1 Axɔ́sú 20 - MAWUXÓWÉMA

¹ Axɔ́sú Silíi tɔn Bɛni-Hadadi kplé ahwangɔnu tɔn ɔ́ bǐ. É kplá axɔ́sú gban-nukún-we (32) e ɖo acɛ tɔn mɛ lɛ́ɛ, bó fɔ sɔ́ kpódó kɛkɛ́ví kpó, bó yi xá Samalíi toxo ɔ́, bó ná tɔ́n ahwan.

² É sɛ́ wɛnsagun dó axɔ́sú Izlayɛ́li tɔn Akábu gɔ́n ɖo toxo ɔ́ mɛ.

³ É ɖɔ yě ní yi ɖɔ n'i ɖɔ: “Axɔ́sú Bɛni-Hadadi ɖɔ mǐ ní ɖɔ nú we ɖɔ hwi ní jó kpatágan towe, siká towe, asi towe lɛ́ɛ kpó vǐ towe ɖagbe ɖagbe lɛ́ɛ kpó nú émí.”

⁴ Bɔ axɔ́sú Izlayɛ́li tɔn ɔ́ ɖɔ sɛ́ dó e ɖɔ: “Sɛ́mɛɖó, a ɖɔ nǔɖé ɔ́, un sixú gbɛ́ ǎ. Nyɛ kpó nǔ e un ɖó lɛ́ɛ bǐ kpó wɛ nyí towe.”

⁵ Lo ɔ́, wɛnsagun lɛ́ɛ lɛ́ lɛ́ kɔ wá yi ɖɔ n'i ɖɔ: “Axɔ́sú Bɛni-Hadadi ɖɔ: ‘Un sɛ́ wɛn dó we ɖɔ hwi ní jó kpatágan towe, siká towe, asi towe lɛ́ɛ kpódó vǐ towe lɛ́ɛ kpó nú mì.

⁶ Hǔn tunwun ɖɔ sɔ lěhwenu ɔ́, un ná sɛ́ mɛsɛntɔ́ ce lɛ́ɛ dó, bɔ yě ná wá kíjé xwé towe, bó ná kíjé gǎn hɔn-yitɔ́ towe lɛ́ɛ ɖokpó ɖokpó sín xwé, bó ná bɛ́ nǔ xɔ akwɛ́ e a ɖǒ lɛ́ɛ bǐ.’ ”

⁷ Ée axɔ́sú Izlayɛ́li tɔn ɔ́ se mɔ̌ ɔ́, é ylɔ́ tomɛxó lɛ́ɛ bǐ, bó ɖɔ nú yě ɖɔ: “Mi mɔ nukúnnú jɛ wú ganjí ɖɔ nyanya mǐtɔn ba wɛ nya nɛ́ ɔ́ ɖe, ɖó é sɛ́ mɛ dó mì, bó byɔ́ asi ce lɛ́ɛ kpó vǐ ce lɛ́ɛ kpó, kpatágan ce kpó siká ce kpó. Un ka gbɛ́ nǔ ɖěbǔ n'i ǎ.”

⁸ Ée é ɖɔ mɔ̌ ɔ́, tomɛxó lɛ́ɛ bǐ kpódó togun ɔ́ bǐ kpó ɖɔ n'i ɖɔ: “Ma ɖótó e ó, gbɛ̌.”

⁹ Ée yě ɖɔ mɔ̌ n'i ɔ́, é wá yi ɖɔ nú wɛnsagun Bɛni-Hadadi tɔn lɛ́ɛ ɖɔ: “Mi yi ɖɔ nú sɛ́mɛɖó ce ɖɔ nǔ e é byɔ́ mì dó nukɔn ɔ́, un ná bló. Amɔ̌, ée byɔ́ mì wɛ é ɖe din ɔ́, un gbɛ́.” Énɛ́ ɔ́, wɛnsagun lɛ́ɛ lɛ́ kɔ yi dó wɛn ɔ́ Bɛni-Hadadi.

¹⁰ Bɔ Bɛni-Hadadi ɖɔ sɛ́ dó Akábu azɔn atɔngɔ́ ɔ́ ɖɔ: “Un ná gba Samalíi toxo ɔ́ bǐ. Nú nǔ e ná kpo ɖo toxo ɔ́ mɛ ɔ́, mɛ e xwedó mì lɛ́ɛ ɖokpó ɖokpó mɔ hɛn alɔ mɛ hǔn, vodún lɛ́ɛ ní dɔn tó nú mì, bónú é ní syɛ́n hú tódɔnnúmɛ lɛ́ɛ bǐ.”

