1 Samuwɛ́li 22 - MAWUXÓWÉMA

¹ Davídi gosín Gati, bó hɔn yi cí sóxo mɛ ɖo Adulámu. Nɔví tɔn lɛ́ɛ kpó mɛ e ɖo tɔ́ tɔn xwé lɛ́ɛ bǐ kpó se mɔ̌ bó yi mɔ ɛ ɖo dɔ̌n.

² Mɛ e adǎn ɖo gbigbo wɛ lɛ́ɛ, mɛ e axɔ́ ɖo kɔ ná lɛ́ɛ, kpó mɛ e xomɛ ma hun ǎ lɛ́ɛ kpó bǐ hɔn yi su i; yě ná yi gbɛtɔ́ afɔwe (400) mɔ̌, bɔ é húzú gǎn yětɔn.

³ Davídi gosín Adulámu, bó yi Misipée ɖo Mɔwabu yíkúngban jí, bó ɖɔ nú axɔ́sú Mɔwabu tɔn ɖɔ: “Kɛnklɛ́n bó ná gbe nú tɔ́ ce kpó nɔ ce kpó ná wá nɔ fí káká jɛ hwenu e un ná tunwun nǔ e ná sɔ́ mì dó wa ná wɛ Mawu ɖe é.”

⁴ Davídi kplá yě yi ɖó axɔ́sú Mɔwabu tɔn ɔ́ xwé, bɔ yě nɔ́ fínɛ́ káká jɛ hwenu e Davídi tɔ́n sín fí e é yi cí, bɔ mɛɖé ma sixú kpé wǔ tɔn ɖe ǎ é.

⁵ É wá su gbe ɖokpó bɔ gbeyíɖɔ Mawu tɔn Gadi ɖɔ nú Davídi ɖɔ: “Ma nɔ fí élɔ́ e a wǎ hɔn hwlá cí é ó, yi Judáa tomɛ.” Ée é ɖɔ mɔ̌ ɔ́, Davídi yi nǔgbó bó yi cí Ɛlɛti zungbó mɛ.

Sawúlu hu vɔ̌sánú-xwlémawutɔ́ e ɖo Nɔvu lɛ́ɛ tɛ́

⁶ Sawúlu se ɖɔ mɛɖé lɛ́ɛ tunwun fí e Davídi kpó mɛ tɔn lɛ́ɛ kpó ɖe é. Hwenɛ́nu ɔ́, Sawúlu ɖo só ɖé jí ɖo Giveya, bó ɖo ayǐjínjɔ́n ɖo tamalisitín ɖé sá, bɔ hwǎn tɔn ɖo alɔ tɔn mɛ. Mɛsɛntɔ́ tɔn lɛ́ɛ bǐ ɖo fínɛ́ xá ɛ.

⁷ Bɔ é ɖɔ nú yě ɖɔ: “Bɛnjamɛ́ɛnu e mi, mi ɖótó mì ganjí. Jɛsée ví ɔ́ ná ná gle kpó vǐwungbo kpó mi bǐ nyɛ ɖɔhun wɛ mi vɛdó a? É ná sɔ́ mi ahwangán, bɔ mɛ ɖě ná nyí sɔ́ja afatɔ́ngán, bɔ mɛ ɖé lɛ́ɛ ná nyí sɔ́ja kanwekogán mi vɛdó a? Gbeɖé kpɔ́n!

⁸ Étɛ́wú mi bǐ ká blá gbě ce, bɔ mɛ ɖěbǔ sixú ɖɔ nú mì ɖɔ vǐ ce kpó Jɛsée ví ɔ́ kpó nu alɛ ǎ? Hǔn nǔ ce blá wǔ nú mɛ ɖěbǔ ɖo mi mɛ, bónú mɛ ɔ́ ná ɖɔ nú mì ɖɔ vǐ ce fɔ́n Jɛsée ví ɔ́ dó jǐ ce ǎ cé? Nǔ énɛ́ ɔ́ wɛ zɔ́n din bɔ Jɛsée ví ɔ́ ɖó mɔ nú mì lě e é bló gbɔn égbé din é.”

⁹ Nya Dowɛgi Edɔ́munu ɔ́ ká ɖo Sawúlu sín mɛ lɛ́ɛ mɛ. Éyɛ́ yí xó bó ɖɔ: “Un mɔ Jɛsée ví ɔ́ gbe ɖokpó, bɔ é wá Aximɛlɛ́ki Axitúvu ví ɔ́ gɔ́n ɖo Nɔvu,

¹⁰ bɔ Aximɛlɛ́ki kan nǔ byɔ́ Mawu Mavɔmavɔ n'i, bó dó nǔɖuɖu gban n'i, bó lɛ́ sɔ́ hwǐ Goliyati Filisitɛ́ɛn ɔ́ tɔn n'i.”

