1 Axɔ́sú 16 - MAWUXÓWÉMA

¹ Mawu Mavɔmavɔ ɖɔ nú Jehu Hanáni ví ɔ́ ɖɔ é ní ɖɔ nú Baeca ɖɔ:

² “Hwi mɛ e ma sɔ atɛ́n ɖo togun ɔ́ mɛ ɖ'ayǐ ǎ é ɔ́, un sɔ́ we gǎn ɖó togun ce Izlayɛ́li nu. Lo ɔ́, hwi lɔ zán gbɛ nyanya Jelobowámu ɖɔhun; a dɔn Izlayɛ́linu lɛ́ɛ bɔ yě hu hwɛ; yě dǒ xomɛsin nú mì gbɔn hwɛ e yě hu lɛ́ɛ gblá mɛ.

³ Énɛ́ ɔ́ wú wɛ un ná sú hwi kpódó xwédo towe bǐ kpó sín kún dó sín ayǐkúngban jí, bɔ xwédo towe ná cí Jelobowámu Nɛvati ví ɔ́ sín xwédo ɖɔhun.

⁴ Mɛ towe e ná kú ɖo toxo ɔ́ mɛ lɛ́ɛ ɔ́, cukú lɛ́ɛ ná ɖu lan yětɔn. Bɔ mɛ towe e ka ná kú ɖo gběhan mɛ lɛ́ɛ ɔ́, xɛ lɛ́ɛ ná ɖu lan yětɔn.”

⁵ È wlǎn Baeca sín tan e kpo ɔ́, nǔ e é wa lɛ́ɛ kpódó lě e é kpan akɔ́n gbɔn ɔ́ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ.

⁶ Baeca zán wá kú, bɔ è sɔ́ ɛ yí ɖó Tíisa. Vǐ tɔn Ela wɛ ɖu axɔ́sú ɖó tɛn tɔn mɛ.

⁷ Nǔ we wú wɛ Mawu Mavɔmavɔ ɖɔ xó nú Baeca kpó xwédo tɔn kpó gbɔn gbeyíɖɔ tɔn Jehu Hanáni ví ɔ́ jí: Nukɔn nukɔntɔn ɔ́, Baeca wa nǔ e má nyɔ́ Mawu Mavɔmavɔ nukún mɛ ǎ é; é wa nǔ bó dó xomɛsin nú Mawu Mavɔmavɔ, Jelobowámu kpó xwédo tɔn kpó ɖɔhun. Wegɔ́ ɔ́, é sú Jelobowámu xwédo ɔ́ sín kún dó.

Ela ɖu axɔ́sú ɖo Izlayɛ́li

⁸ Hwenu e Asa ɖo xwe koatɔ́n-nukún-ɖokpó (26) bló wɛ ɖo axɔ́súzinkpo Judáa tɔn jí wɛ ɔ́, Ela, Baeca ví ɔ́ yi axɔ́súzinkpo Izlayɛ́li tɔn jí ɖo Tíisa; é ɖu axɔ́sú nú xwe we.

⁹ Mɛsɛntɔ́ tɔn Zimuli e kpa acɛ dó kɛkɛ́ví lɛ́ɛ sín vlɔ̌ɖówe nu ɔ́ blá gbě tɔn. Ela ka ɖo Tíisa, bó ɖo ahan nu wɛ ɖo hɔnmɛgán Tíisa tɔn Aasa xwé, bɔ ahan ɖo jǐ tɔn yi wɛ.

¹⁰ Bɔ Zimuli byɔ́ xwé ɔ́ gbe, bó hu i. Hwenu e Asa axɔ́sú Judáa tɔn ɔ́ ɖo xwe koatɔ́n-nukún-we (27) bló wɛ ɖo zinkpo jí ɔ́ wɛ Zimuli hu Ela, bo ɖu axɔ́sú ɖó tɛn tɔn mɛ.

¹¹ Ée é yi zinkpo jí lě tlóló ɔ́, é hu Baeca sín xwédo ɔ́ bǐ. É jó súnnu e ko nyí Baeca tɔn é ɖokpó dó ǎ. É jó hɛ̌nnumɔ dó ǎ, é ka jó xɔ́ntɔn dó ǎ.

