1 Axɔ́sú 11 - MAWUXÓWÉMA

Salomɔ́ɔ nɔ gbejí nú Mawu Mavɔmavɔ ǎ

¹ Axɔ́sú Salomɔ́ɔ da nyɔ̌nu toɖévomɛnu gěgé; é nyí axɔ́sú Ejípu tɔn ví ɔ́ kɛ́ɖɛ́ wɛ nyí toɖévomɛnu e é da ɔ́ ǎ. É da Mɔwabunu ɖé lɛ́ɛ, bó da Amumɔ́ɔ ví ɖé lɛ́ɛ, Edɔ́munu ɖé lɛ́ɛ, Sidɔ́ɔnnu ɖé lɛ́ɛ, Hitíti ɖé lɛ́ɛ.

² Mawu Mavɔmavɔ ká kó ɖɔ nú Izlayɛ́li ví lɛ́ɛ dó togun énɛ́ lɛ́ɛ wú ɖɔ: “Mi ma da to énɛ́ lɛ́ɛ mɛ nu lɛ́ɛ ó, yě lɔ ní má da mi ó, é má nyí mɔ̌ ǎ ɔ́, yě ná dɔn mi bɔ mi ná jɛ vodún yětɔn lɛ́ɛ sɛn jí.” Lo ɔ́, Salomɔ́ɔ ɖó wǎn yíyí nú nyɔ̌nu toɖévomɛnu énɛ́ lɛ́ɛ.

³ Nyɔ̌nu nǔwɔntɔn kanwe ko (700) wɛ é da, bó lɛ́ ɖó asi afɔɖé kanwe ko (300) ɖěvo. Nyɔ̌nu lɛ́ɛ lílɛ́ ayixa tɔn.

⁴ Hwenu e Salomɔ́ɔ wá kpo nyɔ̌xó ɔ́, asi tɔn lɛ́ɛ lílɛ́ ayixa tɔn bɔ é jɛ vodún lɛ́ɛ sɛn jí, bɔ ayixa tɔn bǐ sɔ́ ɖo Mawu Mavɔmavɔ, Mawu tɔn wú, tɔ́ tɔn Davídi ɖɔhun ǎ.

⁵ Salomɔ́ɔ nɔ sɛn Sidɔ́ɔnnu lɛ́ɛ sín vodún Asitaatée ɔ́, bó nɔ sɛn Amumɔ́ɔ ví lɛ́ɛ sín vodún Milukɔ́mu, nǔvɛ́mɔ Mawu tɔn ɔ́.

⁶ Salomɔ́ɔ wa nǔ e má nyɔ́ Mawu Mavɔmavɔ nukún mɛ ǎ é, ɖó é nɔ́ se tónú nú Mawu Mavɔmavɔ ɖo ali bǐ nu tɔ́ tɔn Davídi ɖɔhun ǎ.

⁷ É gbá vodúnxɔ ɖokpó ɖó só e kpan nukɔn Jeluzalɛ́mu ɔ́ jí nú Mɔwabunu lɛ́ɛ sín vodún, nǔvɛ́mɔ Mawu tɔn Kemɔci ɔ́ kpódó Amumɔ́ɔ ví lɛ́ɛ sín vodún Mɔlɛ́ki, nǔvɛ́mɔ Mawu tɔn ɔ́ kpó.

⁸ Mɔ̌ wɛ é gbá xɔ nú asi tɔn toɖévomɛnu lɛ́ɛ bǐ sín vodún, bɔ yě nɔ́ xwlé nǔsáwǔ wǎnɖagbenɔ vodún yětɔn lɛ́ɛ, bó nɔ́ zé kanlin dó sá vɔ̌ nú yě.

⁹ Mawu sin xomɛ dó Salomɔ́ɔ, ɖó é ɖe ayixa tɔn sín Mawu Mavɔmavɔ, Mawu Izlayɛ́li tɔn e ɖe éɖée xlɛ́ ɛ azɔn we ɔ́ wú.

¹⁰ Hwe énɛ́ lɛ́ɛ nu wɛ Mawu Mavɔmavɔ dó sɛ́n n'i ɖɔ é ní ma sɛn vodún ó. Salomɔ́ɔ ka nyi sɛ́n e Mawu Mavɔmavɔ dó n'i lɛ́ɛ ǎ.

