1 Kɔlɛ́ntinu 9 - MAWUXÓWÉMA

Acɛ e mɛsɛ́dó ɖó lɛ́ɛ, kpódó nǔ e mɛsɛ́dó ɖó ná wa lɛ́ɛ kpó

¹ Nyɛ ɖésúnɔ sí wɛ un ɖe ǎ cé? Mɛsɛ́dó wɛ un nyí ǎ cé? Un mɔ Aklúnɔ mǐtɔn Jezu ǎ cé? Azɔ̌ e un wa ɖo bǔ e un ɖe xá Aklúnɔ mɛ ɔ́ sín xlɛ́ wɛ mi nyí ǎ cé?

² Ényí ɖɔ mɛɖěvo tlɛ gbɛ́ ɖɔ un kún nyí mɛsɛ́dó ó ɔ́, midɛɛ lɛ́ɛ ɔ́, mi ɖó ná tunwun dandan ɖɔ mɛsɛ́dó wɛ un nyí. Nǔgbó ɔ́, mi ɖésúnɔ ɔ́, ɖó bǔ e mi ɖe xá Aklúnɔ ɔ́ wútu ɔ́, mi nyí xlɛ́ ɖɔ un nyí mɛsɛ́dó.

³ Mɛ e nɔ ɖo biba ná mɔ do nú mì wɛ lɛ́ɛ ɔ́, xó e un nɔ dó hwlɛ́n nyɛɖée gán ɖo yě sí ɔ́ ɖíe:

⁴ un ɖó acɛ bó ná yí nǔɖuɖu kpódó ahan kpó, ɖó azɔ̌ e wa wɛ un ɖe ɔ́ wú ǎ cé?

⁵ Un ɖó acɛ bó ná da nɔví ɖo Klísu mɛ ɖokpó, bó ná kplá hɛn lě e Sefási kpó mɛsɛ́dó ɖě lɛ́ɛ kpó, kpódó Aklúnɔ sín nɔví lɛ́ɛ kpó bló gbɔn ɔ́ a cé ?

⁶ Abǐ nyɛ kpódó Baanabási kpó kɛ́ɖɛ́ jɛ́n ɖó ná wa azɔ̌, cóbó sixú mɔ nǔ e hu dó mǐ lɛ́ɛ a?

⁷ Abǐ mi se kpɔ́n gbeɖé ɖɔ ahwan-yitɔ́ ɖé nɔ zé é ɖésúnɔ sín akwɛ́ dó wa ahwanzɔ́ ná wɛ a? Abǐ mi se kpɔ́n gbeɖé ɖɔ mɛ e dó vǐwuntín ɔ́ kún nɔ ɖu sínsɛ́n tɔn ó wɛ a? Abǐ kanlinnyitɔ́ ɖé kún nɔ nu kanlin e nyi wɛ é ɖe lɛ́ɛ sín anɔ̌sin ó wɛ a?

⁸ Mi ma vɛdó ɖɔ gbɛtɔ́ sín linlin kpowun wɛ un dó ɖo xó ɖɔ ná wɛ sín ó, ɖó Mɔyízisɛ́n ɔ́ lɔmɔ̌ ɖɔ nǔ ɖokpó ɔ́.

⁹ Nǔgbó ɔ́, è wlán dó sɛ́n énɛ́ mɛ ɖɔ: “Mi ma dó aja nu nú nyibú e ɖo nǔkún só ɖó afɔ wú wɛ é ó.” Mawu nɔ jɛ tagba dó nyibú lɛ́ɛ tamɛ wɛ a?

¹⁰ Nú è nǎ ɖɔ nǔgbó ɔ́, mǐdɛɛ lɛ́ɛ wú wɛ Mawu ɖɔ xó gbɔn mɔ̌ ǎ cé? Mǐdɛɛ lɛ́ɛ wú wɛ è wlǎn xó énɛ́ dandan. Mɛ e ɖo gle lɛ wɛ ɔ́ kpó mɛ e ɖo jinukún cɔ wɛ ɔ́ kpó ɖó ná wa azɔ̌ yětɔn, ɖo nukúnɖíɖó mɛ ɖɔ émí ná yí jinukún e ná nyí émítɔn ɔ́ ɖ'é mɛ.