¹² Zimuli sú Baeca xwédo ɔ́ bǐ sín kún dó, lě e Mawu Mavɔmavɔ ko ɖɔ gbɔn dó Baeca wú, gbɔn gbeyíɖɔ Jehu jí é.

¹³ Nǔ énɛ́ lɛ́ɛ bǐ jɛ, ɖó hwɛ e Baeca kpódó vǐ tɔn Ela kpó hu, bó dɔn Izlayɛ́linu lɛ́ɛ d'é mɛ, bɔ yě hu, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ gbɔn vodún sinsɛn yětɔn lɛ́ɛ gbla mɛ é wú.

¹⁴ È wlǎn Ela sín tan e kpo lɛ́ɛ kpódó nǔ e é wa lɛ́ɛ bǐ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ.

Zimuli ɖu axɔ́sú ɖo Izlayɛ́li

¹⁵ Hwenu e Judáa xɔ́sú Asa ɖo xwe koatɔ́n-nukún-we (27) bló wɛ ɖo zinkpo jí ɔ́, Zimuli yi axɔ́súzinkpo Izlayɛ́li tɔn jí ɖo Tíisa; é ɖu axɔ́sú nú azǎn tɛ́nwe. Ahwangɔnu Izlayɛ́li tɔn ɔ́ ɖó gɔnu ɖó Gibetɔ́ni toxo e Filisitɛ́ɛn lɛ́ɛ yí ɔ́ nukɔn.

¹⁶ Sɔ́ja lɛ́ɛ se ɖɔ Zimuli blá axɔ́sú ɔ́ sín gbě, bó ko hu i. Ée yě se mɔ̌ tlóló ɔ́, yě ɖó gbe kpɔ́, bó sɔ́ ahwangán Ɔmúli axɔ́sú ɖó Izlayɛ́li to ɔ́ nu gbe nɛ́ gbe, ɖo fí e yě ɖǒ gɔnu ɖó é.

¹⁷ Ɔmúli kpódó ahwangɔnu tɔn bǐ kpó gosín Gibetɔ́ni, bó xá Tíisa toxo ɔ́.

¹⁸ Ée Zimuli mɔ ɖɔ è ko yí toxo ɔ́ é ɔ́, é hɔn yi xɔ ɖokpó mɛ ɖo hɔn ɔ́ mɛ, lobo dó xwé ɔ́ zo dó ta nú éɖée, bó kú.

¹⁹ É kú ɖó é wa nǔ e ma nyɔ́ Mawu Mavɔmavɔ nukún mɛ ǎ é, bɔ é nyí hwɛ bɔ é hu. É hu hwɛ e Jelobowámu hu, bó dɔn Izlayɛ́linu lɛ́ɛ d'é mɛ, bɔ yě hu é.

²⁰ È wlǎn Zimuli sín tan e kpo lɛ́ɛ kpó gbě e é blá ɔ́ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ.

²¹ Ée Zimuli zán wá kú ɔ́, Izlayɛ́li togun ɔ́ má ɖó we. Togun ɔ́ akpá ɖokpó ɖo Tivuni Gináti ví ɔ́ jí, bó ná sɔ́ ɛ axɔ́sú, bɔ akpá wegɔ́ ɔ́ ká ɖo Ɔmúli jí.

²² Wǎgbɔ wǎgbɔ ɔ́, mɛ e ɖo Ɔmúli jí lɛ́ɛ ɖu ɖo mɛ e ɖo Tivuni Gináti ví ɔ́ jí lɛ́ɛ jí. Tivuni ɔ́ ká kú, bɔ Ɔmúli ɖu axɔ́sú.

Ɔmúli ɖu axɔ́sú ɖo Izlayɛ́li

²³ Hwenu e Asa Judáa xɔ́sú ɔ́ ɖo xwe gban-nukún-ɖokpó bló wɛ ɖo zinkpo jí ɔ́, Ɔmúli yi axɔ́súzinkpo Izlayɛ́li tɔn jí; é ɖu axɔ́sú nú xwe wěwe. É to nɔ Tíisa nú xwe ayizɛ́n.

