1 Samuwɛ́li 25 - MAWUXÓWÉMA

¹ Samuwɛ́li kú, bɔ Izlayɛ́li to ɔ́ bǐ kplé bó wa nǔ tɔn, bó ɖi i ɖó xwé tɔn gbe ɖo Hlama. Énɛ́ ɔ́ gúdo ɔ́, Davídi yi cí gbětótló Paláni tɔn mɛ.

² Nya dɔkunnɔ ɖokpó ká tíin ɖo Mawɔ́ni bó nɔ́ nɔ Kaamɛ́li. Nǔ ɖo así tɔn ɖésú. É ɖó lɛ̌ngbɔ́ afɔwó-afatɔ́n (3.000), bó ɖó gbɔ̌ afatɔ́n (1.000). Nya ɔ́ yi Kaamɛ́li, bó ɖo fún kpa nú kanlin tɔn lɛ́ɛ wɛ.

³ Nya ɔ́ nɔ nyí Navalu, bɔ asi tɔn nɔ nyí Avigayilu. Nyɔ̌nu ɔ́ ɖó nǔnywɛ́, bó lɛ́ nyɔ́ ɖɛkpɛ ɖésú. Súnnu ɔ́ ká nyí mɛɖé bó nylá hun, bó nɔ xo dǎka; Kalɛ́bu kún mɛ wɛ nya ɔ́ jɔ ɖe.

⁴ Davídi ɖo gbětótló ɔ́ mɛ bó se ɖɔ Navalu ɖo fún kpa nú kanlin tɔn lɛ́ɛ wɛ,

⁵ bó sɛ́ dɔ̌nkpɛvú wǒ dó gɔ̌n tɔn, bó ɖɔ nú yě ɖɔ: “Mi yi Kaamɛ́li, Navalu gɔ́n, bó dó gbe e nú mì.

⁶ Mi ná ɖɔ n'i ɖɔ nyɛ mɛsɛntɔ́ tɔn Jɛsée ví ɔ́ wɛ sɛ́ mi dó, bó ɖɔ xwe ɔ́ ná nyí xwesi n'i, ɖɔ nǔ ná nyɔ́ n'i bɔ ká tɔn kpó go tɔn kpó bǐ nǎ nɔ ganjí.

⁷ Mi ɖɔ n'i ɖɔ un se ɖɔ fúnkpatɔ́ lɛ́ɛ ɖo gɔ̌n tɔn. Lɛ̌ngbɔ́nyitɔ́ tɔn lɛ́ɛ ɔ́, hwenu e mǐ kpó yě kpó nɔ kpɔ́ ɖo Kaamɛ́li ɔ́, mǐ wa nǔ nyanya ɖěbǔ nú yě ǎ. Kanlin yětɔn ɖokpó ká hwe ǎ.

⁸ É jló e hǔn, é ní kanbyɔ́ yě, yě ná tínmɛ n'i. Mi ɖɔ n'i ɖɔ ní kɛnklɛ́n bó nyɔ́ xomɛ dó mi wú, ɖó égbé ɔ́, xwe ɖu wɛ mǐ ɖe. Mi ɖɔ n'i ɖɔ un ɖo kɛnklɛ́n dó n'i wɛ ɖɔ nú é ɖó nǔɖé ɖo fínɛ́ hǔn, é ní ná nyɛ mɛsɛntɔ́ tɔn ɔ́ kpó mi kpó.”

⁹ Ée Davídi sín mɛ lɛ́ɛ wá Navalu gɔ́n ɔ́, yě ɖɔ xó nɛ́ lɛ́ɛ bǐ n'i ɖó Davídi nyíkɔ mɛ bó xwɛ.

¹⁰ Navalu ka ɖɔ nú mɛsɛntɔ́ Davídi tɔn lɛ́ɛ ɖɔ: “Mɛ̌ ka nyí Davídi Jɛsée ví ɔ́ tawun? Égbé din ɔ́, mɛsɛntɔ́ gěgé tíin bó nɔ hɔn sín gǎn yětɔn lɛ́ɛ gɔ́n,

¹¹ bɔ din ɔ́, nyɛ ná sɔ́ nǔɖuɖu ce, bó ná sɔ́ sin ce, bó ná sɔ́ kanlin e un hu nú mɛ e ɖo fún kpa nú kanlin ce wɛ lɛ́ɛ, bó ná mɛ e un ma tunwun fí e yě gosín ǎ lɛ́ɛ é wɛ a? Un ná wa mɔ̌ ǎ.”