¹¹ Énɛ́ ɔ́, Mawu Mavɔmavɔ ɖɔ n'i ɖɔ: “Ée a wa nǔ gbɔn mɔ̌, bó má hɛn akɔ e mǐ jɛ ɔ́ ǎ, bó má ká nyi sɛ́n e un dó nú we lɛ́ɛ ǎ ɔ́, un ná yí axɔ́súɖuto ɔ́ sín así towe, bó ná sɔ́ jó nú mɛsɛntɔ́ towe lɛ́ɛ ɖokpó.

¹² Amɔ̌, un ná kpɔ́n dó tɔ́ towe Davídi wú bó ná yí axɔ́súɖuto ɔ́ sín así towe hwenu e a ɖo gbɛ ɔ́ ǎ. Vǐ towe sí wɛ un ná wá yí axɔ́súɖuto ɔ́ ɖe.

¹³ É ká nyí axɔ́súɖuto ɔ́ bǐ wɛ un ná yí ǎ, un ná jó akɔta ɖokpó dó n'i, ɖó mɛsɛntɔ́ ce Davídi kpódó Jeluzalɛ́mu toxo e un sɔ́ ɔ́ kpó wútu.”

Mɛ e ɖo gǎn hwlɛ́n xá Salomɔ́ɔ wɛ lɛ́ɛ

¹⁴ Mawu Mavɔmavɔ sɔ́ dó ayi mɛ nú mɛ ɖokpó, bɔ é ná hwlɛ́n gǎn xá Salomɔ́ɔ. Mɛ ɔ́ nɔ nyí Hadádi; Edɔ́munu wɛ, bó jɔ ɖo axɔ́sú Edɔ́mu tɔn sín kún mɛ.

¹⁵ Hwenu e Davídi ɖo ahwan fun xá Edɔ́mu to ɔ́ wɛ ɔ́, ahwangán Jowabu yi Izlayɛ́li ví e kú ɖo ahwangbénu lɛ́ɛ ɖi gbé, bó hu súnnu Edɔ́munu lɛ́ɛ bǐ.

¹⁶ Jowabu kpó Izlayɛ́li ví lɛ́ɛ bǐ kpó nɔ fínɛ́ xɔ sun ayizɛ́n; yě nɔ fínɛ́ káká bó hu súnnu e ɖo Edɔ́mu tomɛ lɛ́ɛ bǐ.

¹⁷ Amɔ̌, Hadádi hɔn, é kpódó Edɔ́munu ɖé lɛ́ɛ kpó, bó yi Ejípu. Tɔ́ tɔn sín mɛsɛntɔ́ lɛ́ɛ wɛ. Hadádi lɛ́ kpo ɖo dɔ̌nkpɛvú mɛ hwenɛ́nu.

¹⁸ Yě gosín Madiáani, bó yi Paláni. Yě kplá súnnu Paláninu ɖé lɛ́ɛ, bó yi Ejípu ɖo axɔ́sú Ejípu tɔn ɔ́ gɔ́n. Axɔ́sú ɔ́ ná xwé ɖokpó Hadádi, bó nɔ ná ɛ nǔɖuɖu, lobo ná ɛ ayǐkúngban.

¹⁹ Axɔ́sú Ejípu tɔn ɔ́ nyɔ́ xomɛ dó Hadádi wú, káká bó sɔ́ asi tɔn Taxipenɛ́si sín nɔví ɔ́ da n'i.

²⁰ Taxipenɛ́si sín nɔví ɔ́ ji vǐ súnnu ɖokpó nú Hadádi, bó sun nyǐ i ɖɔ Genuváti. Taxipenɛ́si hɛn vǐ ɔ́ ɖó axɔ́sú ɔ́ xwé, bɔ é kpó Ejípu xɔ́sú ɔ́ sín vǐ lɛ́ɛ kpó nɔ kpɔ́.

²¹ Hadádi kpo ɖo Ejípu dɔ̌n, bó se ɖɔ Davídi zán kú, bɔ Jowabu e nyí ahwangán ɔ́ lɔ kú. Ée é se mɔ̌ ɔ́, é ɖɔ nú Ejípu xɔ́sú ɔ́ ɖɔ: “Nǎ gbe mì nú ma yi to ce mɛ.”

²² Ée é ɖɔ mɔ̌ ɔ́, axɔ́sú ɔ́ kanbyɔ́ ɛ ɖɔ: “Ani wɛ hwedó we ɖo gɔ̌n ce, bɔ a jlǒ ná yi to towe mɛ?” Bɔ Hadádi yí gbe n'i ɖɔ: “Nǔ ɖěbǔ hwedó mì ǎ, amɔ̌ gbɔ nú má yi.”

