1 Samuwɛ́li 12 - MAWUXÓWÉMA

¹ Samuwɛ́li ɖɔ nú Izlayɛ́li to ɔ́ bǐ ɖɔ: “Éɖíe, un bló nǔ e mi ɖɔ nú mì lɛ́ɛ bǐ, bó sɔ́ axɔ́sú ɖokpó nú mi.

² Bɛ́ sín din ɔ́, é wɛ ná ɖu gǎn ɖo mi nu. Nyɛ ɔ́, un ko kpo, bó wú hwa kpé fí bǐ; vǐ ce lɛ́ɛ ka ɖo mi mɛ. Nyɛ ɔ́, un nɔ mi nu sín vǔ ce káká wá jɛ égbé.

³ Nyi ɖíe! Ényí un wa nǔɖé nyi do nú mɛɖé hǔn, mi ɖɔ ɖo Mawu Mavɔmavɔ kpó axɔ́sú e é sɔ́ ɔ́ kpó nukɔn din: un yí nyibú mɛɖé tɔn a? Un yí tócí mɛɖé tɔn a? Mɛ̌ un ka táfú kpɔ́n? Mɛ̌ un dó tagba ná kpɔ́n? Mɛ̌ sí un yí nǔ ɖu ɖe bo nɔ jǐ tɔn kpɔ́n? Mɛ ɔ́ ní ɖɔ nú má sú axɔ́ tɔn ɛ.”

⁴ Bɔ yě bǐ yí gbe n'i ɖɔ: “A táfú mɛɖé gbeɖé ǎ, a ka dó tagba nú mǐ ɖě gbeɖé kpɔ́n ǎ, a ka yí nǔ ɖu ɖo mɛɖé sí gbeɖé kpɔ́n ǎ.”

⁵ Bɔ Samuwɛ́li lɛ́ ɖɔ nú yě ɖɔ: “Hǔn Mawu Mavɔmavɔ kpó axɔ́sú e é sɔ́ ɔ́ kpó nyí kúnnuɖetɔ́ égbé din ɖɔ mi kún mɔ nǔɖé ɖɔ dó wǔ ce ó.” Bɔ yě yí gbe n'i ɖɔ: “Ɛɛn mǐ yí gbe.”

⁶ Bɔ Samuwɛ́li lɛ́ ɖɔ nú togun ɔ́ ɖɔ: “Mawu Mavɔmavɔ wɛ sɔ́ Mɔyízi kpó Aalɔ́ɔn kpó; é wɛ ɖe tɔ́gbó mitɔn lɛ́ɛ tɔ́n sín Ejípu.

⁷ Din ɔ́, mi wá hwɛgun ɖo Mawu Mavɔmavɔ nukɔn. Đagbe e Mawu Mavɔmavɔ wa nú mi kpó tɔ́gbó mitɔn lɛ́ɛ kpó ɔ́, un ná to flín mi hwɛ̌.

⁸ Ée Jakɔ́bu kpó mɛ tɔn lɛ́ɛ kpó yi Ejípu ɔ́, tɔ́gbó mitɔn lɛ́ɛ jɛ xó sú ylɔ́ Mawu Mavɔmavɔ jí, bɔ é sɛ́ Mɔyízi kpó Aalɔ́ɔn kpó dó, bɔ yě kplá yě sín Ejípu wá fí.

⁹ Lo ɔ́, yě wǎ wɔn Mawu Mavɔmavɔ, Mawu yětɔn. Énɛ́ ɔ́ wú wɛ Mawu Mavɔmavɔ jó yě nú Sisela ahwangán Hasɔ́ɔ toxo ɔ́ tɔn, bó jó yě nú Filisitɛ́ɛn lɛ́ɛ kpó axɔ́sú Mɔwabu tɔn kpó, bɔ mɛ énɛ́ lɛ́ɛ bǐ fun ahwan bo ɖu ɖo yě jí.

¹⁰ Énɛ́ ɔ́, yě lɛ́ wá jɛ xó sú ylɔ́ Mawu Mavɔmavɔ jí bó ɖɔ: ‘Mǐ hu hwɛ bo sɛn vodún Baalu lɛ́ɛ kpó Asitaatée lɛ́ɛ kpó; hwlɛ̌n mǐ gán din ɖo kɛntɔ́ mǐtɔn lɛ́ɛ sí, bónú mǐ ná nɔ se tónú nú we.’

¹¹ Ée yě ɖɔ mɔ̌ ɔ́, Mawu Mavɔmavɔ sɛ́ Yelubáalu kpó Bedáni kpó Jɛfutée kpó Samuwɛ́li kpó dó, bó ɖe mi sín kɛntɔ́ e lɛ́ lɛ̌ dó mi lɛ́ɛ lɔ mɛ, bɔ ayi mitɔn j'ayǐ.

