1 Axɔ́sú 9 - MAWUXÓWÉMA

Mawu tɔ́n dó Salomɔ́ɔ jí azɔn wegɔ́

¹ Hwenu e axɔ́sú Salomɔ́ɔ sá xwé nú Mawu Mavɔmavɔ fó, bó sá xwé é ɖésúnɔ tɔn ɔ́, lobo gbá xɔ e é jló ná gbá lɛ́ɛ bǐ ɔ́,

² Mawu Mavɔmavɔ tɔ́n dó jǐ tɔn azɔn wegɔ́ ɔ́, lě e é tɔ́n dó jǐ tɔn gbɔn ɖo Gabawɔ́ɔn é,

³ bó ɖɔ n'i ɖɔ: “Un yí ɖɛ towe, un se vo e a sa sɛ́ dó mì ɔ́. Un yí xwé élɔ́ e a sá nú mì, bɔ é ná nyí ce káká sɔ́yi bɔ un ná nɔ́ ɖe nyɛɖée xlɛ́ mi ɖo fínɛ́, bɔ nukún ce kpódó ayixa ce kpó ná ɖo jǐ tɔn hwebǐnu.

⁴ Hwɛ ɔ́, nú a zǎn gbɛ ganjí ɖo nukɔn ce, tɔ́ towe Davídi ɖɔhun kpódó ayixa towe kpó, bó wa nǔ jlɔ́jlɔ́ ɔ́, nú a wa nǔ e un zɔ́n we lɛ́ɛ bǐ ɔ́, nú a nyi sɛ́n ce lɛ́ɛ bó xwedó nǔ e un ɖɔ lɛ́ɛ ɔ́,

⁵ un ná hɛn zinkpo towe ɖó te tɛgbɛ ɖo Izlayɛ́li, lě e un ɖɔ nú tɔ́ towe Davídi gbɔn é; un ɖɔ n'i ɖɔ: ‘A nǎ ba mɛ e ná nɔ axɔ́súzinkpo towe jí ɖo Izlayɛ́li ɔ́ kpo gbeɖé ɖo vǐ towe lɛ́ɛ mɛ ǎ.’

⁶ Amɔ̌, nú mi kpódó vǐ mitɔn lɛ́ɛ kpó lɛ́ kɔ sín gǔdo ce ɔ́, nú mi ma bló nǔ e un zɔ́n mi lɛ́ɛ ǎ ɔ́, nú mi ma nyi sɛ́n ce lɛ́ɛ bó xwedó nǔ e un ɖɔ lɛ́ɛ ǎ ɔ́, nú mi yi sɛn vodún, bó ɖe kɔ́ nú yě ɔ́,

⁷ un ná ɖe Izlayɛ́li ví lɛ́ɛ sín to e un ná yě ɔ́ mɛ, un ná jó xwé élɔ́ e a sá nú mì bɔ un yí din ɔ́ dó, bɔ Izlayɛ́li to ɔ́ ná húzú to gbigba, bó ná húzú slǎmɛɖɔnú ɖo togun lɛ́ɛ bǐ mɛ.

⁸ Bɔ xwé élɔ́ e ɖó susu sɔ mɔ̌ din ɔ́, mɛ ɖěbǔ gbɔn akpá tɔn ɔ́, é ná nɔ kpácá ɛ, bɔ é ná nɔ sú xó. È nǎ nɔ́ ɖɔ: ‘Étɛ́wú wɛ Mawu Mavɔmavɔ ká wa nǔ xá to élɔ́ kpódó xwé élɔ́ kpó gbɔn mɔ̌?’

