1 Samuwɛ́li 16 - MAWUXÓWÉMA

¹ Mawu Mavɔmavɔ ɖɔ nú Samuwɛ́li ɖɔ: “Hwetɛ́nu a nǎ gɔn avǐ ya dó Sawúlu tamɛ dó? Un gbɛ́ xó tɔn wɛ hǔn; é sɔ́ ná ɖu axɔ́sú ɖo Izlayɛ́li gbeɖé ǎ. Hwɛ ɔ́, un ná sɛ́ we dó Jɛsée Bɛteleyɛ́munu ɔ́ gɔ́n, ɖó mɛ e un jló ná sɔ́ axɔ́sú ɔ́, un mɔ ɖo vǐ tɔn lɛ́ɛ mɛ. Hǔn, sɔ́ lanzo towe bó kɔn ami d'é mɛ ní gɔ́, bó jɛ ali.”

² Samuwɛ́li kanbyɔ́ Mawu Mavɔmavɔ ɖɔ: “Nɛ̌ un ka ná yi gbɔn? Sawúlu táá wá se bó ná hu mì.” Bɔ Mawu Mavɔmavɔ ɖɔ nú Samuwɛ́li ɖɔ: “A xweyǐgbe ɔ́, a nǎ hɛn nyibúví asi ɖokpó, bó ná ɖɔ vɔ̌ sá nú Mawu Mavɔmavɔ gbé wɛ émí xwe.

³ Énɛ́ ɔ́, a nǎ ylɔ́ Jɛsée wá vɔ̌sísá ɔ́ do mɛ. Nǔ e a na bló ɔ́, un ná ɖɔ nú we, bɔ a nǎ kɔn ami dó ta nú mɛ e un ná xlɛ́ we ɔ́, bó ná sɔ́ ɛ axɔ́sú bɔ é ná nɔ́ wa azɔ̌ nú mì.”

⁴ Samuwɛ́li bló nǔ e Mawu Mavɔmavɔ ɖɔ n'i ɔ́ bǐ, bó yi Bɛteleyɛ́mu. Ée é jɛ dɔ̌n ɔ́, tomɛxó lɛ́ɛ bɛ́ wezun bo wá gɔ̌n tɔn adohu adohu, bó kanbyɔ́ ɛ ɖɔ: “Đagbe wɛ a wǎ fí a?”

⁵ Samuwɛ́li yí gbe ɖɔ: “Ɛɛn, ɖagbe wɛ. Vɔ̌ ɖé sá gbé wɛ un ja bo wá. Mi slá wǔ bó ná kplá mì yi vɔ̌sísá ɔ́ do mɛ.” Samuwɛ́li ylɔ́ Jɛsée kpó vǐ tɔn lɛ́ɛ kpó ɖɔ yě lɔ ní wá slá wǔ.

⁶ Ée Jɛsée kpó vǐ tɔn lɛ́ɛ kpó wá bɔ Samuwɛ́li mɔ Eliavu lě ɔ́, é ɖɔ dó ayi mɛ ɖɔ: “Un ɖiɖɔ mɛ e Mawu Mavɔmavɔ sɔ́ é ɖíe.”

⁷ Mawu Mavɔmavɔ ká ɖɔ nú Samuwɛ́li ɖɔ: “Ma nú ninɔmɛ tɔn blɛ́ we ó, ma ka nú ga tɔn blɛ́ we ó, ɖó é wɛ un sɔ́ ǎ. Nǔ e nyí nǔxɔ-akwɛ́ ɖo gbɛtɔ́ lɛ́ɛ nukún mɛ ɔ́ nɔ xɔ akwɛ́ nyɛ Mawu nukún mɛ ǎ. Nǔ e ɖo wěxo ɔ́ wɛ gbɛtɔ́ nɔ kpɔ́n, ayixa mɛ wɛ nyɛ Mawu Mavɔmavɔ ká nɔ́ kpɔ́n.”

⁸ Jɛsée ylɔ́ Avinadávu bó kplá ɛ gbɔn Samuwɛ́li nukɔn, bɔ Samuwɛ́li ɖɔ: “Mawu Mavɔmavɔ sɔ́ mɛ élɔ́ lɔ ǎ.”

⁹ Jɛsée lɛ́ ylɔ́ vǐ tɔn Camúma wá, bɔ Samuwɛ́li ɖɔ: “Mawu Mavɔmavɔ sɔ́ mɛ élɔ́ lɔ ǎ.”

¹⁰ Jɛsée ylɔ́ vǐ tɔn ɖokpó ɖokpó tɛ́nwe wá, bɔ Samuwɛ́li ɖɔ: “Mawu Mavɔmavɔ sɔ́ mɛ ɖokpó ɖo yě mɛ ǎ.”

¹¹ Samuwɛ́li gbɔ bo kanbyɔ́ Jɛsée ɖɔ: “Vǐ towe lɛ́ɛ bǐ jɛ́n ná?” Bɔ Jɛsée yí gbe n'i ɖɔ: “É kpo mɛ kpɛví ɔ́; è nɔ ylɔ́ ɛ ɖɔ Davídi; amɔ̌, é kplá gbɔ̌ lɛ́ɛ yi amagbo mɛ.” Énɛ́ ɔ́, Samuwɛ́li ɖɔ n'i ɖɔ: “Dǒ wɛn sɛ́ dó e din tlóló. É má wá fí ǎ ɔ́, mɛɖé ná ɖu nǔ e è xwlé Mawu é ǎ.”

