1 Axɔ́sú 2 - MAWUXÓWÉMA

¹ Davídi mɔ ɖɔ kúzán émítɔn kó sɛkpɔ́, bó ɖɔ lě e nǔ ná nɔ gbɔn ɔ́ nú vǐ tɔn Salomɔ́ɔ. É ɖɔ:

² “Un ɖo nǎ yi wɛ; ɖǒ akɔ́nkpinkpan, bó wa nǔ súnnu ɖɔhun.

³ Nɔ gbejí nú Mawu Mavɔmavɔ, Mawu towe: nɔ wa jlǒ tɔn hwebǐnu, nɔ nyi sɛ́n tɔn lɛ́ɛ, nɔ wa nǔ e é zɔ́n lɛ́ɛ, nɔ xwedó gbetakɛ́n tɔn lɛ́ɛ kpó kplɔ́n tɔn lɛ́ɛ kpó lě e è wlǎn dó Mɔyízi sɛ́n ɔ́ mɛ gbɔn é. A nɔ wa nǔ mɔ̌ ɔ́, a nǎ mɔ nu nú nǔ e a nǎ wa lɛ́ɛ bǐ.

⁴ Énɛ́ ɔ́, Mawu Mavɔmavɔ ná ɖe akpá e é dó nú mì ɔ́. É dó akpá nú mì ɖɔ: ‘Ényí vǐ towe lɛ́ɛ hɛn yěɖée, bó nɔ gbejí nú mì kpódó ayixa yětɔn bǐ kpó, kpódó lǐndɔ̌n yětɔn bǐ kpó ɔ́, a nǎ ba mɛ e ná nɔ tɛn towe mɛ ɖo axɔ́súzinkpo Izlayɛ́li tɔn ɔ́ jí ɔ́ kpo gbeɖé ɖo yě mɛ ǎ.’

⁵ A tunwun nǔ e Jowabu Selúya ví ɔ́ wa xá mì ɔ́, nǔ e é wa xá ahwangán Izlayɛ́li tɔn we Avunɛ́ɛ Nɛ̌ɛ ví ɔ́, kpódó Amasa Yɛtɛ́ɛ ví ɔ́ kpó é. Vivo mɛ wɛ mɛ bǐ ɖe bɔ é tɔ́n ahwan yě ahwan hwenu wɛ yě ɖe ɖɔhun, bó hu yě, lobo va hun yětɔn dó gǒjíblánú e ɖo alin tɔn é wú, bó va dó afɔkpa e ɖo afɔ tɔn lɛ́ɛ wú.

⁶ A nǎ zé nǔnywɛ́ towe dó wa azɔ̌ ná; a nǎ jó e dó bɔ é ná kpo nyɔ̌xó, bó ná kú sɛ́ kú ǎ.

⁷ A nǎ flín Baaziláyi Galadinu ɔ́ sín vǐ lɛ́ɛ; a nǎ nyɔ̌ xomɛ dó yě wú, bɔ yě ná nɔ ɖu nǔ xá we; ɖó hwenu e un ɖo hinhɔn ɖo nɔví towe Abusalɔ́mu nukɔn wɛ ɔ́, yě wɛ gɔ́ alɔ nú mì.

⁸ Gela e nɔ́ nɔ Baxulimu ɖo Bɛnjamɛ́ɛ yíkúngban jí ɔ́ sín vǐ Cimɛ́yi nɛ́ ɖo akpá towe nɛ́. Gbe e gbe un hɔn xwe Maxanayímu ɔ́, é dó nu mì bɔ é syɛ́n. Amɔ̌, é wá kpé mì ɖo Judɛ́ɛn tɔ ɔ́ tó hwenu e un lɛ́ kɔ é, bɔ un ko xwlé Mawu Mavɔmavɔ n'i ɖɔ un kún ná hu i ó.

