1 Axɔ́sú 3 - MAWUXÓWÉMA

¹ Axɔ́sú Salomɔ́ɔ da axɔ́sú Ejípu tɔn sín vǐ ɖokpó dó jɛ akɔ xá ɛ. É kplá asi tɔn ɔ́ yi ɖó Davídi Toxo mɛ, ɖo Jeluzalɛ́mu, có bó wá gbá xɔ é ɖésúnɔ tɔn ɔ́ fó, bó gbá sinsɛnxɔ Mawu Mavɔmavɔ tɔn, lobo mɛ dǒ lɛ́ lɛ̌ dó Jeluzalɛ́mu toxo ɔ́.

² Vɔ̌sákpe e gbɔn só jí só jí lɛ́ɛ jí wɛ togun ɔ́ nɔ́ sá vɔ̌ nú Mawu Mavɔmavɔ ɖe hwe énɛ́ ɔ́ nu, ɖó è ko gbá sinsɛnxɔ nú Mawu Mavɔmavɔ ǎ.

³ Salomɔ́ɔ yí wǎn nú Mawu Mavɔmavɔ, bó nɔ́ xwedó nǔ e tɔ́ tɔn Davídi ɖɔ é. Lo ɔ́, vɔ̌sákpe e ɖo só jí lɛ́ɛ jí wɛ élɔ́ nɔ́ xwlé vɔ̌sánú lɛ́ɛ kpó zǎlínkpɔ́n kpó Mawu ɖe.

Salomɔ́ɔ byɔ́ nǔnywɛ́ Mawu, bó ná dó nɔ to ɔ́ nu

⁴ É wá su gbe ɖokpó, bɔ axɔ́sú ɔ́ ɖidó Gabawɔ́ɔn, bó ná yi sá vɔ̌ nú Mawu ɖo fínɛ́, ɖó vɔ̌sákpe énɛ́ ɔ́ wɛ nyí vɔ̌sákpe e ɖo tají é. É kó dó vɔ̌sánú maxamaxa zo nú Mawu ɖo vɔ̌sákpe e ɖo tɛn énɛ́ ɔ́ mɛ é jí ɖ'ayǐ.

⁵ Hwenu e Salomɔ́ɔ ɖo Gabawɔ́ɔn ɔ́, Mawu Mavɔmavɔ wá xo dlɔ̌ ɛ zǎn mɛ, bó ɖɔ n'i ɖɔ: “Byɔ̌ nǔ e jló we é, nú má ná we.”

⁶ Ée Mawu Mavɔmavɔ ɖɔ mɔ̌ ɔ́, Salomɔ́ɔ ɖɔ n'i ɖɔ: “A nyɔ̌ xomɛ dó mɛsɛntɔ́ towe tɔ́ ce Davídi wú tawun. Đó Davídi ɔ́, gbɛtɔ́ ɖé wɛ bɔ è nǎ ɖeji dó wǔ tɔn; é nɔ wa nǔ jlɔ́jlɔ́, bó sɔ́ xomɛ ɖó wɛn nú we, bɔ a nyɔ̌ xomɛ énɛ́ ɔ́ dó wǔ tɔn, bó ná ɛ vǐ súnnu ɖokpó, bɔ é wá jínjɔ́n axɔ́súzinkpo tɔn jí lě e mɔ gbɔn wɛ è ɖe égbé é.

⁷ Mawu Mavɔmavɔ, Mawu ce, din ɔ́, a sɔ́ nyɛ mɛsɛntɔ́ towe dó ɖó axɔ́sú dó tɔ́ ce Davídi tɛnmɛ. Yɔkpɔ́vú wɛ un ka nyí. Un tunwun lě e un ná wa azɔ̌ énɛ́ ɔ́ gbɔn ɔ́ ǎ.

⁸ Nyɛ mɛsɛntɔ́ towe ɔ́, un wá mɔ nyɛɖée ɖo togun e a sɔ́ ɔ́ nu. Yě sukpɔ́ ɖésú, bɔ è sixú tunwun nabí e yě nyí é tawun ǎ.

