1 Jǎan 3 - MAWUXÓWÉMA

Mawu ví lɛ́ɛ

¹ Mi Kpɔ́n lě e Tɔ́ ɔ́ yí wǎn nú mǐ sɔ é. É yí wǎn nú mǐ káká bo ɖɔ è ní ylɔ́ mǐ ɖɔ Mawu ví; vǐ tɔn wɛ mǐ ka nyí nǔgbó. Ée gbɛ ɔ́ ma tunwun Mawu ɔ́ ǎ wútu wɛ é ma tunwun mǐ ǎ.

² Mɛvívɛ́ná ce lɛ́ɛ mi, din ɔ́, Mawu ví wɛ mǐ nyí; amɔ̌, è ko ɖe nǔ e mi ná wá nyí ɔ́ xlɛ́ céɖécéɖé ǎ. Lo ɔ́, nǔ e mǐ tunwun kpowun ɔ́ wɛ nyí ɖɔ hwenu e Klísu ná lɛ́ kɔ wá ɔ́, mǐ ná cí é ɖɔhun; ɖó mǐ ná mɔ ɛ lě e é ɖe gbɔn é.

³ Mɛ ɖěbǔ ɖó nukún ɖíɖó énɛ́ ɖo Klísu mɛ hǔn, éɖée bló ɖó mǐmɛ́ jí wɛ é ɖe lě e Jezu Klísu ɖésúnɔ nyí mǐmɛ́ gbɔn é.

⁴ Mɛ e nɔ hu hwɛ é ɖěbǔ ɔ́, Mawusɛ́n gba wɛ é ɖe; ɖó hwɛhuhu ɔ́, Mawusɛ́n gbigba wɛ.

⁵ Mi ka tunwun ɖɔ Klísu wá, bó ná ɖe hwɛ lɛ́ɛ síin; hwɛ ɖě ka ɖo ayi tɔn mɛ ǎ.

⁶ Énɛ́ ɔ́, mɛ ɖěbǔ ɖo Jezu Klísu mɛ ɔ́, mɛ ɔ́ sɔ́ nɔ hu hwɛ ǎ; mɛ e nɔ ɖo hwɛ hu wɛ ɔ́ mɔ ɛ ǎ, é ka tunwun i ǎ.

⁷ Vǐ ce lɛ́ɛ mi, mi ma lɔn nú mɛɖé blɛ́ mi ó; mɛ e nɔ wa nǔ jlɔ́jlɔ́ ɔ́, hwɛjijɔnɔ wɛ é nyí, lě e Klísu nyí hwɛjijɔnɔ é.

⁸ Mɛ e nɔ ɖo hwɛ hu wɛ ɔ́, awǒvi tɔn wɛ é nyí, ɖó awǒvi ɔ́ ko ɖo hwɛ hu wɛ sín do, bɔ Mawu ví ɔ́ ka wá, bó ná sú awǒvi sín nǔwiwa lɛ́ɛ sín kún dó.

⁹ Mɛ ɖěbǔ nyí Mawu ví ɔ́, mɛ ɔ́ sɔ́ nɔ hu hwɛ ǎ, ɖó gbɛ Mawu tɔn ɖo mɛ énɛ́ mɛ. Đó ée Mawu nyí Tɔ́ tɔn ɔ́, é sixú kpo ɖo hwɛ hu wɛ ǎ.

¹⁰ Mɛ e nyí Mawu ví lɛ́ɛ kpó mɛ e nyí awǒvi ví lɛ́ɛ kpó ɔ́, nǔ e nɔ zɔ́n bɔ è nɔ tunwun ɖě ɖo ɖě mɛ céɖécéɖé ɔ́ ɖíe: mɛ e ma nɔ wa nǔ jlɔ́jlɔ́ ǎ é ɖěbǔ nyí Mawu ví ǎ; mɛ e ma yí wǎn nú nɔví tɔn ǎ é ɖěbǔ nyí Mawu ví ǎ.

Mi yí wǎn nú miɖée

¹¹ Nǔgbó ɔ́, xó e mi se sín hwenu e mi ɖi nǔ nú Klísu ɔ́ wɛ nyí mǐ ɖó ná yí wǎn nú mǐɖée.