⁹ Din ɔ́, ma gɔn tó dɔn n'i ó, ɖó gbɛtɔ́ nǔnywɛ́tɔ́ wɛ nú we, bɔ a tunwun lě e a nǎ wa nǔ xá ɛ gbɔn é. É kó kpo bǐ mɔ̌, có a ka ná tɛ́nkpɔ́n bó hu i.”

Davídi zán wá kú, bɔ Salomɔ́ɔ jɛ tɛn tɔn mɛ

¹⁰ Davídi zán wá kú, bɔ è sɔ́ ɛ ɖó Davídi Toxo mɛ ɖo Jeluzalɛ́mu.

¹¹ Xwe kanɖé (40) wɛ Davídi ɖu axɔ́sú ɖo Izlayɛ́li togun ɔ́ nu xɔ: é ɖu axɔ́sú ɖo Eblɔ́n nú xwe tɛ́nwe, bó ɖu ɖo Jeluzalɛ́mu nú xwe gban-nukún-atɔn (33).

¹² Salomɔ́ɔ yi axɔ́súzinkpo tɔ́ tɔn Davídi tɔn jí, bɔ axɔ́súɖuɖu tɔn jínjɔ́n ayǐ tawun.

Salomɔ́ɔ ɖe ɖɛ Adoniyasi

¹³ É wá su gbe ɖokpó, bɔ Adoniyasi e nɔ tɔn nɔ nyí Hagiti ɔ́ yi Bɛtisabe Salomɔ́ɔ sín nɔ gɔ́n. Ée nyɔ̌nu ɔ́ mɔ ɛ ɔ́, é kanbyɔ́ ɛ ɖɔ: “Đagbe wɛ a wǎ gɔ̌n ce a?” Bɔ é yí gbe n'i ɖɔ: “Ɛɛn ɖagbe wɛ.

¹⁴ Xó ɖé wɛ un jló ná ɖɔ nú we.” Bɔ nyɔ̌nu ɔ́ ɖɔ n'i ɖɔ: “Bo ɖɔ xó ɔ́.”

¹⁵ Ée é ɖɔ mɔ̌ é ɔ́, é ɖɔ: “Hwi ɖésú tunwun ɖɔ nyɛ wɛ ɖó ná ɖu axɔ́sú ɔ́ bɔ Izlayɛ́li to ɔ́ bǐ sín nukún kó ɖo jǐ ce; nǔ ká sɔ́ wá nyí gbɔn mɔ̌ ǎ. Axɔ́súɖuɖu ɔ́ wá lílɛ́ jɛ nɔví ce jí. Un mɔ ɖɔ lě e Mawu Mavɔmavɔ jló gbɔn ɔ́ nɛ́.

¹⁶ Din ɔ́, un ná byɔ́ nǔ ɖokpó we, ma gbɛ́ ó!” Bɔ nyɔ̌nu ɔ́ ɖɔ n'i ɖɔ: “Bo ɖɔ nǔ ɔ́.”

¹⁷ Bɔ é ɖɔ: “Kɛnklɛ́n yi ɖɔ nú axɔ́sú Salomɔ́ɔ ɖɔ ní ná mì Avicági Cunɛ́munu ɔ́ bónú ma da; ɖó nú a byɔ́ nǔ Salomɔ́ɔ ɔ́, é ná gbɛ́ ǎ.”

¹⁸ Bɛtisabe ka ɖɔ n'i ɖɔ: “É nyɔ́, un ná yi mɔ axɔ́sú ɔ́ nú we.”

¹⁹ Bɛtisabe yi axɔ́sú Salomɔ́ɔ gɔ́n, bó ná ɖɔ Adoniyasi sín xó ɔ́ n'i. Axɔ́sú ɔ́ sí te sín axɔ́súzinkpo tɔn jí, bó yi kpé e, lobo ɖe kɔ́, bó lɛ́ wá jínjɔ́n ayǐ. È nǎ zinkpo axɔ́sú ɔ́ sín nɔ, bɔ é jínjɔ́n ayǐ ɖo ɖisí tɔn xwé.

