1 Samuwɛ́li 6 - MAWUXÓWÉMA

¹ Akɔjijɛgbá Mawu Mavɔmavɔ tɔn ɔ́, sun tɛ́nwe wɛ é nɔ Filisitɛ́ɛn lɛ́ɛ gɔ́n xɔ.

² Bɔ Filisitɛ́ɛn lɛ́ɛ wá ylɔ́ vodúnnɔ yětɔn lɛ́ɛ kpó nǔkantɔ́ yětɔn lɛ́ɛ kpó, bó ɖɔ nú yě ɖɔ: “Nɛ̌ mǐ ká ná bló gbɔn nú akɔjijɛgbá ɔ́? Mi ɖɔ lě e mǐ ná bló gbɔn, bó sɛ́ dó fí e é gosín ɔ́ nú mǐ.”

³ Bɔ yě yí gbe nú yě ɖɔ: “Ényí mi jló ná sɛ́ akɔjijɛgbá Mawu tɔn ɔ́ dó hǔn, mi ma sɛ́ dó yǎyá ó. Mi sá vɔ̌ nú Mawu ɖó hwɛ mitɔn lɛ́ɛ tamɛ; énɛ́ ɔ́, azɔn mitɔn ná gbɔ, bɔ mi ná tunwun nǔ e wú Mawu ɖo mɔ̌ wa xá mi wɛ é.”

⁴ Filisitɛ́ɛn lɛ́ɛ ɖɔ: “Hwɛsɔ́kɛmɛ vɔ́ tɛ́ wɛ mǐ ná sá?” Bɔ yě yí gbe nú yě ɖɔ: “Mi ná sɔ́ siká, bó ná dó bló yonutúntún sín akpajlɛ́ atɔ́ɔ́n, bó ná lɛ́ sɔ́ siká dó bló ajaka atɔ́ɔ́n bɔ é ná sɔgbe dó gǎn nabí e ɖo to ɔ́ mɛ é ta, ɖó bǎ ɖokpó ɔ́ wɛ xo mi, bó xo gǎn mitɔn lɛ́ɛ lɔ.

⁵ Mi ná sɔ́ siká dó bló yonutúntún e ɖo mi wú é sín akpajlɛ́ ná, bó ná lɛ́ sɔ́ siká dó bló ajaka e ɖo nǔkún mitɔn lɛ́ɛ hɛn gblé wɛ é sin akpajlɛ́ ná, bó ná susu Mawu Izlayɛ́li tɔn. Énɛ́ ɔ́, é sixú kú nǔbláwǔ mitɔn, bó ná gɔn tó dɔn nú mi, bó ná gɔn tó dɔn nú vodún mitɔn lɛ́ɛ, bó ná gɔn tó dɔn nú to mitɔn.

⁶ Mi ma tlí tó Ejípunu lɛ́ɛ kpó Ejípu xɔ́sú ɔ́ kpó ɖɔhun ó. Ée yědɛɛ lɛ́ɛ tlí tó mɔ̌ ɔ́, Mawu dɔn tó tɛnmɛ tɛnmɛ lɛ́ɛ nú yě, bɔ yě gbɔ bó wá jó Izlayɛ́li ví lɛ́ɛ dó bɔ yě yi.

⁷ Din ɔ́, mi bló kɛkɛ́ví yɔ̌yɔ́ ɖokpó, bó fɔ nyibú vǐnɔ e má dɔn kɛkɛ́ví ɖě kpɔ́n ǎ é we, bó dó kan nyibú lɛ́ɛ, bó sin dó kɛkɛ́ví ɔ́ wú. Énɛ́ ɔ́, mi ná kplá nyibúví e ɖo gǔdo yětɔn lɛ́ɛ yi xwé.

⁸ Mi ná sɔ́ akɔjijɛgbá Mawu tɔn ɔ́ ɖó kɛkɛ́ví ɔ́ jí, bó bɛ́ nǔ e mi zé siká dó bló bó ná Mawu ɖó hwɛ mitɔn lɛ́ɛ tamɛ é dó gbǎví ɖé mɛ, bó ná sɔ́ ɖó akɔjijɛgbá ɔ́ kpá; énɛ́ gúdo ɔ́, mi ná jó kɛkɛ́ví ɔ́ kpó nyibú lɛ́ɛ kpó dó, bɔ yě ná yi.

⁹ Yě ɖidó ɔ́, mi ná ɖo kpínkpɔ́n wɛ. Ényí nyibú lɛ́ɛ tunta Bɛti-Cɛmɛ́ci, bó wlí Izlayɛ́li sín ali hǔn, Mawu Mavɔmavɔ wɛ dó nǔ baɖabaɖa énɛ́ sin xá mǐ nɛ́. É má nyí mɔ̌ ǎ ɔ́, mǐ ná tunwun ɖɔ é kún nyí Mawu Mavɔmavɔ wɛ wa nǔɖé xá mǐ ó, hǔn nǔɖé kpowun wɛ wa mǐ nɛ́.”

¹⁰ Filisitɛ́ɛn lɛ́ɛ bló nǔ e vodúnnɔ lɛ́ɛ kpó nǔkantɔ́ lɛ́ɛ kpó kplɔ́n yě ɔ́ nǔgbó: yě fɔ nyibú vǐnɔ we, bó dó kɛkɛ́ví ɔ́ kan, bo sin dó yě wú, bó sú nyibúví lɛ́ɛ dó xwé gbe.

