1 Samuwɛ́li 20 - MAWUXÓWÉMA

¹ Davídi hɔn sín gbeyíɖɔ Mawu tɔn lɛ́ɛ xwé ɖo Hlama, bó yi mɔ Jonatáan bo kanbyɔ́ ɛ ɖɔ: “Étɛ́ un wa? Mɛ wɛ un hu a? Hwɛ tɛ́ un ka hu dó tɔ́ towe bɔ é ɖo kú ce ba wɛ sɔ mɔ̌?”

² Jonatáan yí gbe n'i ɖɔ: “Gbeɖé kpɔ́n, è nǎ hu we ǎ. Tɔ́ ce nɔ ja nǔ ɖěbǔ wa gbé ma ɖó te nú mì ǎ. Étɛ́wú é ká ná hwlá énɛ́ ɔ́ dó mì. Adingban wɛ, nǔ sixú nyí mɔ̌ ǎ.”

³ Davídi lɛ́ yí xó, bó ɖɔ n'i ɖɔ: “Un xwlé Mawu nú we ɖɔ nǔgbó wɛ. Tɔ́ towe tunwun ganjí ɖɔ xɔ́ntɔn towe wɛ un nyí; énɛ́ wú wɛ é má ná ba ɖɔ hwi ní mɔ do ná ǎ, é táá vɛ́ nú we. Amɔ̌, Mawu Mavɔmavɔ nukɔn ɖíe ɖɔ ɖe wɛ un ɖe, bó ɖo ɖiɖɔ wɛ ɖo hwi ɖésúnɔ nukɔn e, afɔ ɖiɖe ɖokpó jɛ́n ɖo kú kpó nyɛ kpó tɛ́ntin.”

⁴ Jonatáan kanbyɔ́ Davídi ɖɔ: “Étɛ́ a jló nú má bló nú we?”

⁵ Bɔ Davídi ɖɔ n'i ɖɔ: “Sɔ wɛ mǐ ná ɖu sunwájǐxwe ɔ́, bɔ nyi kpó axɔ́sú ɔ́ kpó ɖó ná jínjɔ́n ayǐ, bó ná ɖu nǔ. Amɔ̌, din ɔ́, nǎ gbe mì nú má yi hɔn bɛ cí gle ɖé mɛ káká jɛ azǎn atɔngbe gbadanu.

⁶ Tɔ́ towe ná mɔ ɖɔ nyi kún wá ó; ɖɔ n'i ɖɔ nyi byɔ́ gbe émí ɖɔ nyi ná yá wǔ yi Bɛteleyɛ́mu, tɔ́ ce toxo mɛ, bó ná sá xwetavɔ́ xá mɛ ce lɛ́ɛ.

⁷ Ényí a ɖɔ mɔ̌ n'i nú é ɖɔ é nyɔ́ ɔ́, énɛ́ ɔ́, nyɛ mɛsɛntɔ́ towe sɔ́ ná ɖi xɛsi nú nǔɖé ǎ. Amɔ̌, nú é bɛ́ xomɛsin ɔ́, a nǎ mɔ ɖɔ é ɖo biba ná hu mì wɛ.

⁸ É jɛ mɔ̌ ɔ́, a nǎ ɖe lě e a yǐ wǎn nú nyɛ mɛsɛntɔ́ towe gbɔn ɔ́ xlɛ́, ɖó mǐ kó nu alɛ ɖo Mawu Mavɔmavɔ nyíkɔ mɛ. É ká nyí nǔ nyanya ɖé wɛ un dó sin hǔn, hwi ɖésúnɔ ní hu mì. É byɔ́ ɖɔ a nǐ sɔ́ mì yi jó nú tɔ́ towe ǎ.”

⁹ Jonatáan ka sú xó, bó ɖɔ: “Gbeɖé kpɔ́n! Ényí un se ɖɔ tɔ́ ce ɖe gbeta tɔ́n ɖɔ émí ná hu we ɔ́, un ná ɖɔ nú we; Mawu Mavɔmavɔ, Mawu Izlayɛ́li tɔn wɛ un xwlé nú we.”

