1 Samuwɛ́li 28 - MAWUXÓWÉMA

¹ Hwenɛ́nu ɔ́, Filisitɛ́ɛn lɛ́ɛ sɛ yěɖée kplé, bó dó ahwan gbě, bó ná yi fun ahwan xá Izlayɛ́li ví lɛ́ɛ, bɔ Akíci ɖɔ nú Davídi ɖɔ: “Hwi kpó mɛ towe lɛ́ɛ kpó ná kplá mì yi ahwangbénu. A se ganjí a?”

² Davídi ɖɔ nú Akíci ɖɔ: “È nǎ mɔ lě e nyɛ mɛsɛntɔ́ mɛtɔn ná wa nǔ gbɔn é.” Bɔ Akíci ɖɔ nú Davídi ɖɔ: “Un ná sɔ́ we bɔ a nǎ nɔ́ kplá mì, bó ná nɔ́ nya xɛ ɖo jǐ ce hwebǐnu.”

Sawúlu yi kan nǔ ɖo nyɔ̌nu bokantɔ́ e ɖo Eyinu-Dɔ́ɔ ɔ́ gɔ́n

³ Ée Samuwɛ́li kú ɔ́, Izlayɛ́li to ɔ́ bǐ yi ɖi i ɖó toxo tɔn mɛ ɖo Hlama, bó wa nǔ tɔn. Đ'ayǐ ɔ́, Sawúlu ka ko hu mɛ e nɔ kan amɔɛ lɛ́ɛ kpó mɛ e nɔ kan bo lɛ́ɛ kpó sín axɔ́súɖuto tɔn mɛ.

⁴ É wá su gbe ɖokpó, bɔ Filisitɛ́ɛn lɛ́ɛ kplé yěɖée, bó wá ɖó gɔnu ɖó Cunɛ́mu. Sawúlu ká kplé ahwanfuntɔ́ Izlayɛ́li tɔn lɛ́ɛ, bɔ yě ɖó gɔnu ɖó Gilubowa.

⁵ Ée Sawúlu mɔ Filisitɛ́ɛn lɛ́ɛ lě ɔ́, xɛsi ɖaxó ɖé jɛ jǐ tɔn, bɔ hǔn tɔn nɔ xo gblo, gblo, gblo.

⁶ Sawúlu kan nǔ byɔ́ Mawu Mavɔmavɔ; Mawu Mavɔmavɔ ka kɛ nu d'é mɛ n'i ǎ. É xo dlɔ̌ ɛ ǎ, é ká ɖɔ xó n'i gbɔn Wulímu vɔ̌sánú-xwlémawutɔ́ lɛ́ɛ tɔn jí ǎ, é ká ɖɔ xó n'i gbɔn gbeyíɖɔ tɔn lɛ́ɛ ɖě jí ǎ.

⁷ Sawúlu gbɔ bo ɖɔ nú mɛsɛntɔ́ tɔn lɛ́ɛ ɖɔ: “Mi ba nyɔ̌nu e nɔ kan bo é ɖokpó nú mì bónú má yi kan nǔ ɖo gɔ̌n tɔn.” Mɛsɛntɔ́ tɔn lɛ́ɛ ɖɔ n'i ɖɔ nyɔ̌nu ɖokpó ɖo Eyinu-Dɔ́ɔ, bó nɔ́ kan bo.

⁸ Bɔ Sawúlu fɔ awu ɖěvo dó, bɔ è sɔ́ sixú tunwun i ǎ. É yi nǎwe ɔ́ gɔ́n zǎn mɛ, é kpó súnnu we kpó. Sawúlu ɖɔ nú nǎwe ɔ́ ɖɔ: “Kan bo nú mì. Kúvítɔ́ e un ná ɖɔ ɔ́ wɛ a nǎ ylɔ́ bó ná kan nǔ byɔ́ nú mì.”

⁹ Nyɔ̌nu ɔ́ ká yí gbe n'i ɖɔ: “A tunwun nǔ e Sawúlu dó sin xá mɛ e nɔ kan amɔɛ lɛ́ɛ kpó mɛ e nɔ kan bo lɛ́ɛ kpó ɖo tomɛ fí é; é hu yě bǐ. Bɔ étɛ́wú hwɛ ka wá ɖo mɔ ɖó nú mì wɛ, bɔ è nǎ hu nyi lɔ?”

¹⁰ Ée é ɖɔ mɔ̌ ɔ́, Sawúlu xwlé Mawu n'i ɖɔ: “Mawu Mavɔmavɔ ɖo gbɛ! Nǔɖé ná gbo we ɖ'é mɛ ǎ.”

¹¹ Nyɔ̌nu ɔ́ kanbyɔ́ ɛ ɖɔ: “Kúvítɔ́ ɖě tɛ́ a jlǒ má ylɔ́ nú we?” Bɔ é yí gbe n'i ɖɔ: “Ylɔ̌ Samuwɛ́li nú mì.”

¹² Ée é ɖɔ mɔ̌ ɔ́, nyɔ̌nu ɔ́ ylɔ́ Samuwɛ́li nǔgbó, bɔ é wá. Ée nyɔ̌nu ɔ́ mɔ Samuwɛ́li lě ɔ́, é sú xó ɖaxó ɖé, bó ɖɔ nú Sawúlu ɖɔ: “Étɛ́wú a blɛ̌ mì? Hwi wɛ nyí Sawúlu hǔn?”