¹¹ Yě sɔ́ akɔjijɛgbá ɔ́ kpó gbǎ e mɛ è bɛ̌ nǔ e è sɔ́ siká dó bló ná lɛ́ɛ kpó ɖó kɛkɛ́ví ɔ́ jí.

¹² Bɔ nyibú lɛ́ɛ wlí Bɛti-Cɛmɛ́ci sín ali ɔ́ tlélé. Yě mlɛ́ ali ɖokpó ɔ́ tlélé bó ɖo xó sú wɛ. Yě zɛ dó aɖisí ǎ, yě ká zɛ dó amyɔ ǎ. Gǎn Filisitɛ́ɛn lɛ́ɛ tɔn lɛ́ɛ jɛ gǔdo yětɔn, bó xwedó yě káká yi Bɛti-Cɛmɛ́ci sín dogbó jí.

¹³ Bɛti-Cɛmɛ́cinu lɛ́ɛ ɖo blěe ya wɛ ɖo tɔdo ɖé mɛ, bó jlɔ́ kɔ bo mɔ akɔjijɛgbá Mawu tɔn sɛ́ dó, bɔ é víví nú yě káká.

¹⁴ Kɛkɛ́ví ɔ́ wá Jozuwée Bɛti-Cɛmɛ́cinu ɔ́ sín gle mɛ, bó nɔ te ɖo awǐnnya ɖaxó ɖokpó kpá; énɛ́ ɔ́, atín e è dǒ ján kɛkɛ́ví ɔ́ ná lɛ́ɛ ɔ́, Bɛti-Cɛmɛ́cinu lɛ́ɛ zɛ bǐ, bó fɔ nyibú we lɛ́ɛ dó sá vɔ̌ e è nɔ dó zo ɔ́ ná nú Mawu Mavɔmavɔ.

¹⁵ Levíi ví lɛ́ɛ ká kó ɖe akɔjijɛgbá Mawu Mavɔmavɔ tɔn jɛ te nɛ́, bó ɖe gbǎ e mɛ sikánú lɛ́ɛ ɖe ɔ́ lɔ jɛ te. Yě fɔ bǐ ɖó awǐnnya ɖaxó ɔ́ jí. Bɛti-Cɛmɛ́cinu lɛ́ɛ sá vɔ̌ e è nɔ dó zo é kpó kɔnɖókpɔ́ vɔ́ kpó kɔn nyi kpɔ́ nú Mawu Mavɔmavɔ gbe nɛ́ ɔ́ gbe.

¹⁶ Ée gǎn Filisitɛ́ɛn lɛ́ɛ tɔn atɔ́ɔ́n lɛ́ɛ mɔ mɔ̌ ɔ́, yě lɛ́ kɔ gbe nɛ́ ɔ́ gbe wá yi Eklɔ́ni.

¹⁷ Yonutúntún sín akpajlɛ́ nabí e è sɔ́ siká dó bló ná bɔ Filisitɛ́ɛn lɛ́ɛ ná Mawu Mavɔmavɔ ɖó hwɛ yětɔn tamɛ lɛ́ɛ ɖíe: Acidɔ́di ná ɖokpó, Gaza ná ɖokpó, Acikelɔ́ni ná ɖokpó, Gati ná ɖokpó, bɔ Eklɔ́ni ná ɖokpó .

¹⁸ Ajaka sín akpajlɛ́ e yě sɔ́ siká dó bló ná lɛ́ɛ ɖ'é mɛ, bɔ ajaka nabí e ɖo gbǎ ɔ́ mɛ é sɔgbe xá toxo nabí e nu gǎn atɔ́ɔ́n lɛ́ɛ kpa acɛ dó é. Toxo e è mɛ ahohó lɛ́ lɛ̌ dó é kpódó ée è ma mɛ ahohó lɛ́ lɛ̌ dó ǎ é kpó bǐ ɖ'é mɛ. Nǔ e ɖɔ wɛ awǐnnya ɖaxó e jí yě sɔ́ akɔjijɛgbá Mawu Mavɔmavɔ tɔn ɔ́ ɖó ɔ́ ɖe é nɛ́. É kpo ɖo Jozuwée Bɛti-Cɛmɛ́ci tɔn sín gle mɛ káká wá jɛ égbé.

¹⁹ Bɛti-Cɛmɛ́cinu lɛ́ɛ kpɔ́n akɔjijɛgbá Mawu Mavɔmavɔ tɔn ɔ́ mɛ, bɔ Mawu Mavɔmavɔ hu súnnu kanɖé gban (70) ɖo yě mɛ, bɔ to ɔ́ bǐ byɔ́ aluwɛ mɛ, ɖó Mawu Mavɔmavɔ sín alɔ wɛ jɛ yě wú.

²⁰ Bɛti-Cɛmɛ́cinu lɛ́ɛ ɖɔ: “Mɛ ɖěbǔ sixú nɔ te ɖo Mawu Mavɔmavɔ, Mawu mímɛ́ énɛ́ ɔ́ nukɔn ǎ. Fítɛ́ mǐ ká ná zé akɔjijɛgbá tɔn yi ɖó din, bɔ é ná nɔ zɔ nú mǐ?”

²¹ Ée yě ɖɔ mɔ̌ ɔ́, yě sɛ́ mɛ dó Kiliyati-Yealimunu lɛ́ɛ, bó ɖɔ nú yě ɖɔ: “Filisitɛ́ɛn lɛ́ɛ lɛ́ kɔ nú akɔjijɛgbá Mawu Mavɔmavɔ tɔn wá; mi wá sɔ́.”