¹² Ée Navalu ɖɔ mɔ̌ ɔ́, mɛ e Davídi sɛ́ dó lɛ́ɛ lɛ́ kɔ bo yi ɖɔ xó nɛ́ lɛ́ɛ bǐ nú Davídi.

¹³ Bɔ Davídi ɖɔ nú mɛ tɔn lɛ́ɛ ɖɔ: “Mɛ ɖokpó ɖokpó ní blá hwǐ tɔn.” Ée é ɖɔ mɔ̌ ɔ́, yě bǐ blá hwǐ, bɔ Davídi lɔ blá hwǐ tɔn. Mɛ e xwedó Davídi lɛ́ɛ ná yi afɔwe (400), bɔ é kpo gbɛtɔ́ afɔɖé (200) ɖo agban yětɔn lɛ́ɛ kɔn.

Avigayilu gɔ́ alɔ nú Davídi

¹⁴ Mɛsɛntɔ́ Navalu tɔn lɛ́ɛ ɖokpó wá ɖɔ nú Avigayilu Navalu sín asi ɔ́ ɖɔ: “Davídi nɔ gbětótló mɛ, bó sɛ́ mɛ dó ɖɔ yě ní wá dó gbe gǎn mǐtɔn. Ée yě wá ɔ́, gǎn mǐtɔn yí yě ganjí ǎ.

¹⁵ Có mɛ énɛ́ lɛ́ɛ ká wa ɖagbe nú mǐ titewungbe. Yě bló nǔ nyanya ɖokpó nú mǐ ǎ, kanlin mǐtɔn lɛ́ɛ ɖokpó ká hwe hwenu e mǐ kpó yě kpó nɔ kpɔ́ ɖo gběhan mɛ ɔ́ ǎ.

¹⁶ Hwenu e mǐ kpó yě kpó ɖo kpɔ́ zǎn kpó kéze kpó ɔ́, ahohó ɖɔhun wɛ yě cí nú mǐ, bɔ mǐdɛɛ lɛ́ɛ nɔ́ ɖo kanlin mǐtɔn lɛ́ɛ wú kpé nukún dó wɛ.

¹⁷ Din ɔ́, lin tamɛ bó kpɔ́n nǔ e a nǎ wa é, ɖó gǎn mǐtɔn ná dɔn, bɔ xwédo tɔn ná dɔn ɔ́, wɛn wɛ é ko ɖe din. É ɖíe ká nyí mɛɖé, bɔ jijɔ tɔn ma nyɔ́ ɖěbǔ, bónú è nǎ sixú glá ɖɔ xó ɖé n'i ǎ e.”

¹⁸ Ée Avigayilu se mɔ̌ ɔ́, é yá wǔ fɔ wɔ̌xúxú afɔɖé, bó fɔ vɛ̌ɛn anyǔglo we, bó hu gbɔ̌ atɔ́ɔ́n, bó bló bǐ, bó hɛn nǔkún mimɛ gannú atɔ́ɔ́n, bó fɔ vǐwun xúxú hwǐn kanwe ko kpó fígi mlímlí afɔɖé kpó, bó dó nǔ nɛ́ lɛ́ɛ bǐ sín agban nú tócí ɖé lɛ́ɛ.

¹⁹ É ɖɔ nú mɛsɛntɔ́ tɔn lɛ́ɛ ɖɔ: “Mi zɔn mǐ yi; un ná jɛ gǔdo mitɔn.” É ká ɖɔ xó ɖěbǔ nú asú tɔn ǎ.

²⁰ Avigayilu xá tócí tɔn jí, bó gbɔn ali e gbɔn sókan mɛ ɔ́, bó jɛ te wá só ɔ́ kpá, bó mɔ Davídi kpó mɛ tɔn lɛ́ɛ kpó lɔ ɖo te jɛ wɛ, bɔ é kpé yě.

²¹ Davídi ka ɖo ɖiɖɔ dó ayi mɛ wɛ ɖɔ: “Ée un kpé nukún dó nya nɛ́ ɔ́ sín nǔ lɛ́ɛ wú ɖo gbětótló mɛ bɔ ɖokpó ma hwe ǎ ɔ́, nǔ yǎyá wɛ un wa nɛ́ hǔn. É sɔ́ nyanya dó sú ɖagbe xɔ́ mì.

