1 Axɔ́sú 19 - MAWUXÓWÉMA

¹ Axɔ́sú Akábu wlí nǔ e Elíi dó sin ɔ́ kpódó lě e é hu vodún Baalu sín hunnɔ lɛ́ɛ bǐ gbɔn ɔ́ kpó ɖɔ nú asi tɔn Jezabɛ́li.

² Ée Jezabɛ́li se mɔ̌ ɔ́, é sɛ́ mɛ dó Elíi, nú è yi ɖɔ n'i ɖɔ: “Sɔ lěhwenu ɔ́, nú un ma hu we lě e a hu hunnɔ lɛ́ɛ gbɔn ɔ́ ǎ ɔ́, vodún lɛ́ɛ ní dɔn tó nú mì, bónú é ní syɛ́n hú tódɔnnúmɛ lɛ́ɛ bǐ.”

³ Ée Elíi se mɔ̌ ɔ́, xɛsi jɛ jǐ tɔn, bɔ é kplá mɛsɛntɔ́ tɔn, bó hɔn, bó ná hwlɛ́n éɖée. É wá jɛ Bɛ̌-Ceva ɖo Judáa sín afɔligbé bó jó mɛsɛntɔ́ tɔn dó nyi fínɛ́.

⁴ Bɔ é ɖésúnɔ ɔ́ ɖi zɔnlin gbɔn gbětótló mɛ nú kéze ɖokpó, bó yi jínjɔ́n jenɛ́ɛtín ɖé sá. É ɖo biba wɛ ɖɔ émí ní kú. É ɖɔ: “Din ɔ́, Mawu Mavɔmavɔ, agbɔ̌n kpé mì! Yǐ gbɛ ce, ɖó nyɛ nyɔ́ hú tɔ́gbó ce lɛ́ɛ ǎ.”

⁵ Ée é ɖɔ mɔ̌ ɔ́, é mlɔ́ ayǐ, bó dɔ́ amlɔ ɖo atín ɔ́ sá. Lo ɔ́, wɛnsagun Mawu Mavɔmavɔ tɔn ɖokpó wá ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ.”

⁶ Ée é fɔ́n ɔ́, é mɔ wɔ̌xúxú e è nɔ ɖa ɖo awǐnnya zozo jí é ɖokpó ɖo ta tɔn ligbé, bó mɔ sin tɔyizɛ́n ɖokpó. É ɖu nǔ bó nu sin bo lɛ́ mlɔ́ ayǐ.

⁷ Wɛnsagun Mawu Mavɔmavɔ tɔn ɔ́ lɛ́ wá azɔn wegɔ́ ɔ́ bó ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ, ɖó ali towe lín ga ɖésú.”

⁸ Bɔ Elíi fɔ́n, bó ɖu nǔ, bó nu sin, bɔ nǔɖuɖu énɛ́ ɔ́ ná ɛ hlɔ̌nhlɔ́n, bɔ é ɖi zɔnlin nú kéze kanɖé (40) zǎn kanɖé (40), bó wá jɛ Holɛ́bu, só Mawu tɔn kɔn.

Mawu lɛ́ ná akɔ́nkpinkpan Elíi

⁹ Ée Elíi wá jɛ Holɛ́bu só ɔ́ kɔn ɔ́, é byɔ́ sóxo mɛ, bó dɔ́ fínɛ́. Bɔ Mawu Mavɔmavɔ wá kanbyɔ́ ɛ ɖɔ: “Elíi, étɛ́ wa wɛ a ɖe ɖo fí?”

¹⁰ Bɔ Elíi yí gbe n'i ɖɔ: “Mawu Mavɔmavɔ, Mawu Nǔbǐwúkpétɔ́, un yí wǎn nú we káká bɔ nǔ e wa wɛ Izlayɛ́linu lɛ́ɛ ɖe ɔ́, un sɔ́ sixú dɛ ɖ'é nu ǎ; yě gba akɔ e a jɛ xá yě ɔ́; yě flí vɔ̌sákpe towe lɛ́ɛ xwe; yě hu gbeyíɖɔ towe lɛ́ɛ. Nyɛ ɖokpónɔ géé wɛ kpo, yě ká lɛ́ jló ná hu mì.”

¹¹ Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Tɔ́n bó wá nɔ só ɔ́ jí, ɖo nukɔn ce! Un ná wá dín.” Ée Mawu Mavɔmavɔ ɖɔ mɔ̌ ɔ́, jɔhɔn ɖaxó ɖé jɛ nyinyi jí, jɔhɔn ɔ́ syɛ́n ɖésú, bó zɛ só lɛ́ɛ, lobo gba awǐnnya lɛ́ɛ hánnyá ɖo Mawu Mavɔmavɔ nukɔn. Mawu Mavɔmavɔ ká ɖo jɔhɔn énɛ́ mɛ ǎ. Ée jɔhɔn ɔ́ nyi gúdo ɔ́, ayǐkúngban dán wǔ. Mawu Mavɔmavɔ ká ɖo ayǐkúngban énɛ́ e dán wǔ ɔ́ mɛ ǎ.

