1 Samuwɛ́li 13 - MAWUXÓWÉMA

¹ Xwe gban (30) wɛ Sawúlu ɖó bó yi axɔ́súzinkpo Izlayɛ́li tɔn jí. Hwenu e é ɖo xwe we bló wɛ ɖo zinkpo jí ɔ́,

² é cyán Izlayɛ́li ví afɔwó-afatɔ́n (3.000), bó bɛ́ yě mɛ afɔwó (2.000), bɔ é kpó yě kpó cí Mikumasi kpó Betɛ́li só ɔ́ kpó jí, bɔ yě mɛ afatɔ́n (1.000) kpó Jonatáan kpó cí Giveya ɖo Bɛnjamɛ́ɛ yíkúngban jí. Sawúlu nyi Izlayɛ́li ví e kpo lɛ́ɛ ɖɔ mɛ ɖokpó ɖokpó ní yi xwé tɔn gbe.

³ Jonatáan gba ahwankpá Filisitɛ́ɛn lɛ́ɛ tɔn e ɖo Gɛva é, bɔ Filisitɛ́ɛn lɛ́ɛ se. Sawúlu ɖɔ bɔ è kún lanzo gbɔn Izlayɛ́li to ɔ́ bǐ mɛ bónú Eblée lɛ́ɛ bǐ ná se nǔ e jɛ é.

⁴ Énɛ́ ɔ́, Izlayɛ́li to ɔ́ bǐ se bɔ è ɖo ɖiɖɔ wɛ ɖɔ: “Sawúlu gba ahwankpá Filisitɛ́ɛn lɛ́ɛ tɔn, bɔ Izlayɛ́li ví lɛ́ɛ bǐ húzú nǔ baɖabaɖa ɖo Filisitɛ́ɛn lɛ́ɛ nukún mɛ.” Énɛ́ ɔ́, togun ɔ́ bǐ kplé ɖo Sawúlu gɔ́n ɖo Gilugalu.

⁵ Filisitɛ́ɛn lɛ́ɛ kplé bó ná tɔ́n ahwan Izlayɛ́li. Yě ɖó ahwankɛkɛ́ví adɔ̌kpo ɖě děgba we afɔwó (30.000), bó ɖó sɔ́xátɔ́ děgba ɖě afɔwó (6.000). Ahwanfuntɔ́ e ɖo fínɛ́ lɛ́ɛ sukpɔ́, è sixú xa ǎ. Yě sukpɔ́ káká, bó cí kɔ́ e ɖo xutó é ɖɔhun, bɔ yě wá ɖó gɔnu ɖó Mikumasi, ɖo zǎnzǎnhwe jí ɖo Bɛti-Awɛni.

⁶ Izlayɛ́li ví lɛ́ɛ wá mɔ ɖɔ nǔ ɔ́ hú gǎn émí, ɖó mɛ lɛ́ɛ lɛ́ lɛ̌ dó yě gbɔn fí bǐ, bɔ yě gbɔ bó hɔn byɔ́ sónu lɛ́ɛ mɛ, do lɛ́ɛ mɛ, awǐnnya kan mɛ, nu lɛ́ɛ mɛ, dotɔ lɛ́ɛ mɛ.

⁷ Mɛ ɖé lɛ́ɛ ɖo yě mɛ, bɔ yě lɔ dó asá Judɛ́ɛn tɔ ɔ́, bó yi Gadi kpó Galadi kpó gbé jí. Sawúlu ka kpo ɖo Gilugalu, bɔ mɛ wɔ̌buwɔ́bú e kpó é kpó ɖo fínɛ́ lɛ́ɛ bǐ ɖo xɛsi jí.

⁸ Sawúlu nɔ te nú azǎn tɛ́nwe lě e Samuwɛ́li ɖɔ gbɔn n'i é. Lo ɔ́, Samuwɛ́li ɖo wǐwá wɛ ǎ, bɔ mɛ lɛ́ɛ bǐ ɖo hinhɔn jó Sawúlu dó wɛ.

⁹ Bɔ Sawúlu gbɔ bo ɖɔ: “Mi sɔ́ kanlin e ná dó sá vɔ̌ e è nɔ dó zo ɔ́ ná wɛ è ɖe ɔ́ kpó éé ná dó sá kɔnɖókpɔ́ vɔ́ lɛ́ɛ ná wɛ è ɖe lɛ́ɛ kpó wá.” È bɛ̌ kanlin lɛ́ɛ wá n'i, bɔ é ɖésú sá vɔ̌ e è nɔ dó zo ɔ́.

¹⁰ Vɔ̌ ɔ́ sá fó wɛ è ɖe kɛ́ɖɛ́, bɔ Samuwɛ́li wá, bɔ é yi gɔ̌n tɔn, bó ná dó gbe e.