⁹ Bɔ è nǎ yí gbe nú yě ɖɔ: ‘Mawu Mavɔmavɔ, Mawu yětɔn e ɖe yě tɔ́n sín Ejípu ɔ́ wɛ yě jó dó, bó tɛ́ dó vodún lɛ́ɛ wú, bó nɔ ɖe kɔ́ nú yě, lobo nɔ sɛn yě. Énɛ́ ɔ́ wú wɛ Mawu Mavɔmavɔ sɛ́ awě énɛ́ lɛ́ɛ bǐ dó yě.’ ”

Nǔ tɛnmɛ tɛnmɛ e Salomɔ́ɔ wa lɛ́ɛ

¹⁰ Xwe ko wɛ Salomɔ́ɔ sɔ́ ɖó te bo dó sá xwé we lɛ́ɛ ná. É sá Mawu Mavɔmavɔ xwé ɔ́ kpódó xwé é ɖésúnɔ tɔn kpó.

¹¹ Hwenɛ́nu ɔ́, axɔ́sú Tíi tɔn Ilámu wɛ ná sɛ́dlutín kpó siplɛ́tín kpó, kpódó siká kpó Salomɔ́ɔ lě e Salomɔ́ɔ ba gbɔn ɔ́, énɛ́ wú wɛ Salomɔ́ɔ ná toxo ko Ilámu ɖo Galilée gbé jí.

¹² Ilámu gosín Tíi bó ná yi kpɔ́n toxo e Salomɔ́ɔ ná ɛ lɛ́ɛ; lo ɔ́, éé é yi mɔ toxo lɛ́ɛ ɔ́, toxo lɛ́ɛ nyɔ́ nukún tɔn mɛ ǎ.

¹³ Bɔ é ɖɔ: “Nɔví ce, toxo tɛ́ ká nyí toxo énɛ́ lɛ́ɛ bɔ a nǎ mì?” Bɔ é ɖó nyǐkɔ nú toxo énɛ́ lɛ́ɛ ɖɔ Kavúli; è kpo ɖo toxo énɛ́ lɛ́ɛ ylɔ́ ɖɔ mɔ̌ wɛ káká jɛ égbé.

¹⁴ Siká tɔ́nu atɔn adaɖé wɛ Ilámu ná Salomɔ́ɔ.

¹⁵ Axɔ́sú Salomɔ́ɔ ɖe mɛ sɛ́ dó mɛɖe, bónú yě ná gbá Mawu Mavɔmavɔ xwé ɔ́, bó ná gbá xwé é ɖésúnɔ tɔn ɔ́, bó ná sú Milo do ɔ́, bó ná mɛ Jeluzalɛ́mu sín ahohó ɔ́, bó ná gbá Hasɔ́ɔ toxo ɔ́, Mɛgido toxo ɔ́, kpódó Gɛzɛ́ɛ toxo ɔ́ kpó.

¹⁶ Axɔ́sú Ejípu tɔn wá yí Gɛzɛ́ɛ toxo ɔ́; é hu Kanáanu e ɖo toxo ɔ́ mɛ lɛ́ɛ, bó dó toxo ɔ́ zo. Énɛ́ ɔ́ gúdo ɔ́, é zé toxo ɔ́ dó ná agban nú vǐ tɔn nyɔ̌nu e nyí Salomɔ́ɔ sín asi é.

¹⁷ Bɔ Salomɔ́ɔ vɔ́ Gɛzɛ́ɛ toxo ɔ́ ɖó ayǐ, bó vɔ́ Bɛti-Holɔ́ni Dodomɛ tɔn ɔ́ ɖó ayǐ.

¹⁸ É vɔ́ Baaláti toxo ɔ́ ɖó ayǐ, bo vɔ́ Tamáa toxo e ɖo gbětótló Judáa tɔn ɔ́ mɛ ɔ́ ɖó ayǐ.

¹⁹ É gbá toxo e mɛ é ná nɔ bɛ́ agban tɔn lɛ́ɛ dó lɛ́ɛ, bó gbá ée mɛ é ná nɔ bɛ́ ahwankɛkɛ́ví tɔn lɛ́ɛ dó lɛ́ɛ, bó gbá toxo e mɛ é ná nɔ bɛ́ sɔ́ tɔn lɛ́ɛ dó ɔ́. Salomɔ́ɔ gbá xɔ e é jló ná gbá ɖó Jeluzalɛ́mu lɛ́ɛ, bó gbá ée é jló ná gbá ɖó Libáan lɛ́ɛ kpódó ée é jló ná gbá gbɔn to e mɛ é kpa acɛ gbɔn lɛ́ɛ bǐ kpó.