¹⁰ Bɔ Davídi kanbyɔ́ Jonatáan ɖɔ: “Ényí tɔ́ towe ká yí gbe nú we kpó xomɛsin kpó ɔ́, mɛ̌ a ka ná ɖɔ ná bɔ é ná wá ɖɔ nú mì?”

¹¹ Jonatáan ɖɔ nú Davídi ɖɔ: “Wǎ mǐ ní tɔ́n bó yi gle mɛ.” Bɔ yě mɛ we lɛ́ɛ tɔ́n bó ɖidó gle ɔ́ mɛ.

¹² Jonatáan ɖɔ nú Davídi ɖɔ: “Un xwlé Mawu Mavɔmavɔ, Mawu Izlayɛ́li tɔn ɔ́ nú we; sɔ abǐ azǎn atɔn gbe gan élɔ́ mɛ lě ɔ́, un ná kan nǔ byɔ́ tɔ́ ce dó nǔ e lin dó wǔtu towe wɛ é ɖe ɔ́ wú. Ényí é má lin nǔ nyanya ɖé dó wǔtu towe ǎ ɔ́, un ná ɖɔ sɛ́ dó we.

¹³ Nú é ká lin nǔ nyanya dó wǔtu towe, bónú un ma ɖɔ sɛ́ dó we ǎ hǔn, Mawu Mavɔmavɔ ní sɔ́ mì dó wa nǔ e jló e lɛ́ɛ bǐ ná. Énɛ́ ɔ́, un ná jó we dó bɔ a nǎ yi kpódó fífá kpó. Mawu Mavɔmavɔ ní nɔ kpɔ́ xá we, lě e é nɔ kpɔ́ xá tɔ́ ce gbɔn ɖ'ayǐ é.

¹⁴ Ényí un kpo ɖo gbɛ jɛ́n wɛ ɔ́, a nǎ ɖe xomɛnyínyɔ́ Mawu Mavɔmavɔ tɔn xlɛ́ mì, bɔ un ná kú ǎ.

¹⁵ Ma ɖe xomɛnyínyɔ́ towe sín xwédo ce wú gbeɖé ó. Ényí Mawu Mavɔmavɔ ná bo wá ɖo kɛntɔ́ towe lɛ́ɛ ɖokpó ɖokpó ná ɖe sín ayǐkúngban jí fí wɛ hǔn, ma ɖe xomɛnyínyɔ́ towe sín xwédo ce wú ó.”

¹⁶ Jonatáan nu alɛ xá Davídi xwédo ɔ́ bó ɖɔ: “Mawu Mavɔmavɔ ma kan nǔ byɔ́ Davídi ǎ ɔ́, é ká ná kanbyɔ́ kɛntɔ́ tɔn lɛ́ɛ.”

¹⁷ Jonatáan lɛ́ ɖɔ nú Davídi ɖɔ é ní xwlé nǔ ɖɔ émí yí wǎn nú émí. Đó Jonatáan yí wǎn nú Davídi é ɖésúnɔ ɖɔhun.

¹⁸ Jonatáan lɛ́ ɖɔ nú Davídi ɖɔ: “Sɔ wɛ è nǎ ɖu sunwájǐxwe ɔ́; tɛn towe mɛ ná nɔ vɔ̌ bɔ è nǎ tunwun ɖɔ hwi kún wá ó.

¹⁹ Azǎn atɔngbe ɔ́, a nǎ hun káká yi fí e a hɔn hwlá cí gbe énɛ́ ɔ́ gbe é, bó ná nɔ Ezɛ́li wínnya kpá.

²⁰ Bɔ un ná da gǎ atɔn sɛ́ dó fí e a hɔn hwlá cí ɔ́, nǔɖé da gǎ dó wɛ un ɖe ɖɔhun.

