1 Samuwɛ́li 19 - MAWUXÓWÉMA

¹ Sawúlu ɖɔ nú Jonatáan kpó azaglɔ́gán tɔn lɛ́ɛ bǐ kpó ɖɔ émí jló ná hu Davídi. Jonatáan Sawúlu ví ɔ́ ká yí wǎn nú Davídi ɖésú.

² É yi ɖɔ xó nɛ́ ɔ́ nú Davídi, bo ɖɔ: “Tɔ́ ce jló ná hu we. Sɔ zǎnzǎn ɔ́, a nǎ nɔ acéjí. Hɔn yi bɛ cí gle ɖé mɛ.

³ Un ná xwedó tɔ́ ce, bó ná kplá ɛ gbɔn gle e mɛ a nǎ hɔn bɛ dó ɔ́ mɛ. Énɛ́ ɔ́, un ná ɖɔ xó towe nú tɔ́ ce bó ná kpɔ́n nǔ e é ná ɖɔ é, bó ná wá ɖɔ nú we.”

⁴ Ée yě wá jɛ gle ɔ́ mɛ ɔ́, Jonatáan jɛ Davídi xó ɖagbe ɖɔ nú tɔ́ tɔn jí; é ɖɔ: “Sɛ́mɛɖó, è ma wa nǔɖé nyi do nú mɛsɛntɔ́ mɛtɔn Davídi ɔ́ ó; ɖó é jɛ agɔ ɖé dó mɛ ǎ, é nyɔ́ wa ɔ́, ɖagbe mɛtɔn kɛ́ɖɛ́ wɛ é nɔ ba.

⁵ É gbɛ́ kú ǎ, bó yi kpé hun xá Filisitɛ́ɛn ɔ́ bó hu i, bɔ Mawu Mavɔmavɔ hwlɛ́n togun tɔn Izlayɛ́li ɔ́ bǐ gǎn. Mɛ ɖésú mɔ bɔ é víví nú mɛ. Étɛ́wú nǔɖé má sín nǔɖé wú ɔ́, è nǎ hu Davídi, bó ná kɔn xomɛvɔ́nɔ sín hun kɔn nyi ayǐ bó dó hu hwɛ?”

⁶ Sawúlu mɔ ɖɔ nǔgbó ɖɔ wɛ Jonatáan ɖe, bó xwlé Mawu n'i ɖɔ: “Mawu Mavɔmavɔ ɖo gbɛ! Davídi ná kú ǎ.”

⁷ Ée é ɖɔ mɔ̌ ɔ́, Jonatáan yi ylɔ́ Davídi bó ɖɔ xó nɛ́ lɛ́ɛ bǐ n'i, bó kplá ɛ wá Sawúlu gɔ́n, bɔ Davídi lɛ́ bɛ́ azɔ̌ tɔn ɖo Sawúlu gɔ́n, lě e é nɔ bló gbɔn ɖ'ayǐ é.

Mikali hwlɛ́n Davídi gán

⁸ Ahwan ɔ́ lɛ́ bɛ́, bɔ Davídi yi bo fun ahwan xá Filisitɛ́ɛn lɛ́ɛ, bó ɖu ɖo yě jí bǐ, bɔ yě hɔn ɖo nukɔn tɔn.

⁹ É wá su gbe ɖokpó bɔ Sawúlu ɖo ayǐjínjɔ́n xwé tɔn gbe bɔ hwǎn tɔn ɖo alɔ tɔn mɛ, bɔ yɛ nyanya e Mawu Mavɔmavɔ sɛ́ dó ɔ́ lɛ́ wá jǐ tɔn. Davídi ka ɖo kanhún xo wɛ.

¹⁰ Bɔ Sawúlu nyi hwǎn e ɖo alɔ tɔn mɛ ɔ́, bó ná xwe Davídi dó dǒ wǔ, Davídi ka sɛ sín nu, bɔ hwǎn ɔ́ byɔ́ dǒ ɔ́ mɛ. Davídi hɔn zǎn ɔ́ mɛ bó gló e.

¹¹ Sawúlu sɛ́ mɛ dó Davídi xwé ɖɔ yě ní ɖo cícɔ́ ɛ wɛ, nú é jɛ zǎnzǎn ɔ́, yě ná hu i. Lo ɔ́, Mikali ɖɔ nú asú tɔn ɖɔ: “Ényí a ma hɔn din zǎn mɛ ǎ nú ayǐ hɔ́n dó we ɔ́, yě ná hu we.”

¹² Ée Mikali ɖɔ mɔ̌ nú asú tɔn ɔ́, é sɔ́ ɛ gbɔn flɛtɛ́li nu, bɔ é jɛ te bo hɔn yi. Lě e Davídi gló yě gbɔn é nɛ́.

¹³ Ée é yi ɔ́, Mikali sɔ́ bǒcyɔ ɖokpó, bó sɔ́ mlɔ́ Davídi zan jí, bó sɔ́ gbɔ̌nyú ɖó bǒcyɔ ɔ́ sín ta bó bú avɔ dó bǐ.