¹² Jɛsée sɛ́ mɛ dó gbě tɔn mɛ nǔgbó. Nyaví vɔvɔ ɖagbe ɖagbe ɖé wɛ, bó ɖó nukún cɔɔn. Ée é wá ɔ́, Mawu Mavɔmavɔ ɖɔ nú Samuwɛ́li ɖɔ: “Sí te bo kɔn ami dó ta n'i bó sɔ́ ɛ axɔ́sú. É wɛ un sɔ́.”

¹³ Samuwɛ́li sɔ́ ami ɔ́ bó kɔn dó ta n'i bó sɔ́ ɛ axɔ́sú ɖo nɔví tɔn lɛ́ɛ nukún mɛ. Kpowun ɔ́, yɛ Mawu Mavɔmavɔ tɔn wá Davídi jí gbe énɛ́ gbe, bó nɔ jǐ tɔn káká sɔ́yi. Ée Samuwɛ́li bló énɛ́ ɔ́ fó ɔ́, é lɛ́ kɔ yi Hlama.

¹⁴ Yɛ Mawu Mavɔmavɔ tɔn gosín Sawúlu jí, bɔ Mawu Mavɔmavɔ sɛ́ yɛ nyanya ɖé dó e, bɔ é jɛ tagba dó n'i jí.

¹⁵ Mɛsɛntɔ́ Sawúlu tɔn lɛ́ɛ ɖɔ n'i ɖɔ: “Mǐ mɔ ɖɔ yɛ nyanya ɖé gosín Mawu gɔ́n, bó ɖo tagba dó nú mɛ wɛ.

¹⁶ Sɛ́mɛɖó ní ɖe gbe. Mǐ mɛsɛntɔ́ mɛtɔn lɛ́ɛ ɖo gbesisɔ mɛ; mǐ nǎ yi ba mɛ e nyɔ́ kanhún xo ɔ́ ɖokpó, bɔ nú yɛ nyanya e Mawu sɛ́ dó ɔ́ wá jǐ mɛtɔn ɔ́, é ná nɔ́ xo kanhún ɔ́ nú mɛ, bɔ mɛ ná nɔ́ mɔ agbɔ̌n.”

¹⁷ Ée yě ɖɔ mɔ̌ ɔ́, Sawúlu ɖɔ nú yě ɖɔ: “Mi bo yi ba mɛ e nyɔ́ nǔ xo ganjí é ɖokpó bó kplá wá nú mì.”

¹⁸ Mɛsɛntɔ́ lɛ́ɛ ɖokpó ká yí xó, bó ɖɔ: “Un tunwun Jɛsée Bɛteleyɛ́munu ɔ́ sín vǐ ɖokpó, bɔ é nyɔ́ nǔ xo ganjí. Nyaví ahwanfuntɔ́ ɖé wɛ. É nyɔ́ xó ɖɔ ganjí. É nyɔ́ ɖɛkpɛ. Asúká ɖokpó wɛ. Mawu Mavɔmavɔ ɖo kpɔ́ xá ɛ.”

¹⁹ Ée Sawúlu se mɔ̌ ɔ́, é sɛ́ wɛn dó Jɛsée bo ɖɔ: “Sɛ́ vǐ towe Davídi e nɔ kplá lɛ̌ngbɔ́ towe lɛ́ɛ yi amagbo mɛ é dó mì.”

²⁰ Jɛsée ka dó nǔɖuɖu gban, bó sɔ́ anyǔglo ɖokpó, bó dó vɛ̌ɛn mɛ bɔ é gɔ́, bó sɔ́ gbɔ̌ví ɖokpó gɔ́ ná, bó dó bǐ sín agban dó tócí ɖokpó jí, bó sɛ́ dó Sawúlu gbɔn vǐ tɔn Davídi jí.

²¹ Davídi yi Sawúlu gɔ́n. Nǔ tɔn nyɔ́ Sawúlu nukún mɛ káká, bɔ é sɔ́ ɛ, bɔ é nɔ́ hɛn ahwanfunnú tɔn lɛ́ɛ n'i.

²² Sawúlu ɖɔ sɛ́ dó Jɛsée ɖɔ: “Kɛnklɛ́n bó jó vǐ towe Davídi ɔ́ dó nú mì, bónú é ná nɔ wa azɔ̌ nú mì, ɖó nǔ tɔn nyɔ́ nukún ce mɛ.”

²³ Sín hwenɛ́nu ɔ́, yɛ nyanya e Mawu sɛ́ dó Sawúlu ɔ́ wá jǐ tɔn hweɖěbǔnu ɔ́, Davídi nɔ sɔ́ kanhún bó nɔ xo. Énɛ́ ɔ́, yɛ nyanya ɔ́ nɔ́ gosín jǐ tɔn, bɔ gbɔjɛ tɔn nɔ yi do, bɔ é nɔ́ mɔ agbɔ̌n kpɛɖé.