¹² Bɔ ée mi wá mɔ ɖɔ Naxáci Amumɔ́ɔ ví lɛ́ɛ xɔ́sú ɔ́ ja mi gba gbé ɔ́, mi ɖɔ nú mì ɖɔ: ‘Gbeɖé, axɔ́sú ɖokpó ná nɔ mǐ nu dandan.’ Mawu Mavɔmavɔ, Mawu mitɔn ká ko nyí axɔ́sú mitɔn.

¹³ Axɔ́sú e mi byɔ́ bó sɔ́ é ɖíe. Mi byɔ́ bɔ Mawu Mavɔmavɔ ná mi.

¹⁴ Ényí mi ɖó sísí nú Mawu Mavɔmavɔ ɔ́, ényí mi nɔ sɛn ɛ ɔ́, ényí mi nɔ se tónú n'i ɔ́, ényí mi ma fɔ́n gǔ dó xó tɔn jí ǎ ɔ́, mi ná ɖo Mawu Mavɔmavɔ, Mawu mitɔn xwedó wɛ, mi kpó axɔ́sú mitɔn kpó.

¹⁵ Amɔ̌, nú mi ma se tónú nú Mawu Mavɔmavɔ ǎ ɔ́, nú mi gbɛ́ gbe n'i ɔ́, Mawu Mavɔmavɔ ná wa nǔ xá mi, lě e é wa xá tɔ́gbó mitɔn lɛ́ɛ gbɔn é.

¹⁶ Mi lɔmɔ̌ mi nɔ te bó ná kpɔ́n nǔ ɖaxó e Mawu Mavɔmavɔ ná jlɛ́ ɖo nukún mitɔn mɛ din é.

¹⁷ Hwenu e mǐ ɖe din ɔ́, é nyí jǐ hwenu ǎ, ɖó nǔkún-yiya hwenu wɛ mǐ ɖe. Un ka ná xomlá Mawu Mavɔmavɔ, bɔ jǐ ná dó gbe, bó ná ja. Ényí nǔ cí mɔ̌ hǔn, mi tunwun ɖɔ axɔ́sú e émí byɔ́ Mawu Mavɔmavɔ é ɔ́, nǔ ɖaxó ɖokpó wɛ é nyí bɔ émí wa nyi do.”

¹⁸ Samuwɛ́li xomlá Mawu Mavɔmavɔ, bɔ gbe énɛ́ gbe ɖokpó ɔ́, jǐ dó gbe bó ja, bɔ togun ɔ́ bǐ ɖi xɛsi dó Mawu Mavɔmavɔ kpó Samuwɛ́li kpó wú.

¹⁹ Togun ɔ́ bǐ ka ɖɔ nú Samuwɛ́li ɖɔ: “Ylɔ̌ Mawu Mavɔmavɔ, Mawu towe dó mɛsɛntɔ́ towe lɛ́ɛ tamɛ, bónú mǐ ní ma kú ó, ɖó axɔ́sú e mǐ byɔ́ ɔ́, hwɛ wɛ nyí bɔ mi hu dó hwɛ jí.”

²⁰ Samuwɛ́li ka ɖɔ nú yě ɖɔ: “Mi ma ɖi xɛsi ó, mi dó nǔ nyanya énɛ́ ɔ́ sin có mi ma lɛ́ kɔ sín Mawu Mavɔmavɔ gúdo ó, mi sɛn ɛ kpódó ayi mitɔn bǐ kpó.

²¹ Mi ma jó Mawu mitɔn dó ó, é má nyí mɔ̌ ǎ ɔ́, mi ná xwedó nǔ yǎyá lɛ́ɛ; nǔ yǎyá lɛ́ɛ ka nɔ sixú hwlɛ́n mɛ gán ǎ, yě nɔ́ sixú wa ɖagbe ɖé nú mɛ ǎ, ɖó nǔ yǎyá kpowun wɛ yě nyí.

²² Mawu Mavɔmavɔ ná jó togun tɔn dó gbeɖé ǎ, bó ná dó hɛn nyǐkɔ tɔn e gba kpé ɔ́ ɖó te; ɖó Mawu Mavɔmavɔ wɛ zin alɔ dó akɔ́n ɖɔ émí ná sɔ́ mi dó bló togun émítɔn.

²³ Mawu Mavɔmavɔ ma lɔn nú un gɔn ɖɛ xo nú mi, bó hu hwɛ dó e ó. Un ná xlɛ́ ali e nyí ali ɖagbe ɔ́ mi, ali e nyí ali jlɔ́jlɔ́ é.

²⁴ Mi vɛ́ kó ɖó sísí nú Mawu Mavɔmavɔ kpowun, bó sɛn ɛ ɖo nǔgbó mɛ kpódó ayi mitɔn bǐ kpó; mi kpɔ́n nǔ ɖaxó e é jlɛ́ ɖo nukún mitɔn mɛ é.

²⁵ Amɔ̌, ényí mi wa nǔ nyanya ɔ́, mi ná dɔn, mi kpódó axɔ́sú mitɔn kpó.”