¹⁴ Ée mɛ e Sawúlu sɛ́ dó ɖɔ è nǐ wá wlí Davídi ɔ́ lɛ́ɛ wá é ɔ́, Mikali ɖɔ nú yě ɖɔ é kún nyɔ́ n'i ó.

¹⁵ Sawúlu lɛ́ lɛ́ kɔ nú mɛ lɛ́ɛ ɖɔ yě ní yi mɔ ɛ. É ɖɔ nú yě ɖɔ: “Mi yi sɔ́ é kpó zan e jí é ɖe ɔ́ kpó wá nú mì ma hu i.”

¹⁶ Mɛ lɛ́ɛ yi bó wá, bɔ bǒcyɔ ɔ́ ɖo ayǐmlɔ́mlɔ́ zan ɔ́ jí, bɔ gbɔ̌nyú ɔ́ ɖo ta tɔn.

¹⁷ Sawúlu ɖɔ nú Mikali ɖɔ: “Étɛ́wú a ka blɛ́ mì mɔ̌, bó jó kɛntɔ́ ce dó bɔ é yi bó gló mì?” Mikali ka yí gbe nú Sawúlu ɖɔ: “É wɛ ɖɔ nyi ma jó émí dó ǎ ɔ́, émí ná hu mì.”

Sawúlu yi mɔ Davídi ɖo Hlama

¹⁸ Hwenɛ́nu ɔ́, Davídi hɔn bo gló Sawúlu. É yi Samuwɛ́li gɔ́n ɖo Hlama, bó ɖɔ nǔ e Sawúlu wa xá ɛ é bǐ n'i, bɔ é kpó Samuwɛ́li kpó yi nɔ gbeyíɖɔ Mawu tɔn lɛ́ɛ xwé.

¹⁹ È yi ɖɔ nú Sawúlu ɖɔ Davídi ɖo gbeyíɖɔ Mawu tɔn lɛ́ɛ xwé ɖo Hlama.

²⁰ Bɔ Sawúlu sɛ́ mɛ dó ɖɔ è nǐ wlí Davídi wá. Ée yě yi ɔ́, yě mɔ gbeyíɖɔ Mawu tɔn sín gbɛ̌ta ɔ́, bɔ yě ɖo xó e Mawu ɖɔ nú yě lɛ́ɛ ɖɔ wɛ. Samuwɛ́li wɛ ka ɖo yě nu. Yɛ Mawu tɔn jɛ mɛ e Sawúlu sɛ́ dó lɛ́ɛ jí, bɔ yě lɔ jɛ xó e Mawu ɖɔ nú yě ɔ́ ɖɔ jí.

²¹ È ɖɔ xó nɛ́ lɛ́ɛ nú Sawúlu bɔ é lɛ́ sɛ́ mɛ ɖěvo lɛ́ɛ dó. Ée yě lɔ jɛ dɔ̌n ɔ́, yě jɛ xó e Mawu ɖɔ nú yě lɛ́ɛ ɖɔ jí. É lɛ́ sɛ́ gbɛ̌ta atɔngɔ́ ɔ́ dó, bɔ yě lɔ bló nǔ ɖokpó ɔ́.

²² Bɔ Sawúlu ɖésú gbɔ bo yi Hlama. Ée é jɛ dotɔ ɖaxó e ɖo Sekú ɔ́ kɔn ɔ́, é kanbyɔ́ ɖɔ: “Fí e Samuwɛ́li kpó Davídi kpó ka ɖe?” È yǐ gbe n'i ɖɔ: Yě ɖo gbeyíɖɔ Mawu tɔn lɛ́ɛ xwé ɖo Hlama.

²³ Ée é se mɔ̌ ɔ́, é wlí ali ɖidó gbeyíɖɔ Mawu tɔn lɛ́ɛ xwé ɖo Hlama. Ée é ɖo yiyi wɛ ɔ́, Yɛ Mawu tɔn wá jǐ tɔn, bɔ é ɖo xó e Mawu sɔ́ dó nu n'i ɔ́ ɖɔ dó ali wɛ káká yi gbeyíɖɔ Mawu tɔn lɛ́ɛ xwé ɖo Hlama.

²⁴ É lɔmɔ̌ ɖe awu gbeyíɖɔ ɖě lɛ́ɛ ɖɔhun; é lɔ ɖo xó e Mawu Mavɔmavɔ ɖɔ n'i ɔ́ ɖɔ wɛ ɖo Samuwɛ́li nukɔn, bó ɖo wěxo mɔ̌, bó j'ayǐ, bó nɔ mɔ̌ gbe énɛ́ gbe káká bɔ ayǐ hɔ́n. Énɛ́ ɔ́ wú wɛ è nɔ kanbyɔ́ ɖɔ: “Sawúlu lɔ nyí gbeyíɖɔ Mawu tɔn wɛ a?”