1 Axɔ́sú 4 - MAWUXÓWÉMA

¹ Axɔ́sú Salomɔ́ɔ wɛ nyí axɔ́sú Izlayɛ́li ví lɛ́ɛ bǐ tɔn.

² Gǎn e nɔ́ wa azɔ̌ xá ɛ lɛ́ɛ sín nyǐkɔ ɖíe: Azalyahu, vɔ̌sánú-xwlémawutɔ́ Sadɔ́ku ví ɔ́,

³ Eliholɛ́fu kpódó Axiya Cica ví lɛ́ɛ kpó wɛ nyí wěgbójínɔtɔ́ tɔn. Yexosafáti Axiludi ví ɔ́ wɛ nyí gbeyíɖɔ tɔn.

⁴ Benayahu Yexoyada ví ɔ́ wɛ kpa acɛ dó ahwangɔnu ɔ́ nu. Sadɔ́ku kpó Abiyatáa kpó wɛ nyí vɔ̌sánú-xwlémawutɔ́.

⁵ Azalyahu Natáni ví ɔ́ wɛ kpa acɛ dó tokpɔngán lɛ́ɛ nu. Zavúdu Natáni ví ɔ́, vɔ̌sánú-xwlémawutɔ́ wɛ, bó nɔ́ lɛ́ ɖe wě xá axɔ́sú ɔ́.

⁶ Axisáa wɛ kpa acɛ dó axɔ́sú ɔ́ sín xwé nu, bɔ Adonilámu Avuda ví ɔ́ ɖo mɛ e nɔ yi mɛɖe lɛ́ɛ nu.

⁷ Tokpɔngán wěwe wɛ Salomɔ́ɔ ɖó, bó má yě gbɔn to ɔ́ mɛ, bɔ yě nɔ́ ná nǔɖuɖu é kpó xwédo tɔn kpó, sun mɛ sun mɛ, mɛjíjɛ mɛjíjɛ.

⁸ Nyǐkɔ yětɔn lɛ́ɛ ɖíe: Húu ví ɔ́; éyɛ́ kpa acɛ dó Eflayímu sókan ɔ́ nu.

⁹ Dɛkɛ́ɛ ví ɔ́; éyɛ́ kpa acɛ ɖo Makasi gbé jí, bó kpa ɖo Caaluvímu gbé jí, bó kpa ɖo Bɛti-Cɛmɛ́ci kpódó Elɔ́ni-Bɛti-Hanáni kpó gbé jí.

¹⁰ Hɛsɛ́di ví ɔ́; éyɛ́ nɔ́ nɔ Alubɔti, bó kpa acɛ ɖo Soko gbé jí, bó kpa dó Hefɛ́ɛ to ɔ́ bǐ nu.

¹¹ Avinadávu ví ɔ́; éyɛ́ kpa acɛ dó sókan e ɖo Dɔ́ɔ gbé jí ɔ́ bǐ nu. É da Tafáti Salomɔ́ɔ ví ɔ́.

¹² Baana Axiludi ví ɔ́; éyɛ́ kpa acɛ ɖo Tanaki gbé jí, bó kpa ɖo Mɛgido kpódó Bɛti-Ceani kpó gbé jí. Bɛti-Ceani ɔ́ ɖo gletoxo Saatáni kpá, ɖo dokɔ nú Izleyɛ́li, bó gosín Bɛti-Ceani yi Avɛ́li-Mɛhola, bó dín zɛ Yokimɔámu wú.

¹³ Gɛvɛ́ɛ ví ɔ́; éyɛ́ nɔ́ nɔ Hlamɔti ɖo Galadi yíkúngban jí. É kpa acɛ dó gletoxo Manasée ví ɔ́ tɔn e ɖo Yayíi gbé jí ɖo Galadi lɛ́ɛ bǐ nu, bó kpa acɛ dó Aagɔ́vu sín toxo ɔ́ nu ɖo Basáni. Toxo énɛ́ lɛ́ɛ bǐ bló toxo kanɖé ko (60), bɔ è mɛ ahohó lɛ́ lɛ̌ dó, bó dó hɔn nu, lobo zé sɛxlo ganvɔ tɔn dó sú ná.

¹⁴ Axinadavu Idóo ví ɔ́; éyɛ́ kpa acɛ ɖo Maxanayímu gbé jí.

¹⁵ Aximáasi ɔ́, éyɛ́ kpa acɛ ɖo Nɛfutali gbé jí. É lɔmɔ̌ da Salomɔ́ɔ ví ɖokpó, bɔ è nɔ ylɔ́ ɛ ɖɔ Basimáti.

¹⁶ Baana Hucáyi ví ɔ́, éyɛ́ kpa acɛ ɖo Acɛ́ɛ kpódó Bealɔ́ti kpó gbé jí.

¹⁷ Yexosafáti Paluwáxi ví ɔ́, éyɛ́ kpa acɛ ɖo Isakáa gbé ɔ́ jí.

¹⁸ Cimɛ́yi Ela ví ɔ́, éyɛ́ kpa acɛ ɖo Bɛnjamɛ́ɛ gbé ɔ́ jí.

¹⁹ Gɛvɛ́ɛ Wulíi ví ɔ́, éyɛ́ kpa acɛ dó Galadi to ɔ́ nu, bó lɛ́ kpa acɛ dó Amɔliti lɛ́ɛ xɔ́sú Sihɔ́ni kpódó Basáni xɔ́sú Ɔgu kpó sín to lɛ́ɛ nu. Tokpɔngán ɖokpó géé wɛ kpa acɛ gbɔn gbě énɛ́ lɛ́ɛ bǐ jí.

Fí e Salomɔ́ɔ kpa acɛ gbɔn lɛ́ɛ

²⁰ Togun Judáa tɔn ɔ́ kpó Izlayɛ́li tɔn ɔ́ kpó sukpɔ́ ɖésú, bó cí nyɛ̌kɛ́n e ɖo xutó ɔ́ ɖɔhun; yě nɔ́ mɔ nǔ ɖu, bó nɔ mɔ ahan nu, lobo vo ganjí.