¹¹ Ée é ɖɔ mɔ̌ ɔ́, axɔ́sú ɔ́ sɛ́ mɛ dó vɔ̌sánú-xwlémawutɔ́ Aximɛlɛ́ki Axitúvu ví ɔ́, kpó mɛ e ɖo hɛ̌n tɔn nu, bó nyí vɔ̌sánú-xwlémawutɔ́ ɖo Nɔvu lɛ́ɛ bǐ kpó gbé mɛ, bɔ yě bǐ wǎ axɔ́sú ɔ́ gɔ́n.

¹² Ée yě wá ɔ́, Sawúlu ɖɔ nú Aximɛlɛ́ki ɖɔ: “Axitúvu ví, ɖǒtó mì.” Bɔ nya ɔ́ ɖɔ: “Un ɖo tó ɖó mɛ wɛ sɛ́mɛɖó.”

¹³ Bɔ Sawúlu kanbyɔ́ ɛ ɖɔ: “Étɛ́wú hwi kpó Jɛsée ví ɔ́ kpó ká blá gbě ce? Étɛ́wú a ka dó nǔɖuɖu gban n'i, bó lɛ́ kan nǔ byɔ́ Mawu n'i, bónú é ná fɔ́n gǔ dó jǐ ce, bó ná ɖó mɔ nú mì lě e é bló gbɔn égbé din é?”

¹⁴ Aximɛlɛ́ki ka yí gbe nú axɔ́sú ɔ́ ɖɔ: “Mɛsɛntɔ́ mɛtɔn lɛ́ɛ ɖě tɛ́ ka ɖo gbejí nú mɛ Davídi ɖɔhun? Éyɛ́ ɔ́, vǐ mɛtɔn sú wɛ. É wɛ kpa acɛ dó sɔ́ja e nɔ cɔ́ mɛ lɛ́ɛ nu, bɔ mɛ e ɖo hɔnmɛ lɛ́ɛ bǐ nɔ sɔ́ ɛ su.

¹⁵ Gbe énɛ́ gbe wɛ un jɛ nǔ kanbyɔ́ Mawu n'i jí a? Éeǒ. È ma dó hwɛ ɖěbǔ nyɛ mɛsɛntɔ́ mɛtɔn ɔ́ ó, è ma ka dó hwɛ mɛ ce lɛ́ɛ ɖěbǔ ó, ɖó un mɔ do nú nǔ énɛ́ lɛ́ɛ ɖokpó lě ǎ.”

¹⁶ Ée Aximɛlɛ́ki ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Un ná hu hwi kpó mɛ e ɖo hɛ̌n towe nu lɛ́ɛ bǐ kpó.”

¹⁷ Ée axɔ́sú ɔ́ ɖɔ mɔ̌ ɔ́, é ɖɔ nú sɔ́ja e nɔ kplá ɛ lɛ́ɛ ɖɔ: “Mi hu vɔ̌sánú-xwlémawutɔ́ lɛ́ɛ, ɖó yě lɔ nɔ Davídi jí. Yě tunwun ganjí ɖɔ hinhɔn yi wɛ é ɖe, bó ká gba kpá nú mì ǎ.” Lo ɔ́, mɛ e axɔ́sú ɔ́ ná gbe lɛ́ɛ jló ná hu yě ǎ.

¹⁸ Bɔ axɔ́sú ɔ́ ɖɔ nú Dowɛgi ɖɔ: “Sí te bo hu vɔ̌sánú-xwlémawutɔ́ lɛ́ɛ.” Bɔ Dowɛgi hu mɛ e ɖó acɛ bo nɔ dó vɔ̌sánú-xwlémawutɔ́ sín awu é kanwe atɔ́ɔ́n (85) gbe nɛ́ gbe.

¹⁹ Sawúlu lɛ́ ná gbe bɔ è hu mɛxó kpó yɔkpɔ́vú kpó súnnu, nyɔ̌nu, vǐ ɖo anɔ̌nu, nyibú, tócí, gbɔ̌ kpó lɛ̌ngbɔ́ kpó e ɖo Nɔvu vɔ̌sánú-xwlémawutɔ́ lɛ́ɛ sín toxo mɛ lɛ́ɛ bǐ.

²⁰ Mɛ ɖokpó géé wɛ kpé wú bó hɔn; è nɔ ylɔ́ ɛ ɖɔ Abiyatáa. Aximɛlɛ́ki ví wɛ, bó nyí Axitúvu vívú. É hɔn yi su Davídi,

²¹ bo ɖɔ n'i ɖɔ: “Sawúlu hu vɔ̌sánú-xwlémawutɔ́ lɛ́ɛ bǐ.”

²² Bɔ Davídi ɖɔ n'i ɖɔ: “Un tunwun ganjí ɖɔ Dowɛgi Edɔ́munu e ɖo fínɛ́ gbe nɛ́ gbe ɔ́ kún ná gɔn ɖiɖɔ nú Sawúlu ó. Nyi wú wɛ è hu mɛ towe lɛ́ɛ bǐ.

²³ Nɔ fí xá mì. Ma ɖi xɛsi ó, ɖó mɛ e ɖo biba ná hu mì wɛ ɔ́ ɖo hwi lɔ ba ná hu wɛ. A ka ɖo gɔ̌n ce ɔ́, nǔɖé ná wa we ǎ.”