1 Samuwɛ́li 24 - MAWUXÓWÉMA

¹ Davídi hɔn sín Zifu, bó yi cí Eyinu-Gɛdi, ɖo fí e mɛɖé má ná sixú kpé wǔ tɔn ɖe ǎ é.

² Ée Sawúlu nya Filisitɛ́ɛn lɛ́ɛ yi ɖó bó wá ɔ́, é se ɖɔ Davídi ɖo gbětótló Eyinu-Gɛdi tɔn mɛ.

³ Ée Sawúlu se mɔ̌ ɔ́, é cyán súnnu glegbenu afɔwó-afatɔ́n donu atɔn (3.000) ɖo Izlayɛ́li to ɔ́ mɛ, bó jɛ Davídi kpó mɛ tɔn lɛ́ɛ kpó gbé mɛ, bó hun káká yi gbǎgbá gbě tɔn lɛ́ɛ sín awǐnnya lɛ́ɛ kɔn.

⁴ Sawúlu wá ɖo gbɔ̌kpó e ɖo ali ɔ́ kpá lɛ́ɛ kɔn gbɔn wɛ, bó mɔ sónu ɖé, bó byɔ́ mɛ, bó ná yi afɔ jí. Davídi kpó mɛ tɔn lɛ́ɛ kpó ká ɖo sónu ɔ́ mɛ ɖo nukɔn.

⁵ Davídi sín mɛ lɛ́ɛ ɖɔ n'i ɖɔ: “Égbé wɛ Mawu Mavɔmavɔ ɖɔ émí ná jó kɛntɔ́ towe nú we, bɔ a nǎ sɔ́ dó wa nǔ e jló we é.” Ée yě ɖɔ mɔ̌ ɔ́, Davídi sɛ yi fí e Sawúlu ɖe ɔ́, bó wa dɛ̌dɛ̌, bó kán awu ɖaxó e Sawúlu dó é.

⁶ Ée é bló mɔ̌ ɔ́, ayi tɔn jɛ hun xo xá ɛ jí, ɖó Sawúlu sín awu e é kán ɔ́ wú.

⁷ Bɔ é ɖɔ nú mɛ tɔn lɛ́ɛ ɖɔ: “Mawu Mavɔmavɔ ní má lɔn nú un hu Sɛ́mɛɖó ce, axɔ́sú e Mawu Mavɔmavɔ sɔ́ ɔ́ ó; un ma sɔ́ alɔ ce bo dó wa nǔ mɔ̌hun ná ó, ɖó Mawu Mavɔmavɔ wɛ ɖe e ɖó vo.”

⁸ Xó énɛ́ e Davídi ɖɔ ɔ́ zɔ́n bɔ mɛ tɔn lɛ́ɛ sɔ́ sixú ɖó alɔ Sawúlu wú ǎ. Sawúlu tɔ́n sín sónu ɔ́ mɛ, bó lɛ́ wlí ali tɔn ɖidó.

⁹ Ée Sawúlu tɔ́n bɔ é nɔ zaan ɔ́, Davídi lɔmɔ̌ tɔ́n sín sónu ɔ́ mɛ, bó jɛ xó sú ylɔ́ Sawúlu jí ɖɔ: “Axɔ́sú sɛ́mɛɖó ce!” Ée Sawúlu se mɔ̌ ɔ́, é kpɔ́n gǔdo, bɔ Davídi jɛ kpo bo ɖe kɔ́.

¹⁰ Davídi ɖɔ nú Sawúlu ɖɔ: “Étɛ́wú è ka nɔ ɖótó mɛ e nɔ ɖɔ nú mɛ ɖɔ un ɖo nyanya mɛ tɔn lin wɛ lɛ́ɛ?

¹¹ Mɛ ɖésú mɔ din kpó nukún mɛtɔn kpó ɖɔ Mawu Mavɔmavɔ jó mɛ nú mì égbé ɖo sónu élɔ́ mɛ, bɔ è kplɔ́n nǔ mì ɖɔ má hu mɛ. Lo ɔ́, un gbɛ́, ɖó un jló ná hu Sɛ́mɛɖó ce ǎ, ɖó Mawu Mavɔmavɔ wɛ sɔ́ mɛ axɔ́sú.