²² Cóbónú sɔ zǎnzǎn ná su ɔ́, ényí un jó mɛ e ko sixú nyí Navalu tɔn ɔ́ ɖokpó dó nyi gbɛ hǔn, Mawu ní dɔn tó e syɛ́n hú tódɔnnúmɛ lɛ́ɛ bǐ é nú mì.”

²³ Ée Avigayilu mɔ Davídi lě tlóló ɔ́, é jɛ te bléwún sín tócí tɔn jí, bó xwe agbɔ̌nnusú do ɖo Davídi sá mɛ, bó ɖe kɔ́,

²⁴ bó ɖɔ: “Sɛ́ ce, nǔ e jɛ nɛ́ lɛ́ɛ bǐ ɔ́, nyɛ wɛ zɔ́n, kɛnklɛ́n bónú nyɛ mɛsɛntɔ́ towe ná ɖɔ xó nú we; ɖǒtó nyɛ mɛsɛntɔ́ towe.

²⁵ Sɛ́ ce, ma ɖótó nya dídá énɛ́ ɔ́ ó. Lě e nyǐkɔ tɔn cí é jɛ́n é cí. Navalu wɛ nyǐkɔ tɔn nyí. É gú hú gbɔ̌, nyɛ mɛsɛntɔ́ towe ká mɔ mɛ e a sɛ́ dó lɛ́ɛ ǎ.

²⁶ Din ɔ́ sɛ́ ce, un xwlé Mawu nú we ɖɔ nú Mawu Mavɔmavɔ ɖo gbɛ jɛ́n wɛ bónú hwi lɔ ɖo gbɛ ɔ́, Mawu Mavɔmavɔ wɛ hɛn we ɖó te ɖɔ hwi ní má kɔn hun kɔn nyi ayǐ dó ba hwɛjijɔ nú hwiɖée ó. Mɛ e nyí kɛntɔ́ towe lɛ́ɛ kpó mɛ e ɖo nyanya towe lin wɛ lɛ́ɛ kpó ɔ́, nǔ e ná gbo Navalu ɔ́ ní gbo yě lɔ.

²⁷ Kɛnklɛ́n yí nǔ e nyɛ mɛsɛntɔ́ towe hɛn wá nú we é, bó má nú mɛ e kpó hwi kpó zɔn lɛ́ɛ é.

²⁸ Kɛnklɛ́n wɛ un dó nú we, sɔ́ hwɛ e un hu dó we ɔ́ kɛ mì. Mawu Mavɔmavɔ ná bló bɔ axɔ́súɖuɖu ná nɔ hɛ̌n towe nu tɛgbɛ, ɖó a nɔ fun ahwan n'i; ma nú è mɔ nǔ nyanya ɖé ɖo gbɛzán towe mɛ gbeɖé ó.

²⁹ Sɛ́ ce, ényí mɛɖé sí te dó jǐ towe, bó ɖo kú towe ba wɛ ɔ́, Mawu Mavɔmavɔ, Mawu towe ná nya xɛ ɖo jǐ we, bó ká ná fɔ kɛntɔ́ towe lɛ́ɛ nyi dó gbě, lě e è nɔ sɔ́ hwǎn dó klohwán mɛ bó nɔ da é ɖɔhun.

³⁰ Sɛ́ ce, hwenu e Mawu Mavɔmavɔ ná bló nǔ ɖagbe e sín akpá é dó nú we ɔ́ bǐ, bó ná sɔ́ we ɖó Izlayɛ́li togun ɔ́ nu ɔ́,

³¹ ma ɖo hwɛjijɔ ba nú hwiɖée wɛ bó hu mɛ dó wǔvɔ́ bónú ayi towe ná xo hun xá we ó. Sɛ́ ce, hwenu e Mawu Mavɔmavɔ ká ná wá wa ɖagbe nú we ɔ́, flín nyɛ mɛsɛntɔ́ towe.”

³² Davídi ɖɔ nú Avigayilu ɖɔ: “Un dó kú nú Mawu Izlayɛ́li tɔn e sɛ́ we dó, bɔ a wǎ kpé mì égbé din é.

³³ Un dó kú nú hwi lɔmɔ̌; hwi mɛ e ɖó nǔnywɛ́, bó hɛn mì ɖó te, bɔ un ma kɔn hun kɔn nyi ayǐ dó ba hwɛjijɔ nú nyɛɖée ǎ é.