²⁴ Énɛ́ ɔ́ gúdo ɔ́, é xɔ só Samalíi tɔn ɔ́ ɖo Cɛmɛ́ɛ sí yí gankwɛ́ děgba ɖě afɔwó (6.000). É ɖó toxo ɖokpó ayǐ ɖo só ɔ́ jí, bo sun nyǐ ɖɔ Samalíi. Cɛmɛ́ɛ e nyí só ɔ́ nɔ ɖ'ayǐ ɔ́ sín nyǐkɔ wɛ é ɖó nú só ɔ́.

²⁵ Ɔmúli wa nǔ e má nyɔ́ Mawu Mavɔmavɔ nukún mɛ ǎ é. Nǔ nyanya e é wa lɛ́ɛ lɛ́ nylá hú ée mɛ e ɖu axɔ́sú jɛ nukɔn n'i lɛ́ɛ bǐ wa é.

²⁶ É zán gbɛ e Jelobowámu Nɛvati ví ɔ́ zán lɛ́ɛ bǐ. É hu hwɛ e Jelobowámu hu, bo dɔn Izlayɛ́linu lɛ́ɛ d'é mɛ bɔ yě hu, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ gbɔn vodún sinsɛn yětɔn lɛ́ɛ gbla mɛ.

²⁷ È wlǎn Ɔmúli sín tan e kpo lɛ́ɛ, nǔ e é wa lɛ́ɛ, lě e é kpan akɔ́n gbɔn é bǐ dó “Axɔ́sú Izlayɛ́li tɔn lɛ́ɛ sín Tan wéma” mɛ.

²⁸ Ɔmúli zán wá kú, bɔ è sɔ́ ɛ yi ɖó Samalíi, bɔ vǐ tɔn Akábu ɖu axɔ́sú ɖó tɛn tɔn mɛ.

Akábu ɖu axɔ́sú ɖo Izlayɛ́li

²⁹ Akábu Ɔmúli ví ɔ́ ɖu axɔ́sú ɖo Izlayɛ́li; hwenu e Asa, Judáa xɔ́sú ɔ́ ɖo xwe gbantɔ́n-nukún-atɔn (38) bló wɛ ɖo axɔ́súzinkpo jí ɔ́, Akábu yi axɔ́súzinkpo Izlayɛ́li tɔn jí ɖo Samalíi; é ɖu axɔ́sú xɔ xwe ko-nukún-we (22).

³⁰ Akábu Ɔmúli ví ɔ́ wa nǔ e má nyɔ́ Mawu Mavɔmavɔ nukún mɛ ǎ é hú ée mɛ e ko ɖu axɔ́sú jɛ nukɔn n'i lɛ́ɛ bǐ wa é.

³¹ Hwɛ e Jelobowámu hu bɔ é lɔmɔ̌ hu ɔ́ víví hwe dó e, bɔ é lɛ́ da Jezabɛ́li Ɛtibaalu axɔ́sú Sidɔ́ɔnnu lɛ́ɛ tɔn sín vǐ ɖokpó, lobo jɛ vodún Baalu sɛn jí, bó nɔ ɖe kɔ́ n'i.

³² É mɛ vodún Baalu xɔ ɖokpó ɖó Samalíi ɖésú, bó lɛ́ bló vɔ̌sákpe e jí è nǎ nɔ sá vɔ̌ ɖe é ɖokpó.

³³ Akábu bló bǒcyɔ. É wa nǔ e má nyɔ́ Mawu Mavɔmavɔ nukún mɛ ǎ é hú ée axɔ́sú Izlayɛ́li tɔn e ko jɛ nukɔn n'i lɛ́ɛ bǐ wa é, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́.

³⁴ Hwenɛ́nu ɖokpó ɔ́, Iyɛli Betɛ́linu ɔ́ vɔ́ toxo Jeliko tɔn ɔ́ gbá. Hwenu e é ɖo do kun wɛ bo ná dó dǒ lɛ́ɛ do ɔ́, nukɔngbéví tɔn Avilámu kú, bɔ kpodéví tɔn Segúvu kú hwenu e é ɖo hɔn lɛ́ɛ dó wɛ é, lě e Mawu Mavɔmavɔ ko ɖɔ gbɔn ɖ'ayǐ gbɔn Jozuwée Nuni ví ɔ́ jí é.