²⁰ Bo ɖɔ n'i ɖɔ: “Un ɖo nǔ kpɛví ɖé ná byɔ́ mɛ wɛ, è ma ka tɛ mì ó.” Bɔ axɔ́sú ɔ́ ɖɔ n'i ɖɔ: “Nǎna, bo byɔ́ nǔ e ba wɛ a ɖe é! Un ná tɛ we ǎ.”

²¹ Bɔ nɔ tɔn ɖɔ n'i ɖɔ: “Un ba ɖɔ è nǐ sɔ́ Avicági Cunɛ́munu ɔ́ jó nú nɔví mɛtɔn Adoniyasi nú é ní nyí asi tɔn.”

²² Axɔ́sú Salomɔ́ɔ yí gbe nú nɔ tɔn bo ɖɔ: “Aniwú wɛ a ɖo Avicági Cunɛ́munu ɔ́ byɔ́ nú Adoniyasi wɛ? Gbɔ bo byɔ́ axɔ́súzinkpo ɔ́ n'i bó, ɖó fofó ce wɛ. Byɔ̌ axɔ́súzinkpo ɔ́ nú é kpó vɔ̌sánú-xwlémawutɔ́ Abiyatáa kpó, kpódó Jowabu ahwangán ɖaxó ɔ́ kpó.”

²³ Énɛ́ ɔ́, axɔ́sú Salomɔ́ɔ xwlé Mawu Mavɔmavɔ ɖɔ: “Nú un ma hu Adoniyasi ɖó nǔ énɛ́ e é byɔ́ ɔ́ wú ǎ hǔn, Mawu ní dɔn tó nú mì nú é ní syɛ́n hú tódɔnnúmɛ lɛ́ɛ bǐ.

²⁴ Din ɔ́, un xwlé Mawu ɖɔ: Mawu Mavɔmavɔ ɖo gbɛ; é wɛ bló bɔ axɔ́súɖuɖu ce lí dǒ. É sɔ́ mì jínjɔ́n axɔ́súzinkpo tɔ́ ce Davídi tɔn jí. É wɛ dó akpá nú mì ɖɔ nyi wɛ ná ɖu axɔ́sú, bɔ vǐ ce lɛ́ɛ lɔ ná ɖu káká sɔ́yi. Adoniyasi ná kú égbé.”

²⁵ Énɛ́ ɔ́, axɔ́sú Salomɔ́ɔ sɛ́ Benayahu Yexoyada ví ɔ́ dó, bɔ é yi hu Adoniyasi. Lě e Adoniyasi kú gbɔn é nɛ́.

Salomɔ́ɔ nya Abiyatáa sín Jeluzalɛ́mu

²⁶ Énɛ́ ɔ́ gúdo ɔ́, axɔ́sú Salomɔ́ɔ ɖɔ nú vɔ̌sánú-xwlémawutɔ́ Abiyatáa ɖɔ: “Gosín fí, bó yi ayǐkúngban towe jí, ɖo Anatɔ́ti toxo mɛ, ɖó hu wɛ è ɖǒ ná hu we. Un ka ɖo nǎ hu we wɛ égbé ǎ, ɖó a hɛn akɔjijɛgbá Aklúnɔ, Mawu Mavɔmavɔ tɔn ɖo tɔ́ ce Davídi nukɔn; a ka lɛ́ ji ya lɛ́ɛ bǐ xá tɔ́ ce.”

²⁷ Énɛ́ ɔ́, Salomɔ́ɔ yí vɔ̌sánú-xwlémawutɔ́ sín azɔ̌ e Abiyatáa nɔ wa lɛ́ɛ sín así tɔn, bónú xó e Mawu Mavɔmavɔ ko ɖɔ ɖ'ayǐ dó vɔ̌sánú-xwlémawutɔ́ ɖaxó Eli sín xwé ɔ́ wú ɖo Silóo ɔ́ ná dó jɛ.