²³ Mawu sɔ́ dó ayi mɛ nú mɛ ɖěvo bɔ é ná hwlɛ́n gǎn xá Salomɔ́ɔ. Eliyada sín vǐ Hlezɔ́ni wɛ. É hɔn sín gǎn tɔn Hadadɛzɛ́ɛ, Sova xɔ́sú ɔ́ gɔ́n.

²⁴ Hwenu e Davídi hu gǎn tɔn Hadadɛzɛ́ɛ sín sɔ́ja lɛ́ɛ ɔ́, Hlezɔ́ni kplé mɛ ɖé lɛ́ɛ bó nyí gǎn ɖo yě nu, bɔ yě yi Damási, bó nɔ fínɛ́, bó ɖu axɔ́sú ɖo fínɛ́.

²⁵ Hwenu e axɔ́sú Salomɔ́ɔ ɖo zinkpo jí ɔ́, Hlezɔ́ni mɔ Izlayɛ́li togun ɔ́ gbɔ ǎ; Hadádi lɔ ɖo nǔ e jló e ɔ́ dó sin xá togun ɔ́ wɛ hwenɛ́nu ɖokpó ɔ́. Hlezɔ́ni gbɛ́ wǎn nú Izlayɛ́li ví lɛ́ɛ hwenu e é ɖo axɔ́sú ɖu wɛ ɖo Silíi é.

Jelobowámu fɔ́n gǔ dó axɔ́sú Salomɔ́ɔ jí

²⁶ Nya ɖé tíin, bó nɔ́ nyí Jelobowámu; akɔta Eflayímu tɔn mɛ wɛ é jɔ ɖe, bó gosín gletoxo Seleda tɔn mɛ. Tɔ́ tɔn nɔ́ nyí Nɛvati. Nɔ tɔn nɔ nyí Selúa; asúkúsi wɛ. Jelobowámu ɔ́, mɛsɛntɔ́ Salomɔ́ɔ tɔn wɛ, bó ká fɔ́n gǔ dó jǐ tɔn.

²⁷ Lě e é fɔ́n gǔ dó jǐ tɔn gbɔn é ɖíe: Hwenu e Salomɔ́ɔ ɖo Milo do ɔ́ sú wɛ, bó ɖo fí e ahohó Davídi tɔn mu ɖe lɛ́ɛ blóɖó wɛ ɔ́, Jelobowámu fɔ́n gǔ dó jǐ tɔn.

²⁸ Jelobowámu dó hlɔ̌nhlɔ́n; súnnu glegbenu ɖokpó wɛ. Ée Salomɔ́ɔ mɔ lě e é ɖo azɔ̌ wa gbɔn wɛ ɔ́, é sɔ́ ɛ, ɖɔ ní cɔ́ mɛ e ɖo mɛɖe ɖo akɔta Eflayímu tɔn kpó Manasée tɔn kpó mɛ lɛ́ɛ bǐ.

²⁹ Jelobowámu tɔ́n sín Jeluzalɛ́mu gbe ɖokpó, bɔ gbeyíɖɔ Mawu tɔn Axiya Silóonu ɔ́ kpé e ɖo alixo. Awu ɖaxó yɔ̌yɔ́ ɖé wɛ Axiya dó. Yě mɛ we lɛ́ɛ géé wɛ ɖo ali ɔ́ jí, ɖo gblǒlǒ mɛ.

³⁰ Axiya dɔn awu yɔ̌yɔ́ e é dó ɔ́, bó hɛn tlɛ́n ɖó wěwe,

³¹ bó ɖɔ nú Jelobowámu ɖɔ: “Bɛ̌ xwɛ wǒ! Đó Mawu Mavɔmavɔ, Mawu Izlayɛ́li tɔn ɖɔ: ‘Đǒtó mì, un ná yí axɔ́súɖuto ɔ́ sín Salomɔ́ɔ sí, bó ná ná we akɔta wǒ.

³² Amɔ̌ un ná jó akɔta ɖokpó dó n'i ɖó mɛsɛntɔ́ ce Davídi kpó Jeluzalɛ́mu toxo e un sɔ́ ɖo akɔta Izlayɛ́li tɔn lɛ́ɛ bǐ mɛ ɔ́ kpó wútu.