³⁴ Amɔ̌, un xwlé nǔ nú we; Mawu Mavɔmavɔ, Mawu Izlayɛ́li tɔn e hɛn mì ɖó te bɔ un ma wa nǔɖé nú we égbé ǎ ɔ́ ɖo gbɛ. Ényí a ma ko yá wǔ wá mɔ mì ǎ ɔ́, mɛɖé sɔ́ ná nyí Navalu tɔn bo ná kpo bɔ ayǐ ná hɔ́n dó ǎ.”

³⁵ Ée Davídi ɖɔ mɔ̌ ɔ́, é yí nǔ e Avigayilu hɛn wá n'i lɛ́ɛ ɖo así tɔn, bó ɖɔ n'i ɖɔ: “A nǎ yi xwé ɖagbe; un se xó e a ɖɔ ɔ́. Un yí gbe ná.”

Navalu kú, bɔ Davídi da Avigayilu

³⁶ Hwenu e Avigayilu ɖo xwé gbe wá wɛ ɔ́, Navalu ko ylɔ́ agɔ̌ ɖaxó ɖokpó axɔ́sú ɖé ɖɔhun. É kó nu ahan bo mú bǐ, bɔ xomɛ ɖo hunhun i wɛ ɖo gbɛmɛ. Avigayilu ka ɖɔ xó ɖěbǔ n'i ǎ. É tín nǔ ɖěbǔ mɛ n'i káká cóbɔ ayǐ hɔ̌n ǎ.

³⁷ Ée é su zǎnzǎn bɔ ahan ɔ́ hɔ́n nú Navalu ɔ́, asi tɔn tín nǔ e jɛ ɔ́ bǐ sésé mɛ n'i. Énɛ́ ɔ́, Navalu sín hǔn zɛ, bɔ é sɔ́ sixú xo nǔ ɖo wǔ ǎ.

³⁸ Azǎn wǒ gúdo ɔ́, Mawu Mavɔmavɔ sín alɔ jɛ Navalu wú bɔ é kú.

³⁹ Ée Davídi se ɖɔ Navalu kú ɔ́, é ɖɔ: “Un dó kú nú Mawu Mavɔmavɔ ɖó é ba hlɔn nú mì ɖó nǔ e Navalu wa nú mì ɔ́ nu. É lɔn bónú mɛsɛntɔ́ tɔn wa nǔ nyanya ǎ. Adǎka e Navalu jló ná xo wǔ e ɔ́, Mawu Mavɔmavɔ lílɛ́ bɔ é jɛ é ɖésúnɔ jí.” Ée Davídi ɖɔ mɔ̌ ɔ́, é sɛ́ wɛn dó Avigayilu ɖɔ é ní wá húzú asi émítɔn.

⁴⁰ Mɛsɛntɔ́ Davídi tɔn lɛ́ɛ wá Avigayilu gɔ́n ɖo Kaamɛ́li, bó ɖɔ n'i ɖɔ: “Davídi sɛ́ mǐ dó gɔ̌n towe ɖɔ mǐ ní wá kplá hwi wá nú émí, bónú hwi ná nyí asi émítɔn.”

⁴¹ Énɛ́ ɔ́, Avigayilu sí te, bo jɛ kpo bo ɖe kɔ́, bó ɖɔ: “Un ná húzú kannumɔ nú sɛ́ ce, bó ná nɔ klɔ́ afɔ nú mɛsɛntɔ́ tɔn lɛ́ɛ.”

⁴² Ée Avigayilu ɖɔ mɔ̌ ɔ́, é sɔ́ nǔ tlóló, bó xá tócí ɖé jí, bɔ ɖyɔ̌vǐ atɔ́ɔ́n kplá ɛ, bɔ é xwedó wɛnsagun e Davídi sɛ́ dó e lɛ́ɛ, bó húzú asi nú Davídi.

⁴³ Davídi ka ko da Axinɔwamu Izleyɛ́linu ɔ́ ɖ'ayǐ, bɔ yě mɛ we lɛ́ɛ bǐ nyí asi tɔn.

⁴⁴ Davídi sín asi nukɔntɔn ɔ́ nɔ́ nyí Mikali; Sawúlu ví wɛ. Tɔ́ tɔn Sawúlu ɔ́ ká ko sɔ́ ɛ da nú Layici Galímunu ɔ́ sín vǐ Paluti.