1 Samuwɛ́li 31 - MAWUXÓWÉMA

¹ Filisitɛ́ɛn lɛ́ɛ tɔ́n ahwan Izlayɛ́li ví lɛ́ɛ, bó gblé wǔ yě, bɔ yě hɔn bó yi kú jɛ Gilubowa só ɔ́ ta.

² Filisitɛ́ɛn lɛ́ɛ zun dó Sawúlu kpó vǐ tɔn lɛ́ɛ kpó jí. Yě hu vǐ tɔn Jonatáan, Avinadávu kpódó Maluki-Cua kpó.

³ Sawúlu gbé nya wɛ yě ká ɖe tawun. Mɛ e nɔ da gǎ lɛ́ɛ wá mɔ ɛ, bɔ xɛsi ɖaxó ɖé jɛ jǐ tɔn.

⁴ Bɔ Sawúlu ɖɔ nú mɛ e nɔ hɛn ahwanfunnú tɔn lɛ́ɛ n'i ɔ́ ɖɔ: “Sún hwǐ towe bó hu mì, bónú mɛ e ma nɔ sɛn Mawu ǎ nɛ́ lɛ́ɛ má wá hu mì kpó hwǐ kpó, bó wá cá mì ko ó.” Mɛ e nɔ hɛn ahwanfunnú tɔn lɛ́ɛ n'i ɔ́ ká ɖi xɛsi bo gbɛ́. Énɛ́ ɔ́, Sawúlu sɔ́ hwǐ tɔn tun te, bó zé éɖée slɔ́ nu.

⁵ Ée mɛ e nɔ hɛn ahwanfunnú tɔn lɛ́ɛ n'i ɔ́ mɔ mɔ̌ ɔ́, élɔ́ sɔ́ hwǐ tɔn tun te, bó zé éɖée slɔ́ nu bó kú.

⁶ Lě e Sawúlu kpó vǐ tɔn atɔn lɛ́ɛ kpó, mɛ e nɔ hɛn ahwanfunnú tɔn lɛ́ɛ n'i ɔ́ kpó mɛ tɔn lɛ́ɛ kpó bǐ kú gbɔn gbe nɛ́ gbe ɔ́ nɛ́.

⁷ Izlayɛ́li ví e ɖo tɔdo Izleyɛ́li tɔn ɔ́ gúdo lɛ́ɛ kpó éé ɖo Judɛ́ɛn tɔ ɔ́ gúdo lɛ́ɛ kpó se ɖɔ ahwanfuntɔ́ Izlayɛ́li tɔn lɛ́ɛ hɔn, bó lɛ́ se ɖɔ Sawúlu kpó vǐ tɔn lɛ́ɛ kpó kú. Ée yě se mɔ̌ ɔ́, yě lɔmɔ̌ hɔn jó toxo yětɔn lɛ́ɛ dó, bó yi, bɔ Filisitɛ́ɛn lɛ́ɛ yi cí toxo lɛ́ɛ mɛ.

⁸ Ayǐhɔ́ngbe tɔn ɔ́, Filisitɛ́ɛn lɛ́ɛ tɔ́n gǒ mɛ kíjé nú cyɔ lɛ́ɛ gbé, bó wá mɔ Sawúlu kpó vǐ tɔn lɛ́ɛ kpó sín cyɔ ɖo Gilubowa só ɔ́ jí.

⁹ Yě gbo Sawúlu sín ta, bó bɛ́ ahwanfunnú tɔn lɛ́ɛ, bó sɛ́ mɛ dó ɖɔ yě ní yi jlá wɛnɖagbe énɛ́ ɔ́ gbɔn Filisitíi to ɔ́ bǐ mɛ, bónú mɛ e ɖo vodún yětɔn lɛ́ɛ xwé lɛ́ɛ, kpó togun ɔ́ bǐ kpó ní se.

¹⁰ Yě bɛ́ Sawúlu sín ahwanfunnú lɛ́ɛ yi ɖó vodún yětɔn Asitaatée xwé, bó yi sɔ́ Sawúlu sín cyɔ, lobo blá ɖó Bɛti-Ceani sín ahohó ta.

¹¹ Ée Yavɛ́cinu e ɖo Galadi gbé jí lɛ́ɛ se lě e Filisitɛ́ɛn lɛ́ɛ wa Sawúlu nú gbɔn ɔ́,

¹² súnnu glegbenu yětɔn lɛ́ɛ bǐ sɔ́ nǔ bó zɔn zǎn, bó yi ɖe Sawúlu cyɔ sín Bɛti-Ceani sín ahohó ɔ́ ta, bó ɖe vǐ tɔn lɛ́ɛ lɔ sín cyɔ, lobo bɛ́ wá Yavɛ́ci, bó wá dó zo.

¹³ Yě bɛ̌ xú yětɔn lɛ́ɛ bó ɖi ɖó Tamalisitín ɖé sá. Ée yě ɖi xú lɛ́ɛ ɔ́, yě blá nu nú azǎn tɛ́nwe.