1 Axɔ́sú 5 - MAWUXÓWÉMA

¹ Salomɔ́ɔ lɛ́ ɖu ɖo axɔ́súɖuto lɛ́ɛ bǐ jí, bɛ́ sín Efláti tɔ ɔ́ kɔn káká yi Filisitɛ́ɛn lɛ́ɛ tomɛ, káká yi bɔ dó Ejípu to sín dogbó ɔ́ wú. Axɔ́sú to énɛ́ lɛ́ɛ bǐ tɔn ɖo Salomɔ́ɔ sín acɛ glɔ́, bó nɔ sú takwɛ́ n'i ɖo gbɛ hwenu tɔn bǐ.

² Nǔ e Salomɔ́ɔ nɔ mɔ gbe ɖokpó bɔ é kpó mɛ tɔn lɛ́ɛ kpó nɔ ɖu ɔ́ ɖíe: jinukún glínglín tɔ́nu tɛ́nnɛ, linfín tɔ́nu afɔtɔn-nukún-atɔn,

³ Nyibú kloklo wǒ, nyibú kpaa ko, lɛ̌ngbɔ́ kanwe ko, tɛ́, agbanlín, zungbɔ́, kpódó xɛ kloklo lɛ́ɛ kpó gɔ́ ná.

⁴ É lɛ́ kpa acɛ dó ayǐkúngban e ɖo Efláti tɔ ɔ́ sín gbadahwe jí lɛ́ɛ bǐ nu, bɛ́ sín Tifusáxi káká yi Gaza. Axɔ́sú e ɖo gbě énɛ́ lɛ́ɛ jí lɛ́ɛ bǐ wɛ ɖo acɛ tɔn mɛ. To tɔn kpó to e lɛ́ lɛ̌ dó e lɛ́ɛ kpó sín ayi jɛ ayǐ.

⁵ Bɛ́ sín Dan ɖo totaligbé káká yi Bɛ̌-Ceva ɖo tofɔligbé ɔ́, Judáa ví lɛ́ɛ kpó Izlayɛ́li ví lɛ́ɛ kpó bǐ sín ayi jɛ ayǐ. Mɛ ɖokpó ɖokpó nɔ́ vo bó nɔ́ kpé nukún dó vǐwungle tɔn kpó fígigle tɔn kpó wú ganjí, ɖo Salomɔ́ɔ sín hwenu.

⁶ Salomɔ́ɔ bló kpó nú sɔ́ e nɔ́ dɔn kɛkɛ́ví tɔn lɛ́ɛ é; kpó lɛ́ɛ ná hɛn sɔ́ adɔ̌kpo we (40.000); é ɖó sɔ́xátɔ́ děgba atɔn (12.000).

⁷ Tokpɔngán wěwe e Salomɔ́ɔ sɔ́ lɛ́ɛ nɔ́ ná nǔ e é kpódó mɛ e nɔ ɖu nǔ ɖo xwé tɔn gbe lɛ́ɛ kpó ná ɖu é sun mɛ sun mɛ, mɛjíjɛ mɛjíjɛ. É jɛ tokpɔngán ɖé jí sun ɖé mɛ ɔ́, é nɔ lɔn nú nǔɖuɖu nɔ hwe ǎ.

⁸ Yě nɔ́ lɛ́ hɛn ɔ́ji kpó gběhan kpó wá nú sɔ́ lɛ́ɛ, kpó sɔ́ wezunkántɔ́ lɛ́ɛ kpó. Tokpɔngán lɛ́ɛ nɔ bɛ́ nǔ énɛ́ lɛ́ɛ yi jó ɖo fí e axɔ́sú ɔ́ ɖe é, lě e è ɖɔ nú yě gbɔn é.

Salomɔ́ɔ ɖó nǔnywɛ́ hú gbɛtɔ́ lɛ́ɛ bǐ

⁹ Mawu ná nǔnywɛ́ kpó nukúnnú mɔ jɛ nǔ mɛ kpó Salomɔ́ɔ titewungbe. Énɛ́ ɔ́, xó e Salomɔ́ɔ ɖɔ gbo lɛ́ɛ sukpɔ́ nyɛ̌kɛ́n e ɖo xutó ɔ́ ɖɔhun.

¹⁰ Salomɔ́ɔ ɖó nǔnywɛ́ hú mɛ e ɖo zǎnzǎnhwe jí lɛ́ɛ, kpó mɛ e ɖo Ejípu lɛ́ɛ bǐ kpó.