¹¹ Énɛ́ ɔ́, axɔ́sú Izlayɛ́li tɔn ɔ́ yí gbe sɛ́ dó e ɖɔ é ní flín lǒ e è dǒ bó ɖɔ: “Ahwan wɛ nɔ gbɔ cóbɔ è nɔ ɖɔ ahwan xó” é.

¹² Ahan nu wɛ Bɛni-Hadadi kpódó axɔ́sú ɖě lɛ́ɛ kpó ɖe ɖo goxɔ sá, bɔ è wǎ dó wɛn énɛ́ ɔ́ ɛ, bɔ é ɖɔ nú mɛsɛntɔ́ tɔn lɛ́ɛ ɖɔ: “Mɛ ɖokpó ɖokpó ní yi nɔ tɛn tɔn mɛ bó ná fun ahwan!” Bɔ yě yi nɔ te toxo ɔ́ nukɔn.

Axɔ́sú Akábu ɖu ɖo ahwan ɔ́ jí

¹³ Hwenɛ́nu ɔ́, gbeyíɖɔ Mawu tɔn ɖokpó sɛkpɔ́ axɔ́sú Izlayɛ́li tɔn Akábu, bo ɖɔ n'i ɖɔ: “Mawu Mavɔmavɔ sɛ́ wɛn dó we ɖɔ: ‘A mɔ mɛ wɔ̌buwɔ́bú nɛ́ lɛ́ɛ bǐ a? Un ná jó yě nú we égbé, bɔ a nǎ tunwun ɖɔ nyɛ wɛ nyí Mawu Mavɔmavɔ e ɖó acɛ dó nǔ bǐ jí é.’ ”

¹⁴ Akábu ka kanbyɔ́ gbeyíɖɔ ɔ́ ɖɔ: “Mɛ̌ jí wɛ Mawu Mavɔmavɔ ka ná jó yě nú mì gbɔn?” Bɔ gbeyíɖɔ ɔ́ yí gbe n'i ɖɔ: “Nǔ e Mawu Mavɔmavɔ ɖɔ ɔ́ ɖíe: ‘Dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ jí wɛ un ná jó yě nú we gbɔn.’ ” Ée é ɖɔ mɔ̌ ɔ́, Akábu lɛ́ ɖɔ: “Mɛ̌ wɛ ka ná tɔ́n ahwan mɛ ɖé jɛ nukɔn?” Bɔ gbeyíɖɔ ɔ́ yí gbe n'i ɖɔ: “Hwi wɛ.”

¹⁵ Énɛ́ ɔ́, Akábu wá yi xa dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ, bó mɔ ɖɔ yě nyí afɔɖé gban-nukún-we (232). Ée é xa yě fó ɔ́, é wá yi xa ahwanfuntɔ́ Izlayɛ́li tɔn lɛ́ɛ lɔ, bó mɔ ɖɔ yě nyǐ děgba ɖě afɔwó-afatɔ́n (7.000).

¹⁶ Akábu kpó ahwanfuntɔ́ tɔn lɛ́ɛ kpó tɔ́n ahwan yě hwemɛ. Hwenɛ́nu ɔ́, Bɛni-Hadadi kpódó axɔ́sú gban-nukún-we (32) ɖěe ɖo acɛ tɔn mɛ lɛ́ɛ kpó ɖo ahan nu wɛ ɖo goxɔ sá, bɔ ahan ɖo yě jí yi wɛ.

¹⁷ Dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ tɔ́n ahwan yě jɛ nukɔn, bɔ Bɛni-Hadadi sɛ́ mɛ dó ɖɔ yě ní yi kpɔ́n nǔ e ɖo jijɛ wɛ é, bɔ yě yi, bó wá ɖɔ n'i ɖɔ mɛ ɖé lɛ́ɛ wɛ jǎwe sín Samalíi.

¹⁸ Bɔ é ɖɔ: “Nú fífá gbé wɛ yě tɔ́n bó ja hǔn, mi wlí yě gbɛɖe gbɛɖe. É ká nyí ahwan fun gbé wɛ yě tɔ́n bó ja hǔn, mi lɛ́ wlí yě gbɛɖe gbɛɖe.”

¹⁹ Hwenɛ́nu ɔ́, dɔ̌nkpɛvú Izlayɛ́linu e tokpɔngán lɛ́ɛ yí dó ahwan mɛ lɛ́ɛ kó tɔ́n sín toxo ɔ́ mɛ, bɔ ahwangɔnu e kpo ɔ́ xwedó yě.

