1 Axɔ́sú 14 - MAWUXÓWÉMA

¹ Hwenɛ́nu ɔ́, Jelobowámu sín vǐ Avíya ɔ́ bɛ́ azɔn.

² Bɔ Jelobowámu ɖɔ nú asi tɔn ɖɔ: “Sɔ́ nǔ, húzú kan bónú è ma sɔ́ tunwun ɖɔ hwi asi ce ɔ́ wɛ ó. A nǎ yi Silóo, fínɛ́ wɛ gbeyíɖɔ Mawu tɔn Axiya ɖe. É wɛ ɖɔ nú mì ɖɔ nyi ná ɖu axɔ́sú nú Izlayɛ́li togun ɔ́.

³ Hɛn wɔ̌xúxú wǒ, bo hɛn acɔnmɔ, bó hɛn wǐin go ɖokpó, bó yi xwé tɔn gbe. A ko yi ɔ́, é ná ɖɔ nǔ e ná jɛ dó vǐ ɔ́ jí ɔ́ nú we.”

⁴ Jelobowámu sín asi bló nǔ e asú tɔn ɖɔ n'i ɔ́. É sɔ́ nǔ bó yi Silóo, lobo yi Axiya xwé. Axiya ka sɔ́ ɖo nukúnnú mɔ wɛ hwenɛ́nu ǎ, ɖó é ko kpo dín.

⁵ Mawu Mavɔmavɔ ká ko ɖɔ nú Axiya ɖɔ: “Jelobowámu sín asi jǎwe; é ná dó éɖée gesí ganjí ǎ, bó ná kan nǔ byɔ́ we dó vǐ tɔn e ɖo azɔn jɛ wɛ ɔ́ wú. Nú é kan nǔ byɔ́ we ɔ́, a nǎ ɖɔ nǔ e Mawu Mavɔmavɔ ɖɔ hwi ní ɖɔ ɔ́ n'i.”

⁶ Hwenu e nyɔ̌nu ɔ́ gosín hɔntogbó ɔ́ kɔn jǎwe bɔ Axiya se afɔ tɔn gbe ɔ́, é ɖɔ: “Byɔ̌ xɔ mɛ Jelobowámu si. Étɛ́wú a ma dó hwiɖée gesí ganjí ǎ? Wɛn nyanya ɖé wɛ Mawu ɖɔ má dó we.

⁷ Yi ɖɔ nú Jelobowámu ɖɔ Mawu Mavɔmavɔ, Mawu Izlayɛ́li tɔn ɖɔ: ‘Un sɔ́ we ɖo togun ɔ́ mɛ, bó sɔ́ we su. Un sɔ́ we gǎn ɖó togun ce Izlayɛ́li ɔ́ nu,

⁸ un yí axɔ́súzinkpo sín xwédo Davídi tɔn sí, bó sɔ́ jó nú we, a ka wa nǔ mɛsɛntɔ́ ce Davídi ɖɔhun ǎ. Éyɛ́ ɔ́, é bló nǔ e un zɔ́n ɛ lɛ́ɛ, bó xwedó mì kpó ayi tɔn bǐ kpó. Nǔ e sɔgbe ɖo nukún ce mɛ lɛ́ɛ kɛ́ɖɛ́ jɛ́n é nɔ́ bló.

⁹ Hwɛ ɔ́, nǔ nyanya e a wa ɔ́ nylá hú mɛ e ko ɖu axɔ́sú jɛ nukɔn nú we lɛ́ɛ bǐ tɔn. A zě gan dó bló vodún kpódó bǒcyɔ lɛ́ɛ kpó nú hwiɖée, bó dó dó xomɛsin nú mì; a jǒ mì dó.

¹⁰ Énɛ́ ɔ́ wú wɛ un ná sɛ́ nyladó dó we, un ná za mɛ towe lɛ́ɛ bǐ zunkɔ́ ɖɔhun: un ná hu mɛ e nyí mɛ towe lɛ́ɛ bǐ, un ná hu yɔkpɔ́vú kpó mɛxó kpó. Un ná za mɛ towe lɛ́ɛ bǐ zunkɔ́ ɖɔhun, bɔ yě sɔ́ ná tɔ́n nyǐ ǎ.