¹³ Axɔ́sú ɔ́ ká yí gbe n'i ɖɔ: “Ma ɖi xɛsi ó, ɖɔ nǔ e mɔ wɛ a ɖe ɔ́ nú mì.” Nyɔ̌nu ɔ́ yí gbe n'i ɖɔ: “Un ɖo kúvítɔ́ ɖé mɔ wɛ bɔ é ɖo ayǐkúngban glɔ́ tɔ́n sín wɛ.”

¹⁴ É lɛ́ kanbyɔ́ ɛ ɖɔ: “Nɛ̌ kúvítɔ́ e mɔ wɛ a ɖe ɔ́ ka cí?” Bɔ nǎwe ɔ́ yí gbe n'i ɖɔ: “Degénɔ kpikpo ɖé mɔ wɛ un ɖe, bɔ é ɖo awu ɖaxó ɖé mɛ, bó ɖo tíntɔ́n sín ayǐkúngban glɔ́ wɛ.” Sawúlu mɔ nukúnnú jɛ wú ɖɔ Samuwɛ́li wɛ, bó húzú jɛ kpo bo ɖe kɔ́.

¹⁵ Samuwɛ́li kanbyɔ́ Sawúlu ɖɔ: “Étɛ́wú a ka dó tagba nú mì bó ylɔ́ mì?” Sawúlu yí gbe n'i ɖɔ: “Aluwɛ ɖaxó ɖé mɛ wɛ un ɖe. Filisitɛ́ɛn lɛ́ɛ wɛ tɔ́n ahwan mì, bɔ Mawu ka jó mì dó. É ɖɔ xó nú mì gbɔn gbeyíɖɔ tɔn lɛ́ɛ ɖě jí ǎ, é ká ɖɔ nú mì gbɔn dlɔ̌ mɛ ǎ, bɔ un tunwun ɖɔ má wá ylɔ́ we nú a nǎ ɖɔ nǔ e un nǎ wa é nú mì.”

¹⁶ Ée é ɖɔ mɔ̌ ɔ́, Samuwɛ́li kanbyɔ́ ɛ ɖɔ: “Étɛ́wú a ka wá ɖo nǔ kanbyɔ́ nyɛ wɛ? Mawu Mavɔmavɔ ko jó we dó, bó húzú kɛntɔ́ towe.

¹⁷ Lě e Mawu Mavɔmavɔ ɖɔ émí ná wa nǔ towe gbɔn bɔ un ɖɔ nú we ɔ́ wa gbɔn wɛ é ɖe. Mawu Mavɔmavɔ gba to ɔ́ dó ta nú we, bó sɔ́ jó nú Davídi.

¹⁸ A se tónú nú Mawu Mavɔmavɔ ǎ, a sú Amalɛ́ki ví lɛ́ɛ bǐ sín kún dó lě e Mawu Mavɔmavɔ zɔ́n gbɔn é ǎ. Énɛ́ ɔ́ wú wɛ Mawu Mavɔmavɔ ɖo nǔ wa xá we wɛ gbɔn mɔ̌ égbé.

¹⁹ Đésú lɔ ɔ́, Mawu Mavɔmavɔ ná jó hwi kpó Izlayɛ́li to ɔ́ bǐ kpó dó nú Filisitɛ́ɛn lɛ́ɛ. Sɔ ɔ́, hwi kpó vǐ towe lɛ́ɛ kpó ná ɖo kpɔ́ xá mì ɖo kútomɛ dě, bɔ Mawu Mavɔmavɔ ná jó ahwangɔnu Izlayɛ́li tɔn nú Filisitɛ́ɛn lɛ́ɛ.”

²⁰ Tlóló kpowun ɔ́, Sawúlu j'ayǐ, bó dlɛ́n bǐ ɖo kɔ́ mɛ; xó e Samuwɛ́li ɖɔ ɔ́ kú lanmɛ n'i bǐ, bɔ é sɔ́ ɖó gǎn ɖěbǔ ǎ, ɖó é ɖu nǔ ɖěbǔ ɖo kéze ɔ́ mɛ ǎ, é ká ɖu zǎn ɔ́ mɛ ǎ.

²¹ Nyɔ̌nu ɔ́ wá Sawúlu gɔ́n, bó mɔ ɖɔ xɛsi ɖi i, bó ɖɔ n'i ɖɔ: “Sɛ́mɛɖó, xó e mɛ ɖɔ nú nyɛ mɛsɛntɔ́ mɛtɔn ɔ́, un bló. Un sɔ́ gbɛ ce ɖó axɔ́nu, bó wa nǔ e mɛ zɔ́n mì é.

²² Din ɔ́, è nǐ bó ɖótó mì; un ná hɛn nǔɖuɖu kpɛɖé wá nú mɛ, bɔ mɛ ná ɖu, bó ná mɔ gǎn dó zɔn ali.”

²³ Lo ɔ́, Sawúlu gbɛ́ ɖɔ émí kún ná ɖu nǔ ɖěbǔ ó. Mɛsɛntɔ́ tɔn lɛ́ɛ kpó nyɔ̌nu ɔ́ kpó jɛ kɔ n'i káká ɖɔ é ní ɖu nǔ, bɔ é gbɔ bó yí gbe. Énɛ́ ɔ́, é sí te sín kɔ́ mɛ, bó jínjɔ́n zan jí.

²⁴ Nyibúví kloklo ɖokpó ká ɖo nǎwe ɔ́ sí, bɔ é yá wǔ bó hu tlóló; é zé linfín bó nya, bó ɖa wɔ̌xúxú,

²⁵ lobo sɔ́ nú Sawúlu kpó mɛsɛntɔ́ tɔn lɛ́ɛ kpó, bɔ yě ɖu. Ée yě ɖu nǔ fó ɔ́, yě sɔ́ nǔ zǎn ɔ́ mɛ bó yi.