¹¹ Jinukún Yɛsinsɛn tɔn wɛ mǐ dó nyi ayi mitɔn mɛ: ényí jinukún ɔ́ ɖě wɛ mǐ ya ɖ'é mɛ ɖo dɔkun mitɔn lɛ́ɛ mɛ ɔ́, nǔ wɛ mǐ wa zɛ jlɛ̌ wú a?

¹² Ényí mɛɖěvo lɛ́ɛ ɖó acɛ énɛ́ ɖo mi jí ɔ́, mǐdɛɛ lɛ́ɛ ɖó acɛ énɛ́ ɖo mi jí hú yědɛɛ lɛ́ɛ ǎ cé? É ɖo mɔ̌ có, mǐ zé acɛ énɛ́ ɔ́ dó wa azɔ̌ ná ǎ; é nyɔ́ wa ɔ́, mǐ dɛ ɖo nǔ bǐ nu, bó ma glɔ́n ali nú Wɛn Ɖagbe e ɖɔ xó dó Klísu wú ɔ́ sín nukɔn yiyi ó.

¹³ Dandan mɛ ɔ́, mi tunwun ɖɔ mɛ e nɔ wa azɔ̌ ɖo sinsɛnxɔ mɛ lɛ́ɛ ɔ́, sinsɛnxɔ mɛ sín nǔɖuɖu wɛ yě nɔ́ ɖu; bɔ mɛ e nɔ xwlé vɔ̌sánú Mawu ɖo vɔ̌sákpe jí lɛ́ɛ nɔ mɔ yětɔn yí ɖo vɔ̌sánú énɛ́ lɛ́ɛ mɛ.

¹⁴ Mɔ̌ ɖokpó ɔ́, Aklúnɔ ná gbe ɖɔ mɛ e ɖo Wɛn Ɖagbe ɔ́ jlá wɛ lɛ́ɛ ɔ́, azɔ̌ énɛ́ ní ná nǔɖuɖu yě.

¹⁵ Lo ɔ́, un zé acɛ énɛ́ lɛ́ɛ ɖokpó dó wa azɔ̌ ná ǎ; é ka nyí ɖɔ biba wɛ un ɖe wú wɛ un ɖo xó élɔ́ wlán wɛ ǎ. Ényí un kú ɔ́, é nyɔ́ nú mì hú è nǎ yí nǔ énɛ́ e zɔ́n bɔ un nɔ jlá ajɔ̌ nú nyɛɖée ɔ́ sín así ce.

¹⁶ Un ná jlá ajɔ̌ nú nyɛɖée ɖó Wɛn Ɖagbe e jlá wɛ un ɖe ɔ́ wú ǎ; nǔgbó ɔ́, azɔ̌ ɖé wɛ é nyí bɔ è zɔ̌n mì ɖɔ ma wa dandan; ényí un ma jlá Wɛn Ɖagbe ɔ́ ǎ hǔn, heelú mì.

¹⁷ Ényí nyɛ ɖésú wɛ zé azɔ̌ énɛ́ ɔ́, bó ɖo wiwa wɛ ɔ́, un sixú ɖó nukún ɖɔ un ná mɔ le tɔn. Lo ɔ́, ɖěe é nyí ɖɔ azɔ̌ wɛ é nyí, bɔ è ɖɔ un ɖó ná wa ɔ́, azɔ̌ e è zɔ́n mì ɔ́ wa wɛ un ɖe kpowun.

¹⁸ Le tɛ́ wɛ ka ɖ'é mɛ nú mì lo? Nú un jlá Wɛn Ɖagbe ɔ́ mɛ lɛ́ɛ vɔ̌nu, bó ma ka zán Wɛn Ɖagbejlátɔ́ sín acɛ e un ɖó lɛ́ɛ ǎ ɔ́, vǐví e un nɔ mɔ ɖ'é mɛ ɔ́ wɛ nyí le ce.

¹⁹ Nyɛɖée sí wɛ un ɖe; un nyí mɛ ɖěbǔ sín kannumɔ ǎ; é ka ɖo mɔ̌ có, un sɔ́ nyɛɖée dó ɖó kannumɔ nú mɛ bǐ, bó ná dó dɔn mɛ gěgé wá Aklúnɔ li jí lě e un kpé wú gbɔn é.

