1 Axɔ́sú 12 - MAWUXÓWÉMA

Izlayɛ́li ví lɛ́ɛ kplé ɖo Sikɛ́mu

¹ Hlobowámu yi Sikɛ́mu, ɖó akɔta Izlayɛ́li tɔn e ɖo Totaligbé lɛ́ɛ bǐ wá Sikɛ́mu bó ná sɔ́ ɛ axɔ́sú.

² Jelobowámu Nɛvati ví ɔ́, Ejípu fí e é hɔn nú axɔ́sú Salomɔ́ɔ bo yi cí ɔ́ wɛ é kpo ɖe, bó se ɖɔ è sɔ́ Hlobowámu axɔ́sú. Ée é se mɔ̌, é ɖɔ émí kún ɖo tɛn ná sɛ sín Ejípu wɛ ó.

³ Lo ɔ́, yě sɛ́ mɛ dó e ɖɔ é ní wá. Énɛ́ ɔ́, é kpó kplékplé Izlayɛ́li ví e ɖo Totaligbé lɛ́ɛ tɔn bǐ kpó wá Hlobowámu gɔ́n, bó ɖɔ n'i ɖɔ:

⁴ “Agban kpinkpɛn wɛ tɔ́ towe ɖíɖá mǐ. Hwɛ din ɔ́, nú a ɖe kan kpo nú azɔ̌ syɛ́nsyɛ́n e wa wɛ mǐ ɖe ɔ́, bo ɖe agban kpinkpɛn e tɔ́ towe ɖíɖá mǐ ɔ́ kpo nú mǐ ɔ́, mǐ nǎ wa azɔ̌ nú we.”

⁵ Ée yě ɖɔ mɔ̌ ɔ́, Hlobowámu ɖɔ nú yě ɖɔ: “Mi yi bo lɛ́ kɔ wá gɔ̌n ce azǎn atɔn gbe.” Ée é ɖɔ mɔ̌, yě ɖidó.

⁶ Ée togun ɔ́ yi ɔ́, axɔ́sú Hlobowámu yi mɔ tomɛxó e wa azɔ̌ xá tɔ́ tɔn Salomɔ́ɔ hwenu e é ɖo gbɛ ɔ́, bó kanbyɔ́ yě ɖɔ: “Nǔ tɛ́ wɛ mi ná kplɔ́n mì, nú má ɖɔ nú togun énɛ́ ɔ́?”

⁷ Bɔ yě ɖɔ n'i ɖɔ: “Égbé din ɔ́, nú a ɖe xlɛ́ yě ɖɔ émí ɖo gbesisɔ mɛ, bó ná nyí mɛsɛntɔ́ togun ɔ́ tɔn ɔ́, nú a dǒ gbe ɖagbe nú yě ɔ́, yě ná nyí mɛsɛntɔ́ towe káká sɔ́yi.”

⁸ Hlobowámu ka zé nǔ e tomɛxó lɛ́ɛ kplɔ́n ɛ ɔ́ dó wa azɔ̌ ná ǎ, lobo yi mɔ gbɛ̌ tɔn e kpódó é kpó su ɖó hǎ jí bɔ yě nɔ́ sɛn ɛ lɛ́ɛ,

⁹ bó ɖɔ nú yě ɖɔ: “Togun énɛ́ wá ɖɔ nú mì ɖɔ nyɛ ní ɖe agban kpinkpɛn e tɔ́ ce dó nú émí, bó ɖɔ émí ní hɛn dandan ɔ́ kpo nú émí. Nǔ tɛ́ wɛ mi ná kplɔ́n mì, nú má ɖɔ nú yě?”

¹⁰ Ée é ɖɔ mɔ̌ ɔ́, gbɛ̌ tɔn lɛ́ɛ ɖɔ n'i ɖɔ: “Mɛ énɛ́ lɛ́ɛ ɖo vo sa wɛ ɖɔ tɔ́ hwi tɔn ɖíɖá agban kpinkpɛn émí, bó ɖo byɔ̌byɔ́ wɛ ɖɔ hwi ní ɖe agban kpo nú émí. É nyɔ́! Xó e a ɖǒ ná ɖɔ nú yě ɔ́ ɖíe: Đɔ nú yě ɖɔ: ‘Alɔví ce tókɛ́ ɔ́ kló hú tɔ́ ce sín awa.

¹¹ Tɔ́ ce dó agban kpinkpɛn nú mi. Nyɛ ka ná dó agban e kpɛn hú mɔ̌ ɔ́ nú mi. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.’ ”

¹² Azǎn atɔn e axɔ́sú ɔ́ ɖó ɔ́ sɔgbe, bɔ Jelobowámu kpódó togun ɔ́ bǐ kpó wá Hlobowámu gɔ́n lě e é ɖɔ nú yě gbɔn é.