¹² Mǐ ɖó ná cí Kanyɛ́ɛ ɖɔhun ǎ, ɖó mɛ nyanya ɔ́ tɔn wɛ éyɛ́ ko nyí, bó hu nɔví tɔn. Étɛ́wú é ka hu nɔví tɔn? Nǔ e wú é hu i ɔ́ wɛ nyí ɖɔ nǔ e éyɛ́ Kanyɛ́ɛ ɔ́ nɔ wa lɛ́ɛ nɔ sɔgbe ǎ; ée nɔví tɔn ka nɔ wa lɛ́ɛ nɔ sɔgbe.

¹³ Énɛ́ wú ɔ́ nɔví lɛ́ɛ mi, ényí mɛ e nyí gbɛ élɔ́ tɔn lɛ́ɛ gbɛ́ wǎn nú mi hǔn, ní ma kpácá mi ó.

¹⁴ Mǐ tunwun ɖɔ mǐ gosín kú wá gbɛ; mǐ tunwun mɔ̌, ɖó mǐ yí wǎn nú nɔví mǐtɔn lɛ́ɛ. Mɛ e ma ka yí wǎn nú mɛ ǎ é kpo ɖo kú.

¹⁵ Mɛ ɖěbǔ gbɛ́ wǎn nú nɔví tɔn hǔn, mɛhutɔ́ wɛ é nyí; mi ka tunwun ɖɔ mɛhutɔ́ ɖěbǔ kún ɖó gbɛ mavɔ mavɔ ó.

¹⁶ Lě e mǐ tunwun nǔ e wǎn yíyí nyí ɔ́ gbɔn ɔ́ ɖíe: Klísu sɔ́ gbɛ tɔn jó dó ta mǐtɔn mɛ; hǔn mǐ lɔmɔ̌ ɖó ná sɔ́ gbɛ mǐtɔn jó dó nɔví mǐtɔn lɛ́ɛ tamɛ.

¹⁷ Ényí mɛɖé jɛ dɔkun, bó mɔ ɖɔ nǔɖé hudó nɔví émítɔn, bó ka ɖo nukún syɛ́n dó e wɛ ɔ́, nɛ̌ wǎn yíyí Mawu tɔn ka sixú nɔ mɛ énɛ́ sín ayi mɛ gbɔn?

¹⁸ Vǐ ce lɛ́ɛ mi, mi ma nú mǐ ní nɔ́ yí wǎn nú mɛ ɖo nu kpó xó víví kpó kpowun ó; lo ɔ́, wǎn yíyí titewungbe e nɔ ɖe éɖée xlɛ́ gbɔn nǔwiwa lɛ́ɛ mɛ ɔ́ wɛ mǐ ɖó ná ɖó.

¹⁹ Lě e mǐ ná tunwun ɖɔ mǐ nyí nǔgbó ɔ́ tɔn gbɔn ɔ́ nɛ́; lě e ayi mǐtɔn ná ɖó gǎnjɛwú ɖo Mawu nukɔn gbɔn é nɛ́.

²⁰ Ényí ayi mǐtɔn ná bó ɖo hwɛ ɖó nú mǐ wɛ ɔ́, mǐ ní tunwun ɖɔ Mawu hú gǎn ayi mǐtɔn, lobo tunwun nǔ bǐ.

²¹ Mɛvívɛ́ná ce lɛ́ɛ mi, ényí ayi mǐtɔn ma sɔ́ ɖo hwɛ ɖó nú mǐ wɛ ǎ hǔn, mǐ ɖó gǎnjɛwú kpíkpé ɖo Mawu nukɔn.

²² Nǔ ɖěbǔ e mǐ byɔ́ ɔ́, mǐ nɔ mɔ yí ɖo así tɔn, ɖó mǐ nɔ nyi sɛ́n tɔn lɛ́ɛ, bó nɔ wa nǔ e nɔ nyɔ́ nukún tɔn mɛ lɛ́ɛ.

²³ Nǔ e zɔ́n mǐ wɛ Mawu ɖe ɔ́ wɛ nyí ɖɔ mǐ ní ɖi nǔ nú vǐ tɔn Jezu Klísu ɔ́ sín nyǐkɔ, bó ka yí wǎn nú mǐɖée lě e Klísu zɔ́n mǐ gbɔn é.

²⁴ Mɛ e nɔ nyi Mawusɛ́n lɛ́ɛ ɔ́, mɛ ɔ́ ɖo Mawu mɛ, bɔ Mawu ɖo éyɛ́ mɛ. Mǐ tunwun ɖɔ Mawu ɖo mǐ mɛ gbɔn Yɛsinsɛn e é ná mǐ é jí.