²⁰ Yě mɛ ɖokpó ɖokpó hu kɛntɔ́ ɖokpó ɖokpó, káká bɔ Silíinu lɛ́ɛ hɔn, bɔ Izlayɛ́linu lɛ́ɛ jɛ gǔdo yětɔn. Axɔ́sú Silíi tɔn Bɛni-Hadadi ɔ́, éyɛ́ xá sɔ́ jí, bó hɔn, é kpó sɔ́xátɔ́ ɖé lɛ́ɛ kpó.

²¹ Lě e axɔ́sú Izlayɛ́li tɔn ɔ́ ɖu ɖo ahwan jí gbɔn ɔ́ nɛ́: É dó nǔ sin xá Silíinu lɛ́ɛ bɔ é vɛ́ jlɛ́. É hu sɔ́ yětɔn lɛ́ɛ, lobo hɛn kɛkɛ́ví yětɔn lɛ́ɛ bǐ gblé.

²² Énɛ́ ɔ́ gúdo ɔ́, gbeyíɖɔ Mawu tɔn ɔ́ wá mɔ axɔ́sú Izlayɛ́li tɔn ɔ́, bó ɖɔ n'i ɖɔ: “Kpan akɔ́n, lin tamɛ dó nǔ e a ɖǒ ná wa ɔ́ wú ganjí, ɖó xwe ɖě ɔ́ mɛ lěhwenu ɔ́, axɔ́sú Silíi tɔn ɔ́ ná lɛ́ wá tɔ́n ahwan we.”

Axɔ́sú Akábu lɛ́ ɖu ɖo ahwan ɔ́ jí

²³ Silíi xɔ́sú ɔ́ sín azaglɔ́gán lɛ́ɛ ɖɔ n'i ɖɔ: “Vodún Izlayɛ́linu lɛ́ɛ tɔn ɔ́, vodún sókan mɛ tɔn wɛ, énɛ́ ɔ́ wú wɛ yě hú gǎn mǐ. Din ɔ́, mǐ ní tɔ́n ahwan yě ɖo ayǐkúngban wɛnjɛ jí, mi ná mɔ ɖɔ mǐ syɛ́n hú yě.

²⁴ Din ɔ́, nǔ e a nǎ wa ɔ́ ɖíe: ɖe axɔ́sú gban-nukún-we (32) e ɖo acɛ towe mɛ lɛ́ɛ síin, bó sɔ́ tokpɔngán lɛ́ɛ ɖó tɛn yětɔn mɛ.

²⁵ Hwi ɖésúnɔ ní cyán ahwanfuntɔ́ ɖěvo lɛ́ɛ, bónú yě ní sukpɔ́ sɔ ahwanfuntɔ́ nukɔntɔn e kɛntɔ́ hu lɛ́ɛ é. Sɔ́ lɛ́ɛ kpódó kɛkɛ́ví lɛ́ɛ kpó lɔ ní sukpɔ́, xóxó tɔn lɛ́ɛ ɖɔhun. Énɛ́ ɔ́, mǐ ná yi tɔ́n ahwan yě ɖo ayǐkúngban wɛnjɛ jí; mi ná mɔ ɖɔ mǐ syɛ́n hú yě.” Énɛ́ ɔ́, Bɛni-Hadadi yí gbe nú xó yětɔn, bó bló lě e yě ɖɔ gbɔn é.

²⁶ Xwe e jɛ fínɛ́ ɔ́ mɛ ɔ́, ɖo hwe ɖokpó ɔ́ nu ɔ́, Bɛni-Hadadi xa ahwanfuntɔ́ Silíi tɔn lɛ́ɛ, bó kplá yě yi toxo Afɛ́ki tɔn mɛ, bónú yě ná fun ahwan xá ahwanfuntɔ́ Izlayɛ́li tɔn lɛ́ɛ.

²⁷ Akábu lɔ xa ahwanfuntɔ́ Izlayɛ́li tɔn lɛ́ɛ, lobo dó nǔɖuɖu gban nú yě, bɔ yě jɛ ali, bó ná yi kpé Silíinu lɛ́ɛ. Yě mǎ ahwangbɛ́ ɔ́ ɖó we, bó ɖó gɔnu ɖó Silíinu lɛ́ɛ nukɔn, bó cí gbɔ̌hwan kpɛví we ɖɔhun. Silíinu lɛ́ɛ ka sukpɔ́ káká bó gba kpé to ɔ́ bǐ mɛ.

