1 Axɔ́sú 15 - MAWUXÓWÉMA

Abiya ɖu axɔ́sú ɖo Judáa

¹ Hwenu e Nɛvati ví Jelobowámu ɖo xwe afɔtɔn nukún atɔn bló wɛ ɖo axɔ́súzinkpo jí ɔ́, Abiya ɖu axɔ́sú ɖo Judáa.

² É ɖu axɔ́sú nú xwe atɔn. Jeluzalɛ́mu wɛ é nɔ́ nɔ. Nɔ tɔn nyí Maaka; Abusalɔ́mu ví wɛ.

³ Hwɛ e tɔ́ tɔn ko hu jɛ nukɔn n'i ɖ'ayǐ lɛ́ɛ bǐ wɛ élɔ́ hu; é sɔ́ ayixa tɔn bǐ jó nú Mawu Mavɔmavɔ, Mawu tɔn tɔ́gbó tɔn Davídi ɖɔhun ǎ.

⁴ Nǔ ɖo mɔ̌ có, Mawu Mavɔmavɔ, Mawu tɔn kpɔ́n dó Davídi wú, bó ná ɛ vǐ ɖokpó, bɔ é ná wá ɖu axɔ́sú ɖó tɛn tɔn mɛ, bónú Davídi sín kan ma bú ó, bɔ Jeluzalɛ́mu ná ɖo te.

⁵ Đó Davídi ɔ́, nǔ e sɔgbe ɖo Mawu Mavɔmavɔ nukún mɛ ɔ́ wɛ é wa. Đo gbɛzán tɔn bǐ mɛ ɔ́, é lɛ́ kɔ sín nǔ e Mawu Mavɔmavɔ zɔ́n lɛ́ɛ ɖě gúdo gbeɖé zɛ Ulíi Hitíti ɔ́ sín xó ɔ́ wú ǎ.

⁶ Hlobowámu kpódó Jelobowámu kpó ɔ́ ahwan fun xá yěɖée wɛ jɛ́n yě nɔ́ ɖe. Ahwan énɛ́ ɔ́ kpo ɖo te káká wá jɛ Abiya hwenu.

⁷ È wlǎn Abiya sín tan e kpo ɔ́ dó “Axɔ́sú Judáa tɔn lɛ́ɛ sín Tan wéma” mɛ. Abiya lɔmɔ̌ fun ahwan xá Jelobowámu.

⁸ Abiya zán wá kú, bɔ è sɔ́ ɛ ɖó Davídi Toxo mɛ, bɔ vǐ tɔn Asa ɖu axɔ́sú ɖó tɛn tɔn mɛ.

Asa ɖu axɔ́sú ɖo Judáa

⁹ Hwenu e axɔ́sú Izlayɛ́li tɔn Jelobowámu ɖo xwe ko bló wɛ ɖo axɔ́súzinkpo jí ɔ́, Asa ɖu axɔ́sú ɖo Judáa.

¹⁰ É ɖu axɔ́sú nú xwe kanɖé-nukún-ɖokpó (41) ɖo Jeluzalɛ́mu. Tɔ́ tɔn sín nɔ nɔ nyí Maaka; Abusalɔ́mu ví wɛ.

¹¹ Asa wa nǔ e sɔgbe ɖo Mawu Mavɔmavɔ nukún mɛ é tɔ́gbó tɔn Davídi ɖɔhun.

¹² É nya súnnu kpó nyɔ̌nu kpó e nɔ́ lɛ aga ɖo hunkpá mɛ dó sɛn hun lɛ́ɛ sín to ɔ́ mɛ, bó ɖe vodún e tɔ́gbó tɔn lɛ́ɛ lí lɛ́ɛ bǐ síin.

¹³ É tlɛ lɛ́ yí nyɔ̌nu ɖaxó sín acɛ e tɔ́ tɔn nɔ Maaka ɖó ɔ́ sín así tɔn, ɖó Maaka kpa vodún Acela sín bǒcyɔ bó nɔ́ sɛn. Asa gba vodún nǔvɛ́mɔ Mawu tɔn, vodún tɔ́ tɔn nɔ ɔ́ tɔn, bó dó zo ɖo tɔsisa Sedlɔ́n tɔn tó.