¹¹ É ɖó nǔnywɛ́ hú gbɛtɔ́ lɛ́ɛ bǐ. É ɖó nǔnywɛ́ hú Etáni Zeláxi ví ɔ́, é ɖó hú Maxɔ́lu ví Hemani, Kalukɔ́lu kpódó Daada kpó. É ɖó nǔnywɛ́ ɔ́ ɖésú, bɔ nyǐkɔ tɔn gba kpé to e lɛ́ lɛ̌ dó e lɛ́ɛ bǐ mɛ.

¹² Lǒ afɔwó-afatɔ́n (3.000) wɛ Salomɔ́ɔ dó. Nǔnywɛ́ sín han e é kpa lɛ́ɛ hú afatɔ́n (1.000).

¹³ É ɖɔ xó dó atín tɛnmɛ tɛnmɛ lɛ́ɛ wú, bɛ́ sín atín ɖaxó ɖaxó sɛ́dlu Libáan tɔn lɛ́ɛ jí, káká jɛ atínvú izɔ́pu e nɔ wú ɖo dǒ wú lɛ́ɛ jí. É lɛ́ ɖɔ xó dó kanlin lɛ́ɛ wú; é ɖɔ xó dó xɛ lɛ́ɛ wú, é ɖɔ xó dó hweví lɛ́ɛ kpó kanlin e nɔ sá gbɔn kɔ́ mɛ lɛ́ɛ kpó wú.

¹⁴ Mɛ lɛ́ɛ nɔ gosín togun lɛ́ɛ bǐ mɛ, bó nɔ wá se nǔnywɛ́xó Salomɔ́ɔ tɔn. Axɔ́sú e ɖo ayǐkúngban jí, bó se nǔnywɛ́ tɔn sín xó lɛ́ɛ nɔ sɛ́ mɛ dó, bɔ è nɔ wá se xó tɔn.

Salomɔ́ɔ ɖo nǔ sɔ́ wɛ bó ná sá xwé nú Mawu Mavɔmavɔ

¹⁵ Axɔ́sú Tíi tɔn Ilámu sɛ́ mɛsɛntɔ́ tɔn lɛ́ɛ dó Salomɔ́ɔ gɔ́n, ɖó é se ɖɔ è kɔn ami dó ta n'i, bó sɔ́ ɛ axɔ́sú ɖó tɔ́ tɔn Davídi sín tɛnmɛ. Davídi sín xɔ́ntɔn wɛ Ilámu ɔ́ kó nyí sín do.

¹⁶ Salomɔ́ɔ lɔ ka sɛ́ mɛ dó e ɖɔ è nǐ yi ɖɔ n'i ɖɔ:

¹⁷ “A tunwun ɖɔ tɔ́ ce Davídi kún kpé wú bó sá xwé nú Mawu Mavɔmavɔ, Mawu tɔn ó. Đó kɛntɔ́ tɔn lɛ́ɛ nɔ́ ɖo ahwan tɔ́n ɛ wɛ gbɔn ɖisí amyɔ. Mawu Mavɔmavɔ ka bló bɔ é wá ɖu ɖo yě jǐ.

¹⁸ Din ɔ́, Mawu Mavɔmavɔ, Mawu ce ná vivo mì gbɔn fí bǐ. Un sɔ́ ɖó kɛntɔ́ ǎ, adǎn ɖé ká sɔ́ ɖo gbigbo mì wɛ ǎ.

¹⁹ Un jló ná sá xwé ɖokpó nú Mawu Mavɔmavɔ, Mawu ce. Đó Mawu Mavɔmavɔ ko ɖɔ nú tɔ́ ce Davídi ɖɔ: ‘Vǐ towe e un ná sɔ́ ɖó tɛn towe mɛ ɖo axɔ́súzinkpo towe jí ɔ́ wɛ ná wá gbá sinsɛnxɔ e mɛ è nǎ nɔ́ wá sɛn mì ɖe ɔ́.’

²⁰ Bo ná gbe din tlóló nú è nǐ gbo atín ɖaxó ɖaxó sɛ́dlu Libáan tɔn lɛ́ɛ nú mì. Mɛsɛntɔ́ ce lɛ́ɛ kpódó towe lɛ́ɛ kpó ná gbo, bɔ un ná sú axɔ́ e a nǎ ɖɔ ɔ́ mɛsɛntɔ́ towe lɛ́ɛ. Đó a tunwun ɖɔ mɛ ɖěbǔ kún ɖo mǐdɛɛ lɛ́ɛ gɔ́n, bó ná sixú gbo atín ɔ́ Sidɔ́ɔnnu lɛ́ɛ ɖɔhun ó.”

