1 Jǎan 5 - MAWUXÓWÉMA

Mǐ ɖu ɖo gbɛ ɔ́ jí

¹ Mɛ ɖěbǔ ɖi nǔ ɖɔ Jezu wɛ nyí Klísu ɔ́ hǔn, mɛ ɔ́ nyí Mawu ví. Mɛ ɖěbǔ yí wǎn nú tɔ́ ɖé ɔ́, mɛ ɔ́ nɔ yí wǎn nú vǐ tɔn lɛ́ɛ lɔmɔ̌.

² Ényí mǐ yí wǎn nú Mawu, bó nɔ nyi sɛ́n tɔn lɛ́ɛ ɔ́, énɛ́ wɛ ná zɔ́n bɔ mǐ ná tunwun ɖɔ mǐ yí wǎn nú vǐ tɔn lɛ́ɛ.

³ Wǎn yí nú Mawu wɛ nyí è nǐ nyi sɛ́n tɔn lɛ́ɛ; sɛ́n tɔn lɛ́ɛ ka vɛ́ nyi ǎ;

⁴ ɖó Mawu ví ɖěbǔ hɛn ɔ́, é ná ɖu ɖo gbɛ ɔ́ jí. Nǔɖiɖi e mǐ ɖǒ ɔ́ wɛ ka nɔ zɔ́n bɔ mǐ nɔ ɖu ɖo gbɛ ɔ́ jí.

⁵ Mɛ̌ ka sixú ɖu ɖo gbɛ ɔ́ jí? Mɛ e ɖi nǔ ɖɔ Jezu nyí Mawu ví ɔ́ kɛ́ɖɛ́ wɛ hɛn ɔ́, é ná ɖu ɖo gbɛ ɔ́ jí.

Kúnnu e è ɖe nú Jezu Klísu é

⁶ Jezu Klísu wɛ nyí mɛ e wá é; é wɛ wá kpó sin kpó hun kpó; é wá kpó sin kɛ́ɖɛ́ kpó ǎ; lo ɔ́, é wá kpó sin kpó hun kpó, bɔ Yɛsinsɛn ka ɖo kúnnu ɖe ná wɛ ɖɔ nǔgbó wɛ, ɖó Yɛsinsɛn ɔ́, nǔgbó wɛ é nyí.

⁷ Kúnnuɖetɔ́ atɔn wɛ ɖe;

⁸ Yě wɛ nyí: Yɛsinsɛn, sin kpó hun kpó. Yě mɛ atɔn lɛ́ɛ sín gbe ɖo kpɔ́.

⁹ Mǐ nɔ yí gbe nú kúnnuɖiɖe gbɛtɔ́ lɛ́ɛ tɔn; Mawu sín kúnnuɖiɖe ka hú gǎn gbɛtɔ́ lɛ́ɛ tɔn ɖaxó. Kúnnuɖiɖe Mawu tɔn ɔ́ wɛ nyí ɖɔ é ɖe kúnnu nú vǐ tɔn.

¹⁰ Énɛ́ ɔ́, mɛ e ɖi nǔ nú Mawu ví ɔ́ é ɔ́, mɛ énɛ́ ɖó kúnnuɖiɖe énɛ́ ɔ́ ɖo ayi tɔn mɛ; mɛ e ma ka ɖi nǔ nú Mawu ǎ é sɔ́ Mawu dó ylɔ́ adingbannɔ; ɖó é ɖi nǔ nú kúnnu e Mawu ɖe nú vǐ tɔn é ǎ.

¹¹ Nǔ e ɖɔ wɛ kúnnuɖiɖe énɛ́ ɖe ɔ́ ɖíe: Mawu ná gbɛ mavɔ mavɔ mǐ, bɔ mǐ mɔ gbɛ énɛ́ gbɔn vǐ tɔn jí.

¹² Mɛ e ɖó vǐ ɔ́ ɖo ayi mɛ ɔ́ ɖó gbɛ énɛ́; mɛ e ma ka ɖó vǐ ɔ́ ɖo ayi mɛ ǎ ɔ́ ɖó gbɛ énɛ́ ǎ.

Gbɛ mavɔ mavɔ

¹³ Un ɖo nǔ énɛ́ wlán sɛ́ dó mi wɛ bónú mi mɛ e ɖi nǔ nú Mawu ví ɔ́ lɛ́ɛ ná tunwun ɖɔ émí ɖó gbɛ mavɔ mavɔ.

¹⁴ Mǐ ɖǒ gǎnjɛwú kpíkpé ɖo Mawu nukɔn ɖɔ mǐ byɔ́ nǔ ɖěbǔ nú é sɔgbe xá jlǒ tɔn ɔ́, é nɔ ɖótó mǐ.

¹⁵ Ée mǐ tunwun ɖɔ hwenu e mǐ ɖo nǔɖé byɔ́ ɛ wɛ ɔ́, é nɔ ɖótó mǐ ɔ́, mǐ lɛ́ tunwun ɖɔ é nɔ ná nǔ e byɔ́ ɛ wɛ mǐ ɖe ɔ́ mǐ.

¹⁶ Ényí mɛɖé mɔ nɔví tɔn ɖo hwɛ hu wɛ hǔn, mɛ ɔ́ ní xo ɖɛ n'i; énɛ́ ɔ́, Mawu ná ná gbɛ nɔví énɛ́. É ka ɖo mɔ̌ có, hwɛ ɖokpó tíin bó nɔ dɔn mɛ yi kú; hwɛ énɛ́ tamɛ wɛ un ɖɔ è nǐ xo ɖɛ dó ǎ.

¹⁷ Nǔ nyanya wiwa bǐ wɛ nyí hwɛ; amɔ̌ hwɛ ɖé lɛ́ɛ tíin bó nɔ dɔn mɛ yi kú ǎ.

¹⁸ Mǐ tunwun ɖɔ mɛ e nyí Mawu tɔn ɔ́ ɖěbǔ kún sɔ́ nɔ kpo ɖo hwɛ hu wɛ ó, ɖó Mawu ví ɔ́ cyɔ́n alɔ jǐ tɔn, bɔ Mɛnyanya ɔ́ sɔ́ nɔ kpé nǔ ɖěbǔ wú bó nɔ wa n'i ǎ.

¹⁹ Mǐ tunwun ɖɔ Mawu tɔn wɛ mǐ nyí, bɔ gbɛ ɔ́ bǐ ka ɖo Mɛnyanya ɔ́ sín acɛ mɛ.

²⁰ Mǐ tunwun ɖɔ Mawu ví ɔ́ wá, bó ná nǔnywɛ́ mǐ, nú mǐ ná dó tunwun Mawu nǔgbó ɔ́, bɔ mǐ ɖo bǔ xá Mawu nǔgbó ɔ́ gbɔn vǐ tɔn Jezu Klísu jí; é wɛ nyí Mawu nǔgbó ɔ́, bó nyí gbɛ mavɔ mavɔ.

²¹ Vǐ ce lɛ́ɛ mi, mi cɔ́ miɖée dó vodún sinsɛn wú.