²⁰ Amɔliti lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖé lɛ́ɛ kpo ɖo to ɔ́ mɛ; yědɛɛ ká nyí Izlayɛ́li ví ǎ.

²¹ Yě kpo ɖo to ɔ́ mɛ, ɖó Izlayɛ́li ví lɛ́ɛ kpé wú bó hu yě bǐ sín to ɔ́ mɛ ǎ; yě mɛ énɛ́ lɛ́ɛ sín vǐ wɛ Salomɔ́ɔ nɔ sɔ́ dó wa azɔ̌ syɛ́nsyɛ́n lɛ́ɛ; é kpo ɖo mɔ̌ káká jɛ égbé.

²² Salomɔ́ɔ ka nɔ sɔ́ Izlayɛ́li ví lɛ́ɛ dó wa azɔ̌ syɛ́nsyɛ́n ǎ, ɖó yědɛɛ lɛ́ɛ ɔ́, ahwanfuntɔ́ wɛ yě nyí, bó nyí mɛsɛntɔ́ tɔn lɛ́ɛ, bó nyí azɔ̌gán tɔn lɛ́ɛ, bó nyí ahwangán tɔn lɛ́ɛ, bó nyí mɛ e kpa acɛ dó ahwankɛkɛ́ví tɔn lɛ́ɛ kpódó sɔ́ tɔn lɛ́ɛ kpó nu é.

²³ Gǎn e Salomɔ́ɔ sɔ́ ɖó azɔ̌ tɔn lɛ́ɛ nu lɛ́ɛ ɔ́, yě mɛ afɔwe kantɔn gban (550) wɛ, bɔ yě nɔ́ cɔ́ azɔ̌watɔ́ lɛ́ɛ.

²⁴ Axɔ́sú Ejípu tɔn sín vǐ nyɔ̌nu ɔ́ gosín Davídi Toxo mɛ, bo yi jɛ xwé e Salomɔ́ɔ sá n'i ɔ́ gbe. Hwe énɛ́ ɔ́ nu ɔ́, Salomɔ́ɔ zɔ́n bɔ è sú Milo do ɔ́.

²⁵ Xwe atɔn mɛ, atɔn mɛ tɛgbɛ ɔ́, Salomɔ́ɔ nɔ sá kɔnɖókpɔ́vɔ́ kpó vɔ̌ e è nɔ dó zo é kpó, ɖo vɔ̌sákpe e é bló nú Mawu Mavɔmavɔ ɔ́ jí, bó nɔ́ dó zǎlínkpɔ́n zo ɖo vɔ̌sákpe e ɖo Mawu Mavɔmavɔ nukɔn é jí. Énɛ́ ɔ́, nǔ e wú Salomɔ́ɔ sá xwé ɔ́, é nɔ́ bló.

²⁶ Axɔ́sú Salomɔ́ɔ bló tɔjíhún ɖé lɛ́ɛ ɖo Esiɔ́ni-Gevɛ́ɛ ɖo Eyilati kpá, ɖo Xu Vɔvɔ ɔ́ tó, ɖo Edɔ́mu tomɛ.

²⁷ Ilámu bɛ́ mɛsɛntɔ́ é ɖésúnɔ tɔn, tɔzɔ́watɔ́ e tunwun tɔ ganjí lɛ́ɛ dó tɔjíhún énɛ́ lɛ́ɛ mɛ, bó sɛ́ yě dó mɛsɛntɔ́ Salomɔ́ɔ tɔn lɛ́ɛ gɔ́n.

²⁸ Yě yi Ofíi, bó hɛn siká tɔ́nu wěwe jɛjí sín dɔ̌n wá nú axɔ́sú Salomɔ́ɔ.