¹³ Ée yě wá é ɔ́, é bló nǔ e tomɛxó lɛ́ɛ kplɔ́n ɛ ɔ́ ǎ; é dó gbe ɖagbe nú yě ǎ.

¹⁴ É bló nǔ e gbɛ̌ tɔn lɛ́ɛ kplɔ́n ɛ é. É ɖɔ nú yě ɖɔ: “Tɔ́ ce dó agban kpinkpɛn nú mi, nyɛ ká ná dó éé hú mɔ̌ ɔ́ nú mi. É zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.”

¹⁵ Hǔn axɔ́sú ɔ́ bló nǔ e ba wɛ togun ɔ́ ɖe ɔ́ ǎ. Mawu Mavɔmavɔ wɛ ka zɔ́n bɔ nǔ nɛ́ lɛ́ɛ nyí gbɔn mɔ̌, bónú xó e é ɖɔ nú Jelobowámu Nɛvati ví ɔ́ gbɔn Axiya Silóonu ɔ́ jí ɔ́ ná dó jɛ.

Axɔ́súɖuto ɔ́ má

¹⁶ Ée akɔta Izlayɛ́li tɔn e ɖo Totaligbé lɛ́ɛ bǐ mɔ ɖɔ axɔ́sú ɔ́ kún bló nǔ e ba wɛ émí ɖe ɔ́ ó ɔ́, yě ɖɔ: “Ani wɛ ɖo mǐ kpódó Davídi kpó tɛ́ntin? Mǐ kpó Jɛsée ví énɛ́ ɔ́ kpó kpé nǔɖé ǎ, Izlayɛ́li ví e mi, mi wá mǐ ní lɛ́ kɔ yi xwé! Din ɔ́, Davídi ví, kpé nukún dó axɔ́súɖuto towe wú!” Ée Izlayɛ́li ví lɛ́ɛ ɖɔ mɔ̌ ɔ́, yě ɖidó.

¹⁷ Judáanu lɛ́ɛ kɛ́ɖɛ́ jɛ́n nɔ́ mɔ Hlobowámu dó mɔ axɔ́sú.

¹⁸ Nǔ ká ɖo mɔ̌ có Hlobowámu sɛ́ Adolámu e kpa acɛ dó mɛɖezɔ́ nu ɔ́ dó Izlayɛ́li ví e ɖo Totaligbé lɛ́ɛ gɔ́n, bɔ yě bǐ nyi hwǎn dó e bó hu i. Énɛ́ ɔ́, Hlobowámu yá wǔ byɔ́ kɛkɛ́ví tɔn mɛ, bó hɔn yi Jeluzalɛ́mu.

¹⁹ Lě e Izlayɛ́li ví e ɖo Totaligbé lɛ́ɛ gbɛ́ ɖɔ xwédo Davídi tɔn kún ná kpa acɛ nú émí ó gbɔn ɔ́ nɛ́, bɔ é kpo ɖo mɔ̌ káká wá jɛ égbé.

²⁰ Izlayɛ́li ví e ɖo Totaligbé lɛ́ɛ bǐ se ɖɔ Jelobowámu lɛ́ kɔ wá. Ée yě se mɔ̌ ɔ́, yě kplé yěɖée, bó sɛ́ wɛn dó Jelobowámu, bɔ é wá, bɔ yě sɔ́ ɛ axɔ́sú ɖó Izlayɛ́li to ɔ́ bǐ nu. Akɔta Judáa tɔn ɔ́ kɛ́ɖɛ́ wɛ nɔ gbejí nú Davídi sín mɛ lɛ́ɛ.

²¹ Ée Hlobowámu Salomɔ́ɔ ví ɔ́ wá Jeluzalɛ́mu ɔ́, é kplé ahwanfuntɔ́ syɛ́nsyɛ́n adɔ̌kpo tɛ́nnɛ (180.000) ɖo akɔta Judáa tɔn kpódó akɔta Bɛnjamɛ́ɛ tɔn kpó mɛ, bónú yě ná yi fun ahwan xá Izlayɛ́li ví e ɖo Totaligbé lɛ́ɛ, bónú Hlobowámu ná ɖu axɔ́sú ɖo yě nu gǎnnugǎnnu.

