1 Timɔtée 4 - MAWUXÓWÉMA

Kplɔ́n e ma sɔgbe xá nǔkplɔ́nmɛ ɖagbe ɔ́ ǎ é

¹ Yɛsinsɛn ɖésú ko ɖɔ céɖécéɖé ɖɔ azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná jó nǔɖiɖi dó, bó ná ɖótó yɛ e nɔ flú mɛ lɛ́ɛ kpódó yɛ nyanya lɛ́ɛ sín nǔkplɔ́nmɛ kpó.

² Yě ná ɖótó nǔ énɛ́ lɛ́ɛ ɖo yɛmɛnúwatɔ́ lɛ́ɛ kpó adingbannɔ lɛ́ɛ kpó sín nu, bó ná jó yěɖée dó bɔ yɛmɛnúwatɔ́ énɛ́ lɛ́ɛ e nǔmasɔgbewiwa ɖó wuntun ayixa yětɔn lɛ́ɛ gan zozo wɛ è dǒ ɖó wuntun ɖɔhun lɛ́ɛ ná dɔn yě bǐ bǔ.

³ Mɛ énɛ́ lɛ́ɛ nɔ dó sɛ́n ɖɔ è ma da asú ó, è ma ka da asi ó. Yě nɔ dó nǔɖuɖu ɖé lɛ́ɛ sín sɛ́n nú mɛ; lo ɔ́, Mawu bló nǔɖuɖu énɛ́ lɛ́ɛ, bónú nǔɖitɔ́ e mɔ nukúnnú jɛ nǔgbó ɔ́ wú lɛ́ɛ ná nɔ ɖu kpó kúdídó kpó.

⁴ Đó nǔ e Mawu bló lɛ́ɛ bǐ wɛ nyɔ́, bɔ è sixú dó ɖě sín sɛ́n nú mɛ ǎ; bǐ wɛ è ɖǒ ná yí kpódó kúdídó kpó.

⁵ Đó Mawuxó ɔ́ kpódó ɖɛxixo kpán nɔ bló bɔ nǔ bǐ nɔ húzú nǔ mímɛ́.

Azɔ̌watɔ́ ɖagbe

⁶ A kplɔ́n nǔ énɛ́ lɛ́ɛ nɔví lɛ́ɛ ɔ́, a nǎ nyí Klísu Jezu sín mɛsɛntɔ́ ɖagbe, bó ná ɖe xlɛ́ ɖɔ nǔɖiɖixó kpódó nǔkplɔ́nmɛ titewungbe e a xwedó lɛ́ɛ kpán wɛ nyí Yɛsinsɛn sín nǔɖuɖu nú we.

⁷ Hɔn nú xlonɔ sín tan e kpi wɛ nyɔ̌ɖaxóví lɛ́ɛ nɔ ɖe, bɔ é ma sɔgbe xá nǔɖiɖi ɔ́ ǎ lɛ́ɛ é, bó kplɔ́n hwiɖée dó xɛsi ɖi nú Mawu lɔ jí.

⁸ Agbaza mɛ gándídó ɔ́, nǔ ɖagbe wɛ; amɔ̌ nǔ kpɛɖé jɛ́n wɛ é nyɔ́ ná; ayi mɛ gándídó ɔ́ ka nyɔ́ nú nǔ lɛ́ɛ bǐ, ɖó é dó akpá nú mi ɖɔ mi ná mɔ gbɛ din tɔn, kpódó ée ja ɔ́ kpó.

⁹ Xó nǔgbó ɖokpó nɛ́, bɔ é jɛ xá ɖɔ mɛ bǐ ní yí bǐ dégbédégbé.

¹⁰ Nǔ énɛ́ wú wɛ mǐ ɖo azɔ̌ wa wɛ, bó ɖo gǎn dó wɛ, ɖó mǐ ɖo Mawu gbɛɖe e nyí Mɛhwlɛ́ngántɔ́ gbɛtɔ́ lɛ́ɛ bǐ tɔn ɔ́ ɖó nukún wɛ, ɖo tají ɔ́, Mawu gbɛɖe e nyí Mɛhwlɛ́ngántɔ́ gbɛtɔ́ e ɖi nǔ nú Klísu lɛ́ɛ tɔn ɔ́ ɖó nukún wɛ.

¹¹ Nǔ e a ɖǒ ná ɖɔ nú yě, bó ná kplɔ́n yě lɛ́ɛ nɛ́.

¹² Ma lɔn nú mɛɖé mɔ yɔkpɔ́vú towe, bó ɖó hwɛ nú we ó. Lo ɔ́, nyǐ kpɔ́ndéwú nú nǔɖitɔ́ lɛ́ɛ, bó nyí kpɔ́ndéwú ɖo xóɖiɖɔ mɛ, bó nyí kpɔ́ndéwú ɖo zǐnzán kpó wǎn yíyí kpó mɛ, bó nyí kpɔ́ndéwú ɖo nǔɖiɖi kpó gbɛ mímɛ́ e a nɔ zán ɔ́ kpó mɛ.

¹³ Cóbónú un ná wá hǔn, ɖǒ kan dó Mawuxó xixa ɖo agun mɛ , kpódó Mawuxó ɖiɖɔ kpó wú, bó lɛ́ ɖó kan dó nǔkplɔ́nmɛ wú.

¹⁴ Ma dó vɛ̌ nú nǔníná e ɖo así we, bɔ Mawu ná we hwenu e gbeyíɖɔ Mawu tɔn lɛ́ɛ ɖɔ Mawuxó, bɔ agunmɛxó lɛ́ɛ ɖ'alɔ jí we ɔ́ ó.

¹⁵ Kpé nukún dó nǔ énɛ́ lɛ́ɛ wú, lobo sɔ́ hwiɖée bǐ jó nú nǔ énɛ́ lɛ́ɛ, bónú mɛ bǐ ná mɔ nǔ jɛ nukɔn yiyi towe wú.

¹⁶ Hɛn ayixa dó hwiɖée wú, bó hɛn ayixa dó nǔ e kplɔ́n mɛ wɛ a ɖe ɔ́ wú. Đǒ kan dó nǔ énɛ́ lɛ́ɛ bǐ wú; ɖó nú a ɖo nǔ wa gbɔn mɔ̌ wɛ ɔ́, a nǎ hwlɛ́n hwiɖée gán, bó ná hwlɛ́n mɛ e ɖo tó ɖó we wɛ lɛ́ɛ bǐ gán.