶ Bɔ yě bǐ kplé ɖo Misipa, bó dun sin bo ba kɔn nyi ayǐ nú Mawu Mavɔmavɔ, bó blá nu gbe nɛ́ ɔ́ gbe. Gbe nɛ́ ɔ́ gbe wɛ yě ɖɔ: “Mǐ hu hwɛ dó Mawu Mavɔmavɔ.” Fínɛ́ wɛ Samuwɛ́li húzú togun Izlayɛ́li tɔn sín gǎn ɖe.

⁷ Filisitɛ́ɛn lɛ́ɛ se ɖɔ Izlayɛ́li ví lɛ́ɛ kplé ɖo Misipa, bɔ gǎn yětɔn lɛ́ɛ sɔ́ nǔ, bó ná wá tɔ́n ahwan Izlayɛ́li ví lɛ́ɛ. Ée Izlayɛ́li ví lɛ́ɛ se mɔ̌ ɔ́, xɛsi jɛ yě jí,

⁸ bɔ yě ɖɔ nú Samuwɛ́li ɖɔ: “Ma gɔn xó sú ylɔ́ Mawu Mavɔmavɔ, Mawu mǐtɔn ɖó ta mǐtɔn mɛ ó, bónú é ná hwlɛ́n mǐ gán ɖo Filisitɛ́ɛn lɛ́ɛ sí.”

⁹ Samuwɛ́li sɔ́ lɛ̌ngbɔ́ví e kpo ɖo anɔ̌nu é ɖokpó, bó dó gbɔ̌ví ɔ́ blěbǔ tɔn zo nú Mawu Mavɔmavɔ. Samuwɛ́li sú xó ylɔ́ Mawu Mavɔmavɔ ɖó Izlayɛ́li ví lɛ́ɛ tamɛ, bɔ Mawu Mavɔmavɔ yí gbe nú ɖɛ tɔn.

¹⁰ Hwenu e Samuwɛ́li ɖo vɔ̌ ɔ́ dó zo wɛ ɔ́, Filisitɛ́ɛn lɛ́ɛ lɔ ko ɖo sisɛkpɔ́ Izlayɛ́li ví lɛ́ɛ wɛ, bó ná wá tɔ́n ahwan yě. Mawu Mavɔmavɔ ká ɖe gbe bɔ jǐ dó gbe dó Filisitɛ́ɛn lɛ́ɛ jí, bó dó xɛsi yě bɔ yě bǐ gba dó, bɔ Izlayɛ́li ví lɛ́ɛ ɖu ɖo yě jí.

¹¹ Énɛ́ ɔ́, Izlayɛ́li ví lɛ́ɛ tɔ́n sín Misipa, bó nya Filisitɛ́ɛn lɛ́ɛ káká yi ɖó Bɛti-Káa, bó hu yě mɛ gěgé.

¹² Samuwɛ́li sɔ́ awǐnnya ɖokpó, bó sɔ́ ɖó Misipa kpó Ceni kpó tɛ́ntin, bó ylɔ́ fínɛ́ ɖɔ Evɛ́ni-Ezɛ́ɛ, tínmɛ tɔn wɛ nyí Alɔgɔ́númɛ sín awǐnnya, bó dó ɖo ɖiɖɔ wɛ ɖɔ: “Mawu Mavɔmavɔ dó alɔ mǐ káká wá jɛ fí.”

¹³ Lě e Filisitɛ́ɛn lɛ́ɛ ɖu winnyá gbɔn é nɛ́. Énɛ́ ɔ́, yě sɔ́ wá Izlayɛ́li yíkúngban jí ɖě gbeɖé ǎ. Mawu Mavɔmavɔ sín alɔ jɛ Filisitɛ́ɛn lɛ́ɛ wú, bɔ é nɔ mɔ̌ káká yi jɛ hwenu e Samuwɛ́li kú é.

¹⁴ Izlayɛ́li sín toxo e Filisitɛ́ɛn lɛ́ɛ yí lɛ́ɛ bǐ lɛ́ húzú Izlayɛ́li tɔn ɖo Eklɔ́ni kpó Gati kpó tɛ́ntin. Izlayɛ́li yí toxo énɛ́ lɛ́ɛ bǐ sín Filisitɛ́ɛn lɛ́ɛ sí. Tagba ɖě ká sɔ́ lɛ́ tíin ɖo Izlayɛ́li ví lɛ́ɛ kpódó Amɔliti lɛ́ɛ kpó tɛ́ntin ǎ.

¹⁵ Samuwɛ́li nyí gǎn ɖo togun Izlayɛ́li tɔn ɔ́ nu káká jɛ hwenu e é kú é.

¹⁶ Xwewú xwewú tɛgbɛ ɔ́, é nɔ yi gbɔn Betɛ́li, Gilugalu kpódó Misipa kpó, bó nɔ́ gbo hwɛ nú Izlayɛ́li ví lɛ́ɛ gbɔn fí énɛ́ lɛ́ɛ bǐ.

¹⁷ É ɖɔ hwɛ gbo nú yě ɔ́, é nɔ lɛ́ lɛ́ kɔ wá Hlama, xwé tɔn gbe, bó nɔ ɖɔ hwɛ gbo nú Izlayɛ́li ví lɛ́ɛ ɖo fínɛ́; é bló vɔ̌sákpe ɖokpó nú Mawu Mavɔmavɔ ɖo fínɛ́.