²² Mawu ká ɖɔ nú ɖɛ̌mɛnu tɔn Cemaya ɖɔ:

²³ “Đɔ xó nú Hlobowámu Salomɔ́ɔ sín vǐ, axɔ́sú Judáa tɔn ɔ́ kpódó akɔta Judáa tɔn ɔ́ bǐ kpó, kpódó Bɛnjamɛ́ɛ tɔn ɔ́ bǐ kpó ɖɔ:

²⁴ ‘Mawu Mavɔmavɔ ɖɔ mi ní má yi fun ahwan xá nɔví mitɔn Izlayɛ́linu lɛ́ɛ ó, ɖɔ ɖokpó ɖokpó mitɔn ní lɛ́ kɔ yi xwé! Đó émí wɛ zɔ́n bɔ nǔ énɛ́ lɛ́ɛ bǐ jɛ.’ ” Ée yě se nǔ e Mawu Mavɔmavɔ ɖɔ ɔ́, yě se tónú n'i bó lɛ́ kɔ yi xwé.

²⁵ Jelobowámu mɛ ahohó lɛ́ lɛ̌ dó Sikɛ́mu toxo ɔ́, ɖo Eflayímu sókan mɛ, bó nɔ fínɛ́. Ée é yá ɔ́, é wá gosín fínɛ́, bó yi mɛ ahohó lɛ́ lɛ̌ dó Pɛnuwɛ́li toxo ɔ́.

Jelobowámu hu hwɛ

²⁶ Jelobowámu ɖo ɖiɖɔ dó ayi mɛ wɛ ɖɔ: “Nǔ e ɖo jijɛ wɛ din ɔ́ ná zɔ́n bɔ mɛ e ɖo axɔ́súɖuto ce mɛ lɛ́ɛ ná lɛ́ kɔ yi axɔ́súɖuto Davídi tɔn mɛ.

²⁷ É nyí mɛ élɔ́ lɛ́ɛ wá yi vɔ̌sánú xwlé Mawu Mavɔmavɔ gbé ɖo xwé tɔn gbe, ɖo Jeluzalɛ́mu ɔ́, ayi yětɔn ná lílɛ́ jɛ gǎn yětɔn xóxó Hlobowámu axɔ́sú Judáa tɔn ɔ́ jí, bɔ yě ná hu mì, bó ná lɛ́ kɔ yi axɔ́súɖuto tɔn mɛ.”

²⁸ Énɛ́ ɔ́, é ba ayixa ɖokpó; é zɔ́n bɔ è zě siká dó bló nyibúví we n'i, bɔ é ɖɔ nú togun ɔ́ ɖɔ: “Fí e mi yi Jeluzalɛ́mu jɛ ɔ́ kpé. Izlayɛ́linu e mi! Mawu mitɔn ɖíe. É wɛ ɖe mi tɔ́n sín Ejípu.”

²⁹ Ée é ɖɔ mɔ̌ ɔ́, é zé nyibúví ɔ́ ɖokpó ɖó Betɛ́li ɖo afɔligbé, bó zé ɖokpó ɖó Dan ɖo taligbé.

³⁰ Nǔ énɛ́ e é wa ɔ́ wɛ dɔn yě dó hwɛ mɛ. Mɛ wɔ̌buwɔ́bú ɖé jɛ nyibúví wegɔ́ ɔ́ gúdo káká yi Dan.

³¹ Jelobowámu bló nɔtɛn Mawu tɔn ɖé lɛ́ɛ ɖó vodún xwé e gbɔn só jí só jí lɛ́ɛ kpá, lobo cyán mɛ ɖo togun ɔ́ mɛ, bó sɔ́ yě dó ɖó sinsɛngán ná. Yě mɛ énɛ́ lɛ́ɛ ɖo Levíi ví lɛ́ɛ mɛ ǎ.

³² É ɖó xwe ɖokpó ayǐ, bɔ è nɔ ɖu ɖo azǎn afɔtɔngɔ́ ɔ́ gbe, ɖo sun tántɔngɔ́ ɔ́ mɛ. Xwe énɛ́ ɔ́ cí xwe e è nɔ ɖu ɖo Judáa ɔ́ ɖɔhun. É ɖésúnɔ nɔ́ sá vɔ̌ ɖo vɔ̌sákpe ɔ́ jí. Nǔ e é wa ɖo Betɛ́li ɔ́ nɛ́. É nɔ́ xwlé vɔ̌sánú nyibúví e é bló lɛ́ɛ. É bɛ́ sinsɛngán e é sɔ́ lɛ́ɛ ɖó Betɛ́li.

Mawu gba nyibúví e ɖo Betɛ́li é

³³ Jelobowámu ɖu xwe ɖokpó nú togun Izlayɛ́li tɔn ɔ́ ɖo Betɛ́li, ɖo azǎn afɔtɔngɔ́ ɔ́ e ɖo sun tántɔngɔ́ ɔ́ mɛ ɔ́ gbe. É ɖésúnɔ wɛ sɔ́ azǎn énɛ́ ɔ́. Xwe énɛ́ ɔ́ hwenu ɔ́, é ɖésú wɛ nɔ́ sá vɔ̌ ɖo vɔ̌sákpe e é bló ɔ́ jí.