¹⁴ Tɛn mímɛ́ e ɖo to ɔ́ mɛ lɛ́ɛ ɖo fínɛ́, có Asa sín ayi bǐ nɔ Mawu Mavɔmavɔ jí, ɖo gbɛzán tɔn bǐ mɛ.

¹⁵ Kpatágan kpó siká kpó, kpódó nǔ tɛnmɛ tɛnmɛ e é kpó tɔ́ tɔn kpó bɛ́ ɖó vo nú Mawu Mavɔmavɔ lɛ́ɛ ɔ́, é bɛ́ bǐ wá Mawu Mavɔmavɔ xwé.

¹⁶ Asa kpódó Baeca axɔ́sú Izlayɛ́li tɔn ɔ́ kpó ɔ́, ahwan fun xá yěɖée wɛ jɛ́n yě nɔ́ ɖe hwebǐnu.

¹⁷ Baeca yi, bó tɔ́n ahwan Judáa to ɔ́ gbe ɖokpó, bó jɛ ahohó mɛ lɛ́ dó Hlama gletoxo ɔ́ jí, bó dó gbo ali nú axɔ́sú Judáa tɔn Asa.

¹⁸ Énɛ́ ɔ́, Asa bɛ́ kpatágan kpódó siká kpó e kpo ɖo dɔkun e ɖo Mawu Mavɔmavɔ xwé lɛ́ɛ mɛ lɛ́ɛ, kpódó dɔkun e ɖo axɔ́sú ɔ́ sín hɔnmɛ lɛ́ɛ kpó, bó bɛ́ jó nú mɛsɛntɔ́ tɔn lɛ́ɛ, bó sɛ́ yě dó Damási, ɖo Silíi xɔ́sú Bɛni-Hadadi gɔ́n. Bɛni-Hadadi ɔ́, Tavlimumɔ́ni ví wɛ, bó nyí Hɛziyɔ́ni vívú. Axɔ́sú Asa sɛ́ yě dó gɔ̌n tɔn, nú yě nǐ ɖɔ n'i ɖɔ:

¹⁹ “Wǎ mǐ ní jɛ akɔ, lě e tɔ́ ce kpódó tɔ́ towe kpó jɛ akɔ é ɖɔhun. Kpatágan kpódó siká kpó e un sɛ́ dó we ɔ́ ɖíe. Yi klán akɔ xá axɔ́sú Izlayɛ́li tɔn Baeca, bónú é ní gosín ayǐkúngban ce jí.”

²⁰ Bɛni-Hadadi yí gbe nú xó e axɔ́sú Asa ɖɔ ɔ́, bó sɛ́ ahwangán tɔn lɛ́ɛ dó, bɔ yě yi tɔ́n ahwan Izlayɛ́li sín toxo lɛ́ɛ; yě yǐ Iyɔ́ni, bó yí Dan, bó yí Avɛ́li-Bɛti-Maaka, bó yí ayǐkúngban e gbɔn Jenɛzalɛ́ti gbé ɔ́ jí lɛ́ɛ bǐ, bó yí Nɛfutali yíkúngban e kpo lɛ́ɛ bǐ.

²¹ Ée Baeca se mɔ̌ ɔ́, é ɖó ahohó e mɛ lɛ́ dó Hlama wɛ é ɖe lɛ́ɛ te, bó lɛ́ kɔ bó yi cí Tíisa.

²² Axɔ́sú Asa ylɔ́ Judáa to ɔ́ bǐ, mɛ ɖěbǔ hwe ɖ'é mɛ ǎ. Bɔ yě bɛ̌ awǐnnya, bó bɛ́ atín e Baeca dó ɖo dǒ mɛ lɛ́ dó Hlama wɛ ɔ́, bɔ axɔ́sú Asa bɛ́ dó mɛ ahohó lɛ́ dó Gɛva ɖo Bɛnjamɛ́ɛ, bó lɛ́ mɛ lɛ́ dó Misipa.