¹¹ Jelobowámu sín xwégbenu e ná kú ɖo toxo ɔ́ mɛ lɛ́ɛ ɔ́, cukú lɛ́ɛ wɛ ná ɖu lan yětɔn. Mɛ tɔn e ka ná kú ɖo gběhan mɛ lɛ́ɛ ɔ́, xɛ lɛ́ɛ wɛ ná ɖu lan yětɔn. Mawu Mavɔmavɔ wɛ ɖɔ mɔ̌.’ ”

¹² Axiya lɛ́ ɖɔ nú nyɔ̌nu ɔ́ ɖɔ: “Hwɛ ɔ́, sí te bo yi xwé. Afɔ towe tɛ toxo ɔ́ mɛ lě tlóló ɔ́, vǐ towe ná kú.

¹³ Izlayɛ́li to ɔ́ bǐ ná nɔ aluwɛ mɛ n'i, bó ná ɖi i. É ɖokpónɔ géé wɛ nyí mɛ e ɖo Jelobowámu xwé bɔ è nǎ ɖi dó yɔdo mɛ é, ɖó é ɖokpónɔ géé sín nǔ wɛ nyɔ́ Mawu Mavɔmavɔ, Mawu Izlayɛ́li tɔn ɔ́ nukún mɛ, ɖo Jelobowámu ví lɛ́ɛ bǐ mɛ.

¹⁴ Mawu Mavɔmavɔ ná sɔ́ axɔ́sú tɔn ɖěvo ɖó Izlayɛ́li to ɔ́ nu, bɔ é ná vɔ xwédo Jelobowámu tɔn ɔ́ bǐ gbe énɛ́ gbe. É wɛ ká ko ɖo jijɛ wɛ din.

¹⁵ Mawu Mavɔmavɔ ná dɔn tó nú Izlayɛ́linu lɛ́ɛ, bɔ yě ná nɔ dán fɛ́n e ɖo tɔ mɛ ɔ́ ɖɔhun. É ná yí to ɖagbe élɔ́ e é ná tɔ́gbó yětɔn lɛ́ɛ ɔ́ sín yě sí, bó ná má yě kpé Eflátitɔ ɔ́ gúdo, ɖó yě blǒ vodún Acela, bɔ xomɛ sin Mawu Mavɔmavɔ.

¹⁶ Mawu Mavɔmavɔ ná ɖe alɔ sín Izlayɛ́linu lɛ́ɛ sín kanmɛ ɖó hwɛ e Jelobowámu hu, bó dɔn yě d'é mɛ bɔ yě lɔ hu ɔ́ wú.”

¹⁷ Jelobowámu sín asi sí te, bó ɖidó Tíisa. Ée é jɛ xwé ɔ́ nukɔn ɔ́ lě tlóló ɔ́, vǐ tɔn kú.

¹⁸ È nǎ ɖi i bɔ Izlayɛ́li to ɔ́ bǐ ná nɔ aluwɛ mɛ n'i lě e Mawu Mavɔmavɔ ko ɖɔ gbɔn, gbɔn gbeyíɖɔ tɔn Axiya jí é.

¹⁹ È wlǎn Jelobowámu sín tan e kpo ɔ́ dó “Axɔ́sú Izlayɛ́li tɔn lɛ́ɛ sín Tan wéma” mɛ. È ɖɔ lě e é fun ahwan gbɔn ɔ́ kpó lě e é ɖu axɔ́sú gbɔn ɔ́ kpó d'é mɛ.

²⁰ Jelobowámu ɖu axɔ́sú nú xwe ko-nukún-we, bɔ zǎn tɔn wá kú. Vǐ tɔn Nadabu wɛ wá ɖu axɔ́sú ɖó tɛn tɔn mɛ.