³³ Un ná bló mɔ̌, ɖó Salomɔ́ɔ kpó Izlayɛ́li ví lɛ́ɛ kpó jó mì dó, bó nɔ sɛn Sidɔ́ɔnnu lɛ́ɛ sín vodún Asitaatée; yě nɔ́ sɛn Mɔwabunu lɛ́ɛ sín vodún Kemɔci, yě nɔ́ sɛn Amumɔ́ɔ ví lɛ́ɛ sín vodún Milukɔ́mu. Yě ká lɛ́ xwedó ali ce, bó ná nɔ wa nǔ e sɔgbe ɖo nukún ce mɛ ɔ́ ǎ, yě nɔ́ nyi sɛ́n ce lɛ́ɛ ǎ, yě nɔ́ wa nǔ e un zɔ́n lɛ́ɛ ǎ, yě nɔ́ wa nǔ Davídi Salomɔ́ɔ sín tɔ́ ɔ́ ɖɔhun ǎ.

³⁴ Nǔ ɖo mɔ̌ có, Salomɔ́ɔ sí ná yí axɔ́súɖuto ɔ́ bǐ ɖe wɛ un ɖe ǎ: un ná jó e dó bɔ é ná nyí gǎn ɖo gbɛzán tɔn bǐ mɛ, ɖó mɛsɛntɔ́ ce Davídi e un sɔ́, bɔ é bló nǔ e un zɔ́n lɛ́ɛ, bó nyi sɛ́n ce lɛ́ɛ ɔ́ wú.

³⁵ Amɔ̌, vǐ tɔn sí wɛ un ná wá yí axɔ́súɖuto ɔ́ sín, bó ná ná we akɔta wǒ.

³⁶ Un ná jó akɔta ɖokpó dó nú vǐ tɔn, bónú mɛsɛntɔ́ ce Davídi sín vǐ ɖokpó ná ɖo zinkpo jí tɛgbɛ ɖo Jeluzalɛ́mu toxo e un sɔ́, bɔ nyǐkɔ ce ná nɔ jí ɔ́ mɛ.

³⁷ Jelobowámu, hwɛ ɔ́, un ná sɔ́ we bɔ a nǎ ɖu axɔ́sú lě e é jló we gbɔn é. A nǎ ɖu axɔ́sú ɖo Izlayɛ́li sín akɔta wǒ nu.

³⁸ Nú a xwedó nǔ e un ná ɖɔ nú we lɛ́ɛ bǐ ɔ́, nú a gbɔn ali ce lɛ́ɛ ɔ́, nú a nyi sɛ́n ce lɛ́ɛ, bó wa nǔ e un zɔ́n lɛ́ɛ ɔ́, nú a wa nǔ jlɔ́jlɔ́ ɖo nukɔn ce, lě e mɛsɛntɔ́ ce Davídi bló gbɔn ɔ́, un ná nɔ kpɔ́ xá we, un ná zé axɔ́súzinkpo ɔ́ ɖó xwédo towe mɛ, lě e un bló nú Davídi gbɔn é. Un ná ná Izlayɛ́li to ɔ́ we.

³⁹ Un ná bló mɔ̌, bó ná dó dó winnyá Davídi ví lɛ́ɛ. Un ka ná dó winnyá yě káká sɔ́yi ǎ.’ ”

⁴⁰ Ée Salomɔ́ɔ se mɔ̌ ɔ́, é jló ná hu Jelobowámu, bɔ Jelobowámu hɔn yi Ejípu ɖo Cicáki axɔ́sú Ejípu tɔn ɔ́ gɔ́n. É nɔ Ejípu káká bɔ Salomɔ́ɔ zán wá kú.

⁴¹ Nǔ e kpo bɔ Salomɔ́ɔ wa lɛ́ɛ, azɔ̌ e é wa lɛ́ɛ bǐ, kpódó nǔnywɛ́ tɔn kpó ɔ́, è wlǎn dó azɔ̌ e Salomɔ́ɔ wa lɛ́ɛ sín wěma mɛ.

⁴² Salomɔ́ɔ ɖu axɔ́sú ɖo Jeluzalɛ́mu ɖo Izlayɛ́li to ɔ́ bǐ nu nú xwe kanɖé (40).

⁴³ Énɛ́ ɔ́ gúdo ɔ́, Salomɔ́ɔ zán wá kú, bɔ è sɔ́ ɛ ɖó tɔ́ tɔn Davídi Toxo mɛ. Vǐ tɔn Hlobowámu wɛ ɖu axɔ́sú ɖó tɛn tɔn mɛ.