1 Samuwɛ́li 11 - MAWUXÓWÉMA

¹ Axɔ́sú Naxáci Amumɔ́ɔ ví ɔ́ wá tɔ́n ahwan Yavɛ́ci ɖo Galadi. Yavɛ́cinu lɛ́ɛ bǐ ɖɔ nú Naxáci ɖɔ: “Jɛ akɔ xá mǐ, nú mǐ nǎ nɔ se tónú nú we.”

² Lo ɔ́, axɔ́sú ɔ́ ɖɔ nú yě ɖɔ: “Nú mi jló nú má jɛ akɔ xá mi ɔ́, mi ná yí gbe bɔ un ná tɔ́n nukún aɖisíxwé tɔn ɔ́ mi bǐ sésé dó dó winnyá Izlayɛ́li togun ɔ́ bǐ.”

³ Tomɛxó Yavɛ́ci tɔn lɛ́ɛ ɖɔ nú Naxáci ɖɔ: “Nɔ te kpɔ́n mǐ káká nú azǎn tɛ́nwe, énɛ́ ɔ́, mǐ ná sɛ́ wɛn dó Izlayɛ́li to ɔ́ bǐ mɛ. Ényí mɛɖé má tíin, bó ná hwlɛ́n mǐ gán ǎ ɔ́, mǐ ná sɔ́ miɖée wá jó nú we.”

⁴ Mɛ e è sɛ́ dó lɛ́ɛ wá Giveya Sawúlu toxo mɛ, bo ɖɔ xó nɛ́ lɛ́ɛ bǐ nú togun ɔ́, bɔ mɛ e ɖo to ɔ́ mɛ lɛ́ɛ bǐ wlí avǐ bó ya ɖésú.

⁵ Hwe énɛ́ ɔ́ nu ɔ́, Sawúlu kplá nyibú lɛ́ɛ sín gle mɛ, bo ɖo xwé gbe wá wɛ. É kanbyɔ́ ɖɔ: “Étɛ́ ka jɛ bɔ mɛ bǐ ɖo avǐ ya wɛ?” Bɔ è ɖɔ nǔ e mɛ e gosín Yavɛ́ci lɛ́ɛ ɖɔ ɔ́ n'i.

⁶ Ée Sawúlu se mɔ̌ lě tlóló ɔ́, Yɛ Mawu tɔn wá jǐ tɔn, bɔ xomɛ ɖaxó ɖé sin i.

⁷ É sɔ́ nyibú we bó já bǐ, bó bɛ́ nú wɛnsagun lɛ́ɛ bo ɖɔ yě ní yi gbɔn Izlayɛ́li to ɔ́ bǐ mɛ, bó ɖɔ: “Mɛ ɖěbǔ gbɛ́ ɖɔ émí kún ná xwedó Samuwɛ́li kpó Sawúlu kpó yi ahwan fun gbé ó ɔ́, lě e è nǎ wa nyibú tɔn lɛ́ɛ nú gbɔn é ɖíe.” Ée yě se mɔ̌ ɔ́, Mawu Mavɔmavɔ dó xɛsi yě bǐ, bɔ yě bǐ sɛ ta kplé ɖó bǔ.

⁸ Sawúlu sɔ́ yě bǐ sín kɛ́n ɖo Bɛzɛ́ki Akɔta e ɖo totaligbé lɛ́ɛ ɔ́, yě mɛ adɔ̌kpo afɔtɔn wɛ (300.000). Bɔ akɔta Judáa tɔn ɔ́ nyí gbɛtɔ́ adɔ̌kpo ɖě děgba we afɔwó (30.000).

⁹ Yě ɖɔ nú wɛnsagun e gosín Yavɛ́ci wá lɛ́ɛ ɖɔ: “Mi ná ɖɔ nú Yavɛ́cinu e ɖo Galadi lɛ́ɛ ɖɔ: sɔ hwe yi hwǎn ɔ́, mi ná mɔ alɔgɔ́númɛtɔ́.” Wɛnsagun lɛ́ɛ yi dó wɛn énɛ́ ɔ́ Yavɛ́cinu lɛ́ɛ, bɔ é víví nú yě káká,

¹⁰ bɔ yě ɖɔ nú Amumɔ́ɔ ví lɛ́ɛ ɖɔ: “É jɛ sɔ ɔ́, mǐ nǎ sɔ́ miɖée wá jó nú mi, bɔ mi ná sɔ́ mǐ dó wa nǔ e jló mi é ná.”

¹¹ Ayǐhɔ́ngbe tɔn ɔ́, Sawúlu má ahwanfuntɔ́ tɔn lɛ́ɛ ɖó donu atɔn. Bɔ yě byɔ́ Amumɔ́ɔ ví lɛ́ɛ sín ahwankpá mɛ zǎnzǎn tɛɛn bo hu yě káká bɔ hwe yi hwǎn. Mɛ e kpo lɛ́ɛ hɔn bó gba dó yětɔn yětɔn, mɛɖé sɔ́ ba mɛɖé ǎ.

¹² Togun ɔ́ ɖɔ nú Samuwɛ́li ɖɔ: “Mɛ̌ ká nyí mɛ e ɖɔ Sawúlu kún sixú ɖu gǎn ɖo mǐ nu ó lɛ́ɛ? È nǐ ɖe yě gba, nú mǐ nǎ hu yě.”

¹³ Sawúlu ka ɖɔ: “È nǎ hu mɛɖé égbé ǎ. Đó égbé ɔ́, Mawu Mavɔmavɔ hwlɛ́n togun tɔn Izlayɛ́li gán.”

¹⁴ Bɔ Samuwɛ́li ɖɔ nú togun ɔ́ ɖɔ: “Mi wá mǐ yi Gilugalu bó ná yi sɔ́ axɔ́sú ɔ́ ɖó zinkpo jí.”

¹⁵ Togun ɔ́ bǐ yi Gilugalu bo sɔ́ Sawúlu axɔ́sú, bó sá kɔnɖókpɔ́vɔ́ nú Mawu, bɔ Sawúlu kpó togun ɔ́ bǐ kpó ɖu agɔ̌ gɛnnyii.