Salomɔ́ɔ ɖe ɖɛ Jowabu

²⁸ Ée Jowabu se nǔ e jɛ dó Adoniyasi kpó Abiyatáa kpó jí é ɔ́, é hɔn yi goxɔ Mawu Mavɔmavɔ tɔn mɛ, bó zunfán vɔ̌sákpe ɔ́ sín zo lɛ́ɛ, ɖó Adoniyasi jí wɛ é nɔ; é nɔ Abusalɔ́mu jí ǎ.

²⁹ È wǎ yi ɖɔ nú axɔ́sú Salomɔ́ɔ ɖɔ Jowabu yi goxɔ Mawu Mavɔmavɔ tɔn mɛ, bó zunfán vɔ̌sákpe ɔ́ sín zo lɛ́ɛ. Ée Salomɔ́ɔ se mɔ̌ ɔ́, é sɛ́ Benayahu Yexoyada vǐ ɔ́ dó, bó ɖɔ n'i ɖɔ é ní yi hu i.

³⁰ Bɔ Benayahu yi goxɔ Mawu Mavɔmavɔ tɔn ɔ́ mɛ, bó ɖɔ nú Jowabu ɖɔ axɔ́sú ɔ́ ɖɔ é ní tɔ́n sín fí. Jowabu ka gbɛ́, bó ɖɔ fí wɛ émí ná kú jɛ. Ée é ɖɔ mɔ̌ ɔ́, Benayahu lɛ́ kɔ yi mɔ axɔ́sú ɔ́ bó ɖó gbe n'i.

³¹ Axɔ́sú ɔ́ ka ɖɔ nú Benayahu ɖɔ: “Blǒ lě e é ɖɔ gbɔn ɔ́; hu i bo ɖi i. Énɛ́ ɔ́, xomɛvɔ́nɔ we e Jowabu hu lɛ́ɛ ɔ́, hwɛ tɔn ná nɔ kɔ nú nyɛ kpó tɔ́ ce sín mɛ lɛ́ɛ kpó ǎ.

³² Mawu Mavɔmavɔ ná byɔ́ mɛ e sín hun é kɔn nyi ayǐ lɛ́ɛ sín axɔ́ ɛ, ɖó tɔ́ ce Davídi tunwun ǎ, bɔ é gbo gbe gbɛtɔ́ e nyɔ́ hú i bó nɔ wa nǔ jlɔ́jlɔ́ hú i ɔ́ we; yě wɛ nyí ahwangán Izlayɛ́li tɔn Avunɛ́ɛ Nɛ̌ɛ ví ɔ́, kpódó ahwangán Judáa tɔn Amasa Yɛtɛ́ɛ ví ɔ́ kpó.

³³ Hun yětɔn sín axɔ́ ɖo kɔ nú Jowabu, bó ɖo kɔ nú vǐ tɔn lɛ́ɛ káká sɔ́yi. Amɔ̌, Mawu Mavɔmavɔ ná kɔn fífá dó to ɔ́ mɛ, nú Davídi, nú vǐ tɔn lɛ́ɛ, nú xwédo tɔn, kpódó axɔ́súzinkpo tɔn kpó káká sɔ́yi.”

³⁴ Benayahu Yexoyada ví ɔ́ yi hu Jowabu bo ɖi i dó xwé tɔn gbe, ɖo gbětótló mɛ.

³⁵ Axɔ́sú ɔ́ sɔ́ Benayahu ɖó ahwangɔnu ɔ́ nu, ɖó Jowabu tɛnmɛ, bó sɔ́ vɔ̌sánú-xwlémawutɔ́ Sadɔ́ku ɖó Abiyatáa tɛnmɛ.