²⁸ Đɛ̌mɛnu Mawu tɔn ɔ́ lɛ́ wá mɔ axɔ́sú Izlayɛ́li tɔn ɔ́, bó ɖɔ n'i ɖɔ: “Mawu Mavɔmavɔ ɖɔ: ‘Silíinu lɛ́ɛ ɖɔ nyɛ Mawu Mavɔmavɔ ɔ́, vodún sókan mɛ tɔn wɛ un nyí, un kún nyí ayǐkúngban wɛnjɛ tɔn ó. Énɛ́ ɔ́ wú ɔ́, un ná jó ahwan wɔ̌buwɔ́bú énɛ́ ɔ́ bǐ nú we; énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ e ɖó acɛ dó nǔ bǐ jí é.’ ”

²⁹ Yě nɔ fí e yě ɖǒ gɔnu ɖó, bó kpan nukɔn Silíinu lɛ́ɛ ɔ́ nú azǎn tɛ́nwe. Azǎn tɛ́nwegɔ́ ɔ́ gbe ɔ́, yě bɛ̌ ahwanfunfun, bɔ Izlayɛ́linu lɛ́ɛ hu ahwanfuntɔ́ Silíinu e zɔn afɔ lɛ́ɛ adɔ̌kpo atɔ́ɔ́n (100.000) ɖo kéze ɖokpó mɛ.

³⁰ Mɛ e kpo lɛ́ɛ ɔ́, yě mɛ adɔ̌kpo ɖě děgba ɖě afɔwó-afatɔ́n (27.000) wɛ. Yě hɔn yi Afɛ́ki toxo ɔ́ mɛ. Toxo ɔ́ sín ahohó lɛ́ɛ ka mu kɔn nyi yě jí. Bɛni-Hadadi ɔ́ ká hɔn yi hwlá cí toxo ɔ́ mɛ, bó nɔ ɖo xɔ mɛ xɔ mɛ dán gbɔn wɛ.

Akábu jó axɔ́sú Silíi tɔn Bɛni-Hadadi dó nyi gbɛ

³¹ Azaglɔ́gán Bɛni-Hadadi tɔn lɛ́ɛ ɖɔ n'i ɖɔ: “Éɖíe mǐ se ɖɔ axɔ́sú Izlayɛ́li tɔn lɛ́ɛ ɔ́, axɔ́sú nǔbláwǔkúnúmɛtɔ́ wɛ yě nyǐ é. Mǐ ná sin ati dó alin, bó ná xásá kan dó kɔ, bó ná yi axɔ́sú Izlayɛ́li tɔn ɔ́ gɔ́n. Afɔ nyɔ́ ɔ́, é sixú jó we dó nyi gbɛ.”

³² Ée yě ɖɔ mɔ̌ ɔ́, yě sin ati dó alin, bó xásá kan dó kɔ, bó yi axɔ́sú Izlayɛ́li tɔn ɔ́ gɔ́n. Yě ɖɔ n'i ɖɔ: “Mɛsɛntɔ́ towe Bɛni-Hadadi ɖɔ hwi ní kɛnklɛ́n jó émí dó nyi gbɛ!” Bɔ Akábu kanbyɔ́ yě ɖɔ: “É kpo ɖo gbɛ a? Nɔví ce wɛ.”

³³ Azaglɔ́gán Bɛni-Hadadi tɔn lɛ́ɛ mɔ ɖɔ nǔ ɖo nǎ nyɔ́ wɛ, bó yá wǔ yí xó sín nu tɔn bo ɖɔ: “Nǔgbó wɛ, Bɛni-Hadadi ɔ́, nɔví towe wɛ!” Akábu lɛ́ ɖɔ nú yě ɖɔ: “Mi yi kplá ɛ wá.” Bɛni-Hadadi tɔ́n sín fí e é hɔn hwlá cí ɔ́, bó wá Akábu gɔ́n, bɔ Akábu sɔ́ ɛ ɖó kɛkɛ́ví tɔn mɛ.

³⁴ Énɛ́ ɔ́ gúdo ɔ́, Bɛni-Hadadi ɖɔ nú Akábu ɖɔ: “Un jló ná jó toxo e tɔ́ ce yí ɖo tɔ́ towe sí lɛ́ɛ nú we. A sixú lɛ́ ɖó ajɔ̌tɛn ɖé lɛ́ɛ ɖo Damási, lě e tɔ́ ce ɖó ajɔ̌tɛn ɖé lɛ́ɛ ɖo Samalíi ɔ́ ɖɔhun.” Ée Bɛni-Hadadi ɖɔ mɔ̌ ɔ́, Akábu ɖɔ n'i ɖɔ: “Nyɛ ɔ́, un ná jɛ akɔ xá we, énɛ́ ɔ́ gúdo ɔ́, un ná jó we dó bɔ a nǎ yi.” Ée yě jɛ akɔ énɛ́ ɔ́, Akábu jó Bɛni-Hadadi dó, bɔ é yi.