¹¹ Samuwɛ́li ka kanbyɔ́ ɛ ɖɔ: “Étɛ́ a ka bló nɛ́?” Bɔ é yí gbe n'i ɖɔ: “Ée hwenu e a ɖɔ dó é su bɔ a ma ɖo wǐwá wɛ ǎ, bɔ Filisitɛ́ɛn lɛ́ɛ ká ko kplé ɖo Mikumasi é ɔ́,

¹² un mɔ ɖɔ nú un ma yá wǔ xomlá Mawu Mavɔmavɔ ǎ ɔ́, Filisitɛ́ɛn lɛ́ɛ ná wá tɔ́n ahwan mǐ ɖo Gilugalu. Énɛ́ ɔ́ wɛ zɔ́n bɔ un gbɔ bo sɔ́ tamɛ nyi gbě, bó sá vɔ̌ e è nɔ dó zo ɔ́.”

¹³ Samuwɛ́li ka yí gbe nú Sawúlu ɖɔ: “A wa nǔ taɖunɔ ɖɔhun. Sɛ́n e Mawu Mavɔmavɔ, Mawu towe dó nú we ɔ́, a nyi ǎ. Ényí a ko se tónú nú Mawu wɛ ɔ́, é ná hɛn axɔ́súɖuɖu towe ɖó te káká yi káká sá.

¹⁴ Amɔ̌, din ɔ́, axɔ́súɖuɖu towe ná fó. Mawu Mavɔmavɔ ko sɔ́ mɛ e nyɔ́ nukún tɔn mɛ, bɔ é ná nyí gǎn ɖo togun tɔn nu é. Đó nǔ e é ɖɔ nú we ɔ́, a blǒ ɖ'é jí ǎ.”

¹⁵ Énɛ́ ɔ́ gúdo ɔ́, Samuwɛ́li gosín Gilugalu bo yi Giveya ɖo Bɛnjamɛ́ɛ yíkúngban jí. Sawúlu ka kpɔ́n mɛ e kpo ɖo gɔ̌n tɔn fínɛ́ lɛ́ɛ. Yě yi nǔwɔntɔn (600) mɔ̌.

¹⁶ Sawúlu kpó vǐ tɔn Jonatáan ɔ́ kpó mɛ e kpó yě kpó ɖo yiyi wɛ lɛ́ɛ kpó ɖó gɔnu ɖó Gɛva ɖo Bɛnjamɛ́ɛ yíkúngban jí, bɔ Filisitɛ́ɛn lɛ́ɛ ká ɖó gɔnu ɖó Mikumasi.

¹⁷ Gbɛ̌ta atɔn gosín Filisitɛ́ɛn lɛ́ɛ sín ahwankpá mɛ, bó ná vɔ Izlayɛ́li ví lɛ́ɛ. Gbɛ̌ta ɖokpó wlí Ɔfla toxo ɔ́ sín ali, bó tunta Cuwálu to ɔ́.

¹⁸ Gbɛ̌ta wegɔ́ ɔ́ tunta Bɛti-Holɔ́ni, bɔ gbɛ̌ta atɔngɔ́ ɔ́ wlí ali e gbɔn tɔdo Sevoyímu tɔn mɛ ɖo to ɔ́ sín dogbó jí, ɖo gbětótló kpá é, bó ɖidó.

¹⁹ Hwe nɛ́ ɔ́ nu ɔ́, è mɔ nǔtuntɔ́ ɖěbǔ ɖo Izlayɛ́li to ɔ́ mɛ ǎ, ɖó Filisitɛ́ɛn lɛ́ɛ dó sɛ́n nú Izlayɛ́li ví lɛ́ɛ ɖɔ yě ní má tun hwǐ ó, yě ní má tun hwǎn ó.

²⁰ Bɔ Izlayɛ́li ví lɛ́ɛ bǐ nɔ́ yi tɛ́n alǐn yětɔn lɛ́ɛ, jǐga yětɔn lɛ́ɛ, asyɔ́ yětɔn lɛ́ɛ kpó adǒvwé yětɔn lɛ́ɛ kpó ɖo gɔ̌n yětɔn.

²¹ Ényí alǐn ɖé, abǐ jǐga ɖé, nǔkplɔ́nú ɖé, abǐ asyɔ́ ɖé, abǐ gan nuxwíɖíxwíɖí ɖé wló, bɔ è nǎ tɛ́n ɔ́, Filisitɛ́ɛn lɛ́ɛ gɔ́n jɛ́n è nɔ yi.

²² Énɛ́ ɔ́ wɛ zɔ́n bɔ gbe e gbe yě xwe ahwan fun gbé ɔ́, mɛ e kplá Sawúlu kpó Jonatáan kpó xwe ahwan fun gbé lɛ́ɛ ɖě ɖó ahwanfunnú ɖé ǎ. Gbe nɛ́ gbe ɔ́, Sawúlu kpó vǐ tɔn Jonatáan ɔ́ kpó kɛ́ɖɛ́ jɛ́n hɛn ahwanfunnú.

²³ Ahwanfuntɔ́ Filisitɛ́ɛn lɛ́ɛ tɔn sín gbɛ̌ta ɖokpó yi tɔwu ɖó Mikumasi só vla mɛ, ɖo aga.