²¹ Un bló mɔ̌ fó ɔ́, un ná ɖɔ nú mɛsɛntɔ́ ce ɖɔ: ‘Yi fɔ gǎ lɛ́ɛ wá nú mì.’ Ényí un ka ɖɔ n'i ɖɔ: ‘Kpɔ́n, gǎ lɛ́ɛ yi nukɔn sɔ mɔ̌ ǎ, lɛ̌ kɔ wá fɔ yě wá nú mì;’ ényí un ɖɔ mɔ̌ ɔ́, a nǎ tunwun ɖɔ nǔɖé kún ɖo émí ná gbo wɛ ó, bɔ a hɛn ɔ́, a nǎ lɛ́ kɔ wá. Xɛsi ɖ'é mɛ ǎ, un xwlé Mawu nú we ɖɔ: Mawu Mavɔmavɔ ɖo gbɛ!

²² Ényí un ka ɖɔ nú mɛsɛntɔ́ ce ɖɔ: ‘Gǎ lɛ́ɛ nɛ́ ɖo nukɔn dɔ̌n nɛ́;’ ényí un ɖɔ mɔ̌ ɔ́, a nǎ hɔn, ɖó Mawu Mavɔmavɔ wɛ ɖɔ hwi ní yi nɛ́.

²³ Alɛ e nyi kpó hwi kpó nu ɔ́, Mawu Mavɔmavɔ ná bló bɔ mǐ ná nɔ gbejí ná káká sɔ́yi.”

²⁴ Nǔgbó ɔ́, Davídi yi hɔn hwlá cí gle ɔ́ mɛ. Gbe e gbe è ɖo sunwájǐxwe ɔ́ ɖu wɛ ɔ́, axɔ́sú ɔ́ jínjɔ́n ayǐ bó ná ɖu nǔ.

²⁵ Axɔ́sú ɔ́ jínjɔ́n fí e é kó nɔ jínjɔ́n ɖ'ayǐ é, ɖo dǒ wú. Ahwangán Avunɛ́ɛ jínjɔ́n akpá tɔn, bɔ Jonatáan ɖo te. Davídi sín tɛnmɛ ka ɖo vɔ̌.

²⁶ Gbe nɛ́ ɔ́ gbe ɔ́, Sawúlu ɖɔ xó ɖé ǎ, ɖó é ɖo ɖiɖɔ wɛ ɖɔ é sixú nyí mǐmɛ́ jí wɛ é má ɖe ǎ wú wɛ é ná kó gɔn.

²⁷ Xwe ɔ́ sín azǎn wegɔ́ ɔ́ gbe ɔ́, Davídi tɛn mɛ lɛ́ kpo ɖo vɔ̌, bɔ Sawúlu kanbyɔ́ Jonatáan ɖɔ: “Étɛ́wú Jɛsée vǐ ɔ́ má ka wá ɖu nǔ sɔ ǎ? Étɛ́wú é má ká lɛ́ wá égbé ǎ?”

²⁸ Jonatáan yí gbe nú tɔ́ ɔ́ ɖɔ: “É byɔ́ gbe mì ɖɔ émí ná yi Bɛteleyɛ́mu.

²⁹ É ɖɔ nú mì ɖɔ nyɛ ní kɛnklɛ́n ná gbe émí nú émí ná yi Bɛteleyɛ́mu, ɖɔ nɔví émítɔn ɖɔ émí ní má gɔn nǔwiwa ɔ́ do mɛ gbeɖé ó. É ɖɔ nú mì ɖɔ ényí xɔ́ntɔn jɛ́n nyɛ kpó émí kpó nyí hǔn, nyɛ ní ná gbe émí, bónú émí ná yi xwetavɔ́ e sá gbé hɛ̌nnu émítɔn ja ɔ́ do mɛ. Énɛ́ ɔ́ wɛ zɔ́n bɔ é má wá ɖu nǔ ǎ.”

³⁰ Ée Jonatáan ɖɔ mɔ̌ ɔ́, Sawúlu wlí xomɛsin, bó ɖɔ n'i ɖɔ: “Avǔnví. Hwi kpó Jɛsée ví ɔ́ kpó nyí xɔ́ntɔn ɔ́, un tunwun ǎ wɛ a vɛdó a? Hwi kpó nɔ towe kpó bǐ ná ɖu winnyá.