¹² Ée ayǐkúngban dán wǔ gúdo ɔ́, è mɔ zo, Mawu Mavɔmavɔ ka ɖo zo énɛ́ mɛ ǎ. Ée è mɔ zo gúdo ɔ́, jɔhɔn wɛ́lɛ́wɛ́lɛ́ ɖé nyi.

¹³ Ée Elíi se jɔhɔn ɔ́ sín zǐngídi ɔ́, é sɔ́ awu tɔn ɖaxó ɔ́ cyɔ́n nukún mɛ, bó tɔ́n sín sóxo mɛ, lobo wá nɔ te ɖo só ɔ́ li nu; é lɛ́ se gbe ɖé, bɔ gbe ɔ́ kanbyɔ́ ɛ ɖɔ: “Elíi, étɛ́ wa wɛ a ɖe ɖo fí?”

¹⁴ Bɔ é yí gbe ɖɔ: “Mawu Mavɔmavɔ, Mawu Nǔbǐwúkpétɔ́, un yí wǎn nú we káká bɔ nǔ e wa wɛ Izlayɛ́linu lɛ́ɛ ɖe ɔ́, un sɔ́ sixú dɛ ɖ'é nu ǎ. Yě gba akɔ e a jɛ xá yě ɔ́. Yě flí vɔ̌sákpe towe lɛ́ɛ xwe; yě hu gbeyíɖɔ towe lɛ́ɛ. Nyɛ ɖokpónɔ géé wɛ kpo, yě ká lɛ́ jló ná hu mì.”

¹⁵ Mawu Mavɔmavɔ ka ɖɔ n'i ɖɔ: “Lɛ̌ kɔ, lɛ̌ wlí ali towe káká yi gbětótló Damási tɔn mɛ. Nú a jɛ dɔ̌n ɔ́, a nǎ kɔn ami dó ta nú Hazayɛ́li nú mì, bó ná sɔ́ ɛ Silíi xɔ́sú.

¹⁶ A nǎ kɔn ami dó ta nú Jehu Nimuci ví ɔ́ lɔ, bó ná sɔ́ ɛ Izlayɛ́li xɔ́sú. A nǎ kɔn ami dó ta nú Elizée, Avɛ́li-Mɛhola, Cafáti ví ɔ́, bó ná sɔ́ ɛ gbeyíɖɔ ce ɖó tɛn towe mɛ.

¹⁷ Mɛ ɖé gló Hazayɛ́li ɔ́, Jehu ná hu mɛ ɔ́. Mɛ ɖé ká gló Jehu ɔ́, Elizée ná hu mɛ ɔ́.

¹⁸ Amɔ̌, un ná jó gbɛtɔ́ děgba ɖě afɔwó-afatɔ́n (7.000) dó ɖo Izlayɛ́li; yědɛɛ lɛ́ɛ wɛ ma jɛ kpo nú vodún Baalu ǎ; yě ká kí si n'i ǎ.”

Elíi sɔ́ Elizée ɖó tɛn tɔn mɛ

¹⁹ Elíi gosín Holɛ́bu, bó ɖo yiyi wɛ bó yi mɔ Elizée, Cafáti ví ɔ́, bɔ é ɖo gle lɛ wɛ. Nyibú ko nukún-ɛnɛ wɛ ɖo gle ɔ́ lɛ wɛ. Elizée ɖésú wɛ hɛn nyibú we gǔdo tɔn lɛ́ɛ, bó dó ɖo gle lɛ ná wɛ. Elíi gbɔn akpá tɔn, bó zé awu tɔn ɖaxó ɔ́ nyi jǐ tɔn bó ɖidó.

²⁰ Elizée ká jó nyibú tɔn lɛ́ɛ dó, bó kán wezun yi mɔ Elíi bo ɖɔ n'i ɖɔ: “Gbɔ nú má yi dó yibowá nú tɔ́ ce kpó nɔ ce kpó, bó wá xwedó we.” Bɔ Elíi yí gbe n'i ɖɔ: “Bo yi bo lɛ́ kɔ wá, ɖó nǔ e un wa nú we ɔ́ wú.”

²¹ Ée Elizée jó Elíi dó ɔ́, é wá zé nyibú we bo dó sá vɔ̌ ná. É já mɔ e é dó ɖo gle lɛ ná wɛ ɔ́, dó bló nakí, bó ɖa lan yětɔn bo ná mɛ e ɖo fínɛ́ lɛ́ɛ, bɔ yě ɖu. Énɛ́ ɔ́ gúdo ɔ́, é sɔ́ nǔ bó xwedó Elíi, bó húzú mɛsɛntɔ́ tɔn.