⁹ Énɛ́ ɔ́ wú ɔ́, nǎ nǔnywɛ́ e nyɛ mɛsɛntɔ́ towe ná sixú ɖó bó nɔ togun towe nu, bó ná sixú tunwun nǔ ɖagbe kpó nǔ nyanya kpó. Énɛ́ ɔ́ mɛ vo ɔ́, mɛ ɖěbǔ sixú nɔ togun towe wɔ̌buwɔ́bú énɛ́ ɔ́ nu ǎ.”

¹⁰ Nǔ énɛ́ e Salomɔ́ɔ byɔ́ ɔ́ nyɔ́ Mawu Mavɔmavɔ nukún mɛ,

¹¹ bɔ é ɖɔ n'i ɖɔ: “A byɔ́ jidɔ́ ǎ, a byɔ́ dɔkun ǎ, a ka byɔ́ kɛntɔ́ towe lɛ́ɛ sín kú ǎ; a byɔ́ nǔnywɛ́ bó ná dó wa nǔ jlɔ́jlɔ́ ɖo togun ce nu.

¹² Énɛ́ ɔ́ wú ɔ́, un ná bló lě e a ɖɔ gbɔn ɔ́, un ná ná nǔnywɛ́ kpódó nukúnnú mɔ jɛ nǔ mɛ kpó we. Un ná ná we sɔ mɔ̌, bɔ mɛɖé ná ko ɖó nǔnywɛ́ towe ɖɔhun kpɔ́n ǎ, mɛɖé ká ná lɛ́ ɖó gbeɖé ǎ.

¹³ Un ná lɛ́ ná we nǔ e a ma byɔ́ ǎ é. A ɖɔ a nǎ jɛ dɔkun, a nǎ xɔ susu, bɔ ɖo gbɛzán towe bǐ mɛ ɔ́, axɔ́sú ɖěbǔ ná jɛ dɔkun, bó ná xɔ susu towe ɖɔhun ǎ.

¹⁴ Nú a nɔ wa jlǒ ce, bó nɔ nyi sɛ́n ce lɛ́ɛ, lobo nɔ bló nǔ e un zɔ́n lɛ́ɛ tɔ́ towe Davídi ɖɔhun ɔ́, un ná dó azǎn gbɛzán towe jí.”

¹⁵ Salomɔ́ɔ fɔ́n sín amlɔ mɛ, bo mɔ ɖɔ Mawu wɛ xo dlɔ̌ émí. É lɛ́ kɔ wá yi Jeluzalɛ́mu, bo yi akɔjijɛgbá Mawu Mavɔmavɔ tɔn ɔ́ kɔn. É xwlé vɔ̌sánú e è nɔ dó zo lɛ́ɛ kpódó kɔnɖókpɔ́ vɔ́ lɛ́ɛ kpó Mawu, bó ylɔ́ agɔ̌ nú gǎn hɔn-yitɔ́ tɔn lɛ́ɛ bǐ.

Salomɔ́ɔ sɔ́ nǔnywɛ́ dó gbo hwɛ

¹⁶ Nyɔ̌nu agalɛtɔ́ we wá axɔ́sú Salomɔ́ɔ gɔ́n gbe ɖokpó.

¹⁷ Mɛ ɖokpó ɖɔ n'i ɖɔ: “Sɛ́mɛɖó, kɛnklɛ́n! Nyɛ kpódó nyɔ̌nu élɔ́ kpó ɔ́, xwé ɖokpó ɔ́ gbe wɛ mǐ nɔ́ nɔ. É ɖo fínɛ́ bɔ un ji vǐ súnnu ɖokpó.

¹⁸ Azǎn tɔn atɔn gɔ́ ɔ́ gbe ɔ́, élɔ́ ji vǐ súnnu ɖokpó. Nyɛ kpódó éyɛ́ kpó jɛ́n ká ɖo xwé ɔ́ gbe. Mɛ ɖěvo sɔ́ ɖo fínɛ́ xá mǐ ǎ, mǐ mɛ we lɛ́ɛ géé jɛ́n ɖo fínɛ́.