¹² Daá, kpɔ́n, awu mɛtɔn sín tó ɖíe ɖo alɔ ce mɛ e. Ée un sɛ́n awu mɛtɔn sín tó bó má ká hu mɛ ǎ é ɔ́, tunwun bo mɔ nǔ jɛ wú ɖɔ un kún fɔ́n gǔ dó jǐ mɛtɔn ó. Un kún ká ɖo nyanya mɛtɔn lin wɛ ó. Un kún ká hu hwɛ ɖé dó mɛ ó. Mɛ ka nɔ ɖo mɔ ɖó nú mì wɛ bó ná hu mì.

¹³ Mawu Mavɔmavɔ wɛ ná gbo hwɛ énɛ́ ɔ́ nú nyi kpó mɛ kpó; nǔ e mɛ wa xá mì ɔ́, é wɛ ná dɔn tó tɔn nú mɛ. Amɔ̌ nyɛ ɔ́, un ná wa nǔɖé nú mɛ ǎ.

¹⁴ È ko dó lǒ ɖé bó ɖɔ: ‘Mɛdídá ɔ́, nǔ nyanya jɛ́n é ná wa;’ amɔ̌, nyɛ ɔ́, un ná wa nǔɖé nú mɛ ǎ.

¹⁵ Sɛ́mɛɖó! Mɛ̌ gbě nya wɛ è ɖe? Nyɛ wɛ a? Nyɛ mɛ e cí cukú kúkú ɖɔhun ɔ́, nyɛ mɛ e cí jɔ̌ yǎyá ɖɔhun ɔ́ sín gbě nya wɛ è ɖe a?

¹⁶ Mawu Mavɔmavɔ ná gbo nú nyi kpó mɛ kpó. É ná kpɔ́n bó ná jɛ ahwan jǐ ce, bó ná mɔ hwɛjijɔ nú mì, bó ná hwlɛ́n mì ɖo mɛ sí.”

¹⁷ Ée Davídi ɖɔ xó énɛ́ lɛ́ɛ nú Sawúlu fó ɔ́, Sawúlu kanbyɔ́ Davídi ɖɔ: “Davídi, vǐ ce, hwi jɛ́n ɖo mɔ̌ ɖɔ nú mì wɛ a?” Ée é ɖɔ mɔ̌ ɔ́, é sú xó bó ya avǐ káká,

¹⁸ bó ɖɔ nú Davídi ɖɔ: “Hwɛ towe jɔ; nyɛ wɛ wa nǔ nyi do, ɖó nyɛ ɔ́, un wa nyanya nú we, bɔ hwɛ ka wa ɖagbe nú mì.

¹⁹ A ɖe xomɛnyínyɔ́ towe xlɛ́ mì égbé, ɖó Mawu Mavɔmavɔ jó mì nú we, có hwɛ ɔ́, a hu mì ǎ.

²⁰ Ényí mɛɖé yi kpé kɛntɔ́ tɔn ɔ́, é nɔ jó e dó bɔ é nɔ yi wǔɖíɖí aji ɖɔhun wɛ a? Gbeɖé kpɔ́n! Mawu Mavɔmavɔ ní ná nǔ e a wa nú mì égbé ɔ́ sín ajɔ we.

²¹ Din ɔ́, un mɔ ɖɔ a nǎ wá ɖu axɔ́sú gbe ɖokpó, bɔ Izlayɛ́li to ɔ́ ná vo ɖo acɛ towe mɛ.

²² Xwlé Mawu Mavɔmavɔ nú mì ɖɔ nú un kú ɔ́, a kún ná sú mɛ ce lɛ́ɛ sín kún dó, bónú nyǐkɔ ce ná bú ó.”

²³ Davídi yí gbe bo xwlé Mawu Mavɔmavɔ nú Sawúlu bɔ Sawúlu lɛ́ kɔ yi xwé, bɔ Davídi kpó mɛ tɔn lɛ́ɛ kpó lɛ́ kɔ yi cí fí e mɛɖé má ná sixú kpé yě wú ɖe ǎ é.