²¹ Ée Ilámu se xó e Salomɔ́ɔ ɖɔ ɔ́, xomɛ hun i ɖaxó, bɔ é ɖɔ: “Égbé din ɔ́, un dó kú nú Mawu Mavɔmavɔ, ɖó é ná vǐ nǔnywɛ́tɔ́ Davídi, bɔ é ná ɖu axɔ́sú ɖo Izlayɛ́li togun ɖaxó élɔ́ nu!”

²² Énɛ́ ɔ́ gúdo ɔ́, é yí gbe nú Salomɔ́ɔ sɛ́ dó ɖɔ: “Un se xó e a ɖɔ sɛ́ dó mì ɔ́. Un ná ná sɛ́dlutín kpó siplɛ́tín kpó e ba wɛ a ɖe lɛ́ɛ bǐ we.

²³ Mɛsɛntɔ́ ce lɛ́ɛ ná bɛ́ yě sín Libáan wá xutó, bó ná blá yě ɖó kpɔ́, bɔ un ná bɛ́ yě sɛ́ dó we gbɔn xu jí káká wá fí e a ba ɖɔ má bɛ́ yě ɖó é. Yě ná tún yě ɖó fínɛ́, bɔ mɛsɛntɔ́ towe lɛ́ɛ ná bɛ́ yě. Nǔ e un jló ɖɔ a nǎ dó sú axɔ́ tɔn mì ɔ́ wɛ nyí ɖɔ a nǎ sɛ́ nǔɖuɖu dó xwédo ce.”

²⁴ Ée Ilámu ɖɔ mɔ̌ ɔ́, é ná atín e ba wɛ Salomɔ́ɔ ɖe lɛ́ɛ bǐ i.

²⁵ Xwewú xwewú tɛgbɛ ɔ́, Salomɔ́ɔ nɔ ná jinukún tɔ́nu děgba ɖě afɔwó (6.000) Ilámu, bo nɔ ná ɛ olívumi ɖiɖi lǐtli děgba we (8.000), bɔ é nɔ́ dó tɔ́jú xwédo tɔn ná.

²⁶ Mawu Mavɔmavɔ ná nǔnywɛ́ Salomɔ́ɔ lě e é dó akpá tɔn n'i gbɔn é, bɔ Salomɔ́ɔ nɔ ganjí xá Ilámu lobo jɛ akɔ xá ɛ.

Salomɔ́ɔ to lě e è nǎ yi mɛɖe gbɔn é

²⁷ Axɔ́sú Salomɔ́ɔ cyán mɛ ɖo Izlayɛ́li ví lɛ́ɛ mɛ, bó sɛ́ dó mɛɖe. Yě bǐ yi adɔ̌kpo ɖě děgba we afɔwó (30.000).

²⁸ Sun mɛ sun mɛ ɔ́, é nɔ sɛ́ mɛ děgba we afɔwó (10.000) dó, bɔ yě nɔ́ yi mɛɖe ɖo Libáan só jí. Yě blǒ sun ɖokpó ɖo dɔ̌n ɔ́, yě nɔ́ wá bló sun we ɖo to yětɔn mɛ. Adonilámu wɛ ɖo yě nu.

²⁹ Salomɔ́ɔ lɛ́ ɖó súnnu e nɔ hɛn agban kpinkpɛn lɛ́ɛ adɔ̌kpo atɔn děgba we afɔwó (70.000), bó ɖó súnnu e nɔ kpa awǐnnya ɖo sókan mɛ lɛ́ɛ adɔ̌kpo ɛnɛ (80.000).

³⁰ Gǎn lɛ́ɛ ka ɖ'é mɛ ǎ. Yědɛɛ lɛ́ɛ bló gbɛtɔ́ afɔwó-afayizɛ́n kanwe ko (3.300). Salomɔ́ɔ wɛ sɔ́ yě dó azɔ̌ lɛ́ɛ nu, bɔ yě ná nɔ cɔ́ azɔ̌watɔ́ lɛ́ɛ.

³¹ Axɔ́sú Salomɔ́ɔ ɖe gbeta tɔ́n ɖɔ è nǐ kun awǐnnya ɖaxó ɖaxó e nyɔ́ ɖɛkpɛ lɛ́ɛ, bó kpa bónú è nǎ dó sá xwé ɔ́ ná.

³² Salomɔ́ɔ sín azɔ̌watɔ́ lɛ́ɛ kpódó Ilámu tɔn lɛ́ɛ kpó, kpódó Gebalinu lɛ́ɛ kpó kpa awǐnnya lɛ́ɛ bǐ. Lě e è ba atín kpódó awǐnnya kpó e ná kpé xwé ɔ́ sísá gbɔn ɔ́ nɛ́.