Salomɔ́ɔ ɖe ɖɛ Cimɛ́yi

³⁶ Axɔ́sú Salomɔ́ɔ zɔ́n bɔ è yi kplá Cimɛ́yi wá n'i, bɔ é ɖɔ n'i ɖɔ: “Gbǎ xɔ ɖokpó ɖó Jeluzalɛ́mu, bó nɔ fínɛ́. Ma ka tɔ́n sín toxo ɔ́ mɛ, bó yi fí ɖé ó.

³⁷ Tunwun ganjí ɖɔ gbe e gbe émí ná tɔ́n bó d'asá Sedlɔ́n tɔ ɔ́, émí ná kú dandan. Énɛ́ ɔ́, a ka ná tunwun ɖɔ émí ɖésú wɛ sɔ́ émíɖée nyi gbě nɛ́.”

³⁸ Cimɛ́yi yí gbe nú axɔ́sú ɔ́ ɖɔ: “É nyɔ́! Nyɛ mɛsɛntɔ́ mɛtɔn ná bló nǔ e mɛ ɖɔ é.” Énɛ́ ɔ́, Cimɛ́yi nɔ Jeluzalɛ́mu fínɛ́ sɛ yi.

³⁹ Ée é bló xwe atɔn mɔ̌ ɔ́, kannumɔ tɔn we hɔn yi Akíci Gati xɔ́sú Maaka sín vǐ ɔ́ gɔ́n. È wǎ ɖɔ nú Cimɛ́yi ɖɔ kannumɔ tɔn lɛ́ɛ ɖo Gati.

⁴⁰ Ée Cimɛ́yi se mɔ̌ ɔ́, é sɔ́ nǔ bó blá akpa nú tócí tɔn, bó xá jí ɖidó Akíci gɔ́n ɖo Gati, bó ná yi kplá kannumɔ tɔn lɛ́ɛ. É yi bó kplá yě wá.

⁴¹ È yi ɖɔ nú axɔ́sú Salomɔ́ɔ ɖɔ Cimɛ́yi gosín Jeluzalɛ́mu bo yi Gati bo ko lɛ́ kɔ wá.

⁴² Ée axɔ́sú ɔ́ se mɔ̌ ɔ́, é sɛ́ mɛ dó Cimɛ́yi bɔ é wá, bɔ é kanbyɔ́ ɛ ɖɔ: “Un ma ɖɔ nú we ɖ'ayǐ ɖɔ hwi ní xwlé Mawu Mavɔmavɔ nú mì ɖɔ nú émí tɔ́n sín Jeluzalɛ́mu bó yi fí ɖěbǔ ɔ́, émí ná kú, bɔ a yǐ gbe nú mì ɖɔ: ‘É nyɔ́, un se’ ǎ cé?

⁴³ Bɔ aniwú wɛ a ma xwedó nǔ e a ɖɔ bo xwlé Mawu Mavɔmavɔ d'é jí ɔ́ ǎ? Aniwú wɛ a ma xwedó nǔ e un ɖɔ nú we ɔ́ ǎ?

⁴⁴ Nǔ e a wa xá tɔ́ ce Davídi ɔ́, a tunwun dó ayi towe mɛ ganjí. Mawu Mavɔmavɔ ná sú nǔ énɛ́ ɔ́ e a wa ɔ́ sín axɔ́ we.

⁴⁵ É ká ná kɔn nyɔ̌ná dó nyɛ axɔ́sú Salomɔ́ɔ jí, bó ná bló bɔ axɔ́súɖuɖu Davídi tɔn ná jínjɔ́n ayǐ káká sɔ́yi.”

⁴⁶ Ée axɔ́sú ɔ́ ɖɔ mɔ̌ ɔ́, é ɖe gbe nú Benayahu Yexoyada ví ɔ́, bɔ é kplá Cimɛ́yi tɔ́n, bó yi hu i. Bɛ́ sín hwenɛ́nu ɔ́, acɛkpikpa Salomɔ́ɔ tɔn jínjɔ́n ayǐ ganjí.