²³ È wlǎn Asa sín tan e kpo lɛ́ɛ bǐ, ahwan e é fun lɛ́ɛ, nǔ e é wa lɛ́ɛ bǐ, kpódó toxo e é mɛ ahohó lɛ́ lɛ̌ dó lɛ́ɛ kpó dó “Axɔ́sú Judáa tɔn lɛ́ɛ sín Tan wéma” mɛ. Hwenu e é wá kpo ɔ́, afɔ wá wa nǔ xá ɛ.

²⁴ Asa zán wá kú, bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Jozafáti wá ɖu axɔ́sú ɖó tɛn tɔn mɛ.

Nadabu ɖu axɔ́sú ɖo Izlayɛ́li

²⁵ Axɔ́sú Judáa tɔn Asa ɖo xwe we bló wɛ ɖo axɔ́súzinkpo jí, hwenɛ́nu wɛ Nadabu Jelobowámu ví ɔ́ ɖu axɔ́sú ɖo Izlayɛ́li, bó ɖu axɔ́sú nú xwe we.

²⁶ É wa nǔ e ma nyɔ́ Mawu Mavɔmavɔ nukún mɛ ǎ é. É zán gbɛ nyanya tɔ́ ɔ́ ɖɔhun, bó hu hwɛ e tɔ́ ɔ́ hu bó dɔn Izlayɛ́linu lɛ́ɛ d'é mɛ bɔ yě hu é.

²⁷ Baeca Axiya ví e jɔ ɖo Isakáa sín akɔta mɛ ɔ́ blá axɔ́sú ɔ́ gbé, bó hu i ɖo Gibetɔ́ni, Filisitɛ́ɛn lɛ́ɛ sín toxo mɛ, hwenu e axɔ́sú ɔ́ kpódó Izlayɛ́li to ɔ́ bǐ kpó xá Gibetɔ́ni é.

²⁸ Hwenu e Asa ɖo xwe atɔn bló wɛ ɖo axɔ́súzinkpo Judáa tɔn jí ɔ́ wɛ Baeca hu axɔ́sú Nadabu bo yí zinkpo ɔ́.

²⁹ Ée Baeca yi zinkpo jí lě tlóló ɔ́, é hu mɛ e ɖo Jelobowámu sín xwé gbe lɛ́ɛ bǐ. É jó mɛ ɖěbǔ dó ǎ. É hu mɛ bǐ lě e Mawu Mavɔmavɔ ko ɖɔ gbɔn gbeyíɖɔ tɔn Axiya Silóonu ɔ́ jí é.

³⁰ Nǔ énɛ́ lɛ́ɛ jɛ, ɖó hwɛ e Jelobowámu hu, bó dɔn Izlayɛ́linu lɛ́ɛ d'é mɛ bɔ yě hu bo dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ wú.

³¹ È wlǎn Nadabu sín tan e kpo ɔ́, nǔ e é wa lɛ́ɛ bǐ dó “Axɔ́sú Izlayɛ́li tɔn lɛ́ɛ sín Tan wéma” mɛ.

³² Asa kpódó Baeca axɔ́sú Izlayɛ́li tɔn ɔ́ kpó ɔ́, ahwan fun xá yěɖée wɛ jɛ́n yě nɔ́ ɖe hwebǐnu.

Baeca ɖu axɔ́sú ɖo Izlayɛ́li

³³ Hwenu e Asa, axɔ́sú Judáa tɔn ɔ́ ɖo xwe atɔn bló wɛ ɖo axɔ́súzinkpo jí ɔ́, Baeca, Axiya ví ɔ́ ɖu axɔ́sú ɖo Izlayɛ́li to ɔ́ nu; Tíisa wɛ é nɔ́ nɔ. É ɖu axɔ́sú nú xwe ko-nukún-ɛnɛ.

³⁴ É wa nǔ e ma nyɔ́ Mawu Mavɔmavɔ nukún mɛ ǎ é. É zán gbɛ nyanya Jelobowámu ɖɔhun; é hu hwɛ e Jelobowámu hu, bó dɔn Izlayɛ́linu lɛ́ɛ d'é mɛ bɔ yě hu é.