Mawu ɖó hwɛ nú Akábu

³⁵ Mawu Mavɔmavɔ ɖɔ nú mɛ e ɖo gbeyíɖɔ Mawu tɔn gbɛ́ta mɛ lɛ́ɛ ɖokpó ɖɔ ní sa vo nú hǎgbɛ́ tɔn lɛ́ɛ ɖokpó ɖɔ é ní dó nǔ émí. Hǎgbɛ́ tɔn ɔ́ ká gbɛ́.

³⁶ Gbeyíɖɔ ɔ́ ká ɖɔ n'i ɖɔ: “A gosín gɔ̌n ce din bo ɖidó ɔ́, kinnikínní ná wlí we, ɖó a gbɛ̌ gbe nú Mawu Mavɔmavɔ.” Bɔ ée é ɖidó ɔ́, é kpé kinnikínní ɖokpó bɔ kinnikínní ɔ́ wlí i.

³⁷ Gbeyíɖɔ ɔ́ lɛ́ mɔ hǎgbɛ́ tɔn ɖěvo, bó sa vo n'i ɖɔ é ní dó nǔ émí. Bɔ mɛ énɛ́ ɔ́ dó nǔ i, bó gblé wǔ i.

³⁸ Énɛ́ ɔ́ gúdo ɔ́, gbeyíɖɔ ɔ́ sɔ́ nǔ bó cyɔ́n nǔ nukún mɛ, bó yi cí ali e axɔ́sú Akábu ná gbɔn ɔ́ tó.

³⁹ Ée axɔ́sú ɔ́ ɖo nǎ dín wɛ ɔ́, gbeyíɖɔ ɔ́ sú xó sɛ́ dó e, bó ɖɔ: “Sɛ́mɛɖó, nyɛ mɛsɛntɔ́ mɛtɔn ɔ́, ahwan fun wɛ un ɖe nukún myámyá, bɔ nya ɖokpó tɔ́n sín ahwanfuntɔ́ lɛ́ɛ mɛ, bó kplá mɛ ɖokpó wá nú mì, bó ɖɔ: ‘Hɛn nya élɔ́ nú mì ganjí. Nú un wá ba ɛ kpo ɔ́, hwi wɛ un ná hu ɖó tɛn tɔn mɛ; un ma ka hu we ǎ ɔ́, a nǎ sú mì gankwɛ́ afɔwó-afatɔ́n (3.000).’

⁴⁰ Hwenu e un ka ɖo yiyi wɛ, bó ɖo wǐwá wɛ ɔ́, un wá ba nya ɔ́ kpo.” Axɔ́sú Izlayɛ́li tɔn ɔ́ ká ɖɔ n'i ɖɔ: “Hwɛ e è nǎ ɖó nú we ɔ́ nɛ́ hwi ɖésúnɔ ko ɖó nú hwiɖée nɛ́.”

⁴¹ Ée é ɖɔ mɔ̌ tlóló ɔ́, gbeyíɖɔ ɔ́ ɖe nǔ e é cyɔ́n nukún mɛ ɔ́ síin, bɔ axɔ́sú Izlayɛ́li tɔn ɔ́ mɔ ɖɔ gbeyíɖɔ lɛ́ɛ ɖokpó wɛ.

⁴² Énɛ́ ɔ́, é ɖɔ nú axɔ́sú ɔ́ ɖɔ: “Xó e Mawu Mavɔmavɔ ɖɔ ɔ́ ɖíe. É ɖɔ: ‘A jǒ nya e un ɖɔ un ná hu ɔ́ dó, bɔ é yi. Énɛ́ ɔ́ wútu ɔ́, hwi ɖésú wɛ ná kú ɖó tɛn tɔn mɛ, bɔ togun towe ná ji ya ɖó togun tɔn sín tɛnmɛ.’ ”

⁴³ Ée é ɖɔ mɔ̌ ɔ́, wǔ kú axɔ́sú Izlayɛ́li tɔn ɔ́. Xomɛ sin i, bɔ é lɛ́ kɔ yi xwé tɔn gbe ɖo Samalíi.