¹⁹ Éyɛ́ mlɔ́ vǐ tɔn jí ɖo zǎn mɛ, bɔ é kú.

²⁰ Ée nǔ cí mɔ̌ ɔ́, é fɔ́n zǎnxwete bɔ hwenu e un ɖo amlɔ dɔ́ wɛ ɔ́, é wá zé nyɛ mɛsɛntɔ́ mɛtɔn sín vǐ sín akpá ce, bó zé e yi mlɔ́ akpá, lobo zé éyɛ́ tɔn kúkú ɔ́ wá mlɔ́ akpá nyɛtɔn.

²¹ Ée un fɔ́n zǎnzǎn bó ja anɔ̌ ná vǐ ce gbé ɔ́, un mɔ ɖɔ é kó kú. Énɛ́ ɔ́, un zé e jɛ wěziza nu, bó kpɔ́n ɛ tlítlí, lobo mɔ ɖɔ é kún nyí vǐ ce ɖíe ó.”

²² Hwenɛ́nu ɔ́, nyɔ̌nu ɖě ɔ́ sú xó, bó ɖɔ: “Adingban wɛ! Vǐ nyɛtɔn wɛ ɖo gbɛ, vǐ towe ɔ́ wɛ kú!” Nyɔ̌nu nukɔn tɔn ɔ́ ká lɛ́ yí xó bó ɖɔ: “Nǔvú wɛ! Vǐ towe ɔ́ wɛ kú, nyɛ tɔn ɔ́ wɛ ɖo gbɛ!” Lě e yě ɖo nǔ dɔn xá yěɖée wɛ gbɔn ɖo axɔ́sú ɔ́ nukɔn ɔ́ nɛ́.

²³ Axɔ́sú ɔ́ wá yí xó, bó ɖɔ: “Mɛ ɖě nɔ́ ɖɔ: ‘Ce wɛ ɖo gbɛ, towe wɛ kú!’ Bɔ mɛ ɖě nɔ́ ɖɔ: ‘Nǔvú wɛ, towe wɛ kú! Bɔ ce ɖo gbɛ!’

²⁴ É nyɔ́! Mi zé hwǐ ɖokpó wá nú mì.” Ée è zě hwǐ ɔ́ wá n'i ɔ́,

²⁵ é ɖɔ: “Mi sɛ́n vǐ e ɖo gbɛ ɔ́ ɖó we, bo zé akpá ɖokpó jó nú mɛ ɖokpó, bó zé akpá wegɔ́ ɔ́ jó nú mɛ ɖě ɔ́.”

²⁶ Ée axɔ́sú ɔ́ ɖɔ mɔ̌ ɔ́, nyɔ̌nu e sín vǐ ɖo gbɛ ɔ́, vǐ tɔn vɛ́ n'i, bɔ é sú xó bó ɖɔ: “Gbeɖé sɛ́mɛɖó! È ma hu vǐ ɔ́ ó, è sɔ́ ɛ jó n'i!” Nyɔ̌nu ɖě ɔ́ ká ɖɔ: “É ná gú mǐ bǐ! Mi sɛ́n ɛ ɖó we!”

²⁷ Ée nyɔ̌nu énɛ́ ɔ́ ɖɔ mɔ̌ ɔ́, axɔ́sú ɔ́ yí xó, bo ɖɔ: “Mi sɔ́ vǐ gbɛɖe ɔ́ jó nú nyɔ̌nu nukɔn tɔn ɔ́, mi ma hu i ó. É wɛ nyí vǐ ɔ́ sín nɔ.”

²⁸ Izlayɛ́li to ɔ́ bǐ se lě e axɔ́sú ɔ́ gbo hwɛ ɔ́ gbɔn ɔ́, bó nɔ ɖó sísí n'i, ɖó è mɔ ɖɔ Mawu ná ɛ nǔnywɛ́ titewungbe, bɔ é ná nɔ dó ɖɔ hwɛ ná.