Hlobowámu ɖu axɔ́sú ɖo Judáa

²¹ Hlobowámu, Salomɔ́ɔ ví ɔ́ ɖu axɔ́sú ɖo Judáa. Xwe kanɖé-nukún-ɖokpó (41) wɛ é ɖó bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú nú xwe afɔtɔn-nukún-we. Jeluzalɛ́mu ɔ́, toxo e Mawu Mavɔmavɔ sɔ́ ɖo akɔta Izlayɛ́li tɔn lɛ́ɛ bǐ mɛ, bɔ nyǐkɔ tɔn ná nɔ jǐ ɔ́ wɛ. Hlobowámu sín nɔ ɔ́, nyǐkɔ tɔn nɔ́ nyí Naama; Amumɔ́ɔ ví wɛ nyí Naama.

²² Judáanu lɛ́ɛ wa nǔ e nylá Mawu Mavɔmavɔ nukún mɛ é. Yě dǒ xomɛsin nú Mawu gbɔn hwɛ e yě hu lɛ́ɛ gblá mɛ. Xomɛ e Mawu Mavɔmavɔ sin dó yě ɔ́ syɛ́n hú xomɛ e é sin dó tɔ́gbó yětɔn lɛ́ɛ é, ɖó hwɛ yětɔn lɛ́ɛ syɛ́n hú tɔ́gbó yětɔn lɛ́ɛ tɔn.

²³ Yě lɔ bló vodún xwé lɛ́ɛ gbɔn só jí só jí, bó tun awǐnnya lɛ́ɛ bó nɔ́ sɛn; yě bló vodún Acela lɛ́ɛ gbɔn só lɛ́ɛ bǐ jí, bó lɛ́ bló gbɔn atín e dó ama lɛ́ɛ sá.

²⁴ Yě mɛ súnnu kpó nyɔ̌nu kpó e nɔ lɛ aga ɖo hunkpá mɛ dó sɛn hun lɛ́ɛ tlɛ ɖo to ɔ́ mɛ. Akɔta e Mawu Mavɔmavɔ nya ɖo Izlayɛ́li ví lɛ́ɛ nukɔn lɛ́ɛ ɔ́, nǔ gblégblé yě nɔ́ wa lɛ́ɛ ɔ́, bǐ wɛ yě lɔmɔ̌ nɔ wa.

²⁵ Hwenu e Hlobowámu ɖo xwe atɔ́ɔ́n bló wɛ ɖo gǎn jí ɔ́, axɔ́sú Ejípu tɔn Cicáki tɔ́n ahwan Jeluzalɛ́mu.

²⁶ É bɛ́ dɔkun e ɖo Mawu Mavɔmavɔ xwé gbe lɛ́ɛ kpódó éé ɖo axɔ́sú ɔ́ sín hɔnmɛ lɛ́ɛ kpó bǐ yi. É lɛ́ bɛ́ gǎglónú e Salomɔ́ɔ zé siká dó bló lɛ́ɛ bǐ.

²⁷ Axɔ́sú Hlobowámu zé ganvɔ dó bló gǎglónú ná ɖó tɛn yětɔn mɛ, bó bɛ́ dó alɔ mɛ nú sɔ́jagán e nɔ cɔ́ hɔnmɛ sín hɔntogbó lɛ́ɛ é.

²⁸ Nú axɔ́sú ɔ́ xwe Mawu Mavɔmavɔ xwé gbe hweɖěbǔnu ɔ́, sɔ́ja lɛ́ɛ nɔ́ bɛ́ gǎglónú lɛ́ɛ, bó nɔ́ xwedó e. É ká lɛ́ kɔ wá yi ɔ́, yě nɔ́ bɛ́ yě wá ɖó xɔ yětɔn mɛ.

²⁹ È wlǎn Hlobowámu sín tan e kpo ɔ́ dó “Axɔ́sú Judáa tɔn lɛ́ɛ sín Tan wéma” mɛ.

³⁰ Hlobowámu kpódó Jelobowámu kpó ɔ́ ahwan fun xá yěɖée wɛ jɛ́n yě nɔ́ ɖe.

³¹ Hlobowámu sín zǎn wá kú, bɔ è sɔ́ ɛ yi ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ. Hlobowámu sín nɔ ɔ́, Amumɔ́ɔ ví wɛ; nyǐkɔ tɔn nɔ́ nyí Naama. Vǐ tɔn Abiya wɛ wá ɖu axɔ́sú ɖó tɛn tɔn mɛ.