²⁰ Hwenu e un ɖo azɔ̌ wa wɛ ɖo Jwifu lɛ́ɛ tɛ́ntin ɔ́, un nɔ zán gbɛ Jwifu ɖɔhun, bó ná dó sixú dɔn yě; un ɖo Mɔyízisɛ́n ɔ́ glɔ́ ǎ, có hwenu e un ɖo azɔ̌ wa wɛ ɖo mɛ e ɖo sɛ́n tɔn glɔ́ lɛ́ɛ tɛ́ntin ɔ́, un nɔ zán gbɛ sɛ́n tɔn glɔ́ wɛ un ɖe ɖɔhun, bó ná dó sixú dɔn yě.

²¹ Mɔ̌ ɖokpó ɔ́, hwenu e un ɖo mɛ e ma tunwun Mɔyízisɛ́n ɔ́ ǎ lɛ́ɛ tɛ́ntin ɔ́, un nɔ zé Mɔyízisɛ́n ɔ́ dó wa azɔ̌ ná ǎ; un nɔ zán gbɛ yě ɖɔhun, bó ná dó sixú dɔn yě; énɛ́ ɔ́ wɛ nyí ɖɔ un nɔ vɛ́ tóli nú Mawusɛ́n ɔ́ ǎ; ɖó klisusɛ́n ɔ́ glɔ́ wɛ un ɖe.

²² Đo mɛ e ma ɖó gǎn ɖo nǔɖiɖi mɛ ǎ lɛ́ɛ tɛ́ntin ɔ́, un nɔ zán gbɛ mɛ e ma ɖó gǎn ɖo nǔɖiɖi mɛ ǎ ɖɔhun, bó na dó sixú dɔn yě. Énɛ́ ɔ́, un sɔ́ nyɛɖée dó bló nǔ bǐ nú mɛ bǐ, bó ná dó sixú hwlɛ́n mɛɖé lɛ́ɛ gán gbɔn alɔkpa lɛ́ɛ bǐ mɛ.

²³ Wɛn Ɖagbe ɔ́ wú wɛ un ɖo nǔ énɛ́ lɛ́ɛ bǐ wa wɛ, bó ná sixú ɖó mǐmá ɖo ɖagbe e ɖo Wɛn Ɖagbe ɔ́ mɛ é mɛ.

²⁴ Dandan mɛ ɔ́, mi tunwun ɖɔ mɛ e ɖo agbahwlɛ́nhwlɛ́n wezun kán wɛ lɛ́ɛ ɔ́, yě bǐ wɛ ɖo wezun jí; lo ɔ́, mɛ ɖokpó géé jɛ́n nɔ ɖu ɖ'é jí. Hǔn mi bo kán wezun lě e mi ná kán gbɔn bó ná ɖu ɖ'é jí é.

²⁵ Agbazamɛgándótɔ́ lɛ́ɛ bǐ ɔ́, nú yě ɖo agbazamɛgándídó ɔ́ kplɔ́n wɛ ɔ́, yě nɔ dó sɛ́n syɛ́nsyɛ́n ɖé lɛ́ɛ nú yěɖée; yě nɔ bló mɔ̌ bó ná dó mɔ ɖuɖéjígbákún e ma nɔ dɔ́ ji ǎ ɔ́ ɖokpó yí; amɔ̌ mǐdɛɛ lɛ́ɛ ɔ́, mǐ nɔ́ bló mɔ̌, bó ná mɔ ɖuɖéjígbákún e ná nɔ ayǐ káká sɔ́yi ɔ́ ɖokpó yí.

²⁶ Énɛ́ ɔ́ wú wɛ hwenu e un ɖo wezun kán wɛ ɔ́, nukún ce ɖo fí e un xwe ɔ́ wú; énɛ́ ɔ́ wútu wɛ un cí akpotokwínnyitɔ́ e ma ɖo akpotokwín nyi dó jɔhɔn mɛ wɛ ǎ é ɖɔhun.

²⁷ Un nɔ dó ya nú agbaza ce ɖésú, lobo nɔ hɛn ɛ syɛ́nsyɛ́n, bónú hwenu e un ná ɖɔ Mawuxó ɔ́ nú mɛɖěvo lɛ́ɛ gúdo ɔ́, Mawu ma wá gbɛ́ mì ó.