1 Timɔtée 2 - MAWUXÓWÉMA

¹ Nǔ nukɔntɔn e zɔ́n mi wɛ un ɖe ɔ́ wɛ nyí ɖɔ mi ní nɔ sa vo nú Mawu; mi nɔ xo ɖɛ; mi nɔ byɔ́ nǔ Mawu; mi nɔ dó kú n'i; mi ná nɔ bló nǔ énɛ́ lɛ́ɛ, ɖó gbɛtɔ́ lɛ́ɛ bǐ tamɛ.

² Mi xo ɖɛ nú axɔ́sú lɛ́ɛ kpódó mɛ e sín alɔ mɛ acɛkpikpa ɖe lɛ́ɛ bǐ kpán, bónú mǐ ná sixú mɔ vivo kpódó fífá kpó, ɖo sísí titewungbe ɖó nú Mawu kpódó jijɔ ɖagbe zínzán kpó mɛ.

³ Đó nǔ e nyí nǔ ɖagbe, bó nyɔ́ ɖo Mawu Mɛhwlɛ́ngántɔ́ mǐtɔn nukún mɛ ɔ́ nɛ́.

⁴ É wɛ jló ɖɔ gbɛtɔ́ lɛ́ɛ bǐ ní mɔ hwlɛngán, bó ná tunwun nǔgbó ɔ́ bǐ dégbédégbé.

⁵ Đó Mawu ɖokpó géé wɛ tíin; ɖɛ̌mɛnu ɖokpó géé wɛ tíin ɖo Mawu kpódó gbɛtɔ́ lɛ́ɛ kpán tɛ́ntin. Đɛ̌mɛnu ɔ́ wɛ nyí Klísu Jezu e nyí gbɛtɔ́ é.

⁶ Klísu Jezu énɛ́ ɔ́ wɛ sɔ́ éɖée jó, bó dó xɔ gbɛ nú mɛ bǐ. Ée hwenu e Mawu ɖó ɔ́ wá su ɔ́, lě e é ɖe xlɛ́ ɖɔ Mawu jló ɖɔ gbɛtɔ́ lɛ́ɛ bǐ ní mɔ hwlɛngán gbɔn é nɛ́.

⁷ Un ɖo adingban ɖó wɛ ǎ; nǔgbó ɖɔ wɛ un ɖe bó ɖɔ énɛ́ ɔ́ wútu wɛ Mawu sɔ́ mì wɛnsagun, bó sɔ́ mì mɛsɛ́dó, bó zɔ́n mì ɖɔ ma kplɔ́n nǔ e kan nǔɖiɖi kpódó nǔgbó kpó ɔ́ mɛ e ma nyí Jwifu ǎ lɛ́ɛ.

⁸ Un jló ɖɔ súnnu lɛ́ɛ ɖo fí ɖěbǔ hǔn, yě ní nɔ xo ɖɛ, yě ní nɔ zé alɔ dó jǐ, bó nɔ xo ɖɛ kpódó ayi mímɛ́ kpó; yě ní ma nɔ sin xomɛ ó, yě ma ka nɔ ɖɔ jlɛ ó.

⁹ Un lɛ́ jló ɖɔ nyɔ̌nu lɛ́ɛ ní nɔ́ sɔ́nǔ lě e é jɛ xá gbɔn é, ɖo yɛ̌yi mɛ, ɖo jlɛ̌ jí. Nǔ e nyɔ̌nu lɛ́ɛ ná dó ba acɔ́ ná ɔ́ wɛ nyí ɖa gɛ́dɛ́gɛ́dɛ́ blóbló ǎ; sikánúdídó, jɛ̌dídó abǐ avɔ xɔ akwɛ́ gbígbá ǎ;

¹⁰ lo ɔ́, nǔ e yě ná nɔ dó ba acɔ́ ná ɔ́ wɛ nyí nǔ ɖagbe wiwa, lě e é jɛ xá ɖɔ nyɔ̌nu e nɔ sí Mawu lɛ́ɛ ní nɔ bló gbɔn é.

¹¹ Nyɔ̌nu lɛ́ɛ ní nɔ nɔ xwíí, bó nɔ́ yí nǔ e kplɔ́n yě wɛ è ɖe ɔ́, bó nɔ́ hwíhwɛ́ yěɖée bǐ.

¹² Un ná gbe nyɔ̌nu ɖé ɖɔ é ní kplɔ́n nǔ mɛ ɖo agun mɛ abǐ é ní kpa acɛ nú súnnu ɖé ǎ. Abwɛ̌ wɛ é ɖó ná nɔ.

¹³ Đó Adámu wɛ Mawu bló jɛ nukɔn, cóbó wá bló Ɛvu.

¹⁴ É ka nyí Adámu wɛ Satáan blɛ́ ǎ; nyɔ̌nu ɔ́ wɛ é blɛ́, bɔ é gba sɛ́n e Mawu dó é.

¹⁵ É ɖo mɔ̌ có, nú nyɔ̌nu ɖi nǔ nú Mawu, bó ɖó wǎn yíyí nú nɔzo, bó ɖo mímɛ́ jí, bó nɔ wa nǔ dó jlɛ̌ jí ɔ́, Mawu ná hwlɛ́n ɛ gán ɖo vǐjiji tɔn mɛ.