³¹ Đǒtó mì ganjí! Nya énɛ́ ɔ́ kpo ɖo gbɛ jɛ́n wɛ ɔ́, a sixú ɖu axɔ́sú ǎ. Énɛ́ ɔ́ wú wɛ a nǎ sɛ́ mɛ dó bɔ è nǎ yi wlí i bó kplá ɛ wá fí din, ɖó è ɖǒ ná hu i.”

³² Jonatáan ka kanbyɔ́ tɔ́ tɔn ɖɔ: “Étɛ́wú è ka ná hu i? Étɛ́ é wa?”

³³ Ée é ɖɔ mɔ̌ ɔ́, Sawúlu sɔ́ hwǎn tɔn dó jǐ tɔn, bó jló ná hu i, bɔ Jonatáan mɔ nǔ jɛ wú ɖɔ tɔ́ émítɔn jló ná hu Davídi nǔgbó.

³⁴ Bɔ Jonatáan sí te sín nǔɖuɖu ká ɔ́ kɔn kpó xomɛsin kpó, bó sɔ́ ɖu nǔ xá yě gbe énɛ́ ɔ́ gbe ǎ; wǔ kú i ɖó Davídi wú, ɖó tɔ́ tɔn zun i ɖésú.

³⁵ Ayǐhɔ́ngbe tɔn zǎnzǎn ɔ́, Jonatáan yi gle mɛ fí e é kpó Davídi kpó ko ɖɔ é, bɔ é kpó nyaví kpɛví ɖé kpó zɔn.

³⁶ É ɖɔ nú nyaví ɔ́ ɖɔ: “Bɛ̌ wezun bo jɛ nukɔn bónú gǎ e un ná da lɛ́ɛ ɔ́, a na cyán yě wá nú mì.” Nyaví ɔ́ bɛ́ wezun bɔ Jonatáan da gǎ ɖokpó bɔ é zɛ nyaví ɔ́ wú.

³⁷ Ée nyaví ɔ́ yi fí e gǎ e Jonatáan da ɔ́ jɛ ɔ́, Jonatáan sú xó bó ɖɔ: “É má nyí gǎ ɔ́ nɛ́ ɖo nukɔn dɔ̌n nɛ́ a?”

³⁸ É lɛ́ sú xó bó ɖɔ nú nyaví ɔ́ ɖɔ: “Ya wǔ yi zé gǎ ɔ́ wá; ma nɔ te ó.” Bɔ nyaví ɔ́ yi zé gǎ ɔ́, bó wá gǎn tɔn gɔ́n.

³⁹ Nyaví kpɛví ɔ́ mɔ do nú nǔɖé ǎ. Jonatáan kpó Davídi kpó kɛ́ɖɛ́ wɛ tunwun nǔ e wa wɛ yě ɖe é.

⁴⁰ Jonatáan sɔ́ da tɔn kpó gǎ tɔn lɛ́ɛ kpó nú nyaví kpɛví ɔ́ ɖɔ ní zé yi xwé gbe.

⁴¹ Ée nyaví ɔ́ ɖidó ɔ́, Davídi tɔ́n sín gle ɔ́ sín afɔligbé, bó wá xwe agbɔ̌nnusú do, bó ɖe kɔ́ azɔn atɔn, bɔ xɔ́ntɔn xɔ́ntɔn we lɛ́ɛ zunfán yěɖée, bó y'avǐ káká. Davídi wɛ ka y'avǐ tawun.

⁴² Énɛ́ ɔ́ gúdo ɔ́, Jonatáan ɖɔ nú Davídi ɖɔ: “Yi dó fífá mɛ, bó ká flín alɛ e mǐ nu ɖo Mawu Mavɔmavɔ nyíkɔ mɛ bó ɖɔ: ‘Mawu Mavɔmavɔ ní bló bónú alɛ e nyi kpó hwi kpó nu ɔ́, mǐ ní nɔ gbejí ná káká sɔ́yi, bónú vǐ e mǐ nǎ ji lɛ́ɛ lɔ ní nɔ gbejí ná.’ ”